الضابط و المهندسه

البارت التاسع والثلاثين

ضلت يارا صافنه وامي تحجي واتفمهمه
يارا: شنو يعني
سناء: يعني يعقد عالبنيه لحد ما ابوه يرجع من السفر ويطلكه ماكو غير هذا الحل
وليش يعقد عليه ماعده اهل يتكفلون بيه
مو داكتلج اهله مايريدوه
واسسسر شعليه يطبه مرض هيه وابوه
يمه انتي عاقله وتفتهمين مايصير يدخل ويطلع عليه وهيه غريبه عليه
والله مايتزوجه
اسر: مو زواج مو زواج بس عقد
انتى عاااجبك الموضوع اكيد تكعدددد تبررر حتى تقنعنييي
اني ما جاي ابرر واخذ رخصه منج اجيت انطيج علم
لا اكثر ولا اقل
وانيييي
شبيج انتي تبقين مرتي
شلوووون تتزوج عليه...والله لو هاي البت لو انييي
ولج متزوجه اريد اتونس غير كتلج ابوه خلاه بامانتي يريد يسافر
يعني تتزوجه
اي
لعد اني ما ابقى هنا
لا تبقين منو لازمج
باوعتله مصدومه ودموعي بعيني
لميت ملابسي وملابس اطفالي بسرعة وخالتي واكفه تحجي وياي وتحاول تقنعني واسر نزل
هالكد اني مومهمه عنده
ماكو اول فرصه زواج اجت كبل كال اي
وباعني
بس والله ما ابقى
خابرت مروان كتله يجي لبست جبتي ونزلت لجوه اخذت الاطفال وطلعت انتضر مروان وكله تحجي وياي واني ما اسمع كلشي واسر بعد ما شفته الاطفال استغربو وسيوفي يريد يبجي
اجه مروان اخذني
مروان: شبيج ما تحجين
ماكو شي
ها!! طالعه من بيتج بالليل ماكو شي...خالو شبيه امج
رهف: تعاركت ويه بابا
هاا هيج اكول جنطة ملابسج واطفالج يعني بيه عركه
وصلنه لاهلي نزلت بابا ماموجود بس مراد وماما وميلان
استغربو جيتي بهيج وكت
رهف وسيف راحو يلعبون ويه قيس
واني كبل صعدت لغرفتي وماما وياي كعدت افكر واحلل وارجع الكلام وامي تحجي وياي بس بالي مو يمه
حركتني من ايدي
ميرال: يااا مو داحجي وياج
اسر يريد يتزوج عليه
كلت هيج ونزلت دموعي
ماما انتي متاكده اسر يحبج مامعقوله
جذااب والله مايحبني هو يحب كل نسوان العالم اله يارا
هو بلسانه كالي راح اتزوج
والله ما تدخل براسي اسر ماتزوج عليج يجوز سمعتي هيج بالغلط
ماااامااا شبيج هو كالي والله
شنو شكالج
سولفت لامي كل الكلام الكالته خالتي واسر
يعني ضرف ما متزوج لان انتي ناقصج شي او يريد شي ما موجود بيج
لا هو مايريدني
زين دكافي مسحي دموعج ونامي ولاتبطلين طبع الاستعجال
هسه انتي ويايه لو ويا
مو وياكم ثنينكم نامي
جيبلي سيف ورهف
هسه
نزلت امي واني بدلت ومددت افكر واغلط عليه اريد اطلع حركتي بشي اريد اكسر الدنيا بس ارجع اكول مايستاهل اخرب شي علموده
اجت ماما بيده الاطفال
رهف: ماما اريد بابا
رهوف تنامين بدووون صوت تره روحي طالعه من خشمي
نيمتهم واني ضليت افكر ماكدرت انام
طلع الصبح نزلت يم اهلي
ميلان: امس حتى سلام ماسلمتي عليه شدعوه
اكول ما تنطمين مو احسن
