البطل المغمور "زهور القمر"

الجزء السادس عشر1

#البطل_المغمور2  "زهور القمر"
#جمان_فريد
#الجزء_السادس_عشر "قلوب منكسرة"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐
"هاه شن صار في الرز طاب"..
وقفت ع حيلها لما سمعت الصوت تعرفه كويس..
طلعت صاحبة الصوت ومعاها وحده تانيه تعرفها عفاف عز المعرفه..
عيشه"ام جمعه"؛لا ماشاء الله حاجه صح..
امنه"عمة جمعه":قتلك نعرفهم نفسهم في الماكله الله يبارك...
وعفاف تشوفلهم هما الزوز والدمعه فرت من عينها غصب عنها....
عيشه هزت راسها وقالت:عطيكم الصحه..
الطباخه؛سلمك..
ولفوا الزوز بيخشوا...الزوز مع بعض عيونهم جت ع عفاف...
انصدموا..
وهي تشوفلهم وتمسح في دموعها..
وصالحه تتفرج ع الوضع بإستغراب وهي مش فاهمه شي..
عفاف غيرت عيونها وقالت؛هي ياصالحه سقدي خل نكملوا..
صالحه شبحت للنساوين بعدين لهت مع عفاف..
وهما الزوز فاقوا من صدمتهم ومشوا خشوا داخل مع بعض..
عيشة بعدم استيعاب؛عفاف ولا؟
امنه وهي في نفس حالتها؛ايه هي...شن دير هني!؟
ع جية بنت عيشه؛هاه ماما شفتي الطباخه..
عيشه؛قوليلي من هما النساوين اللي برا؟
:هادم جايين يغسلوا الماعين..
امنه وعيشه شبحوا لبعض..
:علاش خيرهم دارو حاجه؟!
امنه شبحتلها وقالت؛لامادارو شي...بري سلم بنتي شوفي ضيوفك..
البنت وهي مستغربه في حالتهم هزت راسها ومشت...
امنه؛قداش توجع فيا هالمراة..
عيشه؛لاتوجعك ولاسو جاباته لروحها كان اطلقت منه زمان راهو ماوصلتش لهالحاله..
امنه تنهدت ومشت وعيشه لحقتها...
🍁وعفاف برا تعول وكل دمعه تنزل منها تمسحها بسرعه بدون ماتحس بيها صالحه...
🍁🍁🍁🍁
في الجامعه...
كانت مقعمزة تقرا في شيت المحاضره وتأشر بالخطاط ع بعض الفقرات...
وفي عز انسجامها مع القرايه...
"مريومه"..
انصعقت وين سمعت الصوت ودب فيها الرعب..
شبحت فوق لقاته..
هو واقف عليها ويشبحلها بنفس الأبتسامه الخبيثه اللي انخدعت بيها..
ناضت طول وهي ترعش خدت شنطتها ومشت بسرعه..
وهو وراها..
ضرار:مريم مريم شويه بس..اوقفي قتلك..
وهي تمشي بسرعه وماتبيش ترد عليها نهائي..
ضرار؛اوقفي ياحمارة فرجتي علينا الكليه..
ومريم مش مهتمه لشي المهم تهرب منه...
هو سرع خطواته ووقف قدامها ووقفها..
ضرار:وراس بوي كان ماوقفتي وسمعتيني نديرلك العار هني..
هي خافت هلبه..تعرفه واطي ويدير كل شي..
ردت عليه بحده ودموعها في عيونها؛شن تبي ياخنزير..
هو ضحك وقال:مقبوله يابنت عمي..كرامه للأيام اللي كانت بيناتنا...وغمز بعينه..
هي شدت ع شنطتها بقوة ودموعها طاحوا..
ع جية زوز ولاد..
:خير ياأختي في حاجه...
مريم شبحتلهم..
ضرار بإبتسامه:كلمني هني ياغالي هدا بنت عمي واني ولد عمها.
هما شبحولها ويراجو في ردها..
مريم بلعت ريقها وقالت؛ايه ولد عمي..
هما وخروا وقالوا:مالا سامحنا يامودير..
هو رفع يده تحيه ليهم ورجع شاف لمريم..
مريم شبحتله بحده وقالت؛الله ياخدك..
ومن بعيد شويه..
زوز بنات كانوا يتفرجوا معاهم...
وحده منهم البنت اللي سيبها جهاد بعد ماتعرف ع مريم...
:مش هدا نفسه اللي كان يجيها زمان...
:ايه هو نفسه..
رفعت حاجبها وهي مركزة معاهم..
🍁ضرار؛وبردو مقبوله منك يابنت عمي..طلع من جيب جاكيته بطاقه دعوه وقال:عرسي بعد اسبوعين..ومدهالهاا..
