البطل المغمور "زهور القمر"

الجزء الثامن عشر2

#البطل_المغمور2  "زهور القمر"
#جمان_فريد
#الجزء_الثامن_عشر "حب صافي2"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐
في صباح يوم جديد...
في مدرسة المجد للبنات...
وسط الساحه..كانوا مجتمعات بنات سنة تانيه ثانوي ب
مع بنات فصل سنة ثالثة ثانوي ويتكلموا في الموضوع اللي شغلهم اليومين الأخيرات.
روضه:شن تخرفي انتي علاش بنديروا هكي..
أزهار:باهي قولولنا انتم من في غيركم يعرف اسرار فصلنا السنه اللي فاتت غيركم انتم..
سميرة؛بلا مرض ع الصبح مادخلناش حني باللي صاير في فصلكم دوروا ع اللي تلعب معاكم بيناتكم..
دانيه عقدت حواجبها ووجهت نظرها عليهم وقالت؛اسمعوا لو اليوم دارت حاجه تانيه نقولوا للأخصائيه وهي تلقاها بروحها..
ارتفعت اصوات بنات فصلها بالتأييد لكلامها..
شويه ورن جرس الطابور..
مشوا وقفوا في طوابيرهم..
سارة وهي واقفه في طابورها التفتت وشبحت لدانيه..
ودانيه شافلتلها...ابتسموا الزوز لبعض بعدين اللي هادي شبحت لأبله الرياضه اللي بدت معاهم التمارين..
وكالعاده الابلات والأساتذة واقفين يحضروا في الطابور..
ومنهم جيهان وراجلها جمعه..واسماعيل اللي كان محط الانظار..
اسماعيل كان انيق لدرجة اللي يشوفه يقول مدير شركه مش استاذ في مدرسه.. مايبالغش في اللبس يعني زي لبس ربطة العنق او بدالي الرسميه لا..بس لبسه كان انيق جدا وغالي..
وهدا مخلي هلبه اشارات استفهام تحوم حواليه..
من جهة تانيه..
كانت جيهان مركزة ع دانيه ومستغربه عليها كيف جايه عادي للمدرسه اليوم ويبان جوها تمام ولاكأنه صايرة حاجه..
وكالعاده جمعه يقعد يسرقلها في النظر..
🍁بعد انتهاء الطابور الصباحي..
ركبوا الطالبات للفصول...
وطالبات سنه ثالثه علمي اول ماخشوا للفصل..
قعدوا يفتشوا في المقاعد مالقوا شي...وفيسع خشت عليهم ابلة الماده للحصة الأولى...
🍁🍁🍁🍁🍁
"والله اني واجبي اتجاهكم بنديره حتى لو كنتوا تقابلوا في خيري بالإساءة..الله سبحانه وتعالى قال..ادفع بالتي هي احسن"
سدينه تنهدت وقالت؛بارك الله فيك..بس زي ماتعرفي بنتي قاعده في العده مانقدرش نمشي للمناسبات..
مقبوله؛بنت اللي مفروض تكون في العده بس مش الحوش كله..
سدينه؛صعب ياوخيتي مانقدروش...
مقبوله؛كانكم ع اللبس اني تو نتصرف تو نقنع مجيد يعطيكم تاخدوا..
سدينه ؛لبس شني ربي يهديك اني قتلك بنتي في العده مانقدرش..وفوقه اللي صار لبنتي التانيه مش في باب عراس حني..
مقبوله تنهدت وقالت:الله المستعان...ومشت وخلتها...
ع طلعة رتاج من الدار مشت لأمها فم الكوجينه وقالت:امشوا يام..
سدينه بصدمه؛كيف؟
رتاج:ايه امشوا امشوا وسكرولها فمها الخيزبونه الشوومه هادي..
سدينه؛مايجيش يابنتي..
رتاج؛لايجي اني عاطيتكم الاذن بروا
سدينه؛ومن قال اختك تابا تمشي؟!
رتاج؛اني نقنعها مادوريش المهم بتمشوا بنطرحوا وتلبسوا وتقهروا فيتها كامله سادتا اهانات من اللي يسوى واللي مايسواش احني اللي نديروا القدر لأرواحنا يام حني..
سدينه وهي تسمع في كلامها قعدت تفكر فيه وهي مترددة بعدين قالت:باهي تو نشوف المهم وتي روحك نص ساعه وبنطلعوا..
رتاج بدت تتوتر خدت نفس عميق وقالت؛ادعيلي يام ربي يعطيني اللي فبالي..
ابتسمت سدينه وقالت:آمين يارب العالمين..
🍁🍁
وخلال نص ساعه فطروا..بعدين رتاج جهزت نفسها..
لبس الملايه..بعدين فتحت صندوق ذهبها طلعت منه زوز حدايد كبار وحطتهم في الشنطه..
بعدها لبست قفازاتها ومشت طلعت من الدار..سكرتها زين بالمفتاح ومشت هي وامها طلعوا من الشقه..
••مجيد؛عشت وشفت سدينه تسرح وتمرح ع كيفها..
مقبوله؛في النهايه خدت شورك..
مجيد؛عارفتني مش حنقول كلمه فوق كلمه مجاهد..ااخ بس لو كان قاعد بصحتي..
مقبوله؛ع سيرة مجاهد معاش كلمته في الموضوع هداكا..
مجيد؛امس وين دوشلي سألته قالي بنلغي الموضوع هدا توا مازال عليه..
مقبوله ابتسمت بتهكم وشبحت للتلفزيون اللي كان محطوط ع قناة اخبار...
🍁🍁🍁🍁
في المستشفى..
كانوا سدينه ورتاج في قسم النساء والولاده يراجو في دورهم....
ورتاج طول الوقت تهمس بالإستغفار وامها تدعيلها في نفسها ربي يطمن بالها..
