البطل المغمور "زهور القمر"

الجزء السابع2

#البطل_المغمور2  "زهور القمر"
#جمان_فريد
#الجزء_السابع "موعوده بيك2"
العمل الصالح هو الرفيق الوحيد في القبر..
واحب الاعمال إلى الله الصلاة في وقتها
صلوا قبل...
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐💐
ضرار وهو عاقد حواجبه ومبتسم تهكما:جهاد *****
شبحله وقال:وصلت..
ضرار بضحكه؛نسيبنا..
عقد جهاد حواجبه وقال؛كيف!؟
ابتسم وقال:معاك ضرار ولد عم مريم..قبل نبي نسلم عليك سلام خير من هكي..بس يعني..ضحك وقال..انت مشغول..
جهاد قعد يمسح ايديه في القامجو...بعدين مدها..
ضرار شبح ليده ابتسم تهكما وصافحه وقال:مبروك عليك بنت العم...
جهاد شد ع يده بقوة..
ضرار؛اهم شي تكون متأكد يعني لو قلبها خالي ولايعني..ماكانتش يعني...وضحك..
ابتسم جهاد وهو يهز في راسه..
وفجأه جبده بقوة ودفه داخل..
ضرار اندفع لداخل وكان حيطيح خلاص بس شد روحه ووقف ع حيله..
شبح لجهاد وعيونه توسعوا ع الآخر..وهو يشوف فيه كيف ينزل في السيرناتي متاع الورشه...
ضرار بخوف؛هييه انت شن دير..
جهاد قعد يشبحله ببرود ويقدم..
وهو يشبحله ويرعش من الخوف ويقول:شن في!؟
خدي جهاد مفتاح انجليزي..
وقعد يلعب بيه بين ايديه وهو يشبح لضرار بنفس نظرة البرود..
لين وصل فيه..
ضرار فنص عيونه بخوف وقال:شن بدير!!؟..
ابتسم تهكما..وجبده من رقبة التيشرت متاعه وحطه ع الحيط وحط المفتاح ع رقبته وقال وهو يشوفله بنظرات غضب..
جهاد:طلعت خنزير اصلي..جاي تشوه في عرضك يامسخ بعد هتكته ياحلوف يامصطاردي..
وضرار بيموت من الخوف...
لوح جهاد المفتاح وجبده من رقبة تيشرته بإيديه الزوز..
ضربه براسه ع وجهه..وضرار صرخ من الألم..
وجهاد طاح في ضرب ع وجهه مرة يمين مرة يسار..
مرة كفوف..مرة بوكسات..
وهو يتوجع ويصرخ من الألم....
وشويه وقال ضرار:خلاص خلاص...وراس امك خلاص...
حطه جهاد ع الحيط وحط ذراعه ع رقبته وشد عليها وقال:مريم توا ولت تخصني ياولد ستين كلب ورب الكون ياحلوف ورب الكون مازال تجيب سيرتها ولاتكلمها ولاتفوت من حداها ندفنك حي...شكالك انت حلال قتلهم...
ودفه بقوة جي محدوف ع السريناتي..
جهاد مسح عرق جبينه ومشي للسيرناتي قامه ودفه لوحه برا حدا سيارته..
هو ناض بالسيف فتح باب السياره بصعوبه..وسكره..
وقعد ياخد في انفاسه بالسيف وهو يشغل في السيارة ووجهه بدي ينتفخ هدا غير الدم اللي قاعد يسيل منه...
تحرك بالسيارة هارب...
جهاد غمض عيونه بشده وقال:اعوذ بالله منك ياشيطان..
وفتحهم وولى خش داخل..
🍁🍁🍁🍁
واقفه فم باب الدار وهي تسمع في بوها يتكلم..
مجيد؛تطلع تقول شن في..حتى الراجل نتصل بيه مايبيش يرد..
سدينه بخوف؛هي راقده توا..
مقبوله:معليشي ياسدينه نوضيها بوها من حقه يعرف شن صار معاها خصوصا انها في الليل حرجانه الوضع غريب..
رتاج من ورا الباب:شن دخل فية امك انتي..
وفتحت الباب وطلعت ودانيه من الخوف طلعت وراها..
رتاج خشت عليهم الصاله وقالت؛شي بيني وبين راجلي مانبي حد يدخل فيه نتعاركو نتراضو مافي حد ليه دخل..
مقبوله رفعت حاجبها..
مجيد؛من اللي مالاش دخل اني!؟
رتاج؛لاانت ولاغيرك الموضوع يخصنا حني بس..ولو انت ماتبنيش في حوشك نمشي نقعد في حوشك..
مقبوله:كيف تقعدي في حوشك مش لزك هو..
رتاج:ياريت تسكت مرتك خير مانبدا فيها..
مقبوله:شن الأسلوب هدا الله المستعان!
مجيد؛ماتخلنيش نمد يدي عليك..
رتاج؛مدها يدك وشوفه شن يدير..
سدينه ودانيه مصدومات في اسلوب رتاج وجرأتها..
مقبوله؛في بنت متربيه تكلم بوها بالأسلوب هدا..ولاتقل لهما اف ولاتنهرهما..
رتاج وهي تأشر عليها بسبابتها وتقول بإزدراء:مش حنتعلم الدين منك انتي..
مجيد قدملها بيضربها؛لا انتي تبيني نربيك مرة تانيه..
عيطت دانيه وسدينه تقول بهلع؛لا يامجيد لا..
جبدها من شعرها وجي بيضربها بس وقف لما سمعها تقول بعياط:حامل حامل اني حامل..