هي قعدت تشبحله بقرف..
ضرار؛طبعا ع بنت ناس متربيه لاعندها في الطلوع ولافي الهياجه ولا عندها ماضي...وازتها امي موازاة وجتني كيف مانبي...وهو شن يبي الراجل غير مراة نظيفه تصونه وتصون غيبته وتصلح تكون ام صغارها وماشد يدها حد قبله..
مريم كانت تشوفله بكره شديد ودموعها ينهمروا انهمار...
ضرار:نفرح هلبه كان جيتي..
🍁البنت قامت تليفونها وقالت؛وهادي اللي فضلتها عليا ياجهاد...
وصورت في اللحظه اللي مريم خدت فيها البطاقه من ضرار...
صاحبتها؛بتبعتيها؟
؛ايه لكن مش توا...
؛شوفيها شن دارت!؟
مزقت مريم بطاقة الدعوة وهي تشوفله بحقد بعدين قالت؛
"ربي يردهالك في قعر دارك..."
وحدفت عليه البطاقه الممزقه ومشت بسرعه ودموعها تنزل..
اما هو اختفت ملامح ابتسامه الخبث وتبدلت بملامح الغل..
ومشي طول..
والبنات الزوز يتبعوا فيه بعيونهم...
🍁🍁🍁🍁
في نفس الوقت..
في الورشه اللي يخدم فيها جهاد..
كان يخدم ع سياره...صاحبه ومعاه صاحبه مقعمزين حداهم ويهدرزوا وهو يسمع في كلامهم..
:ماناخدش وحده عندها ماضي حتى لو كنت اني ماضيها هدا..وحده استغفلت بوها وخوتها ماتستغفلنيش اني!
ضحك اللي معاه وقال:فكرتني بأخر وحده كلمتها تصدق وهي راكبه معاي فالسيارة تكلم في بوها وتكذب عليه براحه..اني وصاحبتي في الكورس بابا ارتاح انت ماتجيش هي بتروح بيا..وبعد سكرت منه قعدت تضحك..
:تو بالله نموذج زي هادي ديرها مراة وام لصغارك!
:والله كانك عليا موضوع الزواج هدا حاله من زمان حاجر بنت عمي مازال صغيرة ونربي فيها ع ايديا ونعرفها زي نفسي..
:ديما مهني ع روحك انت..
ضحك وقال:مال كيف..
جهاد التفت وشبحلهم...
واحد منهم شبحله وقال؛ها شن تميتوا؟
جهاد حرك راسه بالنفي بعدين اشر بيده وهو يقول:-عندي تعليق صغير ع كلامكم..
التاني التفتله وقعدوا يشبحوله الزوز..
واللي فالورشه ركزوا معاهم..
جهاد؛تو انت قلت ماناخدش وحده عندها ماضي حتى لو كنت انت ماضيها..علاش خاش حياتها من الاول وديرلها في ماضي كان مش ناوي معاها الحلال..
هو ابتسم تهكما وقال؛اني ماضربتهاش ع يدها معلم ماغصبتهاش غصب تصاحبني..
جهاد؛لكن انت اللي بديت عليها..
صاحبه قال؛قصدك عندك عادي تاخد وحده عندها ماضي مش عارف شن شكله..
جهاد؛والله كان انت كنت ماضي في حياة وحده حتجيني وحده عندها ماضي مع غيري وراهو هادي مش حاجه بأختياري ولااختيار حد اللي يحساب روحه حادق وبيختارها بالفتاشه والله لما يطيح في وحده عندها ماضي حتى لو قعد مدرق عليه..
الزوز قعدوا يشبحوله ووجوههم متغير لونها...
جهاد؛خاف من ربي خاف منه هلبه ماتعرفش من وين يجيبهالك وكيف يجيبهالك وفي من يجيبها..
صاحب الورشه عجبه كلام جهاد هلبه..
اما الاولاد صاحب السيارة قاله؛ترا هات المفتاح..
جهاد حدفوله..
هو شده وقال؛نمشي نصلحها في مكان اللي يخدموا فيه يخدموا وهما ساكتين..
جهاد بضحكه:تامه امورها..
صاحب الورشه؛وحقها مانبيشي صدقه عن صغاري..
جهاد شبحله وابتسم ع جنب..
ركبوا الاولاد السيارة وطلعوا وهما في قمة الغضب..
صاحب الورشه؛منور جهاد..
جهاد بإبتسامة جانبيه؛بوجودك...
🍁🍁🍁🍁
نهايه الدوام..
والطالبات بدوا يطلعوا من فصولهم..
سارة وهي طالعه لقت دانيه في الباب تراجي فيها..
ضحكت ومشتلها..
دانيه:وقولي دانيه ماتنفعش..
وسارة تضحك..
