البطل المغمور "زهور القمر"

الجزء التاسع عشر1

#البطل_المغمور2  "زهور القمر"
#جمان_فريد
#الجزء_التاسع_عشر "آلام الآثام"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐
"هي نوضوا يابنات معاي للكوجينه"
كان هدا صوت كنة خديجه مرت عم مريم وهي تعطي في امر لبنات العيله بش ينوضوا يفرقوا الضيافه ع المعازيم..
ناضوا البنات ومشوا معاها...
وام مريم قالت؛مريم نوضي معاهم..
خديجه:العفو! عروسه وبتنوضيها تعول من قلة البنات..
ام مريم:اني معتبرتها بنتك ياخديجه ووخيه للوليداتك كان ماعولتش في عرس وخيينها امتى تعول..
ابتسمت مريم بالغصب وهي شاده دموعها وقالت:كلام امي صح...
ناضت وقالت لتهاني:نوضي معاي توهه..
خديجه:لاحتى ضيفتك بتنوضيها !!
مريم بإبتسامه:اني نبيها معاي..
ام مريم؛كيف هكي بنتي عيب..
تهاني ناضت وحطت الوشاح ع راسها وقالت :عادي مافيها شي خالتي..
لبست مريم عبايتها ع كتافها وقالت بإبتسامه:هاه ريتوا...هيا توهه..
ومشوا الزوز مع بعض...
خديجه:باين عليها متريحه مرومه..
امها ابتسمت مجامله وهزت راسها وهي ساكته..
🍂اما مريم خشت مع تهاني للكوجينه...
كان قصد مريم من جيبة تهاني معاها الحرص عليها ماتبيش تخليها تبيها معاها في كل وقت لعيون جهاد..
ولما خشوا الكوجينه اللي كانت معبيه ببنات العيله اللي مافيش فيهم وحده ساتره نفسها...
انصدمت تهاني وين شافت معاذ فم الباب الخارجي واقفه مع وحده من البنات يهدرز عليها ويضحكوا..
المنظر اثار اشمئزازها..ماحبيتش بيئة عيلة مريم ولاحياتهم اللي مافيها قيود ولاحدود...
مرت ولد مريم؛مريم شن نوضك يامراة!
معاذ سمع اسم اخته شبح داخل...وبدال ماتجي عيونه ع اخته طاحوا ع تهاني..
بلبسها المستور وحجابها خلاته يسهم فيها...
اعجابه بيها شديد..بنت صغيره في عمرها فوق جمالها اخلاقها واحترامها لنفسها ماشافش زيهم...
بس نظرة الإشمئزاز اللي شافها في عيونها حسساته بشي من الضيق..
مريم بإبتسامه وهي شاده دموعها؛عرس وخيي هدا راهو..
معاذ وهو يسرق في النظر لتهاني:شن جو مريومتي..
مريم بضحكه:شنجوك انت..شن دير هني..
بنت وحده من خوات خديجه:اني لقيته في الجنان يهدرز بالتليفون شديته..
مريم:اها..
تهاني غيرت عيونها عنه وهي مضايقه تبي تطلع..
ومعاذ بجرأة كعادته قال؛جبتي معاك طشونه..
مريم فنصت فيه..
والبنات شبحوا لتهاني اللي كان تشبحله بنظرات باين فيهم عدم التقبل..
معاذ بإبتسامه عريضه؛شن جو تهاني..
تهاني غيرت عيونها عنه وقالت؛مريم شن نرفع..
كلهم تفاجئوا فيها كيف تجاهلاته..
وهو قعد يشبحلها بنظرات تعجب من تجاهلها ليه..
مريم التفتت وقالت بإبتسامه ارتباك؛ارفعي سبات كلينكس حبيبتي..
تهاني دورت عليه ووحده من البنات دلتها..
اللي شاده سفرة الروزاطه قالت:بري قبلي..
تهاني خدت السبات ومشت طلعت والبنات وراها..
مرت خو ضرار قالت بضحكه:البنت شكلها صعبه..
مريم بإبتسامه؛متربيه كويس..
البنت اللي واقفه ع معاذ؛وخيرنا حني مش متربيات!
مريم بلعت ريقها وابتسمت بحسرة:متربيات..متربيات...
مرت خو ضرار:باهي عبي الطواسي هادوا مريم احتياط..
مريم:ان شاء الله...
مشت مرت خو ضرار بسفره وطلعت..
ومريم شبحت لخوها لقاته قاعد يشبح لمكان تهاني وهو سرحان..
:وجعاتك يامعاذ.
شبح لأخته وقال:مريومه..
مريم وهي تصب في الروزاطه:امم..
معاذ:اشبحيلي هني..
شبحتله..