امها واختها انصدموا..
ومقبوله رفعت حاجبها اليسار وهي تشوفلها..
وبوها طلق شعرها وقال:اني ماشيله نفهم منه وياويلك تطلعي غالطه فيه..
التفت لمقبوله وقال:هيا قدامي...
مقبوله حركت راسها يمين ويسار وقالت؛الله المستعان..
وحطت خمارها ع وجهه ومشت وهو مشي وراها..
رتاج بهمس؛سحيقه ونار طليقه..
دانيه؛حقه حامل!؟
شبحتلهم بعدين قالت:ايه..
سدينه غمضت عيونها بأسف..
ودانيه تشبح لرتاج بشك ...
••••••••
"وعلاش الكذب"
رتاج:شن تبيني نخليه يقتلي..
دانيه:علاش تكذبي علينا حني..
رتاج بإنزعاج؛اهي كذبه وطلعت وخلاص..
دانيه؛تو امي تقول لمجاهد..
رتاج؛خل تقوله..المهم اني حكيت اللي صار لمجاهد كله..
دانيه؛في فراسك موال..
رتاج؛ايه تريحتي...نبي عادل لما يعرف ان بنته الشيطانه ورا الموضوع يموت من الندم ومانوليله لين نشعفه وين يعرف اني حامل يهبل هبال..
دانيه:موليه تخوفي..
رتاج وهي رافعه حاجبها قالت؛الدنيا هادي بش تقدري تعيشي فيها لازم تكوني هكي يادانيه..
🍁🍁🍁🍁🍁
الساعه 12:30قبل الظهر..
مقعمزة في المدرج وحاطه الشيت قدامها وتقرا..
وتسمع وراها في بنات يحكوا عن
قضية جلال وزياد..وحاطين اللوم في كلامهم ع البنت اللي صارت بسببها المشكله كيف لتوا ساكته وماطلعتش برأت زياد..
مريم في نفسها قالت"اللي ايديه في المية مش زي اللي ايديه في النار"
قامت عيونها عن الشيت واذكرت لقائها بضرار أخر مرة وكلامه ليها..وخافت لو يدور جهاد ويمشيله..
شن ممكن يقوله.. وشن حيصير بيناتهم!؟
فجأه..
شبحت يسارها وهي مخلوعه..شافت شكولاته نوع "ميلكا"...
بعدين سمعت"تحبيها ولا؟"
قامت عيونها شافاته ضحكت وخدتها وقالت:ايه..
هو ابتسم ومشي نزل من الصف اللي كان فيه للصف اللي هي فيه..
وقعمز جنبها بس خلا بيناتهم كرسي..
جهاد بإبتسامه؛شفتك اكثر من مرة تاكلي فيها..
مريم وهي تفتح فيها؛نموت فيك..
وقسمتله منها ومدتها..
جهاد:لا اني والشكلاطه مش صحاب..
مريم بدهشة؛حي مايحبش الشكلاطه!؟
جهاد بضحكه:اني..
مريم:والله ماتعرف تاكل..
ضحك..
طلعت مريم من شنطتها باكو صغير كان حليب "السعوديه"
جهاد عقد حواجبه بضحكه قال:تو هادي اني مافهمتهاش تعدي في الشكلاطه مع الحليب!؟
مريم؛خير ميه مرة من القهوة والنسكافيه..
قعد يضحك..
وهي ابتسمت وبدت تاكل في الشكولاته وتشرب في الحليب..
وهو غير عيونها عنها وقعد يمرر فيهم ع المدرج..
هي شبحتله وابتسمت بعدين قالت:اممم..شن خطر عليك وجيت؟
جهاد شبحلها وقال؛قلت نشوفك كان تبي حاجه..توا انتي خطيبتي ومسؤوله مني..قولي كان تبي تشري كتاب ولاحاجه اني حاضر..
هي ابتسمت بإمتنان وحركت راسها بالنفي بعدين قاالت:تسلم..
هز راسه بإيجاب وغير عيونه عنها..
هي تنهدت وقالت؛جهاد..
شبحلها .
مريم؛نبي نقولك ع حاجه وضروري نقولها مانبي ندرق عليك شي ولانخليك غافل..
هو استغرب..
مريم بضيق؛امس كنت في حوش عمي..فاتحة....وكانت مش قادره تقول اسمه..
جهاد؛ضرار..
هي تفاجئت..
جهاد وهو عاقد حواجبه؛كلمك ولاجي جيهتك..
مريم بضيق:حاول يضايقني بالكلام بس وقفته عند حده ولمح انه حيدورك..
جهاد؛امه دعت عليه وجي اليوم وكلي اللي فيه النصيب..
مريم بصدمه:شن قالك الواطي..
جهاد؛هاك قلتيها واطي لكن خدي اللي يستاهلها لوجهك مرة تانيه مايقدرش يشبح..ولو قال عليك شي لحد نجبدله لسانه من مكانه..
مريم نزلت عيونها ودموعها نزلوا..
جهاد؛ماتبكيش..كلب زي هدا مايستاهلش دموعك..
مريم؛مانبكيش عليه ع روحي وع اللي درته فيها..
جهاد؛خلاص فوتي ومعاشي تبي..وطلع باكو كلينكس من جيبه وعطاهولها..
هي ابتسمت وخداته فتحاته وخدت منه طرف وقعدت تمسح في انفها بعدين ضحكت وقالت؛ريحته دخان..
هو ابتسم..