شويه فاتوا من حداهم روعه وميس وهما يهدرزوا..
ميس:بنهبل عليه ياريري يهبل يهبل...
روعه؛اهبلي ياحنه..
شويه شافوا جمعه جاي هو وجيهان من الممر التاني ويهدرزوا..
جيهان؛هيا جومعه يدوب نلحق..
هو شاف دانيه جايه مع سارة..ولقاها تشبحله..
عقله قال يدير حركه صبيانيه..ومش عارف علاش دارها المهم عنده.وقتها انه يثبت شي معين..
شد يد جيهان وشبك اصابعه بأصابعها  وقال؛خفي روحك.
جيهان طارت من الفرحه اول مرة يدير معاها حركه رومانسيه زي هادي..
نزلوا من الدروج...
وميس تقول؛ان شاء الله تموت يارب يارب تموت..مش ليه بكل ياناس..
فاتوا من حداهم دانيه وسارة ونزلوا..
دانيه:مش عارفه كيف حسيت روحي مارضيتش فيها..
ضحكت سارة وقالت؛ولت حماتك عاد..
ضحكت دانيه..
وكملوا طريقهم لوطا...
وطلعوا برا المبنى..وفاتوا من قدام اسماعيل اللي كان يهدرز مع واحد من الأساتذه.
اسماعيل:انت جيب الملف متاعه بس وخلي الباقي عليا...
؛ان شاء الله بارك الله فيك..
اسماعيل؛فيك بارك الله...
شويه فاتت قدامه ربى مع صاحباتها..
كانت اطلع في ماليا من شنطتها..ومن غير ماتركز طاحت الصورة..
هو طول لما شافها طاحت..
بسرعه جاها وقامها وقعد يشوفلها..
الصورة كانت فيها رتاج وهي في الجردينه اللي اجتمعوا فيها اول مرة..
كعادتها جميله جمال يسلب العقول..
هو تنهد بعدين نزلها ومشي بسرعه ورا ربى..
اسماعيل:ربى..ربى..
سمعوا صوته وقفول والتفتوا..
هو وصل فيهم ومد الصورة وقال؛طاحت من شنطتك..
هي خدتها وقالت:حي عليا!
انبار:صورة اخت دانيه حي عليك هدا غير قالتلك ردي بالك..
هو لما سمع انبار قالت ان اللي في صورة اخت دانيه ابتسم..
عجباته دانيه كطالبه متوفقه وخلوقه..وحط في باله انها مادام اختها معناها زيها..ومش عارف علاش وقتها هو فكر هكي...
اسماعيل:وشن دير عندك صورتها..
استغربوا البنات سؤاله ومع هذا جاوبت ربى..
ربى؛عيد ميلاد اختها اليوم وتبي ديرلها مفاجأه المهم اني عندي اختي دير في الطورطات قلتلها ديرلها وحده..
البنات شبحوا لربى ع جنب لأنها قريب حكت قصة حياتها..
اسماعيل هز راسه وقال:الصورة عندك امانه دسيها فالشنطه زين..
ربى ؛حاضر..وحطت الصورة في جيب الشنطه الدخلاني وسكرت عليها..
اسماعيل:غير ان شاء الله ماتنسيش الشنطه في الباص..
ضحكوا البنات..
ربى بضحكه:كان بتزيدني درجه ماننسهاش..
اسماعيل؛انتم اللي يعطيكن وجه شويه يندم..تحركي روحي انتي وياها..
هما لفوا مشوا وكاتمين ضحكاتهم..
اما هو مشي لسيارته وع وجهه ملامح ابتسامه خفيفه..
🍁🍁🍁🍁
"ان شاء الله لاباس ابله نسيبه"
نسيبه بشي من التعب: دخت شويه ماهو اليوم صايمه هدا علاش..
زميلتها:خليك ارتاحي شويه بعدين كملي شغلك..
قعمزت ع الكرسي وهي مازال حاسه بدوخه ومع ماتبيش تفطر...
شويه وناضت تاني بش تكمل شغلها وفجأة وبدون مقدمات طاحت من طولها فاقده وعيها...
والروضه صارت في ربكه...حاولوا يفيقوها كانت تفيق شويه وترجع دوخ...
فاضطروا يرفعوها للمستوصف القريب عليهم...
وغادي قاسوا ضغطها ودارولها تحليل دم..
ضغطها كان هابط وفطرت غصب عنها...
بينما تحليل الدم...
••خشت عليها وفي يدها ورقة التحليل ركزت ع خاتم الزواج في يدها وقالت بإبتسامه؛قداش ليك متزوجه!؟
نسيبه:فوق الشهر بكم يوم..
؛مبروك حبيبتي حامل..