اجه بابا سلمت عليه وكعدنه نتريك واني كوه اكل كل بالي يمه اكيد هسه يروح يتزوجه
خل يتزوجه اني ما ارجلعه لو يموت
عمار: يارا يمتى اجيتي
امس بالليل بابا
سيوفي ورهف وياج
اي ويايه نايمين فوك
كملو ريوك وطلعو لشغلهم فرغ البيت بابا صعد ينام لان امس خفاره وتعبان وماما صعدت وراه وميلان بالمطبخ
كعدت يمه
ميلان: اي عيني كولي شمسوي الاستاذ حتى جايتنه
ولج اجه بكل عين صلفه يكلي راح اتزوج
عززززاااااا
لا وجايب امه حتى تتوسلطه
انوووب زين سويتي من عفتي واجيتي
مجرد الفكره تخوف يعني يتزوج عليه والله انجلط ابد مايصير بعينه ذاك اليوم من صار ويا حادث شفتي شصار بيه
سوده عليه
مايستاهل ابد لو ميته منو يفيدني اسر
لا طبعا ماعليج عوفي شبيج الف واحد يتمناج تزوجي وقهري
شو انتي طلعتي طول اني ماتزوج اسر كل حياتي
لعد مو هسه دكولين مايستاهل
بغباء: اني كلت هيج
وثووول كومي من كدامي انتي مو مال نصايح
للعصر كاعده بالصاله الفوك صافنه بالحايط سمعت صوت اسر طفرت بسرعه
هذا شجابه باوعت من المحجر عالصاله الجوه اي وعلي هذا هو دخل مبتسم وكاشخ مبايله وسويجه بيده
شو هذا ولامهتم لغيابي معقوله مالي معزه بكلبه
ولو هو منيله كلب اصلا
كعد هو وبابا ومروان ومراد وماما ورهف وسيف ركضوله حطهم بحضنه ويبوس بيهم
اجت ميلان
ميلان: ها ولج شو اجه دروحي طردي
اششش خل اسمع شيكولون
كعدت عالبايات مال الدرج واتصنت
عمار: اني سمعت كلام بس اعرف بتي ما تحط الصوج بيه اريد اسمع منك انتى جبير واعي وافهم
اسر: والله عمي الحياه اشكال بيه ومو كلشي يجي مثل مانريده واني صاحبي كال بتي بامانتك لحد ما ارجع من السفر واني كلت لا...لان زحمه هذا الرجال نفسه الدربني ووصلني لهذا مركزي واله وكفات وياي...والطالبه مني مو صعب...اسألك بالله عمي تراضه مروان يدخل ويطلع على مره غريبه
لا ما ارضه
واني كلت اعقد عالبنيه عالورق مجرد اشوفه شمحتاجه
انتى تعرف بنيه وحده ما ترهم خصوصا هنا بالعراق
واني كتله ليارا لحد مايرجع ابوه اطلكه ولا كانما شي حدث بس بتك الله يسلمه ما تتفاهم لمت ملابسه واخذت اطفالي وطلعت من البيت
واني كتله ما ضميت عليه شي ولو غيري يروح يتزوج ومايكول بس اني مرتي واعزه وما اضم عليه شي حتى مادكول خاني لو من هاي سوالف النسوان
ميلان بهمس: ولج خليتيني اخذ غيبة الرجال طلع عنده ضرف الله يطيح حضج
يارا بهمس: حتى لو ضرف بس ما توصل يتزوج عليه
عمار: هاي هيه عمي هاي حياتك محد يعترض بس اني ردت اسمع منك وافهم الموضوع وانتى رجال والرجال ينعرف بوكفاته وعيب اذا يرد احد وهو يكدر يسوي كلشي...ويارا ماعليك بيه ترجع وياك
نزلت بسرعه وصحت
والله العضييييم مارجع
اسر: خليه عمي براحته بس اخذ سيف ورهف وياي وخليه هنا