شبحتله وقالت؛كان تفوته خيرلك كله مرض في مرض..
جهاد؛حتى اني نفكر نسيبه..تو تجيني  وتساعديني..
ابتسمت وهي ترشف..
هو ضحك وقال: هي خلاص بنمشي..ناض وقال..ماتبي شي؟
مريم بإبتسامة؛سلامتك بس..
جهاد؛عندك محاضرة تانيه؟
مريم؛مازال بعد ساعه ونص..
جهاد؛خلاص نمشي ناخدلك فطور ونجي..
مريم:لالا شكرا مش جعانه هلبه الشكلاطه هادي تشبعني..
جهاد:تشبع عينك..مايمشيش معاي الجو هدا شوفي خليقتك كيف رايحه صفرا..
مريم بضحكه؛اني صفرا اصلا ياخليقة انت..
ضحك وقال؛المهم بنجيبلك فطور وبتاكلي..ولازم تتعودي امي لما تجيها تقعد تحشي فيك وبس..
مريم:تهبل امك ماشاء الله مايبانش عليها امك بكل..تبان صغيرونه..
جهاد بإبتسامه؛اي هي صغيرة اصلا..هي توا خل نمشي نجيب الفطور وبعدين نتسقد وراي مشاوير..
ابتسمت وقالت؛في أمان الله..
جهاد:سلام..ومشي من حداها وطلع من المدرج وهي بعيونها معاه..
شويه جتها بنت وقفت عليها وقال:معليشي بنسألك..
مريم؛تفضلي..
:من وين تعرفي جهاد..
مريم رفعت حاجبها وقالت:خطيبي..
البنت بصدمه:خطيبك..
مريم؛ايه وعرسنا بعد اقل من شهر..
البنت هزت راسها وقالت؛-باهي مبروك..
ومشت..
لحقتها مريم بعيونها لقتها مشت لوحده تكلم فيها.
والبنت تبان انصدمت بعدين خدت حاجتها وطلعت وصاحبتها وراها..
مريم قلبت عيونها وولت تاكل في الشكلاطه وتشرب في الحليب...
🍁🍁🍁🍁
كانت في الكوجينه حاطة السماعات في وذانها تسمع في القرآن وتراجع في حفظها وهي طيب في الغدي..
(فأتقوا الله مااستطعتم واسمعوا وأطيعوا وأنفقوا خيرا لأنفسكم ومن يوق شح نفسه فأولئك هم المفلحون)
قطع عليها اتصال جاها...
طلعت التليفون من جيبها وشافت المتصل فتحت الخط وردت..
سارة؛ايوه السلام عليكم..
"وعليكم السلام استاذه سارة كيف الحال"
ضحكت وقالت؛استاذه مرة وحده!
"ع اللي قريته تستاهلي ينقال عليك استاذه ونص بدون مبالغه ياسارة انتي نابغه في الكتابه المقال ممتاز وممتع ومؤثر واسلوبك فيه اسلوب كتاب كبار يكذبنا اللي يعرف ان اللي كتبت مقال زي هدا بنت عمرها 16سنه"
حكت حاجبها وهي محرجه وقالت؛مش عارفه شن نقول..وضحكت..
"ماتقولي شي احتفلي بنجاحك وزيدي اخدمي ع نفسك وطوريها ياسارة بإذن الله حيكون ليك اسم كبير"
سارة بإبتسامه خجوله:إن شاء الله..
"بإذن الله غدوة حينزل مقالك مع العدد الجديد"
سارة بحماس:غدوة؟.
"ايه غدوة ان شاء الله"..
تسارعت دقات قلب سارة مع انفاسها وهي متحمسه تشوف ردود الأفعال عن مقالها الأول واللي كان يتناول موضوع مهم.زواج القاصرات....
 🍁🍁🍁🍁
بعد العصر..
في دار مسكرة عليها هي وخواتها...
وكناينهم مقعمزات في الصاله يتكلموا عليهم..
:جت لمتهم كلهم ودخلتهم الدار وسكرت عليهم..
:اكيد يدووا في موضوع هداكا الصايع..
:زعمه كان زوجوه يحط عقله في راسه؟!
:ماظني هالأشكال هادي يتربوا مابعدها اللي بياخدها..
:وكان يندروا عليه انه يقيم في عيونه حتى فينا حني ..
:تندري اللفعه الكبيرة تحسابيها فايت عليها مالا علاش لبستنا خمارات حتى في الحوش..
تنهدت وقالت:الله ياربي لو كنت نعرف انهم هكي من البدايه ماانكتبوا عليا...
:ااه ومن سمعك..الله لا يربحها جتنا بلسانها المعسول وقال الله وقال الرسول والملايه تخبخب صدقناها وفرحنا وقلنا من ما تتمناش تاخد راجل ملتزم ومن عيله ملتزمه يخافوا ربي..طلعوا هما في جهه والإلتزام في جهه..
:قداش يقهروا فيا ع الفيس لما ينزلوا في مناشير للشيخ فلان والشيخ علان ويقولوا منهجنا السلفيه والسلف هما قدوتنا وهما منهجهم اليهوديه واليهود هما قدوتهم..
؛عوذ بالله منهم كرهوني في الإلتزام والملتزمين..
:لا والله في ملتزمين الله يبارك عليهم..ملتزمين من داخل ومن برا..عكس الشكالات اللي حني طحنا فيهم مايعرفوا من الالتزام كان اللي يعجبهم بس..
؛صدقني..تنهدت وقالت...اسمعي ماعندكش طريقة نهكر بيها ايميل ع الفيس..