"رقم 7"
ناضوا سدينه ورتاج وخشوا لحجرة الدكتورة..
••••••••••••
الدكتورة؛انتي حاليا في الشهر الخامس..
رتاج:يعني دكتورة يبان جنس العيل توا ولالا..
الدكتورة وهي تشوف في الجهاز؛ايه يبان..وقعدت تركز كويس وسدينه وماجده يشبحولها..
شبحت دكتورة لرتاج وقالت؛انتي شن تبي؟
رتاج بلعت ريقها بخوف وقالت:وليد..
رجعت الدكتوره وقالت:والعيل مايبيكش تعرفي توا شكله..
رتاج وامها شبحوا لبعض..
الدكتورة شبحتلها وقالت:واخد وضعية السجود مش واضح شي..
رتاج؛اكيد دكتورة! قصدي شن ماطلع قولي اللي يجي من ربي راضيه بيه..
الدكتورة بضحكه؛والله مافي حاجه باينه ع قد ماحاولت نشوف ماطلع معاي شي..
تنهدت رتاج وقعدت ساكته..
وامها تشوفلها وهي مبتسمه بحب...
•••••••••
وهما واقفين في الطريق بش يوقفوا سيارة اجرة.
سدينه:وشن بديري بيه محل الذهب..
رتاج:بعدين تعرفي يام...
وقفتلهم سيارة الأجرة....
وركبوا الزوز...وصلتهم لمحل من محلات الذهب..
سدينه:راجينا ياخوي..
:حاضر...
ونزلوا الزوز وخشوا للمحل..
رتاج وسدينه:السلام عليكم..
صاحب المحل:وعليكم السلام..تفضلوا..
طلعت رتاج من شنطتها الحدايد الزوز وامها تفاجئت هلبه لما شافتهم..
حطتهم رتاج وقالت:نبيك تصرفهملي..
الراجل خداهم الزوز وزن كل وحده فيهم...بعدين حسب سعرهم مع بعض وقال...20الف..
انصدمت سدينه..
هزت رتاج...والراجل خش داخل بش بيجيب الفلوس..
سدينه؛علاش تصرفي فيهم شن بديري بيهم؟!
رتاج:تو تعرفي يام..
طلع الراجل والفلوس معاه وقال:عندك شنطة كبيره..
رتاج؛غير لحظه خوي..نبي نشوف التعليقات اللي عندك يكونوا ناعمات وحلوات..
الراجل هز راسه وقال:موجود عندنا..
وقعد يطلع في الاشكال اللي عنده..
ورتاج تشوف فيهم من ورا  خمارها..كلهم كانوا حلوات احتارت فيهم..وفي النهايه اختارت وحده:نبي هادي..
الراجل:ثلاته الاف دينار..
رتاج:خودهم من الفلوس هادم..
الراجل؛تمام..
وسدينه تشبح لبنتها وخلاص...
رتاج؛نبي نشوف كان عندكم خواتم بحدايدهم..
الراجل؛لحظه بس..
وكذلك من بين مجموعه معروضه خدت حديده بخاتمها سعرها خمسة الاف دينار...
بعد ماخدتهم...دست باقي الفلوس في الشنطه وطلعت هي وامها من المحل..
سدينه:لمني هدا يارتاج..
رتاج بضحكه:والله حنقولك الله..
ومشوا ركبوا التاكسي اللي توجه بيهم للحوش طول...
🍁🍁🍁
فالوقت اللي وصلوا فيه عفاف ونسيبه لمعمل "بيت العيله للمأكولات"
نزلوا من السيارة وخشوا طول للمعمل والزوز متأملين خير...
🍁🍁🍁🍁
"هيا اكتبوا بسرعه قبل يرن الجرس"
والبنات ينقلوا في الدرس من السبورة..
وانبار تشبح ليد دانيه ولاحظت الدبله مش موجوده..
بس ماتكملتش..
رن الجرس الابله طول مشت طلعت..
وربى بعد تطلع اي ابله ماده تتكسل لين توخر بإيديها المقعد اللي وراها..
انبار؛راسي ياقرده..
ضحكوا البنات..ودانيه يدوب ابتسمت..
ربى التفتت وهي تضحك قالت:متشوفه لحصة استاذ اسماعيل احلى حصه..
انبار بضحكه:هوايا..
دانيه ضحكت .
ربى بتركيز: دانيه نسيتي الدبله..
دانيه وهي تكتب:تس فسخت..
الزوز انصمتوا وهما يشبحولها..
ربى:تتسهوكي..
دانيه بإبتسامه حسرة؛والله فسخت..
شبحوا ربى وانبار لبعض بعدين شبحولها..
دانيه سكرت كراستها وقالت؛مافيش نصيب..
انبار؛بجد دانيه تحكي..نحس فيك تبصري..
دانيه ضحكت ضحكة الم خفيفه وقالت:اقسم بالله فسخت..
"فسختي!؟؟"
ربى التفتت وقالت؛مااكبر ودانك..
ازهار بضحكه صدمه:حي ياربي اقصر خطبه نشوفها في حياتي بس تبي صراحه متوقعتها من الاول.
:ازهار خيرك تافهه هكي.
ناضت دانيه وفي يدها شيشة ميه وقالت:خليها تقول اللي يعجبها..
ومشت طلعت من الفصل..
والبنات يشبحوا لبعض..بإستغراب...وحزن..
🍁وهي تلاقت مع سارة..
تعنقت دانيه ذراعها وقعدوا يمشوا...
سارة؛شن جوك توا؟
دانيه:احسن..تو نتخطى الموضوع بسرعه ماتخافيش..
تنهدت سارة بضيق...
والزوز نزلوا لوطا...
ووراهم...
ميس:اليوم نبي نديره الفيلم..بعد نركبوا من الاستراحه باهي..