اجتاح نسيبه شعور اول مرة تحس بيه شعور خلا قلبها يرجف من قوة دقاته...وتحس روحها انها تبي تبكي ومش عارفه علاش...مشاعرها كانت متداخله وقتها..
فرح..وخوف...سعاده...وحزن...
🍁فهالوقت..
كانت عزوزتها تتفرج ع بنت سلفها وهي تشرف ع المراة اللي تسقي..
وتشوف في خواتها يخشوا ويطلعوا...
يبانوا مرتاحات وعايشات متهنيات..
وقالت في نفسها علاش لا...بوهم راجل مقدر ومقتدر وعايشين بسمعه زي البرلانت بين الناس اكيد احسنها واكبرها  عائلات فيك يابلاد يتمنوا يناسبوه..
هني قلبها وجعها ع تهاني بنتها...هي ديما واكله همها هي اكثر من خوتها..
يقولوا لو جيت تخطب انشد ع خوتها لان ولدك اللي بيجي بعدين تلتينه لخاله..
وتهاني لاجت من بو ولاخوت...
فاقت من سرحانه ع صوت بنت سلفها وهي تقول؛ ابدوا اغسلوا الأول الأول...
عفاف:حاضر..
اختها قالت؛لالا يقربوا السفر للرجاله..
صالحة:رجالة شني؟!
:مش حيشوفوكم تقربوهم تقريب..
عفاف:حاضر..
وصالحه قريب تنفلج من تصرفات عفاف..
؛هيا ارفعوا وحطوا غادي..
وعفاف طول رفعت سفرة ومشت حطتها وين ماقالولها
وكملت عفاف باقي خدمتها في صمت ظاهري وداخلها دوشة كبيرة...ومؤلمه هلبه..
وفي نهاية الخدمه...
:تفضلوا..
عفاف وصالحه خدوا حق تعبهم زي ماوعدتهم ..
كل وحده فيهم الف..
كانت تشوف للفلوس في يدها وتسمع في بنت سلفها تقول..
؛مش حتاخدوا مبلغ في اي مكان تاني تخدموا فيه بس اني من فرحتي بولدي كان نلقى نعطي الناس كلها..
عفاف بإبتسامه؛ربي يباركلك فيه..
؛يارب..
صالحه اللي كانت حتنفجر خلاص؛هيا عفاف..
عفاف:هي...
حطوا فلوسهم في شناطيهم...وسلموا ع المراة ومشوا طلعوا من الحوش وهي معاهم...
وبعد سقدتهم ولت خشت داخل..
مشت قعمزت حدا خواتها وقالت؛هاه شن رايكم..
؛كله ماشاء الله مانقص عليك شي..
:الحمد لله..
؛شوفي مرت خوك كيف مقعمزة بروحها وحاشيه وجهها في التليفون...
:درهتلي كبدي..قريب جيتها عفجتها كيف تكلم في متاعيني وكيف تشبحلهم...
:اني ملاحظتها اطنش من يوم المحضر..
:حتى امي مش مرتاحه معاها غير تكابر...
🍁وعيشه عزوزة جيهان كانت تحكي ع سلفتها وتقول:لالا ماتقوليلهم شي يعني كان عرفوا شن بيديروا واخدين عليه مش جديد عليهم..
آمنه.بضيق؛ياريتني ماشفتها شن بيطلعهم من عقلي توا..
عيشه:انتي تحبي تشقي روحك وخلاص..
امنه تنهدت وشبحت لجيهان بعدين قالت؛كنتك ماغير شاده هالتليفون وخلاص..
عيشه شبحتلها وحاولت تخفي احراجها وهي تقول؛متحشمه مازال ماتعرف حد ماهو..
امنه بعدم اقتناع؛اهاا...
وعيشه تشوف لجيهان ومن داخل تسحن عليها...
🍁🍁🍁🍁
عفاف..
بعد ماطلعت من حوش بنت سلفها ركبت تاكسي هي وصالحه ومشوا طول للسوق...
خدوا كل ما يلزم الحوش...
عفاف وهي تاخد في الحاجات..كانت تبكي من داخل ع روحها..
تتحسر ع نفسها وين طلع في الفلوس وتدفع فيه وهي تذكر كيف خدتهم..
الموقف قاعد متصور قدامها مش قادرة تنساه..
تجاهل حماتها وسلفتها ليها قهرها بقوة..
ووجودها في مناسبتهم "خدامه" قهرها اكثر..
تغلب في دموعها وتجاهد في روحها بش ماتنهارش...
🍁وقبل العصر بشويه كانت واصله للحوش..
درست التاكسي فم الباب..
وقعدوا ينزلوا في الحاجات وتهاني تعاون فيهم...
ع جية هيثم للحوش...
شافهم شن يديروا...
وعفاف شافاته وهو جاي انحرجت وضايقت في نفس الوقت...