:بتهكري ايميل عمران؟
:ايه...24ساعه والتليفون في يده واني معاد عندي فيه ثقه بكل لاشيخ لاسحنتي..
:عندي عندي..تو نعطيهالك...
🍁في الدار...
مقبوله؛وشن تعرفي عنها؟
:نزيدوا نسألوا عليهم...
:المشكله بنت ضرتك واضح عجباته هلبه روح منكم فرحان بيطير..
مقبوله تنهدت وقالت ؛الله المستعان..عفس فيها خوها..لكن يللا مش نصيبه..
:انتي تقوليله ماصارش..
؛لالا تو نقول لعمران يقوله لما يروح في الجامع هو ولا؟
:ايه في الجامع...
🕸وفي الجامع...
كان عمران مقعمز وهو يحك في سنونه بالسواك..وقدامك المصحف..ويدور بعيونه ع الطلاب واحد واحد..
ع خشة رشيد..
رشيد؛السلام عليكم..
فتح عيونه ع وسعهم وحول السواك وقال؛وعليكم السلام يارشيد..اجلس اجلس..
رشيد مشي قعمز حدا واحد من زملائه..
عمران حط السواك في جيب سوريته وقال:بسم الله الرحمن الرحيم..تعالى يا محمود..
ناض واحد من الطلاب وقعمز قدامه..
عمران؛سمع سورة النبأ هي..
الطالب بدي يسمع..
وعمران حرك عيونه ناحية رشيد..
ورشيد من نظرات حس بشعور غير مريح..النظرات هادم مروا عليه قبل..وذكروه بحاجات يبي ينساها..
ابتسمله عمران..
هو يدوب ردها وغير عيونه للولد اللي يسمع وانتابه شعور بالخوف...
🍁🍁🍁🍁
تاني يوم...
كانت مراجعه مادة الفيزياء في المدرسه لطلبة السنه الاولى والثانيه علمي..
ومشوا سارة ودانيه للمدرسه...
ومع جمعه جت جيهان..وكان في راسها شي تبي ديره..
كانت الحصة الأولى لجمعه في فصل سارة..
وجيهان الحصه الاولى في فصل دانيه..
••جيهان:من يعرب الجمله هادي..
رفعوا البنات ايديهم..
جيهان؛نوضي دانيه..
دانيه ناضت وهي مستغربه في جيهان اللي عاملتها معامله مختلفه هاليوم وخلت زميلتها ازهار تنحرق غيرة منها...
وجاوبت دانيه..
جيهان؛ممتاز قعمزي...ياريت الطالبات كلهم زيك استغلوا العطله في القرايه..
ابتسمت دانيه ابتسامه استغراب..
وجيهان تابعت مراجعتها لعند ماتمت الحصه..
بعد ماتمت..
جيهان؛عندكم شي بعد هادي..
ازهار:لا ياأبله..
جيهان:تمام ترا تعالي دانيه نبيك شويه..
ومشت طلعت..
ودانيه بأستغراب شديد ناضت ومشت طلعت وراها..
:شن الحب اللي نزل في دانيه هدا..
هبه؛دانيه شاطره تفرض احترامها فرض..
ازهار:يامحامي دفاع انتي..
هبه؛كان عجبك..
:خلاص بنات فكونا من المشاكل..
وقعدوا ازهار وهبة يشبحوا لبعض بكره..
🍁برا..
طلع جمعه من فصل سارة..
اتفاجئ لما شاف جيهان واقفه تهدرز ع دانيه...
بعد شويه واتكا ع الحيط وقعد يشبحلهم...
••جيهان بإبتسامه:دانيه بنسألك سؤال شخصي..
دانيه وهي متوجسه منها:تفضلي ياابله..
جيهان:انتي مرتبطه؟
دانيه اتفاجئت من السؤال حركت راسها بالنفي وقالت؛لا..
جيهان؛كويس..نبي نفتح معاك موضوع يخص الإرتباط وممكن انتي تكون عندك عليه خلفيه...
دانيه بعدم فهم:عندي عليه خلفيه!!؟
جيهان بضحكه:ايه..اكيد ركزتي من فترة ان في واحد يجي للمدرسه هني راكب موطو ولا..
دانيه انصدمت وقعدت ساكته..
جيهان؛ياستي هدا خوي...
ودانيه زادت انصدمت...
جيهان:عاجبتيه هلبه وهو يعرف عنك كل شي بأدق التفاصيل طبعا من طبيعه خدمته..هو ضابط شرطه..
دانيه قريب سكرها شيط....
جيهان؛المهم فتح معانا اني وامي في الحوش الموضوع الحق فاجئني هلبه هلبه ومانكذبش عليك مافرحتش بيه هلبه بس مادام خوي مصر مانقدر نقول شي..غير اني ندعيله بالتمام ع خير ونساعده..
دانيه مش مستوعبه اللي تسمع فيه قعدت تشبح لجيهان وخلاص..
جيهان بضحكه:خيرك هكي انسطلتي؟!
ضحكت دانيه وهي متفاجئة قالت:الحق فاجئتيني هلبه..
جيهان بإبتسامه؛عندك الحق تتفاجئي..المهم..يوم الخميس ان شاء الله بنجوكم اني وماما..
دانيه:الخميس!
جيهان:ايه..ولامش مناسب اليوم..
دانيه:مش عارفه الحق..
جيهان:تمام نعطيك رقمي لما تحددوا الموعد اتصلي بيا..