شهكت ورحت شلت سيف من حضنه...ابويه اشرلهم يكومون طلعو وعافونه وحدنه
انوب اجيت على اطفالي ماخليك تاخذهم روح اتزوج وعيش حياتك شنو عبالك ماكدر اعيش بدونك
بابتسامه: لا اعرف اعرف كلش زين شلون تكدرين تعيشين بدوني واضح من عيونج امس باجيه بسببي
اني ما ابجي بسبب واحد مثلك
بابا تروحون وياي لو ويه ماما
رهف: وياك
يارا: همه اطفال مايكدرون بدوني
لا يكدرون....شلت رهف
انطيني سيف
لا اسر فدوه عوفهم الله يخليك
تريدين ارجعي وياهم
شنو ماعندي كرامه ارجع وياك
ومنو المقترب من كرامتك
يعني اكو اكثر من انو تتزوج عليه
اي حقج....انطينيا
سيف يرضع مايكدر بدوني عووفه
نزل رهف وسحب سيف مني بالكوه واني ابجي واتوسل بي
اني اطفالي مايبقون هنا يعيشون ابيت ابوهم وانتي الطلعتي من ذاتج محد كالج اطلعي وهسه تردين ترجعين لو لا
عوفهم يمي
خلص براحتج
اخذهم وطلع اني كعدت ابجي
اجت ماما
اخذ اطفالي منيييي
ميرال: ابوج طلع يحجي وياه هسه يرجعهم
مايرجعهم والله مايرجعهم اني اعرفه يريد يحررك كلبي
كافي ماما ميصير هيج وين ماخذهم غير ابوهم
سيف يرضع على صدري هسه يموت من الجوع واسر ميقبل يشرب من الحليب المعلب هسه شلون
شويه ويرجعهم كومي ارتاحي
صعدت لغرفتي ضليت ابجي لحد ما نمت كعدت ب11
بليل نزلت لجوه لكيت بابا ومروان كاعدين
كعدت يمهم
مروان: عليمن عالبجي على اسر لو عليمن
على سيف ورهف ماينامون اله اني انيمهم
هسه يومين يمل منهم ويجيبهم
عمار: بابا تره زوجج فهمج كلشي ماكو داعي للزعل
يعني يتزوج عليه وما ازعل لعد شسوي
انتي مقصره بشي حتى يتزوج عليج
لا
وهو اساسا ما متزوج لان انتي مقصره بشي متزوج حتى يتكفل البنيه لحد مايرجع ابوه وكالج فتره موقته
خلي حتى لو يبقى وياه طول العمر مايهمني...انتى ماتردين اكعد هنا لو شنو
شنو مثكله علينه البيت بيت ابوج تجين باي وقت بس اني داكلج بيت زوجج ميصير تعوفي على شي بسيط
مو بسيط جبير كلش
بكفيج بعد
ضليت الوب عليهم يوميه اكول هسه يجيبهم هسه يجيبهم ماكو ايست اسر ابد ما اتصلت عليه
صرت اعرف اخبارهم من نيفين
دكول رهف عادي تعلب بس وكت الاكل اسر يوكله
بس سيوفي يبجي واسر يوكله فواكه وجايبله حليب
مايكدرون يعيشون بدوني
هههه وانتي ليش رحتي
باع ليش كلكم تسألون نفس السؤال ولاكانما تعرفون السبب...اكلج هو عقد على البنيه
اي صار اسبوع
صدك ماعنده ضمير ويروحله
حسب ماسمعت من ياسر اي يروحله باليوم مره وتروح وياه خالتي
بلهفه: صددددوك خالتي تروح وياه
اي
عود ليش تروح وياه شنو بديكارد
مادري
يله المهم تروح وياه
انتي مطوله عد اهلج
اي مطوله واحتمال مارجع ايد
ارجعي علمود اطفالج
صعبه
نهيت الاتصال ونزلت مراد كاعد
مراد: اكلج مو جنج استقريتي هنا
تره مالي خلك اسكت
زين وصلت للضرب لو بس صياح