غير عيونه عنهم وخش بالسيارة للحوش..
تنهدت عفاف بضيق وقالت؛خلاص..بارك الله فيك خوي..ومدتله حق الأجرة..
هو خداها وتوكل وهي خشت داخل وسكرت الباب..
قعدت تمشي في الجنان بإحباط...
لين وصلت جهة النعناع والعطر..
قعمزت ع رووس صباعها حداهم وهي تشم في الريحه..
كانت تريح في نفسيتها شويه..
خدت نفس عميق..بعدين رفعت عيونها وقالت؛الفلوس هادم رزقك انت مش منيه من حد خديتهم بتعبي مش صدقه..رزقك.ياربي مش منيه من حد...اللهم لك الحمد...
"عمتي"..
وقفت عفاف ع حيلها وقالت؛نوسه..
جتها نسيبه وقفت قدامها وقالت؛عندي ليك خبر يارب يفرحك..
عفاف؛هاتيه هاتيه بسرعه!
نسيبه بإبتسامه؛اني حامل..
توسعوا عيونها ع الآخر بدهشة...
نسيبه؛انصدمتي ولافرحتي ولازعلتي مافهمتش!
عفاف طول خدتها في حضنها وقالت:خليل بيجوه صغار.!
نسيبه بضحكه؛معناها فرحانه..
عفاف:هادي اكثر حاجه تمنيتها من ربي...اهو يجيبي من يصبرني ع فراقه..عيل نشوفه فيه..
ونسيبه وهي ضم فيها دموعها نزلوا..
عفاف رفعت عيونها فوق وقالت:الحمد لله ياربي الحمد لله...
🍁ونسيبه بعد ماخبرت عفاف خبرت الباقي وفرحولها هلبه..
صالحه وتهاني ومريم..
بس فرحة مريم كانت بغصه..وقلبها ملاه الخوف من بعدين...
•••••••
طلعت من الحوش وفي يدها طرف مالفي ملفوف..
فتحت السيارة وركبت..
مريم:شن جو..
جهاد؛مليح..وشغل السيارة وتحرك..
مريم؛تحبي المالفي؟
جهاد بلهفه؛عيوني..
مريم"يابخته":اهو خود...وفكت الغلاف وعطتهوله..
جهاد خداه وهي بعيونه مع مع الخاتم اللي في صبعه الغنصر..
كان ياكل وهو يقول:شن خطر عليك!؟
مريم:مش اني..نوسه جاباته زردة..
جهاد:زردة شني؟!
مريم ابتسمت  بضيق وقالت؛حامل..
جهاد ضحك بفرح وقال:اوووو...خليل بيدير صغار.
مريم بإبتسامة؛فرحت؟
جهاد؛وهلبه....
تنهدت بإبتسامه وشبحت للطريق..
وهو مازال ياكل..
بعد كمل قال؛ترا كنيكس..
هي فتحت الدرج وعطتهوها..
هو خداه ومسح فمه..
مريم:خليني اني نمسح يدك..
ضحك ومدلها يدها..
هي شدت يده وقعدت تمسح فيها بالكلينكس وهو مرة مرة يشوفلها بإبتسامه..
شويه فكت الخاتم من صبعه وقالت؛طايحه في غرامك..
شبحلها لقاها تتكلم وهي تشوف للخاتم..
مريم؛عاجبني هلبه..
جهاد بضحكه؛كان بودي نقولك خوديه بس هدا هديه من بوي مانعطيه لحد..
مريم بإبتسامه؛معذور...ورجعت لبستهوله من جديد..
جت بتفك يدها هو شدها..
شبحتله..
لقاته يشبح للطريق وع وجهه ملامح ابتسامه خفيفه..
وقلبها بدي يدق بقوة.....
ورجعت الكلمه طلعت من القلب ووصلت لراس اللسان..
بس هو خلاها تبلعها لما قال؛شن رايك تباتي في حوش بوك الليله.
هي بضيق؛ع راحتك..
جهاد؛شن ع راحتي!اني نسأل فيك عن رايك تبي ولالا..
مريم فكت يده وقالت؛تو نشوف..
هو شد بإيديه الزوز الدومان وقال؛تمام..
وقعدوا ساكتين لين وصلوا لحوش بوها..
🍁وفي حوش بوها..
في المربوعه..
معاذ:تي ياراجل توكل ع الله وديرها العمر يجري راهو..
داوود بإبتسامه؛وخيرك ماديرها انت قبلي مادام عارف العمر يجري؟
معاذ ابتسم ع جنب وشد ذراعه بشي من الإحراج وقال؛نفكر..مش.عارف..