وطلعت من شنطتها مفكرة صغيره وبدت تكتب في الرقم..بعدين مزقتها وعطتهالها ..
خدت دانيه الورقه..
جيهان:نراجي منك في اتصال..
دانيه هزت راسها وهي ساكته..
جيهان ابتسمت مجامله وقالت؛سلام...ومشت..
ودانيه خشت للفصل وهي مازال مصدومه ومش مصدقه..
🍁برا..
جت جيهان لجمعه وقالت:ماعندكش حصة توا..
جمعه وهو يشبحلها بحده:لا..
جيهان؛خيرك تشبحلي هكي!
جمعه؛لإني مش فاهمك امس قلتي كلام واليوم درتي عكسه..
ضحكت وقالت:الحق امس فكرت هلبه بعد ماسكرت منك وقلت مادام هو مصر عليها ويبيها لهالدرجه معاندتي ليه حدير مشاكل بيني وبينه واني مانبيش نخسر خوي لأي سبب..
جمعه ابتسم وقال:باهي مبروك عليك خوك..
جيهان:الله يبارك فيك جومعه..وضحكت..شن رايك نمشوا نشربوا نسكافيه..
هو مد يده قدامه بمعنى تفضلي..
هي فاتت هو مشي وراها وملامح الغضب مسيطرة ع وجهه..
🍁🍁🍁🍁
مقعمزة ورا مكتبها تشوف في بعض اوراق الطلبه..
رن تليفونها..سيبت اللي في يدها وخداته لما شافت المتصل ردت طول..
نوال بقلق:ايوه ثريا فاتح صايرله شي!؟
"لاالا مافيه شي اطمني خيرك"
تنفست براحه وقعدت ساكته..
"اني مكلماتك ع شي تاني تعرفي جريده السبق الآلكترونيه"
نوال:ومن يعرفهاش..
"في مقال عندهم نزل مع العدد الجديد نبيك تقريه"
نوال:عن شني..
"اقريه بروحك وتو تعرفي عن شني اسمه "احلام موؤوده"
نوال:حركتي فضولي..باهي سكري خل نشوف..
"تمام..سلام"..
نزلت نوال التليفون وحطاته ع تركينه..
وفتحت اللاب توب وبدت تبحث عن المقال..
لين طلعلها وبدت تقرا فيه....
🍁في نفس الوقت اللي كان يقرا فيه هيثم نفس المقاله بدقه وهو مش قادر يصدق ان اللي كاتبه كلام زي هدا بنت..بنت 16سنه بس!
كان المقال يتكلم عن اجبار القاصرات ع الزواج..
ورغبة القاصرات في الزواج واختصار احلامهم فيه...
وشن صار لهلبه تزوجوا في سن مبكرة جدا وبعد ماوصلوا لمنتصف العشرين ندموا اشد الندم..
وفي منهم بعد ماتعدت منتصف الثلاثين بدت تعيش في المراهقه المتأخره..ابداها من طريقة لبسها وكلامها لعند ماهو اعظم الخيانه الزوجيه عن طريق الانترنت وممكن مباشرة..
واغلب اللي تزوجوا وهما قاصرات ماعرفوش يربوا صغارهم..
والفساد الاخلاقي مستشري بينهم..
والسبب ان الأم نفسها مازال ماتربتش كويس فكيف بتربي صغار..
تكلمت عن المجبرات..اللي عاشوا حياة كلها حرمان ونقص وحسرة ع احلى ايام عمرهم اللي راحت واحلامهم اللي ماتت..
وذكرت قصة رهف بدون ماتذكر اسمها او اي شي يرمز ليها..
وعن الآباء والامهات اللي يجنوا ع بناتهم لما يجبروهم ع الزواج في سن صغير..
وفي مقطع قالت فيه..
"ونجد منهن امهات حاصلات على اعلى الدرجات العلميه تقدم ع تزويج ابنتها القاصر لأنها تؤمن تماما بالمثل القائل..
(البنت زي العصيده كان بردت معاش فيها طعمه)
وانا اقول لها متسائله متأسفه ماذا تركت للجاهلات من النساء يامتعلمه!؟"
وختمت المقال عن اختلاف الأزمان وان كل زمان وشن يمشي معاه ويناسبه ماينفعش المقارنه بين وقتنا حالي وايام زمان...
وفي النهايه كتبت..
"كتبت هذه المقاله القاصر ابنة سته عشر عاما سارة هيثم الكاتب"
هيثم فرك يده بجبهته وهو مبتسم بعدين نزلها وقال:هادي بنتي اني...وضحك ودموعه معبيات عيونه...
🍁اما نوال اللي كانت تقرا في المقال وهي متأثرة ودموعها مابطلوش نزول...
وين وصلت للإسم تفاجئت هلبه..
واتصلت برئاسة تحرير الجريده بش تتأكد اذا كانت سارة بنت هيثم الكاتب نفسه ولا لا...
وهما اكدوله ان هي نفسها وحكولها عن تجاربها في الكتابه..
وهي بعد سكرت منهم قعدت تبحث عن كتاباتها..
 طلعلتها القصة القصيرة اللي فازت بيها في مسابقة ع مستوى الدول العربيه..
"الرجل المغمور"
طول بدت تقرا فيها...
وهي تقرا طول فهمت سارة عن من تكتب....
بعد ماكملتها شافت نتيجة البحث الثانيه..
لوحة "الرجل المغمور"اللي فازت في مسابقه نظمتها وزارة الثقافه..
لما دققت هلبه في ملامح الرسمه...كانت ليه...