معاذ وهو يحاول يثير تعاطفها بنظراتها رفع يده وقال:رقمها..
مريم ابتسمت بتهكم وقالت؛noooowy...
وخدت السفره وطلعت بيها هربا من الحاحه..
معاذ:تي باهي يامريم باهي..
:جديات عاجباتك شن فيها مايعجب..
شبحلها ع جنب وقال بتهكم:شن يفهمك يامسكينه انتي..ومشي وخلاها وفي داخله باديه تتوقد شرارة نار مشاعر ماحسش بيها قبل في حياته...
🍁وفي الخيمه🍁
جهاد كان ضاربها صحبه مع خوت ضرار ويهدرز معاهم وهما عجبهم جوه..
عكس خوت مريم اللي مش طايقينه..وضرار اللي كان يفور ويغلي من داخل مش متحمل يشوفه بيناتهم وجوه رايق والراحه باينه...
شويه وجاب واحد من الشباب الدربوكه وبدي يدربك والشاب هاجوا معاه وبدوا يغنوا..ودارو جو حلو خلا النساوين يحسدوهم..
وضرار رقص وغنى مع صحابه لين دهش...
واحد منهم قاله:قعمز وهني روحك سادك..
وكأنه كلام صاحبه فرصته وجاتك بش يرمي كلامه الخبيث ع جهاد رد عليه وقال كلام في تلميح وقح يخص يوم الزواج...
وجهاد فهم التلقيح كويس بس تجاهله ظاهريا ومن داخله لو يقدر ينوض يدفنه في مكانه...
🍁🍁🍁🍁
وفي حوش اهل مقبوله..
جت عروس خوها...وكانت بنيه ع قدر من الجمال واستقبلوها خوات مقبوله بشتاوات..
وكلها عليهم وع خوهم  اللي طلعوه ولاصلاح الدين الأيوبي في زمانه...
•••••••
سدينه وهي منحرجه:حشمتيني يابنت..
مجاهد بإستغراب؛خيرها شن دارت!؟
دانيه بضحكه:والله ماقدرتش نشد روحي فوتلهم اكثر من اغنيه بس هادي ماقدرتش الحرق..
مجاهد؛اغاني شني!؟
دانيه؛لما جت العروسه قعدوا يغنوا عليها بس يعني هو الغني مش عليها عليهم سلاسه الفاتحين وخلفاء المسلمين وحني وخونا وبونا...والعروسه ومتاعينها ياناري متخزرطين...ضحكت بعدين قالت:المهم وين وصلوا في مقطع شورك ع الصلاية ديما حصلتي سمح التبسيمه وتبسيمته عاد اني شايفتها مش قولة قال..شكلها ماتعرفش القبله وين تفتح..
مجاهد وهو يضحك؛تحشمي ع وجهك..
سدينه وهي شاده ضحكتها:قعد تضحك قدامهم ولاقالت نسكت..
دانيه:واني الصادقه عند ربي..ان شاء الله غير سامحني..قامت عيونها وقالت..كلنا خلقك ياربي سبحانك بس انت خالق القرد والغزال..
مجاهد وهو يضحك؛خلاص اسكتي ياشفشه..استغفر الله العظيم..
وسدينه تضحك وهي تحرك فراسها يمين ويسار...
🍁وفي طريق تانيه..
بإتجاه حوش خالد كان جهاد مروح بأخته ومرته وطول الطريق وجهاد يسأل في مريم عن اقاربها..
فلان شن يخدم..فلان طلع يعرفه..فلان اشبح خيره..
وهي تجاوب فيه..وتهاني خلاص النوم بيغلبها..
اول ماوصلوا طول خشت لدارها..
وهما ركبوا لشقتهم...
مريم توجهت طول لدار النوم..
وهو قعد يسكر في الفيراندا بعدين مشي للدار بياخد شرشافه ومخدته..
وين خش عليها..
شافها واقفه ع مرايا تحول في خراصها"اقراط الاذن"
كانت جدا جميله...هيئتها جذابه..
هو قعد يشبحلها وخلاص..
وهي وين شافاته..قلبها بدي يدق بقوة...حطت خراصها ع الزيانه وقعدت تشوفله..
لحظات ضمت...قعدوا يتبادلوا فيها النظرات..
بدت مريم ترعش مع بعضها من التوتر...
نظراتها ليها هادي اول مرة تشوفها...
وهو كزوج واللي قدامه زوجته وحلاله عجباته وفي شي في داخله كان يبيه يخلي هالزواج حقيقي...
قدم خطوه..ومريم قلبها معاها فر...
وقف بعد هالخطوه وقال:مريم..
مريم بصوت يدوب طالع؛نعم؟!
جهاد شبحلها شويه بعدين قال؛طلعيلي توته...
مريم هزت راسها بإيجاب..