لا مايضربني
لعد انتي تضربينه
اممم ماتضحك
لا صدك هم ضاربج
لا والله ابد مايضربني
ولا راشدي
ولا ابد
زين والله لو غيره يطيح حضج اطلعين من البيت وتعوفين اطفالج وزوجج يطلكج كبل
خل يطلك عااادي
ومن اكول ماريد اتزوج محد يفهمني
التهيت ويه اهلي واحاول انسى من جهه اسر وبروده ويايه و سيف من جهه ثانيه لان هو اكثر واحد اهم بي كلشي اسويله اني بيدي
قررت اروح للشركه بدلت وطلعت وصلني مروان بطريقه
دخلت
والله صار هواي مجايه ولاشايفه شكو ماكو
بلشت اشتغل اريد انسى التكفير دمرني
جان اكو اوراق لازم يزن يوقع عليه طلعت لمكتبه
دكيا الباب سمعت صوته
يزن: ادخل
دخلت بهدوء وشفت ريان واكفه يمه وتعدل بملابسه ومتوتره كلش بس شافتني انصدمت كبل طلعت
هاي شبيه ابد مو طبيعيه
كام يون وكف كبالي
يزن: شعجب اتذكرتي اكو عمل لازم تلتزمين بي
ماهتميت لكلامه
هاي الأوراق عود وقع عليه اذا فرغت
التفت اطلع لزم ايدي احس النار شبت بيه بودي اخنكه
خزرته ونترت ايدي
اسف نسيت انتي متزوجه...جان المفروض اتبع قانون العشائر وانهي عليج
تبقى همجي وابد مايتغير لا تفكيرك ولا اسلوبك
انتى ناسي نفسك لو اذكرك شنو الطريق التمشي بي احقر وحده ماتقبل بيك بس انتى لزكت الموضوع وقبلت بالتقبل بيك وبشكلك
بسببج بسببج انحرفت لهذا الطريق
شنو سحبتك من ايدك وكتلك اتفضل...لاتسوي غلط وتركبه لغيرك اذا ماتحب تحط اللوم على نفسك
طلعت بسرعه للحمامات غسلت ايدي
اووف لعب نفسي
اني مايلمسني غير اسر
بس هو زوجي وحبيبي
يززن حقير
رجعت للمكتب لكيت 4 مكالمات من اسر
اسم الله ليش داك عليه شكو دكيت عليه بسرعه جاوبني
اسر شكو رهف وسيف بيهم شي
اسر: وين جنتي ليش ماتجاوبين
جاااوبني اطفاااالي بيهم شييي
ذوله يلعبون يمي...وين جنتي
احم عندي شغل
شنو هذا الشغل بله
انتى ليش داك عليه احنه مو زعلانين مع السلامه
تعااااااي وووولج
ببرود: نعم
انتي بالبيت
لااا
لااا لعد وين
تره وقتي الثمين ديروح تريد شي كول بسرعه
ومحمد اذا مادكولين هسه اجي اسحلج سحل
هو انتى وين تعرف مكاني حتى تجي تسحلني
احجيييييييي
بالشركة
ومنو كالج تروحين هاااا ليش ما كتيلي
هذا مكان شغلي ميحتاج اكلك
لا يحتاج هسه ترجعين واذا عتبتي باب بيت اهلج بعد اكسر رجليج واني اعرف شلون اتصرف وياج غبت عنج اسبوع كمتي تلعبين بكيفك
بعصبيه: شنووو قصدك تعلبين بكيفج شنو اني مامتربيه وتتهمني هيج اتهام باطل رجا لاتتصل عليه بعد...
سالته بهدوء: بس كولي سيوفي مابي شي هم يشتاقلي
مع السلامه
سد المبايل بوجهي اووووووف وين اولي يعني ماتعدي فتره اذا ماتطلع مشكله تكلب حياتي
ابد ما اعيش مرتاحه ابد
خابرت مروان يجي ياخذني كال اكمل دوام وامر بيج
اجه اخذني
اكلك هم شفت اسر اليوم؟