ابتسمت تهكما وهي تقول في نفسها..
"طلع من جماعة المثالية المصطنعه"
واذكرت لما قال عن المصحه انهم عيله وهو بوهم..
قعدت تضحك متهكمه وقالت:مكثرهم اللي زيه..زي مايقولوا المصاروة..باب النجار مخلع....
🍁🍁🍁🍁
فهالوقت في المصحه..
في صالة مجتمعين النزلاء ع زياد اللي واقف ع طاولة مرش ويقول:هدا شاهي الحشيشه متاع الشاهي واني امس تحديت خونا هدا..واشر ع واحد من النزلاء..واليوم نوريه شن نقدر ندير..
:هي سقدنا سقد بلافلسفه..
زياد؛اصبر ع رزقك..اصبر..
وفتح باكو الشاهي..وبدي يصب في الحشيشة متاعه ع الطاوله..
وكلهم يشبحولها بما فيهم فاتح وخميس..
زياد وزع الحشيشه بإيديه..
بعدين بدي يرسم عليها..
وهو يشوفوا فيه كيف يشتغل وهو مركز تماما..
فاتح:ترا شن بترسم.
زياد وهو لاهي؛تو تشوف..
:خلاص خلوه يركز...
وزياد منشغل بالرسم وهما يهدرزوا مع بعضهم ومرة مرة يكلموا فيه..
وبعد ربع ساعه بالزبط..كمل...
ع جية بوه...كان قاصد واحد من النزلاء بيناديه..
وقف لما شافهم شن يديروا..
كانوا مجتمعين حوالين الطاوله ويتفرجوا وزياد يشبحلهم بإبتسامه ثقه..
قدم وقال:خيركم خيركم شن في!؟
هما شبحوله ووخروا عن الطاوله..
وزياد كان يشبحله وبس..
هو قرب من الطاوله وشاف اللي عليها تفاجئ...
كان رسمة بالشاهي ليه هو...
عقد حواجبه وقال:شن هدا؟
فاتح؛هدا ابداع يادوك..
شبح هيثم لفاتح بعدين شبح لزياد..
زياد كان مازال يشوف لبوه بنفس النظرة ان اللي يدير فيه في نظره مالاش قيمه برغم ان هيثم الفترة الأخيره بينله عكس هكي...
هيثم؛قصدك انت رسمتها هادي..
زياد؛ايه..
هيثم رجع شاف للرسمه..
بعدين طلع تليفونه وحط ع الكاميرا وبدي يصور فيها..
زياد ابتسم..وزملائه يشبحوله..
هيثم؛بش يشوفوا في الحوش قداش طورت هني..
:عجباتك دكتور..
هيثم:هو اني مش فنان بش نقيم لكن اللي شفته مبهر...شبح لولده وقال..احسنت..
فاتح مازحا:هي صفقوله..وبدي يصفق وقعدوا يصفقوا معاه..وزياد يضحك..
هيثم وهو يضحك رفع يده بش يوقفوا بعدين قال؛علي..جهز نفسك..
شبحله وهز راسه..
هيثم:كلهم 6شهور والمكان اللي حتمشيله مايشبهش الحبس اللي تعرفه..انظمة السجون كلها تغيرت واللي زي حالتك ماعليشي تهم غير الإدمان يقعد في مؤسسة الإصلاح واعاده التأهيل مكمل تماما لشغل المركز ونظامه..
:عندي علم دكتور..
هيثم؛اهو قدام صحابك نقولك الكلام ليك وليهم..ردوا بالكم تفكروا ان مستقبلكم مجهول..بالعكس..تقدر تستأنف دراستك من الحبس وبعد تطلع تكملها..كملوا مشواركم فث الحياه وانتم مسكرين وذانكم عن الناس ماتخلوهمش يحددوا مصير حياتكم...لما تنجحوا وتوصلوا حتلقوهم في نهاية المطاف يصفقولكم غصب عنهم..بس لازم تاخدوا بوصية وحده..مافيش افضل منها وصيه لشباب في سنكم..
احفظ الله...يحفظك...
احفظ الله..تجده تجاهك...
إذا سألت...فأسأل الله..
وإذا استعنت...فأستعن بالله..
وأعلم ان لو الأمة اجتمعت على ان ينفعوك بشيء لم ينفعوك ألا بشي قد كتبه الله لك..
وإن اجتمعوا على ان يضروك بشيء لم يضروك إلا بشيء قد كتبه الله عليك..
رفعت الأقلام وجفت الصحف..
▪▪▪▪
◇التربيه الايمانيه عندي كانت اهم من أي شي تاني..اللي زيهم مفروض تتغدا روحهم من داخل وتقوى بش تقوى اجسادهم وعقولهم ويقدروا يكملوا هالحياة ويواجهوا مصاعبها ويتعدوا مطابتها...القرب من الله سبحانه وتعالى يخلي البني آدم ديما رابح حتى لو كان في عيون الناس خاسر كل شي..
تنهد وقال..
ليت الذي بيني وبينك عامر..وبيني وبين العالمين خراب
▪▪▪▪
🍁🍁🍁🍁
في الحصة الأخيرة لفصل دانيه..
كانت مراجعة الفيزياء...
جمعه نوضت دانيه تحل اغلب المسائل وهي كانت تبان عادي بس تصرفه ونظراته وتروها وخافت حتى من نظرات زميلاتها ليها لأن جمعه ماكانش طبيعي بكل..
ماصدقت تمت الحصه..