وهو تابع يقول بشي من الارتباك؛وشرشافي والمخده للصالون...خاش للحمام ...ومشي للحمام طول وخشله..
هي غمضت عيونها بألم بعدين فتحتهم..
نزلوا دموعها طول...خدت من مناديل تنظيف المكياج بيدها اللي ترجف وقعدت تمسح في وجهها ودموعها ينزلوا..
تمسح فيهم مع المكياج هما ينزلوا وتزيد تمسحهم بقوة..
لين ولى منظر عيونها مخيف...
بل وجهها كله....نزلت يدها اللي فيها المنديل ع الزيانه ونزلت راسها وقعدت تبكي بصمت...ودموعها المختلطه بالكحل وغيره من مكياج عيونه كانوا يطيحوا ع الزيانه..
سمعت صوت مية الدوش مفتوحه...هدت بكي..
بعدين شبحت للمرايه..وخدت منديل وقعدت تمسح من جديد...
🍁وهو كان تحت الدوش مغمض عيونه يحاول يسترخي وينسى اللي صار..ينسى كلام ضرار..تلقيحه..ونظراته اللي كانت تهين فيه وتهزا عليه..
برغم انه عارف مدى دناءة وحقارة ضرار...بس مايقدرش يتجاهل كلامه ويرميه ورا ظهره...
🍂طلع من الحمام..
لقاها راقده في سريرها وعاطيه بالظهر...
مشي خدي حوايجه وشرشافه مخدته وطلع من الدار وردها وراه...
وخلاها تبكي بصمت...آلم إثم حتقعد تدفع في ثمنه طول عمرها...
🍁🍁🍁🍁
في اليوم التالي...
الساعه العاشرة صباحا..
عفاف:قالت ماعجبنيش جوهم..
نسيبه؛واني قبل نبيها تغير جو..
تنهدت عفاف وقالت؛امتى تروحي اليوم..
نسيبه فتحت باب السيارة وقالت:الواحد...
عفاف:واني نكمل الثلاته..
نسيبه؛مش مشكله اصلا اني بنمشي للموعد متاعي وبعدين للجامعه ومابين كملت هالمشاوير تكون جت الساعه التلاته..
ركبت عفاف وقالت؛كويس...
شويه وطلعت صالحه وركبت من الخلف..
وبعدهم ركبت نسيبه وشغلت سيارتها وطلعت من الحوش..
ع طلعة هيثم بسيارته من الحوش..
جو عيونه في عيون اخته..
تعبوا عيون نسيبه دموع وهي تشوفله بشوق..
اما هو تجاهلها وتحرك طول بسيارته..
شافتلها عفاف بحزن..
هي خدو نفس عميق وقالت:بسم الله..توكلت ع الله ولاحول ولاقوة الا بالله...وتحركت طول.
وعفاف وصالحة موجوعين ع حالها هي وخوها...
🍁🍁🍁🍁
وفي السجن..
تحديدا فالساحه...
كانوا السجناء من المهجعين ب1 وب2..
طالعين ينظفوا فيها...دورهم هما الاسبوع هدا...
وخالد في الساحه شاد المكنسه هكي وخلاص..طول الوقت عيونه مع ولده يبي يمشيلها ويكلمه...
وخليل يكنس ومعاه اسعد وهما يهدرزوا..
خليل:هدا شي يخصني مانبيكمش تدخلوا فيه...
اسعد؛ياسيدي انت حر دير مايعجبك..
خليل تنهد وقال بتساؤل:ايه..
اسعد؛اليوم استنى مني زياره...
خليل هز راسه وهو ساكت..
اسعد تنهد ووقف كنس وشبح لواحد من جماعته مدله المكنسه ومشي...
والباقي لحقوه...
وعيون خالد معاه وهو طالع لين خش داخل هو واللي معاه...
لوح المكنسه ومشي بإتجاه خليل..
وعيون عقيل..والعجيلي..وزياد..وفاتح معاه..
لين وصل في خليل..
خدي منه المكنسه وقال؛اشبحلي هني..
الكل ركزوا معاهم..
خليل شبح لبوه بإمتعاض...
خالد وهو عاقد حواجبه:شن عندك مع اسعد...
خليل مازال يشوفله بنفس النظرة وهو ساكت..
خالد عصب ع الأخر وضربه ع كتفه بقفا يده وقالت؛تكلم يازفت تكلم وماتشبحليش هكي اني بوك ياتافه..
زياد قعد يشبح لخليل بضيق..
وكل من فالساحه مركزين معاهم حتى من الحرس اللي معاهم واللي فوق السور..
خليل بلع ريقه وضيق عيونه وقال؛عارفه انك بوي..وللأسف مافي حد يقدر يختار بوه..