مروان: لا ماخذ اجازه
صددوك اكيد علمودهم
منو ؟
هيج
صدك مساع خابرني وكال لاتخلي يارا تطلع بعد
ماعليك بي وين طالعه غير للدوام
زوجج هذا لازم تسمعين كلامه وماتطلعين عن كلامه اولا عيب وثانيا حرام شرعا
عوفك من هاي السالفه ماتروح تجيب سيف ورهف والله مشتاقتلهم
انتي ماتعرفين زوجج ماينطيهم انتي امهم اخذهم منج ينطيناهم اكيد لا
لعد شلون راح اموت اريدهم
الله كريم صبري شويه
بليل اتصلت بنيفين وفتحت كامره وصورتلياهم من بعيد شلون يلعبون اباوعلهم وابجي
راحت نيفين
دخلت عليه ماما حضنتني وضليت ابجي بحضنه
والله ما اتحمل وجع مو كافي الشفته
ميرال: كافي يروحي كطعتيي كلبي باجر ابوج يروح يجيبهم اسر يحترم ابوح ويحبه ومايكله لا يروح يجبهم الج بس لاتبجين
ثاني يوم المغرب كاعدين بالصاله ننتضر العشه
سمعت صوت الجرس طلع مروان واسمعه يسلم وصوت رهف رن باذني كمت بسرعه
دخل اسر شايل سيف ورهف تمشي بصفه
سيف ماد اديه يريد اشيله اخذته من اسر وحصنته حييل ابوس واشم بيه
يعمري ياكلبي وين رحتو وعفتوني
كعدت وابوس بيهم وهمه حاضنيني
رهف: ماما بابا كال سافرتي
باوعت لاسر جان بارد كلش ولامتاثر
انتي اشتاقيتيلي
اي كووومه
حبيبتي
انتضرنه بابا يرجع جان طالع
كعدنه نتعشى ويسولفون واني اوكل برهف وسيف ونسيت نفسي وياهم
ميلان كالت اني اوكل رهف كتله لا اني اوكلهم
صعدت لغرفتي شفت جنطه فتحته جانت ملابس سيف ورهف
رهفو ماما بابا ليش جابكم
رهف: كال نروح نكعد يم ماما
والله يعني يعوفهم يمي
بدلتلهم وقصيت لرهف قصه وسيف يكوم ويكعد على الجربايه حتى يهتز
حطيته بحضني واهز بي وهو يحجي حجي ما مفهوم
حطيت راسي عالمخده و رضعته
الغرفه ضلمه وبارده
سمعت صوت الباب باوعت هذا خيال اسر
ماهتميت حسيته مدد وراي حضني ويشم بشعري
حسيت نفس احساسي كل مره
اسر بهمس: عوفي سيف دوريلي
سويت نفسي ما سمعت كرصني بضهري درتله
هممم
كومي نزليهم بالكاع
هللللو وليش ماتنزل انتى شلون انزل الصغار وانتى هنا مرتاح اهم شي راحه اطفالي اذا متضايق انزل
درت وجهي شفته كام شال رهف حطه عالتخم وحطله مخده حتى ماتوكع
ورجع وراي
هاي ليش متخاف تخوكع من التخم المكان ضيك
كعد سيوفي يبجي مو هستوه نام شكعده
فتحت التيبلام وكعدت ارضعه واسر يسولف وياه ويدغدغ بي
وهو يضرب بي ميقبل
نام ورجعته عالفراش
انتي مصدكه اني ابدلج بوحده ثانيه
اي
هيج ماتحسين بحبي الج
يعني من تجي دكلي راح اتزوج شتتوقع شنو شعوري افرح لو اباركلك
والله ماتملى عيني وحده غيرج انتي حبيبتي وام اطفالي شنو ماعندي ضمير هيج ابيعكم بسهوله انتهم كل دنيتي وكتلج وارجع اكول تزوجته فتره مؤقته مو العمر كله والله كوه عليه ماكدر اشوف مره غيرج
انتى تروحله؟