وطول خدت شنطتها وطلعت مع هبه تجري لقوا سارة تراجي فيهم ومشوا مع بعض..
وهما نازلين من فوق..
كانوا الابلات متجمعات ع المديرة..
لما شافوا سارة المديرة بدت تصفق والأبلات معاها..
هما وقفوا وقعدوا يشبحولهم ومش فاهمين شي..
وقفت المديرة تصفيق وقالت:والله شي مشرف ان مدرسه اني ندير فيها تكون فيها طالبه زيك ياسارة..
فهمت سارة ان الموضوع يخص المقاله..
مررت نظرها عليهم وابتسمت بإحراج...
الأخصائيه؛كلام تكتبه وحده فاتت الأربعين..
لغة ممتازة..اسلوب طرح ممتاز اسقطات في مكانها..والامثله اللي جبتها واضح انك بحثي عنها كويس..
سارة:مزبوط كلمت طبيبة نفسيه كانت صديقه لماما الله يرحمها وهي عطتني معلومات..
المديرة:خسارة ان حني في نهاية السنه كان هدا درنا حفل تكريم..
سارة؛شكرا ابله عزيزة اللي درتوه توا يكفيني..
؛الله يبارك عليك..
سارة ابتسمت..
•••••••••
دانيه؛ريتي سبحان الله كيف انقلب الحال..
سارة؛الحمد لله رب العالمين..كله نعمه من ربي..
دانيه ابتسمت وقالت؛ايه قبل ماننسى..طلعت من شنطتها كتاب ومدتهوله وقالت:الرافعي حتى هو .
سارة فرحت هلبه خداته وقالت:شكرا شكرا هلبات..
دانيه ضحكت..
هبه:ووك مفضى بالك بجديات اللي تقري فهالكتب ساد كتابات المدرسه..
دانيه:خير من بالك انتي اللي معبي بخطيبك وكلامه الحلو..
هبه:ايه والله مانبي غيره..
ضحكت سارة..
دانيه؛ايه حقه نسيت نحكيلكم ع اللي صار معاي...
وبدت دانيه تحكي ع اللي صار معاها بإختصار..
ضربتها سارة بالكتاب وقالت؛هدا وين تحكي!!؟
دانيه؛تي نسيت بكل..
سارة:خوها نعرفه كويس راجح ضابط شرطه..
دانيه:هو اللي خطب عمتك زمان صح..
سارة:ايه وماصارش نصيب..
دانيه؛نقدر نعرف علاش!؟
سارة:ماتفاهموش هما الزوز..وبصراحه عمتي قلبها كان مع راجلها اللي توا وهو بعد رفضاته فات الموضوع كانت خطوبة تقليديه يعني .
ابتسمت دانيه وقالت؛فهمت عليك..
هبه؛ياكبدي طحتي ع ضابط مرة وحده...
دانيه:قل اعوذ برب الفلق..
سارة بضحكه؛الباص جي..كلميني لما تروحي..
دانيه :تمام..سلام..
سارة؛سلام ومشت تجري للباص وركبت وتحرك طول..
هبه:حتى حني جي قدامي ياعروسة الغفله..
ضحكت دانيه ومشوا مع بعض ركبوا للباص...
وجمعه قعد مع الباص بعيونه اللي يلمعوا بالدموع وقلبه المحروق..
🍁🍁🍁🍁
ودانيه من اول ماروحت حكت لأمها واختها عن كل شي...
سدينه بضحكه؛ضابط مرة وحده!
رقصت دانيه حواجبها وقالت؛بش تعرفي شن جايبه بس..
رتاج بضحكه؛احسن بش بوك يخاف منك..
ضحكت دانيه .
وسدينه ضربت رتاج ع ذراعها وقالت؛تحشمي...
رتاج؛ااه يما حامل راني..
سدينه؛ياحنه عليا...
ودانيه تضحك..
سدينه شبحتلها وقالت؛باهي يعرف عن كل شي مادام اخته ابلتك..
رتاج؛ضروري تغصصيها بفرحتها يام اكيد اخته بتقوله..
سدينه؛سامحيني بنيتي اني بش خايفه عليك من كسرة الخاطر..
دانيه باست خد امها وقالت؛فاهمه عليك حبي..
رتاج بدت تغني وتصفق؛تعالى يايوم الخميس تعالى...
وامها واختها يضحكوا عليها...
🍁ورتاج تغني وتضحك..
وعادل يدور ورا حقيقة كلامها بعد النقاش اللي صار بيناتكم..
🔺️في وقت سابق
شادها من ذراعها بقوة وهي تقوله ببكي:اقسم بالله مانعرفه ولاعمري كلمته لكن اني عارفه من ورا هدا كله همانه بنتك .
هو زاد شد ع يدها لين قرصها وقال:شن تقولي انتي؟!
رتاج ببكي:اني الغالطه اللي سكتت ع تصرفاتها بنتك حاطه راسها براسي ماهنتنيش بكل من لما عرفتها ووصلت بيها دير فيا اللي داراته توا...يومها لما خدت تليفوني ماكانتش تكلم في صاحبتها لأن تسجيل المكالمات عندي سجل مكالمتها اللي مسحتها..
عادل؛وينه..
رتاج؛هات التليفون...
مدهولها وهي خداته وقعدت دور في التسجيل لين لقاته وفتحاته وسمعتهوله..
هو انصدم بقوة..
نزلت التليفون وقالت؛سمعته ومابيتش نقولك عليها لين نشوفها لوين بتوصل واهو شفت بعيوني.