روعه بضحكه:اوكي..
هما نازلات...واسماعيل راكب..
قعدت تبع فيه روعه بعيونها لين معاش قدرت تلحقه بيهم..
ميس:اشبحي قدامك راك طيحي..
تنهدت روعه بالصوت..وكملت طريقها مع صاحبتها ومواضيعهم كلها تافهه واغلبها لاأخلاقيه....
🍁🍁🍁🍁🍁
"خلاص متفاهمين"
عفاف بإبتسامه:متفاهمين..
خدت مسؤولة المعمل الورقه اللي وقعتها عفاف وقالت؛من الاسبوع الجاي ان شاء الله تبدي في مناسبه فرح طلبونا ليوم الاربعاء الجايه غدي...
عفاف:بإذن الله..
:موعدنا الإربعاء..
عفاف وهي مبتسمه....ان شاء الله...
•••••••••••
ركبت عفاف السيارة وهي تقول:نعمل نظيف ومرتب وكل شي فيه ماشاء الله..
نسيبه؛حتى اني عجبني..يبان راقي ونظيف هلبه..ربي يفتحها عليك عمتي ويسخرلي حتى اني عن قريب..
وشغلت السيارة وتحركت..
عفاف؛بقولي كان تقعمزي في حوشك مرتاحه خيرلك يابنتي..
نسيبه:لالا قعاد الحوش مانحباش بكل...يمرض..
عفاف تنهدت وقالت؛كان هكي ان شاء الله ربي يسخرلك خدمه تمشي معاك..
نسيبه بإبتسامه؛آمين..
🍁فهالوقت..
في السجن..
كان خليل في دار الغسل مع زوز من زملائه عليهم هما غسل الحوايج..
فجأة خش عليهم اسعد وهو يقول؛برا انت وياه..
طول اللي مع طلعوا..
وقعد خليل واقف يشبح لأسعد..
بعد طلعوا زملائه تسكر الباب..
واسعد قدم لخليل وهو مبتسم قاله:هاه..شن صار معاك شارون..
خليل قعد يشبحله بإمتعاض وهو ساكت..
اسعد؛مازال مسكر راسك..هز راسه وقال:تمام تمام...وطلعت تليفون من جيبه..
حط فيه ع شي عطاه لخليل وقاله:تفرج اكيد مستاحش..
هو جبد منه التليفون بقوة...
وشبح شن فيه..مقطع فيديو فتحه
ولقاه لأمه ومرته هما نازلين من السيارة وخاشين للمعمل...
اسعد؛بالخطوه وراهم وعارفين شن يديروا بالتكه..ع فكره مرتك لزوها من الخدمه..وامك توا بتخدم في المكان اللي خشتله اللي شفته في الفيديو قدامك...خوك جهاد اموره تمام في الورشه اللي يخدم فيها...بس رفيق وضعه ملخبط هلبه يخدم حتى هو بس اللي يحصله من الخدمه يريح كله في شرب..مخلي مرته في حوش ماليها قريب اسبوع لتوا مايندريش عليها لاهي ولاولده..
خليل مازال يشوفله بنفس نظرة الامتعاض..
اسعد؛تعرف لو رفيق عنده دماغ زي دماغك كنت لهيت بيه هو  وخليتك فحالك..لكن للأسف ماينفع لشي...
خليل مدله تليفونه وقال:شن تبي
اسعد خدي التليفون وقال بضحكه:انت عيني ياعيني واخيرا فهمت انه لامناص...زاد قربله وقال...تعال بعدين لداري نقعمزوا نشربوا طاسة شاهي ونهدرزوا ع رواق...تمام..
خليل يشوفله بنفس النظره بدون مايقول شي..
اسعد هز راسه وقال؛احسنت احسنت اخترت توقف في الطرف الصح اخترت مصلحة عيلتك...حرك يده وقال...كمل كمل..كمل...ربي يعاون...ولف ومشي طلع من المكان..
خليل غمض عيونه بشده وقال...ياالله...
انفتح الباب...فتح عيونه..خشوا اللي كان معاه..
وهو رجع للي كان يدير فيه..ورجع يردد..
"لاحول ولاقوة الابالله..."
🍁🍁🍁🍁
تمت الاستراحه..
وبدوا البنات يركبوا لفصولهم..
دانيه وسارة وهما راكبات يهدرزوا..لما وصلوا مستراح الدور التاني الكبير..
كانت فيه جيهان مع وحده من الابلات .
واسماعيل مع جمعه..وابله الاشراف الملقبه ب"وحش الممرات"
جيهان لما شافت دانيه جت بتناديها بس...
"دانيه"..
وقفت وشبحت لمصدر الصوت..
كان استاذ اسماعيل اللي يشبحله جمعه شبحات تحرق ...
شن يبي فيها!!؟
وجيهان وقفت في مكانها وهي مستغربه..
سارة؛تمام دنو نتلاقوا بعدين..ومشت..
ودانيه قدمت لإسماعيل وهو كان يقدملها..
لين وصلت فيه..
دانيه:نعم استاذ..
اسماعيل؛حصتكم توا؟
دانيه:لا الاخيره..
ابتسم وقال:مزبوط...حك لحيته وقال..شوفي دانيه من غير لف ودوران بنخش في الموضوع طول..
دانيه في حالة استغراب شديد..
وجيهان وجمعه يشبحولهم وبس..
وابله الاشراف تفوت في البنات وهي تسرقلهم في النظر..
وفي وحده من البنات وهي ماشيه كانت تشوف لدانيه بنظرات كره وغيره...
اسماعيل وهو يحاول يخفي ارتباكه؛اني معجب جدا بأخلاقك وتربيتك وتوفقك..
دانيه في خاطرها"ياوالله عليك ايام سود وخلاص"
اسماعيل؛وسمعت من هني وهني ان عندك اخت..