ارتخت ملامح وجه خالد..والكلام اللي سمعه كان زي سكين وخش صدره...
خليل بإنفعال ولوم؛يا..بوي...جاي توا تسأل فيا شن عندي مع اسعد...واني وين كنت حنعرفه اسعد ولانشوفه ولانكلمه لولاك انت!؟انت اللي خلتيني نعرف اسعد وامثال اسعد ودخلتني بروحك في وسطهم وخليتني نعيش معاهم ..انت اللي خليتني خليل شارون مروج وتاجر المخدرات اللي وين الناس تسمع اسمه تتعوذ وتدعي عليه..بسببك انت اني ياما ضيعت ناس وتسببت في مآسي لناس و..و..و...بسببك انت لما فكرت نطلع من هداكا الوسط المسخ وننظاف لقيت روحي واقف ع ارض من وحل انت اللي وقفتني عليها قاعده تسحب فيا لوطا مرة تانيه..وماقدرتش ننظاف..بسببك انت اني هني بسببك انت..اشر عليه بسبابته..انت اللي ضيعت عيله كامله ياكبيرها..ياربها خليتها كلها ضيع وتنذل وتنهان في جرتك...بسببك انت اني هني توا...مصاحب اسعد وقريب عليه..
زياد وهو يسمع في كلام خليل كان يشبح لخالد كيف لون وجهه انخطف وعيونه الحده تلمع بالدموع..
وفاتح يشوف لخليل...ويسمع في كلامه وحسه وكأنه يحكي اللي في داخله...
خليل وعيونه معبيات دموع؛عشت السنين هدا كلها ناسي انك اب. وبعد فات الفوت تفكرت!...
خالد وهو مصدوم؛مامليان قلبك ياولدي..مليان..!
خليل:ايه ومن سنين طويله...ومش غير هدا بس اللي في قلبي..في غيره مانقدرش نطلعه...نزل عيونه وقال..بش ماطيحش من عيني اكثر من هكي...
ومشي عنه وخلاه...
كلهم بعيونهم يتبعوا في خليل وهو ماشي.
ماعدا زياد اللي كان مركز مع خالد..
خالد اللي نسي كلام ولده كله ووقف بس عند جملة...
"بش ماطيحش من عيني اكثر من هكي"
الجمله اللي خلت السكين اللي انغرس في صدره يحفره حفر يمزق قلبه...
خالد هني فهم ان خليل عرف بسره المدرق لسنين ..السر اللي  قالتله عفاف انها عرفاته...فهم علاش ولاده قاطعوه فجأه...
كان حريص انه يقعد مدرق لين يموت بش مايعيشيش هاليوم...واهو جي هاليوم وعاشه...
في لحظه..حاسه ببركان انفجر في جوفه...وكأنه قعد يطلع في الحمم متاعه..هالحمم قعدت ترقى وترقى..
وزياد يشوفله كيف حط يده ع بطنها وع وجهه بدت ملامح الالم..
بصوت عالي نادى صبري العجيلي..
"خالد"
ومشاله يجري..
وخالد قدم بخطوات سريعه للسطل الموجود قدامه..وقف عليه وبدي يرجع..
عقيل قدمله وهو يقول؛خالد.
وخالد يرجع..واللي يطلع فيه من جوفه كان دم..
زياد بفجعه؛خيره..علاش يرجع في الدم!..
وخالد يرجع بقوة وكأن روحه بتطلع..
صبري العجيلي:عطوه ميه تحركوا..ومشي للحرس وهو يقول..بنمشي للمدير..
خش وزوز من العناصر معاه...
وخالد مازال يرجع..
عقيل:خود ياخالد الميه اشرب.
خالد وقف شويه..وخدي شيشة الميه وهو في قمة التعب يدوب قدر يقربها شرب منها شويه وانفلتت من يده وطاحت وكان هو حيطيح..لولا عقيل وزياد اللي شدوه...
وهو قعد يأن من الألم...الم الروح والجسد..
وخليل ولده في داره في المهجع متاعهم..مسكرها عليه..
ومقعمز ع السرير وهو شاد المخده متاعه اللي عاض عليها بسنونه ويبكي بقوة بصوت مكتوم تسمع فيه حيوط الدار اللي هو فيها بس..
🍁🍁🍁🍁
في مدرسة المجد...
في فصل سنة ثالثه تانوي..
كانت عندهم حصة احياء...
الابله؛بنات..انتبهوا معاي..
كلهم ركزوا معاها..
الابله؛بماان اليوم كملنا اول باب..حنبدوا ع شغل البحوث زي ماتعرفوا وسمعتوا عني من قبل نتبع في النظام هدا بش نهيئكم للدراسه في الجامعه..وتوا بنشرحلكم الفكرة..