داوود؛شن اللي مش عارف !الالا هدا رد جديد قبل وين ندوي معاك في الموضوع هدا تقولي مازال..وتمدها لين نفسك ينقطع..وهو شديت ذراعك وابتسامات..غمزله وقال..اووي حجي شن في؟!
معاذ بضحكه:مش عارف..
كيف جي داوود بيتكلم..
خشت ام مريم وهي تقول:معاذ..اختك وراجلها جو..
تلاشت الضحكه من ع وجه داوود..
معاذ وقف وقال:برا؟
امه؛ايه توا كيف وصلوا..
معاذ شبح لداوود وقال؛شويه وجاي حجي..
ناض وقال؛لا خودني معاك مولي للعمل..
معاذ؛تمام..
داوود؛بالسلامه خالتي..
:بالسلامه ولدي سلم ع امك..
داوود؛يوصل..
ومشوا طلعوا هو ومعاذ...
شافوا مريم خاشه وفي يدها سفرة حلويات ووراها جهاد وفيده زوز صناديق عصير..
مريم لما شافت داوود ارتبكت..
وهو لما شافها غير عيونه عنها وهو مضايق..
وكمل طريقه طول للباب وهو يقول؛السلام عليكم..
معاذ؛وعليكم السلام..في امان الله..
طلع داوود من جنب جهاد اللي شبه عليه لما شافه لأنه كان متغير هلبه وهو لابس مدني...
معاذ:تفضل جهاد..
جهاد شبح لمعاذ وقال:يزيد فضلك..
خدي منه الصناديق وقال:علاش متعبين ارواحكم...
جهاد؛مافيش حاجه من قيمتكم..
معاذ؛لحظه وجاي..ومشي للكوجينه من برا بش يحطهم فيها..
هي كانت تشبحله بإستغراب بعدين شبحت لجهاد..
هو ابتسم وغمزلها..
ضحكت بعدين مشت خشت داخل..
ومعاذ ولاله:تفضل تفضل..
جهاد هز راسه وقال؛يزيد فضلك..كيف الحال..
معاذ:الحمد لله...
🍁🍁🍁🍁
"حامل!!؟"
ماجده بضحكه وعيونها دمعوا؛توا خبرتني..
سارة بفرحه؛ياعمري...خل نتصل بيها..
وماجده تشوف لسارة بإبتسامه من بين دموعها..
🍁في نفس الوقت..
خشت سيارة مجاهد الزنقه....
في اللحظه اللي طلع فيها رفيق هو ومرته من الحوش..
رفيق:كانك عليا اقعدي العمر مش غير تلاته ايام..
هي شبحتله بإشمئزاز...وكيف جت بتركب..
شافت سيارة مجاهد لما درست قدام حوش هيثم..
ونزل منها...شبحت لرفيق..
لقاته يشبحله بحقد...
ابتسمت بشماته وركبت السيارة...
وهو قعد واقف يشبح لمجاهد وهو يرن في الجرس..
شويه وفتح هيثم..
هيثم؛اوووو باش مهندس..
ابتسم مجاهد وقال؛دكتور..
وصافحوا بعض..
هيثم؛تفضل تفضل...
ودخله داخل وسكر الباب..
رفيق بغيظ ركب السيارة وسكر بابها بقوة قريب جابه في يده..وشغل السيارة وتحرك وهو يحرق في العجل..
وسجى متشمته فيه ع الآخر...
🍁🍁🍁🍁
"خليك مازال بكري ماهدرزناش"
جهاد؛وراي خدمه خديت اذن ساعه واهي فاتت ساعه ونص..
معاذ:مش محسوبه راهو مرة تانيه تفضل ع الغدي..
جهاد وهو يخفي في استغرابه لتغير موقف معاذ180درجه؛ان شاء الله...بالله ناديلي مريم..
معاذ:لحظه...
جهاد مشي طلع ومعاذ خش ينادي اخته...
قعد جهاد برا واقف يستنى..
ع جية مريم..
مريم؛شنو جوجو..
عقد حواجبه وقال؛اسكتي خيرلك..
ضحكت وقالت؛بيناتنا مايسمع فينا حد..وغمزت بعينها..
هو ضحك وقال؛باهي اسمعي ياعزوزة..شن صار بتباتي..
مريم:انت تبيني نبات..
هو شبحلها شويه بعدين رفع حواجبه فوق بمعنى"لا"
فرحت قريب طارت من الفرحه بس حاولت تخفيها وقالت؛هو اصلا هكي ولاهكي مانقدرش ..نزلت عيونها وقالت..مازال عروسه مايجيش نبات برا حوشي..
هو ابتسم وقال:تمام...معناها بعد المغرب نجيك.
مريم شبحتله بإبتسامه وقالت؛تمام..
جهاد؛بري خشي هي..
ضحكت وقالت:رد بالك ع روحك..ومشت بسرعه خشت..