دانيه شبه ارتاحت وردت تقول؛ايه اكبر مني..
اسماعيل ابتسم وقال:كويس هلبه..المهم نبي نعرف لو هي مرتبطه او شي زي هكي..وماتخافيش ناوي نجي من الباب..
دانيه وهي متفاجئه فيه ومستغربه في طريقة طلبه وكانه شايف رتاج مش سامع عنها سمع..
ابتسمت بإرتباك وقالت؛والله استاذ اختي من فتره راجلها متوفي وحاليا هي فالعده..
هو انصدم بقوة..قعد يشبح لدانيه بنظرات صدمه حتى من ابتسامته اختفت...
ودانيه قعدت تشوف لردة فعله وهي مبتسمه بإرتباك..
والعيون عليهم..وجمعه بيموت ويعرف شن يبي منها..
ضحك ضحكه صدمه خفيفه..بعدين ابتسم بارتباك وقال؛اسف جدا..اسف..تقدري تمشي لفصلك..
دانيه هزت راسها ولفت ومشت وهي شاده ضحكتها..
ولى اسماعيل لجمعه ووجهها احمر من الاحراج...
جمعه؛شن تبي منها؟
اسماعيل بأسف:قبل نحساب بيصير بموضوع بس يللا كله نصيب..
جمعه؛ماتعرفش انها مخطوبه!
اسماعيل بإبتسامه؛اختها مش هي؟
جمعه ابتسم براحه وقال؛اختها ارمله من فتره وقاعده في العده
اسماعيل؛للأسف..
جمعه ضحك وقال؛خيرها في غيرها...
ووصلوا فهاللحظه ميس وروعه..
ميس بهمس؛واحد اتنين..تلاته...
وفجأه طاحت من طولها..
روعه قعدت تعيط وهي تنوض فيها والابلات جوها يجروا ومعاهم اسماعيل..
وجمعه جاه اتصال بعد عنهم ومشي يرد...
وروعه تعيط وتشبحله...
وبعد محاولات في ميس فاقت...ومالقتش جمعه بين اللي حاولوا يفيقوها...خابت مساعيها من ورا هالفيلم الهابط..
وناضت زيها زي البنت الطيبه مشت لفصلها مع صاحبتها..
🍁في نفس الوقت بنات سنه تالته وقت خشوا فصلهم..
اللي هادي قعدت تفتش في كتاباتها وكراساتها ومالقوا شي..
:مش قلتلكم اني بنات سنه تانيه المعاودات ريتوا لما كلمانهم اليوم معاش لقينا شي..
ازهار؛المهم افتكينا من الجو الصامت اللي كانوا مدايرينه مبردهم...
تسنيم؛توا الواحد يلهى بقرايته ويرتاح ومن الوجيج...
ع خشة ابلة الماده وهي تقول:السلام عليكم...
🍁🍁🍁🍁
"يخطبني اني"
وقعدت تضحك بصوت عالي..
دانيه بضحكه؛تعرفي كان مش نعرف وضعك نقول شايفك هكي حسسني هو..
رتاج بضحكه:تلقيه مسكين انجلط بعد ماعرف اني ارمله..وكان يعرف اني حامل فوقها..
دانيه لاحظت ان اختها تضحك بقهرة والدمعه معبيه عيونها ومع هذا سايرتها ماتبي تحسسها بشي..
هدت رتاج ضحك بعدين قالت:بري افتح الدولاب وطلعي منه الاكياس اللي تلقيهم قدامك ونادي امي..
دانيه وهي متستغربه ناضت فتحت الدولاب وطلعت منه كياس محل مجوهرات..مدتهم لاختها...بعدين فتحت باب الدار ونادت امها...
جت سدينه...خشت وسكرت الباب...
رتاج؛بما انكم الزوز بتمشوا لعرس خو الحيزبونه خديتلكم هادم ب تلبسوهم...فتح علبه التعليقه لدانيه..وعلبه الحديده والخاتم لامها..
دانيه انصدمت.
سدينه:هدا علاش انتي!!!
رتاج؛ايه نبي هديكا تعرف ان العبره مش في اللي عنده ذهب واللي ماعنداش العبره ع من يطلع
عليه ومايطلعش..وحني نزيدوا للذهب والالماس قيمه وين نلبسوهم..
دانيه؛منين خديتهم؟
سدينه؛صرفت حدايد كبار..اضيع في مستقبل عيلها..
رتاج يضحكه؛شنطة ذهب عندي يام راهو..وبعدين مستقبل ولدي ولله الحمد مضمون..حوش ومزرعه وان شاء الله حقه من ورث بوه..اللي صرفته لايقدم ولايؤخر..وايه..باقي الفلوش نبي نشري بيهم لدانيه سيارة صغيره تتعلم عليها السواقه..
اندهشوا الزوز..
رتاج ناضت وقفت وهي تقول؛بعون الله بتخشي كلية طب والمشي والجي يبي سيارة وماتطلع كان عليك اللي يسوقوا فيهم مش خير منك..
دانيه عيونها تعبوا دموع..
رتاج بكبرياء؛حتكملي قرايتك وتولي دكتورة ليها اسمها ووزنها ومصاريف قرايتك ماتفكريش فيهم بكل واني موجوده...
دانيه نزلوا دموعها مشت لاختها ضمتها بقوة..
رتاج وهي تمسح ع ظهرها؛سادك بكي ياسر مش ليك الدموع دنون انتي مفروض تضحكي وبس..
دانيه بنبرة باكيه؛نحبك هلبه..
ضحكت رتاج وقالت؛حتى اني ياهلبه..
سدينه؛ربي يابنيتي ينولك اللي في بالك ويعطيك لين يرضيك..لين تقولي بس..
رتاج بإبتسامة حب؛ويطول في عمرك اميمتي...