اي طبعا اروحله اشوفه شنو محتاجه وارجع
يعني شكد اطول عده
شنو شكد اطول عده بدون اسئله سخيفه
تقرب يبوسني دفعته
وخر والله اشمرر روحي منا...اشرت عالبلكونه...اذا تتقرب مني
لزم اديه وباسني حيل
يييع وخررر
ضربني على راسي
هاي عليمن ال يييع
مد ايده يفتح دكم القميص مالتي ويباوعلي ويرفع بحواجبه واني احذر بي...وخر
صيري حبابه اهلج منا لاتفضحينه
هسه اصيح بابا عليك وخر
باستهزاء: ههههههاي خرب بيوج والله تضحكين
شنو ابوي مو بعينك تستهزء بي
هو وبته بعيوني
عاندته وعاندته وماكدرت عليه
اسر بضحك: نحن لا نهزم
سحبت الغطى عليه ودرت وجهي لسيف ونمت
كعدت على صوت سيف يبجي واسر نايم
باوعت الساعه ب8 ونص
صباح الخير يماما صباح الورد يروحي
هو يباوعلي ويبتسم
فتحت مبايلي ودخلت على لعبه اطفال وانطتهيا يدوس بي
درت لاسر نايم على بطنه دوم ينام هيج ضليت اتأمل بوجهه سمعت صوت شي وكع اسر فز من الصوت
درت لسيف لكيت مبايلي واكع بالكاع
ااووو سيوفي شلون توكعه
نزلته من الجربايه وراح لرهف يكعده يضرب على وجهه
عاط بي اسر
اسر: ولللك بابا اختك خطيييه...باوعتله....صباح الخير
مارديت سحبت قميصي لبسته اجيت اكوم لزم ايدي
تحضري قبل الغده نرجع للبيت
ارجع وحدك
ترجعين وياي غصبن عليج خوووش ماريد تمزعل وسوالف تعبانه وانتي تعرفيني ما اكعد اتوسل بأكبر واحد واذا ماتريديني رجعي علمود اطفالج حرام يتبهذلون واني ماكدر ادري بالي عليهم مثلج
كمت سبحت وطلعت بدلت ومشطت واسر يسبح ورهف وسيف يهوسون بالغرفه حبيباتي صوتهم وهوستهم عندي اجمل اغنيه بالعالم
نزلتهم لجوه وصارت هوستهم ويه قيس بفلس
ومراد يصيح عليهم مراد يتعب من الدوام لان دوامه خفارات
نزل اسر وكعدنه نتريك واسر كاعد بصفي
اسر: احنه اليوم نرجع لبيتنه انشالله
عمار: براحتكم اذا تريدون ابقو هنا
مشكور عمي البيت بيتي قابل مستحي منكم...باوعتله ماعاجبه الحجي...بس احنه اتفقنه نرجع سوه
مروان: سبع والله ماصارلك 24 ساعه اقنعته ترجع وياك
الكل: ههههه
كملنه ريوك وصعدت اجت وراي ميلان
ميلان: اساعدج تلمين غراضج
شنو ولج بسلا ماعاجبج كعدتي هنا
لا حبي مو هيج بس اني اريد اصلح بينكم
امممممم تصلحين بينه وين كلامج عوفي واتزوجي
غير انتي طلعتي الرجال مو خوش ادمي وخاينج وضالمج كتلج عوفي بس طلع هو المضلوم
لميت غراضي دخل اسر
اسر :كملتي
امم
سلمت على اهلي وماما توصي بيه عباله اسمع كلامه بس اكله اي وما انفذ
رجعنه للبيت سلمنه وكعدنه
نيفين: والله ستوه نور البيت وين رحتي وعفتينه
سناء: لا يمه هذا بيتج شلون تعوفي ميصير
ياسر: عود ليش المره من تعرف بخيانته زوجه فورا تغادر البيت
نيفين: طبعا تغادر البيت لعد تكعد تباوعله وترفع معنوياته اكيد تزعل
هو الشرع حلل اربعه لو اني غلطان