بنقسمكم مجموعات..وكل مجموعه فيها تلاته بالصفه..زي توا من صفة الروشن..ازهار وتسنيم ووراهم داليا..هادم مجموعه..وياسمين وموده وليلى مجموعه وهكذا..
اول مجموعه تسلمني البحث يوم الاثنين ان شاء الله المجموعه اللي بعدهم الثلاثاء واللي بعدهم الاربعاء...المواضيع انتم اختاروها من نفس الباب نبي تعمق مانبيش اي كلام وخلاص..البحوث حنطلع عليهم وابلات مادة الاحياء في المدرسه وعضوين من هيئة التدريس في كلية العلوم..
البنات اندهشوا...
وتابعت الابله وهي تقول؛البحوث حتاخدوا عليها خمسة درجات...بس احسن بحث حياخدوا عليه مجموعته 10درجات جنب نشره في النت..وحنكتب اسم البنات ع اللوحه الشرفيه متاع المدرسه لمادة الأحياء...
عيون الطالبات لمعت بالحماس..
الابله؛في حاجتين مهما بنوه عليهم..مواضيع مكررة لا...والمجموعه اللي يجي دورهم ومايسلموش بحثهم مش حناخده منهم وقت تاني..خلاص...سمعتوا..
هما هزوا روسهم بإيجاب..
الابله؛تمام...خدت شنطتها وقالت:ازهار تسنيم داليا يوم الاثنين...
ازهار؛ان شاء الله ياأبله...
الابله:السلام عليكم...ومشت طلعت..
بعد ماطلعت وحده من البنات:كان معانا دانيه معناها حني الفايزين..
ضحكت دانيه..
ازهار بتهكم؛ غيراهدي والعبي ارضي...
ربى:حلوة المنافسه يابنات لكن ماتقلبوهاش حرب..
دانيه؛لاحرب لاسو..كل مجموعه تلهى بالبحث متاعها واللي مكتوبله يفوز حيفوز..حني نديروا جهدنا والنتيجه ع الله..
ربى:حكم يادنون حكم..
هزت دانيه راسها بغرور مصطنع...
وازهار شبحتلها من فوق لتحت بإزدراء وفي عيون تانيه تشوفلها بنظرة حسد واضحه تحاول تخفيها
بإبتسامه مزيفه..
🍁🍁🍁🍁
الساعه الثالثه بعد الظهر...
واقفه قدام معمل التحاليل تراجي..
جتها وحده بورقه وقالت:مزبوط زي ماتوقعتي رنيم..
رنيم بإستعجال:مش عارفه كيف دكاتره كبار مايركزوش ع حاجه زي هادي.
ومشت بسرعه بتلحق ع مريضه حتخش غرفة العمليات مايمشيش التخدير وممكن يتسبب في موتها..
كانت تبي تمشي توري نتيجه التحاليل للدكتور المسؤول عن الحاله..
بس تلاقت في الطريق ممرضه قالتلها..
:دكتور رنيم بيعطوا البنج للمريضه هديكا توا.
رنيم انصدمت وطلعت تجري...
🍁في نفس الوقت...
:ردي بالك تبعد خليك قدام الباب.
؛تم غير خش هيا بش ناخد دوري..
ضحكت بخبث وخش داخل وسكر الباب..
والتاني قعد واقف برا يراقب..
فجاة رن تليفونه شاف المتصل كانت مرته..
مجبور رد عليها؛ايوه.....هاه نسمع فيك.....شبح حواليه وقال:دقيقه بس..خل ندور مكان فيه تغطيه..وبعد عن الباب بمسافه..
ع جية رنيم تجري...
وصلت في الحجرة فتحتها وخشت..
وتشوف مشهد صعقها....
رنيم بصدمه؛ياحقير ياواطي!
هو لما شافها انفجع...بعدين بدي يشوفلها بنظرات تخوف.
هي طول طلعت تجري وهو في جرتها..
خافت يلحق عليها بسرعه ...
اول مكب قمامه قابلها طيحته وكملت جري وهو وقف في مكانه وصاحبه شافه...جاه يجري..
:شن في..
رد عليه بلفظ نابي بعدين قال..شافتنا رنيم ...وقال لفظ نابي تاني...
وهي مازال قاعده تجري من الخوف..
لين وصلت في اخر الممر شافت فيه ناس هدت والتفتت مالقت حد...هي هني زادت خافت...وتوقعت انهم ناويين يديروا شي ينقذوا بيهم رواحهم..
معاش عرفت شن دير تمشي طول تقول اللي شافاته..باهي كان دارو فيها حاجه بعدين لو شهدت ضدهم...
قعدت تمشي وهي تفكر..
وتذكر في اللي صار في قضيتها مع جلال وزياد...