🍁🍁🍁🍁
"الحمد لله"
نسيبه؛ايه والله الحمد لله..عقبالي نحصل خدمه يارب..
مريم وهي تتغدا ع الواقف؛ان شاء الله..ايه نوسه..بلعت وقالت..مش حتزعلي لو حضرت عرس ولد عمي..
نسيبه بضحكه:وعلاش بنزعل بعيد وبر راجل مافيه شي..الحمد لله حي يرزق وقريب تطلع نتيجته ونفرحوا بخشته لكلية الطب..
مريم بإبتسامه؛آمين..
نسيبه قربتلها وقالت؛بس كان فيها كيف تمشي معاك تهاني تحضر تبي تغيرت جو البنت مسكينه نفسيتها مدمره..
مريم وهي تفكر:زعمه عمتي تقول باهي؟
نسيبه؛خليها عليا انتي حاولي تقنعي جهاد مرات هو اللي يقول لا..
مريم حطت في فهما الخبزة وقعدت تاكل وهي تفكر...
شويه سمعوا صوت كلاكس..
مريم؛امم..الباص..هي سلام توا...وطلعت تجري..
نسيبه بضحكه؛سلام..
فجاة رن تليفونها...مشت خداته من فوق الثلاجه..
لقت المتصل رقم غريب...فتحت الخط بدون ماترد..
"ايوه السلام عليكم"
نسيبه؛وعليكم السلام تفضلي..
"ابله نسيبه شورك ماسحه رقمي..اني ابله ابتسام مديرة الروضه"
نسيبه مطت شواربها لداخل بإحراج وهي شاده ضحكتها..
فعلا حذفت رقمها...
"معليشي معليشي..المهم اني متصله بيك بنبلغك بشي مهم..في وحده من اولياء الامور عرفت متأخر انك سيبتي الروضه وطبعا اني ماقلتش السبب قلت هي سيبت "
نسيبه من فوق نفسها؛مشكورة..
"المهم قالت انها مديرة لمدرسه الفكرة الخاصه...اللي درس في طلاب المرحلة الثانويه ومحتاجين ابلة جغرافيا"
نسيبه بإبتسامه؛مادام ماتعرفش وضعي مش حيصير منها من توا..
"لاهي قالت نعرف عنها كل شي قلتلها شن تعرفي بالزبط قالت عطيني رقمها نتواصل معاها ونتفاهموا.. نعطيها رقمك"
نسيبه سكتت شويه بعدين قالت؛تمام اعطيها..
"خلاص..تو نعطيها..موقفه ان شاء الله"
نسيبه:آمين تسلمي...السلام عليكم ..
"وعليكم السلام"..
سكرت نسيبه وقعمزت ع الكرسي وخشت ع الغوغل...
دارت بحث ع المدرسه وطلعتلها نبده عنها وصفحتهم غ الفيس..
خشتلها وقعدت دور فيها ولقتها فعلا مدرسه معروفه وناجحه ومختلفه عن كل المدارس في البلاد...
وتعليقات الناس زادت حمستها..بس خافت ينكسر هالحماس لو تراجعوا بعد مايعرفوا ظروفها...
🍁🍁🍁🍁🍁
فهالوقت...
في منطقة من مناطق طرابلس..
تحديدا مجمع العيادات لصاحبه هيثم الكاتب..
اللي قص الشريط متاعه فهاللحظه...
معلنا افتتاح المجمع وسط تصفيق الحاضرين من الاطباء والطبيبات وممرضين وممرضات ومدير المجمع ومعاهم لجين...
خشوا كلها للمجمع داخلها وقعدوا يدهوروا في ارجائه والكاميرا الثابته تصور في كل شي...
بعد ماشافوا المجمع بكل شي فيه..
وقفوا في المستراح اللي قدام الاستعلامات...
يسمعوا في كلمه يقول فيها هيثم...
هيثم؛مافيش نذكركم ان الخدمه هني الغرض منها مش كسب المادي...المكان هدا درناه للناس اللي ماتقدرش ع دفع مصاريف الكشف اللي ولت غاليه جدا.تقسم الظهر..واني اخترتكم بعنايه وجمعتكم هني لان عارفكم ناس ليها ضماير حيه وفاهمه وعارفه كويس شن معنى كلمة طبيب....عارفين انها مهنه انسانيه قبل لتكون مهنه لكسب الرزق....
اني واحد منكم وفيكم مش حيخش لجيبي غير الراتب اللي حناخده وبس مش حيخش عليا قرش زياده..لأني مافتحتش المكان هدا للكسب المادي من الأساس...تنهد وقال..نبي ناخد منكم عهد هني وربي شاهد علينا...انا نتقوا الله في كل مريض يجينا نقابلوه بالكلمه الطيبه والوجه البشوش مهما كنا مضعوطين في الخدمه...نحطوا بين عيونا القسم اللي اقسمناه..وان اللي يحس روحه في يوم من الأيام معاش يقدر يخدم هني يسيب فورا..... مرر نظره عليهم وقال...وعد..
كلهم بأصوات متقطعه قالوا...وعد..
هيثم؛والله ع مانقول شهيد...وتوا جماعه الحلويات والعصير وينهم..
كلهم قعدوا يشبحوله بنظرات تحذير..
هيثم برفعة حواجب؛ليكم انتم مش ليا اني احسنوا الظن..
ضحكوا..ولجين تضحك وهي تشوفله بنظرات معبيه كلام...
🍁وبدوا يوزعوا ع المجودين في الحلويات والعصير..
وهو حاس برغبه شديده اتجاههم قلبه ناطف عليهم..
لجين بإبتسامه؛عيونك دكتور..
هيثم؛ايااه عاد حتى بالنظر ممنوع..
لجين بضحكه؛يقولوا العين تاكل..
هيثم شبحلها ع جنب...