وهو جاه معاذ سقده...وولى خش داخل لأخته...
🍁🍁🍁🍁🍁
دقت الباب وقالت...
ماجده؛السلام عليكم..مجاهد ولدي شن حالك..
مجاهد بدون مايشوفلها؛الحمد لله كيف حالك انتي خالتي..
وهيثم مركز معاه وهو مبتسم..
ماجده؛الحمد لله في خير ونعمه..شن حال امك والبنات..
مجاهد؛والله الحمد لله كلهم كويسن..
ماجده؛دوم ان شاء الله..
مجاهد؛الله يبارك خالتي صحيتي ع السؤال..
ماجده؛سلمك ولدي ربي يحفظك..ومشت من قدام المربوعه..
هيثم:اشرب قهوتك
مجاهد.ضم ايديه لبعض وقال: والله يادكتور اني جاييك في موضوع نبي نخش فيه طول..
هيثم عقد حواجبه بإبتسامه وقال:ان شاء الله خير!
🍁🍁🍁🍁
"جيت في وقتك ياجهاد"
جهاد:خير!؟
صاحب الورشه؛في جماعه في زليتين كلموني.عندهم سيارات كبار واقفات واني تمشي تشوفهم..
جهاد؛توا!؟
؛حتى غدوة مش مشكله..
جهاد:خلاص غدوة ان شاء الله..اني توا جاييك بناخد اذن لباقي اليوم وماتعطنيش يوميه ...
:ان شاء الله خير..
جهاد ابتسم وقال؛خير خير...
؛ماشي برا...وطلع من جيبه فلوس وعدهم بعدين مدهم وقال..وهادي يوميتك.
جهاد؛لالا مش واخدها شبه ماخدمتش اليوم..
؛انت اكثر حد يخدم هني...خود ياجهاد وماتردش حقك..
تنهد جهاد وهز راسه وخداهم وقال؛بارك الله فيك..
🍁وطلع من الورشه طول لطرابلس...
اول حاجه دارها خطم ع المغسله خدي لبسه ليه قاعده غادي...
ومنها توجه للحمام البخاري الخاص بالرجال..
جهاد؛كد ظهري كد وانزل عليه...
اللي يغسل فيه؛شن عريس مرة تانيه!
ضحك وقال؛قاعد عريس اني يامتخلف..
ضحك وقاله؛ربي يهنيك..وقعد يكد في ظهره بقوة..
جهاد؛:ايوه هكي...ظهري هدا بالذات منتهي من التعب..
وبعد ماطلع من الحمام بخري وهو يبرق وكأنه عريس في ليلة عرسه حق..
توجه لمحل حلويات..
جهاد؛هاه شن واتيه..
الموظفه؛ايه وكتبت العمر عليها ...
كانت طورطه كبيرة ومنظرها مغري..مزينه بشكولاته الميلكا عشق مريم...
دفع.حقها وطلع بيها...طول...
ومشي لمحل فضه..
جهاد؛راعينا شويه ياغالي..
:مش مشكله انت اختار وبعدين نهدرزوا..
جهاد قعد يشوف في السلاسل قدامه..
شاف وحطه ناعمه وتعليقتها ع هيئة فراشه لما شافها طول خطرت عليه...
ابتسم وقال؛هادي...
وبعدها ماخداها.
رفعها لمكتب تغليف هدايا قاللهم يديروها ع ذوقهم..وهو بعد العشي يجي يستلمها..
ومنه طلع طول لحوش اهل مريم..
خش سلم ع بوها وامها وهدرز عليهم شويه بعدين طلع هو وياها..
هدرزت طول الطريق وهو يسمع فيها...
لعند ماوصلوا للحوش..
جهاد؛بنمشي نصلي العشي وبعده بنقضي مشوار..وانتي..بعد ماتكملي الحوسه مع اللي لوطا رتبي الجو فوق السطوح..والبسي احلى حاجه عندك..
هي كانت تشبحله بعدم فهم..وقلبها قريب يطلع من مكانه..
هو قرصها من انفها وقال؛نكلم فيك..
بلعت ريقها وهزت راسها وقالت:باهي..
جهاد ابتسم وقال؛هي انزلي..
نزلت مريم وهي تاخد في انفاسها بسرعه..
وخشت للحوش وحطت يدها ع قلبها وقعدت واقفه تفكر في اللي صار..
حلم...علم...وهم!!؟
وفيسع ماصدقت انه حقيقه..ومن فرحتها زي الفراشه وكأنها طير وهي  راكبه تجري بش دير اللي قال عليه..
🍁🍁🍁🍁
"بنرقد يافرخه دانيه عيوني بيتسكروا"
دانيه:ياسرك نوم ياكوالا..وخشت بيها للصاله..