وكلام هيثم ليها لما اجتمعت بيه في مكتب احسان بوها..
(لو قعدتي ساكته مش حترتاحي بكل تقعدي عمرك كله وانتي حاطه هالذنب في رقبتك وحيمشي للقبر ومنه لربي يوم القيامه..تقدري تبرري سكوتك وقتها بمبررات تافهه مقارنه بنتيجه هالسكوت...!!؟)
وقفت..وغمضت عيونها وخدت نفس..بعدين فتحت عيونها وقامت تليفونها وقعدت دور ع رقم معين..
لما لقاته بعد تردد اتصلت بصاحبه..
🍁اللي كان في مكتبه واقف يراجع في ملف لقضية ما..
لما رن تليفونه قامه وشاف الرقم..
اتفاجئ...حط الملف وفتحت الخط ورد..
احسان وهو متفاجئ؛ايوه..
"بالله تعالى للمستشفى توا تعالى"
•••••••••••
في احد ممرات المستشفى..
احسان بحمق:تمشي توا طول للدكتور وتقوليله كل شي..
رنيم بخوف؛خايفه يكذبوني ولايديرولي حاجه..
احسان؛مايديرولك شي ماتخافيش اني معاك..اللي يقرب منك يتحمل مايجيه..
رنيم وهي تشوف لنظرات عيونه الغاضبه حست بشي من الامان..وتشجعت..
خدت نفس بعدين هزت راسها..ومشت طول للدكتور المسؤوله عن الحاله...
وهو مشي وراها بمسافه..
وصلت في مكتب الدكتور وقالت:يارب..دق دقتين..بعدين فتحت الباب وخشت..
لقتهم الزوز معاه داخل وهو يأنب فيهم..
:كيف يصير في المريضه هكي كيف..
:مش عارف يادكتور ان عطيتها الجرعه حسب الكميه المعروفه..
رنيم؛قتلك دكتور ع المشكله اللي عند المريضه ماتتحملش البنج..
هو قعد يشبح لرنيم يصمت..
وهما يشبحولها بنظرات تهديد..
استجمعت رنيم شجاعتها وقالت:مش هني المصيبه دكتور...المصيبه اني ما خشيت ع هدا بش نوقفه ومانخليشي يعطيها البنج..لقيته يتعدي ع المريضه..
دكتور شبحله بصدمه..
؛ياكذابه يابلعوطه...تكذب يادكتور الكلام هدا مافيش منه
رنيم؛ماعندي شي يخليني نكذب عليك اني شاكه فيه من فتره وشكوكي صرحت بيها لكذا شخص في المستشفى واليوم شفته بعيوني يادكتور..
:كذابه...كذابه..
الدكتور؛سكر فمك..مانبيش نسمعلك حس..رنيم بنتي في حد يعرف باللي انتي شفتيه.
رنيم رفعت حاجبها وقالت بثقه:المحامي متاعي...
هما قعدوا يشبحولها بحقد ووعيد..
وهي تجاهلتهم بس من داخل مازال خايفه..
🍁حولوا الزوز ع التحقيق ورنيم حضرت واحسان معاها وادلت بشهادتها....
وقعدت التحقيقات جاريه لإثبات التهمه ع مرتكبيها...
••رنيم؛خايفه يطلعوا منها وينقموا مني..
احسان؛مش طالعين منها صدقيني...وياسرك خوف ياجبانه..قتلك اني معاك..
هي غيرت عيونها عنه وملامح الخجل بدت ع وجهها..
ابتسم وقال:انتي لو تبطلي تسكير راس نكون معاك في كل وقت ومانخلي حد يضرك بنظره..
لفت ومشت لسيارتها وهي مبتسمه بخجل..
وهو معاها بعيونه وع وجهه ابتسامه حلوة.. ركبت سيارتها وتحركت..
وهو لأول مرة يديرها...يركب سيارته..ويلحقها...
🍁🍁🍁🍁
الساعه الحادية عشر ليلا...
في عرس ولد عم مريم..
كان يوم دخول....
ضرار عريس وعايش جوه مع اهله وصحابه...
وجهاد يشبحله كيف فرحان وجوه مليح ولاكأنه داير شي وكل ماله يزيد يحقد عليه ويحتقره اكثر واكثر...
ماتحملش يقعد هلبه معاهم..
مشي طلع وقف فم الخيمه بس يتنفس هوا نظيف...
كان يمرر في نظره ع الشارع..بعدين رفع يده وشاف ع الساعه..
تنهد ونزلها...ورفع عيونه فوق يشوف للسمي...
خدي نفس وزفر....
"بونسيب"
نزل عيونه وشبح يمينه...
ابتسم بخبت وقاله؛خيرك قاعد هني..
جهاد بإمتعاض؛ناخد في نفس..