هي ضحكت بعدين قالت:ربي يبارك المجمع متكامل ماناقصه شي...
هيثم هز راسه وقال:ربي ينفع بينا وبيه هدا اهم شي..
لجين بإبتسامه؛بإذن الله...
شبحلها وقال؛شكرا لجين وقفتك معاي حتقعد جميل في رقبتي لاخر حياتي...
لجين بتلقائيه؛اني كان نلقى نخدمك العمر كله دكتور..
هو اتفاجأ في اجابتها...عقد حواجبه و غير عيونه عنها ومشي من حداها طول...
لجين غمضت عيونها بشده وهي مصدومه في روحها ..
تمنت الارض تنشق وتبلعها...فتحت عيونها..ولفت وطلعت بسرعه من المجمع...
ركبت سيارتها من هني..وبدت تبكي بصدمه من هني وهي تقول:شن قلتي ياحمارة شن قلتي...غمضت عيونها بشده...عليك موقف حقير حطيت روحي فيه...فتحت عيونها وقعدت تاخد انفاسها بصعوبه وهي تبكي...بعدين شغلت سيارتها طول وتحركت...
🍁🍁🍁🍁🍁
الساعه العاشرة ليلا...
في صاله حوش خالد..
جهاد:اليوم كلمني ولد اختك يام يقولي وينه ع ولده من لما حطهم معاش جي شافه بكل قعدوا هما اللي يصرفوا عليه..اقسم بالله وجهي تقشر من تصرفات ولدك اللي تحشم...طلعت من العمل وخدتيلهم شن يبوا وغادي تلقاني راجل اختك قالي قول لخوك يحدد موقفه لشن يبي يوصل بتصرفاته..
عفاف بضيق؛هالولد اني عجزت فيه مانيش عارفه شن ندير معاه مايدير كان اللي تخزي وياريته غير صغير بش نلقاله عذر ونقول طايش..
جهاد؛واني مش فاضي بيه مصايبه يحلهم بروحه..
ناض وهويقول؛هي تصبحي ع خير يام تاعب وبنرقد..
عفاف؛برا سلم ولدي ارقد وارتاح..تصبح ع خير
جهاد؛قدامك كل خير..ومشي طالع من الصاله ع خشة نسيبه..
جهاد؛السلام عليكم..
نسيبه؛وعليكم السلام..وخشت للصاله وهي مبتسمه بفرح؛حصلت خدمه ياعمتي حصلت خدمه..
عفاف بفرحه؛بالله.
قعمزت حداها وقالت:والله توا كيف سكرت منهم..مدرسه خاصه وبنقري في تخصصي والراتب الف جني في الشهر..
عفاف:الله يبارك الله يبارك..باهي عارفين عنك كل شي ولا.
نسيبه هزت راسها وقالت:ايه ايه..وقالوا الحاجات هادي ماتهمهمش المهم سيرتي اني والخبرة متاعي بس..
عفاف براحه؛الحمد لله رب العالمين..
نسيبه شدت فيها وحطت يدها ع كتفها..
ابتسمت عفاف وحطت يدها ع راسها وقعدت تمسح عليه وهي تقول:ربك كريم ربك كريم...
نسيبه بإبتسامه؛الحمد لله...
🌼ولئن شكرتم لأزيدنكم🌼
🍁🍁🍁🍁🍁
"تهاني!"
مريم؛ايه تغير جو..اختك نفسيتها تاعبه هلبه..
جهاد.عقد حواجبه وقال:لالا..
مريم بإبتسامه اسف:مش مأمن عليها معاي..
جهاد شبحلها وهو متفاجئ في كلمتها..
مريم.شدت دموعها وقالت؛حقك اختك وخايف عليها..تصبح ع خير..وناضت..هو شد يدها..
شبحت ليده...
جهاد؛مش قصدي اقسم بالله..تنهد بعدين قال...خلاص تمشي لكن عيونك عليها يامريم امانتي هادي راهو..
ابتسمت وقالت:امانتك انت في عيوني..
فك يدها وقال بإبتسامه؛يسلموا عيونك ياعزوزه..بري ارقدي..
مريم بضحكه:تصبح ع خير..
جهاد؛وانتي من اهله..
مشت مريم وهي حاطه يدها ع قلبها اللي كان يدق بقوة...
اما هو حط راسه ع المخده وبدي يفكر في وضع خوه رفيق..لين خداه النوم...
🍀🍀🍀🍀🍀
وتمضي الأيام...
وهيثم يبدا خدمة في المجمع اللي الناس بدت تتهافت عليه من الايام الأولى وهالشي فرح قلب هيثم لعدة اسباب اهما ان الاجر الحقيقي كله قاعد يمشي لحبيبة قلبه وهي مكانها البعيد...
ونسيبه كذلك بدت خدمة وكانت فرحانه بيها هلبه..مدرسة محترمه ونظاميه وغير هكي للبنات حتكون مرتاحه اكثر فيها...وايامها الاولى كذلك كانت موفقه..
من جهة تانيه كان وضع راجلها في الحبس مريب لأصحابه بعد ماشافوه اكثر من مرة مع اسعد الكبير..واكثر من كان قاهره هالوضع خالد ومش قادر يحصل معاه فرصة بش يحكي معاه ويمنعه وخوفه عليه كل ماله يزيد...
وبنات المدرسه..
كانت ايام ماشيه عاديه زي قبل من بعد مابطلت تجيهم الرسايل من "القطة الرماديه"وظنوا ان الموضوع تسكر ومجرد تسليه وعدت حالها...
بس جيهان كانت ع اعصابها خوف من معرفة جمعه بفسخ خطوبة دانيه من غير شي الراجل متاخد عقله بيها بعيد عن مرته لأنه بقلبه وبعقله معاها هي...