غمضت رتاج عيونها وقعدت تضحك..
مجاهد.بإبتسامه:تعالي خشي..
فتحت عيونها وقالت بضحكه؛واخيرا عرفت في شنو كنتوا قارنين الروس..
وخشت ووقفت ع الطاوله...
اندهشت لما شافت صورتها ع التورته..
رتاج؛انت مجاهد !؟
مجاهد اشر بعيونه ع دانيه..
رتاج شبحتلها..
دانيه؛عندك قريشات دسيتهم ع تركينه درتلك بيهم هالحاجه بسيطه..
رتاج وعيونه تعبوا دموع؛ياعمري...وحضنت اختها..
ودانيه حتى هي عيونها دمعوا..
وامهم تشبحلهم وهي متاثرة وتقول:ربي مايحرمكم من بعض..
ورشيد شاف لمجاهد لقاه يشبح لخواته بإبتسامه حب..
ابتسم حتى هو بحب..
🍁وفي دار مجيد..
مقبوله:الله المستعان كل حاجه مخالفه للسنه يديروا فيها صغارك..
مجيد؛خليني منهم توا..المهم بعد يكملوا دوشتهم طلعيني مانبي شي من اللي جايبينه يفوتني..
مقبوله وهي متسهفه اكثر منه بس تحاول تبين العكس:حاضر..
🍁🍁🍁🍁
وجهاد في المسجد..
بعد صلى العشي..
صلى استخاره...ودعي من قلبه...
وبعدين طلع من الجامع وتوجه طول لمكتب تغليف الهدايا..
خدي الهديه وحط اللي عنده كله..
ومشي ركب سيارته...
غمض عيونه وقال:يارب مايجيني يوم ونندم يارب..يارب
فتح عيونه وخدي نفس بعدين تحرك بالسيارة..
🌸ومريم...
لبست احلا قفطان عندها الخمري اللون..
اللي لبساته لما جو خطبوها..
وزينت شعرها القصير..ووجهها بزينه غير مبالغ فيها..
وكانت طالعه غايه في الرقه واللطافه والجمال..
لبست بشت ووشاح ومشت ركبت فوق السطح وقعمزت
تستنى فيه...
🍂🍂🍂🍂
"سنه حلوة ياريتا...سنه حلوة ياريتا..
سنه حلوة..سنه حلوة...سنه حلوة ياريتا..."
ورتاج تتفرج عليهم وهي تضحك...
فرحت من قلبها لما دارولها حفلة ذكرى ميلادها "مش عيد"
وفرحتها في هديكا اللحظه نستها كل همومها...
🍁🍁🍁🍁
ومريم..
اللي كان في نفس اليوم ذكرى ميلادها..
كانت تبي تنسى كل شي بشع عاشاته...
كانت تبي تفرح بكسب قلب الراجل اللي حباته بصدق حب حقيقي وتكمل معاه عمرها كله...
🍁وهو كان جايها في الطريق وقريب يوصل..
فجأة رن تليفونها بنغمة رساله...
درس قدام الزنقه..وخدي تليفونه وفتح الرساله....
ويشوف شي نزل ع وجهه صفعه بقوة
صدمه...وفيقه...
صورة لمريم مع جهاد في الكليه..
واقفه عليه وتاخد منه حاجه..
بعدها جاته رساله...
(هادي اللي فضلتها شوف شن دير من وراك.!؟ يكون في علمك هدا زمان كان يجيها للكليه ونلقى فيهم في التراكين..
واليوم ع الملأ....للهالدرجه مش حاسباتك راجل!! لكن تستاهل ياجهاد تستاهل...)
🍁🍁🍁🍁🍁
مقعمزين في المهجع متاعهم..
اللي يهدرز واللي يقرا واللي يسمع في الراديو...
فجأة...
خشوا عليهم عناصر ومعاهم مسؤول المهجع ومدير السجن..
مسؤول المهجع:تحرك انت وياه اوقفوا صفين مقابلين بعض..
المساجين دارو زي ماقاللهم وهما مستغربين..
عقيل؛خير ياافندي شن صاير؟
مدير السجن؛تو تعرف..
وخشوا العناصر وبدوا يفتشوا في الديار..
زياد؛اقل حاجه فهمونا شن في..
مابي حد يجاوبه..
شويه وبدوا يطلعوا من الديار وهما يقولوا نظيف..
وقعدت بس دار فاتح...
اللي طلع منها العنصر وفيده سلاح ابيض..
كلهم شبحوا لفاتح..
وفاتح.قعد يشبح للسلاح وهو عاقد حواجبه وقعد ياكل في شاربه من الغضب...

#صلوا_على النبي
#قلوب_منكسرة
#البطل_المغمور2

...يتبع....