ضرار بتهكم؛الجو اللي داخل يخنق عندك حق..
هز راسه وحط يده ع كتفه وقال:بماأنك عريس جديد شن رايك تعطيني نصايح..وغمز بعينك...
قعد جهاد يشبحله من فوق لتحت...
وضرار يشبحله بنظره متهكمه مستفزة..
وفي لحظه..
جبده من رقبته وحطه ع الحيط...
جهاد؛لولا العيله اللي في رقبتي ذبحتك ياعيل ياوسخ..ياهايف...ياحلوف...يا..........وسكت...بعدين حط سبابته ع بطنه وقال..كنت شقيتهالك الليله نطفت الدنيا من شويه وسخ...
وضرار ميت من الخوف..
جهاد؛تعرف ياكلب..كلب شني الكلب مازال اشرف من امثالك..
تعرف..ياولا حاجه...لو مازال تقرب من مريم ولاتتصل بيها...قسما برب البريه ندير فيك شي عقلك مايستوعباش بالله العظيم...
"ضرار"
ضرار فنص وهو يشوف لجهاد..
وجهاد اللي كان يشوفله بنظره تخوف..وخر عنه.وقعد يساويله في بدلته..
ع جية رضوان اخ ضرار شافهم مع بعض استغرب وقال؛شن في!؟
التفت جهاد وشبحله وقال بإبتسامه:كنت نعطي فيه نصايح...وغمز لضرار..
وضرار يشبحله من فوق لتحت ..
رضوان وهو يشوف لضرار بريبه:هي تعالى بيبدا المولد توا..
تنهد ضرار ومشي مع خوه والرعشه قاعده في عظامه..
وجهاد ابتسم بتهكم ومشي لحقهم....
داخل..
كانت مريم واقفه تشبح للعروسه بنظرات شفقه..
تبان صغيره وبريئه...وجعتها اللي بتاخد واحد زي ولد عمها...
خدوها ومشوا دخلوها لدار ضرار اللي حتقعد فيها مع العيله...
وبدي برا المولد...
🍁🍁🍁🍁
بعد المولد..
جهاد كلم مريم بش تطلع..
••ام مريم؛كان يخليك تباتي بس..
مريم؛لالا مافيهاش كيف ماما..هي تصبحوا ع خير ومبارك ع ضرار مرة تانيه..
خديجه؛الله يبارك فيك مرومه بنتي..
مريم؛تصبحوا غ خير..
كلهم بأصوات متقطعه؛قدام كل خير..
حطت خمارها ع وجهها ومشت طلعت من الحوش..
•••
طول الطريق تهدرز مع جهاد وهو يسمع فيها ويساير فيها بس من داخل كان في فداخله صراع رهيب...
وصلوا للحوش..
وركبوا شقتهم....
مريم اول ماخشت حولت العبايه وخمارها...
ومشت للكوجينه بتشرب وهو معاها بعيونه..
جدا جميله..وجمالها فهالليله بالذات بزياده...
طلعت من الكوجينه ومشت للدار وهي تقول؛رجليا طاحوا من الوقوف..
هو مشي وراها للدار..
شافها كيف حطت العبايه ع السرير..
جاها وقال:مريم..
هي كانت تفك في عقدها لما ناداها التفتت وشبحتله...
نفسها النظرات متاع امس...
بس هالمرة كانت في جرأة اكبر..
قدمله...شد يدها وقال؛مريم...نبيك تكوني مرتي كيف ماربي يبي يامريم..
هي من فرحتها ابتسمت ابتسامه فرح مرتجفه وعيونها تعبوا دموع...
شدت ع يده بقوة بدون ماتقول اي كلمه..
••ولما قرب منها بش يصيب منها مايصيب الرجل من زوجته.••
جي بين عيونه ضرار....
وكلامه..وتلميحاته الوقحه...والرساله اللي بعتهالهم ليلة العرس..
كلامها قعد يطلع قدامه كلمه كلمه...
فجأه جي بين عيونه هيثم وهو يقوله..
"ماتأملهاش فيك"
حس انه بيقدم ع شي هو مش قده بكل..
ارتسمت ع وجهه ملامح الاستياء اللي بانت لمريم وكأنها ملامح اشمئزاز ...
وخر عنها وحرك راسه بالنفي وهو يقول؛مانقدرش..مانقدرش..صعب..
ومشي طول بسرعه طلع من الدار متوجه طول لباب الشقه اللي فتحه وطلع وسكره وراه بقوة..
🍁بعد ماخلاها تتكسر...تتحطم..لأجزاء واجزاء...
خلا قلبها ينشق شق وينقسم نصين...
خلا روحها معلقه بين السماء والأرض..
كانت واقفه في مكانها جامده تماما من الصدمه..