ودانيه كانت تظاهر انها تجاوزت جرح راجح بسرعه...والخافي يعلم بيه الله بس...وحال راجح مش احسن من حالها الخدمه هي اللي مصبراته ومنساياته همه...
زي مجاهد اللي يحاول ينشغل بكل شي بش ينسى موضوع سارة اللي قاهره...واخته تشوف في حاله ومجبورة تقعد ساكته خوف ع خوها...
•••في المدرسة ..
دانيخ بضحكه:حسيته من يومها وهو منحرج مني ..
سارة بإبتسامه؛موقف محرج شويه..
دانيه:بس لتوا خاطري نعرف علاش طلب اختي اني بالذات..
انبار:نقولك لكن ماتقوليش اني قتلك بالله عليك..
دانيه بإنتباه؛باهي قولي...
انبار تنهدت وقالت؛شاف صورة اختك اللي كانت عند ربى..
سارة اتفاجئت..
اما دانيه شهقت بعدين قالت؛كيف شافها؟؟!
انبار:طاحت منها يومها هو لقاها وجابها..
دانيه؛غبارتها المغبرة!
سارة:وينها صورتها توا؟!
دانيه وهي مصدومه:ردتهالي..ربي ستر وماطحتش في ايدين ولد حرام..
سارة:حتى انتي غالطه كيف تعطي صورة اختك لوحده ماتعرفيهاش..
دانيه بضيق:مانحسابش هكي بيصير..
سارة:غلط اكبر غلط ردي بالك تعاوديها مرة تانيه..
دانيه؛لالاشعفه ...
انبار:بالله ماتجيبي سيرة ولاتقوليلها حاجه فكيني من المشاكل..
دانيه هزت راسها وقالت بضيق؛باهي باهي...
سكتوا شويه بعدين قالت دانيه:الله بنمشي للعرس..
سارة؛صار خلاص حسمتي امرك..
دانيه؛ايه عندي فضول نشوف شن بيديروا وشن شكل العروسه اكيك مش احلى مني تي غير يلقوا زيي قبل..
سارة:العبد الواثق..
ضحكوا دانيه وانبار...
🍁🍁🍁🍁
وحتى تهاني...بعد ماروحت من المدرسه بدت تجهز في نفسها بش تمشي للعرس مع مريم...اليوم سهريه كبيرة..واليوم اللي بعده الدخول..
خدت قفطانها وحاجاتها وركبت لشقة مريم بش بتوتي روحها غادي..
••مريم وهي تجبد في شعر تهاني:الله يبارك عليه شعرك لاقوة الابالله..
تهاني بإبتسامه:تسلمي.
مريم بإبتسامه؛بجد الله يبارك عليك توهه جميله هلبه غير عويناتك حكايه..
تهاني بخجل: خلاص احرجتيني ..
ضحكت مريم..
واستمروا في تجهيز نفسهم هما الزوز لين آذن المغرب..
جي جهاد ونزلوله طول وتوجه بيهم لحوش عم مريم..
طول الطريق ومريم عايشه حالة توتر عاليه...
اما جهاد فكان يحاول يهدي نفسه ويكبح غضبه بش يدير الي ناوي عليه الليله بدون مايكون ليه عواقب وخيمه..
🍁وصلوا لحوش عمها..
اللي كان مزين بأسراب الضي..والخيمه منصوبه قدامه..
مريم شبحت لجهاد..
وهو بدون مايشبحلها قال:هي انزلوا..
خدت نفس وفتحت الباب ونزلت..وتهاني نزلت معاها...
هو بعد نزل  جاها...
مريم:من هني حني نخشوا والخيمه للرجاله..
جهاد؛تمام تعالوا..
قعد يمشي معاهم لين دخلهم وقبل ليمشي قال:مريم زي ماوصيتك..
مريم بإبتسامه؛في عيوني...
هو مشي...
ومريم قالت لتهاني:هي تعالي توهه...
ومشوا مع بعض خشوا داخل..
اما هو توجه لخيمة الرجاله وخش...
كان لابس كشمير رجالي لونه ازرق مخليه ملفت للإنتباه..
لما شافوه خوت مريم تفاجئوا...بس العريس انصدم..
ناض معاذ طول مشاله..
معاذ:جهاد شن جو..
صافحه جهاد وقال؛الحمد لله...
معاذ؛تعال نعرفك ع الشباب عارفك شايفهم قبل لكن اكيد ناسيهم..وضحك..
يدوب ابتسم جهاد ومشي معاه وقعد يعرف فيه ع شباب العيله..
لين وصلوا في العرس..
معاذ:وهدا ضرار العريس اول مرة تشوفه..هدا ولد عمي وخوي وصاحبي..
ابتسم جهاد بتهكم وهز راسه ومد يده لضرار وقال؛مبارك..
صافحه ضرار وهو يحاول يبان عادي:الله يبارك فيك..
شد جهاد ع يده بقوة بعدين طلقها..وقعد يوزع في نظره ع المكان..ايه وين نقعمزوا..
معاذ بإبتسامه؛تعالى...ومشوا الزوز قعمزوا حدا بعض جنب شباب العيله اللي بدوا يتعرفوا ع جهاد..
وياسر خو مريم وباقي خوتها مش متحملين وجوده..
بس ضرار اكثر منهم...
ورضوان خوه الكبير كان يراقب في الوضع وانتبه لحالة خوه..
🍁داخل..
مريم اول ماخشت مرت عمها خديجه تلقتها وقعدت تزغرد..
عروسه قاعده وهدا اولها عرس..
سلمت عليها بحراره...بعدين سلمت ع تهاني وخدت منهم عباياتهم ودخلتهم..
خديجه؛زغرطوا يابنات زغرطوا مريومه جت..
بنات اخت خديجه كانوا يعزوا مريم هلبه ولما شافوها فرحوا بيها ودارو شوط ع خشتها..