هو طلق ذراع رتاج بعدين قال:باهي اللي شفته اليوم شنو...هداكا بعيوني شفته طالع من الجردينه..
رتاج؛صدفه والله صدفه وماكنتش نعرف انه موجود اساسا خوي هو اللي اتصل بيك وعزمك يعني اني ماكنتش نعرف بمشيتهم بكل يعني لو نعرف علاش روحت كنت قعدت ومشيت معاهم وماخليتكش انت تجيبني لوكنت دايرة موعد..
هو من شدة حبه ليها كان مصدقها وفرحان ببرائتها لكن في تفس الوقت مصدوم في بنته...
وهي قالت:توا توا تروح بيا لحوش ماليا والله مانقعدلك فيه دقيقه ..
عادل قعد يشبحلها شويه بعدين قال؛حاضر اللي تبيه نديره تقعدي غادي تهدي بعدين نروح بيك..
🔺️الوقت الحاضر
مقعمز في دار مع بنته بروحهم..
عادل بغضب:صدمتي فيك صدمه كبيرة طلعتي مش متربيه بكل..
همانه وهي تبكي؛ماتقولش هكي بابا اني انقهرت يابابا الحقيرة هادي خداتك منا معاش وليت معانا زي زمان..حسيتها خدت وقت ومكانه اني احق بيهم..حسيتها خدت الدلع اللي كان ليا كله..انت نسيتنا بعد خديتها يابابا..
عادل؛اللي قلتيه كله مش مبرر لعملتك هادي..انتي هكي خليتيني نتحشم اللي عندي بنت زيك انتي..وفوقها تكلمي في ولاد ياكلبه..وضربها كف..
وهي زادت في البكي..
عادل ؛اسلوبي معاك حنغيره كليا وتو نوريك في الجديد كيف تكون الربايه الصح...
🍁وبعد ماهزبها هي هزب امها لين خلاها تبكي حتى هي..
بعدين طلع من غادي متوجه لطرابلس لحوش اهل مرته...
•••••••••
مجاهد؛مش حتولي الا بإرادتها..
مجيد؛مجاهد ولدي صل ع النبي..
مجاهد؛اللهم صل وسلم عليه...ياسر يابوي جبرتها من الأول عليه..
مجيد؛مجاهد..
مجاهد؛ع اساس مايعرفش انها مجبوره...ياسيد عادل رد بالك تفكر في يوم ان اختي رضت بيك ع خاطر فلوسك اختي بش تكتبلها حوش بإسمها ومزرعه بش تتحمل اهانتك وترضى توليلك ع خاطر..رتاج انجبرت عليك ماكانش في قدامها خيار تاني..
عادل؛واني مايهمني شي من اللي قلته توا غير ان مرتي توليلي..
مجاهد؛وانت قلت تولي بإرادتها..
مجيد؛مش هكي يامجاهد..
مجاهد؛سامحني يابوي هكي ونص..
هز عادل راسه وقال:تمام..نخليها كم يوم زياده لين تهدوا وترضوا كلكم..وناض..السلام عليكم..
ومشي طلع من المربوعه...ومجيد طلع وراه...
🍁🍁🍁🍁
"تفضلي ياعمي ياريته توصله لمريم"
بو مريم وهو يشوف للظرف قال:هدا شنو؟
جهاد:مصروف مريم..
بومريم؛كيف!
معاذ؛في حد قالك ماعندها حد يصرف عليها!؟
جهاد ابتسم ابتسامه يخفي بيها عصبيته وقال؛عارفها في حوش عز..لكن هي توا خطيبتي ومسؤوله مني..
؛ياولدي انت بروحك قلتها خطيبتك مش مرتك..
جهاد؛قريب ان شاء الله تولي مرتي واني نبي نتحمل مسؤوليتها من توا...
بوها قعد يشبحله وهو ساكت..
وخوها اللي ماكانش طايقه قال:ان شاء الله غير نظاف بس..
بوها؛معاذ!
جهاد:لامعليشي ياعمي عنده حق يسأل..الحمد لله حلاليات وربي شاهد برا اسأل عليها الورشة متاعنا وشوف كم ادخل علينا في الشهر من بركة ربي..
معاذ قعد يشبحله بكبر وهو ساكت..
بوها؛حاضر تو نوصللها الفلوس لكن هادي اخر مرة .
ابتسم جهاد وهز راسه مسايرة..
:اشرب العصير ياولدي اشرب...
🌻برا...
ام مريم؛ماشاء الله ماشاء الله ماخلا ماجاب في خشته هادي..وعبالك دولابك ميلكا وحليب السعوديه..
ضحكت مريم وقلبها يدق بقوة..
ع جيه بوها تنحنح..
هما شبحوله..
مدلها ظرف فلوس وقال؛قال مصروفك خوديه..
امها:مصروفها!؟.
:قال خطيبتي واني الملزوم بيها..
مريم خدت منه الظرف قلبها بيطلع من مكانه.
امها؛شكله راجل ماشاء الله عليه ياحاج..
بوها هز راسه ولف ومشي..
امها:قولي الحق ماتكلميش فيه بالتليفون.
مريم وخدودها محمرات من الخجل؛لا والله ياماما هي هالمرة اللي جاني فيها وقتلك عليها..
امها شبحت للظرف وقالت؛ربي يتمم ع خير يارب بديت نتريحله..
مريم سرحت في الفراغ وابتسمت وفي عيونها لمعه حلوة...

#الصلاة_الإبراهيميه
#موعودة_بيك
#البطل_المغمور2

...يتبع...