مريم..بعد اللي صار..حست روحها ماتسوى شي..
حست انها شي مقرف...او مرض مزري معدي...
حست انها قذارة...شي يعاف اي حد يقرب منه..
ياااه يامريم...ثمن الإثم غالي...واثره عمره طويل...
عكس المتعه متاعه اللي تستمر للحظات وتنتهي..
لحظه ضعف وتهاون...كلفاتك غالي...غالي هلبه يامريم..
نزلوا دموعها سخان حرقوا خدودها....
تلقائيا لفت ومشت للحمام...خشتله....
مشت خشت تحت الدوش وفتحت عليها الميه...
بدت تمسح في ذراعها اليمين وتغسل فيها...
بعدين اليسار....شويه شويه بدت تقوي غسل وهي تبكي...
شافت لليفه..خدت الصابون وصباته عليها قريب كله..
وبدت تكد بقوة..وتزيد تقوي..
وفي صوت يقوللها..
مهما ديري مش حتناظفي...مافي شي يقدر ينظف القذارة متاعك...
زادت قوت اكثر والليفه كانت خشنه بدي جلدها ينجرح وينزف..
وصوت مازال يقول...
ذنبك ماينمسح بالليفه والصابون...لو ديري ماديري...
اصلا حتى ربي ماغفراش..وكان غفرلك هدا حالك..
راك انتي مرتكبه كبيره..هادي كبيره...مش حاجه ساهله كبيره من الكباير..ياويلك يامريم..لا ربي ولاعباده يسامحوك عليها..
مالا شني تحسابيها ساهله تقولي ربي اغفرلي يغفرلك طول..
مسكينه...
وهي تزيد تقوي وتنهج بصوت باكي...
لين بدوا الميه والصابون يحرقوا في جلدها المجروح..
توجعت بس قعدت تحتها قصدا بش تعذب نفسها او تعاقبها..
وهداكا الصوت ماباش يسكت بكل...
🍁وجهاد..
اللي ركب سيارته وطلع من الحوش...
قعد يسوق فيها وهو مش عارف وين ماشي..
يسوق ويتفكر في اللي داره في حياته كله...
ويزيد يكره روحه حتى هو..
وماحسش بنفسه الا وهو واقف في شارع يعرفه كويس...
شبح يساره...عيونه جو ع عمارتهم.. ع شقة حوش اهلها تحديدا..
رتاج..
وقعد يذكر في هديكا الليله..اللي كانوا يضيعها فيها..
بس هي بلطف الله انقذت نفسها في اخر لحظه...
عيونه يشوفوا لمكانها بألم..وكان خاطره في هديكا اللحظه يلمحها ولو شويه..
تنهد بحسرة..بعدين لف وناوي يروح للحوش...
🍁فهالوقت طلعت مريم من الحمام وهي لابسه ديشمبر..
منظر وجهها كان مريب...
لبست حوايجها وهي تشوف لآثار الجروح بنظره بارده...
بعدين مشت طلعت من الدار للكوجينه..
وهي تسمع لنفس الصوت..
اللي زيك موته خير من حياته..لو عشتي تقعدي طول عمرك تتعذبي..بتقولي نخش النار...نقولك انتي خاشتيها خاشتيها..
زنا هادي زنا..كبيرة من الكباير مع الشرك يحطوا فيها راهو..
انسي..
وقفت قدام شباك الماعين...عيونها جو ع موس كبير..
خداته بدون تردد وشبح لمعصم يدها اليسار..
وهي تسمع في نفس الصوت...
موتي يامريم موتي..الموت للي زيك خلاص...
جت بين عيونها نظرة جهاد اللي خلتها تزيد تكره روحها..
طول بالموس قطعت المعصم...وبدي الدم ينهمر منه...
🍁🍁🍁🍁
مقعمز في الصالون يقرا في كتاب الوابل الصيب لإبن القيم ومنسجم معاه..
فجأه سمع باب حوشه دق..
استغرب..من بيدق عليه في ساعه زي هادي..
دق مرة تانيه..
هو سكر الكتاب وحطه...وناض ومشي باتجاه الباب..
فتح وطلع...
دق الباب مرة ثالثه..
هيثم:لحظه..
وصل في الباب وقال؛مني؟!
"اني دكتور"
عقد حواجبه وزاد استغرابه..وفتح الباب..
لما شافه حالته اتفاجئ..
جهاد ودموعه في عيونه؛بالله عليك نبي حد نتكلم معاه بالله عليك..
هيثم هز راسه وقال:خش خش..
خش جهاد وهو شاد روحه بالسيف عن البكي..
وهيثم سكر الباب...

#صلوا_على_الحبيب
#آلام_الأثام
#البطل_المغمور2