ومريم طول الوقت مبتسمه..
لكن تهاني كانت مستغربه في اللي شافاته...
جرأة البنات في اللبس ماشافتهاش حتى عند بنات خالاتها..
حتى زينتهم ومنظرهم جديد عليها..اللي نافخه فمها...واللي دايرة وشم"تاتو"وغيره من الامور اللي مش متعوده تهاني تشوفهم في محيطها..
بس هي بفستانها البترولي المحتشم بأكمامه الطويله واللي كان ضابط من فوق ومن تحت واسع...وشعرها اللي كانت جايباته ع جنب وزينتها الخفيفه المناسبه لعمرها..كانت مميزة جدا وملفته للأنظار...
النساوين الكبار عجبتهم ع الآخر..طبعا..
احتشام..وجمال طبيعي..وزينه غير مبالغ فيها..
كل يبين ان البنت هادي جايه من حوش عرفوا اللي فيه يربوا..
مريم؛حماتي تهاني...
امها بإعجاب:الله يبارك الله يبارك ماشاء الله..
وسلمت عليها وتهاني كانت متحشمه هلبه..
بعدين سلمت ع الموجودات كلهم مع مريم والزوز قعمزوا حدا بعض...
تهاني حست بروحها غريبه في وسطهم..عالم تاني اللي هي فيه..يبرق ويلمع بس لمعانه وبريقه مزيفين ماخدعوش نظر تهاني ابدا..بل خلوها تضايق...
🍁وفي مكان تاني..
في مناسبه فرح كذلك...
كانوا اللي فيه مختلفين اختلاف تام لافي لبس فاضح ولااشكال غير مقبوله..
بس دانيه وامها قلوبهم كانت مغمومه..
يسمعوا في القرمه والنميمه عن ايمانهم وشمائلهم..
وتسهويك وتلقيح دوة مستفز لأبعد حد...
يبين ان الموجودين مافيهم حد متقبل الثاني..
وحده من خوات مقبوله؛الله يبارك خوتي خدامين ع روسهم من يومهم كملوا بعد بوي وكبروا خدمته اكثر...
وحده من الموجودات:الله يبارك لكن ياوخيتي فوق هدا كله جلسة هالصاله قاعده زي ماهي من 15سنه امنيه حياتي تغيروها قبل لنموت..
ع خشة مقبوله وهي تقول بملامح وجه جامده:وعلاش نغيرها قاعده جديده وكأنا خديناها البارح...الحمد لله حني ناس ربي مباركلها في رزقها الحاجه عندنا عمرها يطول وماتفسدش..فلوس الحلال...
خواتها  شبحوا للي كانت تتكلم بعد ماافحمتها مقبوله..
ابتسمت بارتباك؛صدقتي..ربي يزيدكم  ويباركلكم..
مقبوله بنفس ملامح الجمود؛آمين...التفتت ع خواتها وبناتهم واشرتلهم بعيونها بعدين مشت طلعت وبعض منهم ناض وطلع وراها...
ودانيه وسدينه متفرجات بس..
شويه وحده من الحاضرات مقعمزة حداهم قالت..
:اييه قتلك بوي ورزق الحلال نسوا شن دار بوهم زمان..
؛اهو رده تالت ومتلت تشبحي فيه كيف ملوح في تركينه..
:لكن والله مايجي شي قدام اللي دار لهداكا الراجل مسكين خدي منه ارضه بالزور والبهتان وخلاه يموت عليها مقهور..
؛ربك ماينساش كان هما نسوا..
ودانيه وسدينه يسمعوا وهما متفاجئات..
بالذات دانيه اللي كل يوم تزيد تكتشف هالعيله ع حقيقتهم اكثر واكثر..
🍁🍁🍁🍁
طلعت من الكوجينه بعد ماضمتها..
مشت للصاله لقت خوها الصغير راقد فيها والتلفزيون مفتوح عليه..
مشتله وقعدت تنوض فيه؛رشيد..رشود..
ناض وهو يقول؛اممم..
رتاج؛نوض ارقد في دارك ..
غمض عيونه ومسحهم..بعدين فتحهم وناض ومش للدار..
وهي قعمزت تتفرج ع التلفزيون...
شويه وخش مجاهد..
مجاهد؛شن تتفرجي..
رتاج:شي برنامج..
قعمز  حداها وتنهد...
رتاج شبحتله وقالت؛خيره وخيي..
ابتسم بألم وهو يشوف للفراغ وقعد ساكت..
رتاج:هدرز مجاهد طلع اللي فقلبك..
غمض عيونه وفتحهم بعدين قال؛مش عارف شن بنحكي ولاشن قول...مش قادر نتخطى اللي صار ولانطلعها من عقلي يارتاج...
قعدت تشبحله بحزن..
مجاهد؛اللي مجنني..اني متأكد اللي فيا فيها متأكد من مشاعرها جيهتي رفضها ليا صدمني يارتاج..
رتاج:شوف حتى اني حاسه ان في ان...وحاسه دانيه عارفه شن في لكن ساكته..علاقتهم ببعض ولت زي قبل..
مجاهد شبحلها وهو عاقد حواجبه:لمحتلك بحاجه!؟
رتاج؛لا اصلا وين نجيب سيرة موضوعك انت وسار طول تسكره..
قعد ساكت وهو يفكر بعدين قال:شن تتوقعي انتي؟
رتاج:نقول مرات ع قصه بوي وخالتي ماجده.
مجاهد:لو هكي فعلا راهو بوها ردني طول...
رتاج بعدم معرفه؛مش عارفه هدا اللي فكرت فيه..بعني شن بيكون غير هكي..
ضيق مجاهد عيونه وهو يفكر كيف يقدر يطلع الدوة من دانيه بدون مايجبرها اجبار ع الدوة....

💖يتبع