لا حبيبي وحده ومن تموت كمل دينك واتزوج الثانيه
واذا ما ماتت
سناء: يمه الله يبعدنه شنو هذا الكلام شنو تموت شنو تتزوج اني ولدي مايتزوجون ثنين
يمه يكولون مو رجال الما يثني هذا اسر بطل وسواه
لعد اني ليش كله واكفه ضدي
اسر حكمته الضروف ولو ماعنده هيج ضرف والله اغضب عليه ليوم الدين اذا يتزوج على مرته انتى شعندك من ضروف كولي
والله كلام خالتي درر لو هيج الخاله لو ماتراد
نيفين بشك: انتى ليش تحجي بالخيانه هواي اكو شي
ياسر: استغفر الله شنو هاي الافكار الشيطانيه...اسر انتى ومرتك عديتونه لو شنو
يارا: لا انتم وراثه عمي وانوب اسر ويجوز جاي دورك
الله يسمع منج خويه كولي امين
صعدت لغرفة الاطفال حطيت ملابسي بكنتورهم وكعدت العب وياهم
نزلنه عالغده سلمت على عمي جان فرحان برجعتي
كعدنه ناكل وهالمره ماكعدت يم اسر
صح رجعت ويا بس ما اسامحه
وارجع مثل قل واتعامل وياه
كزوجه صالحه
هو حس عليه بس غلس ماكال شي
ضليت انام بغرفة رهف وسيف واسر مامعترض بس يبسمر بالحجي لان مبتعده عنه ورهف كل يوم تسال اسر وين العروسه قصده عالبنيه التزوجهه
اني حتى اسمه لسه ما اعرفه
مره كاعدين نتعشى وبيبيتهم يمنه
ياسر: يابه يكلك جاي مرض كورونا للعراق
محمد: اي سمعت بهذا الخبر من الصين اجانه
فتاك مو مرض كبل للكبر
الحجيه: اسم الله الرحمن الله يحفضنه منه
حجيه يكولون مايصيب بس كبار السن
يااااا ولك شتريد مني
الله يطول بعمرج اني ماقصدي شي بس هيه كورونا بعد
ادور وين الحبير تروح ليه
اسر: لاتخافين اني احطلج كونكريت مسلح لاتجيج كورونا ولا اي مرض
انتم سمعو كلام الصحه وماكو اله كل خير
ياسر تعرف صاحبي علاء
اي اعرفه شبي
مرته خاطبتله وباجر عرسه
عليك العباس
وداعتك خويه والولد عزمني بس ماروح
ليش
خويه غير اموت من القهر يعني صاحبي مرته تخطبله واني لا حتى الله مايرضى

اي حقك شنسوي بعد هاي قسمتنه

الحجيه: انتم شبيكم تبسمرون شبيهن نسوانكم شو حلوات ومثقفات وشهادات شتريدون بعد

اسر: حقج دكولين هيج ماعايشه الضيم العايش بي اني

زعله حبايب ام سيف حبابه شكم يوم وترجع مثل قبل بس تريد تتأقلم ويه الموضوع
رهف: بابا وين العروسة مالتك

منين بابا ياعروسه هاي ماكو بس امج

كملنه عشه وغسلت المواعين وصعدت انام لكيت بس رهف بالغرفه
ماما اخوج وين
رهف: يم بابا

هاا

اروح اجيبه لو لا...لا خليه شويه واسر يجيبه
طفيت الضوه ونمنه كعدت ب2 على صوت اسر
اسر: يارا كومي ياراا

هاا

سيف يبجي جوعان

وينه

هناك بالغرفه

روح جيبه

كومي انتي اني مابيه حيل

راح واني كمت للغرفه لكيته كاعد بس مايبجي
مددت يمه ورضعته ونسيت نفسي وغفيت
كعدنه الصبح على صوت سيف
.
.
.
انتضروني بالبارت الاخير
انشالله باجر انشرهه 🌟