قلبي لكِ

الحلقه الـ14

زاي الربيعي

""

ضلينا نسولف وبعدين هو راح عنده شغل ، رجعت نمت وكعدت ثاني يوم نفس الملل ، غسلت الماعين ويه البنات وصعدت لغرفتي اجت ريماس يمي

ريماس : حُب كومي نسوي جو
نور : شنسوي
ريماس : نمكيج و نبدل
نور : مالي خلكك
ريماس : كومي حبابه

كمت يمها وهيه طلعت مكياجي وبدت تمكيج ، وانا اباوعلها مابيه ، ريماس حبابه و لطيفه لكن احياناً احس عدها سوالف

طايحة حظ ، وتسوي اشياء وره اَهلها ، فد مره مريت من غرفتها واسمع ضحكتها والغزل عرفت جاي تخابر احد بس

مادخلت وسكتت ، ومره ثانيه جان تلفونها كبالي لكن مالعبت بي ولا اجاني فضول اشوفه ، بس هواي تجي رسايل الها ، بس تخاف تحجي شي كبالي عبالها احجي لوليد ، اخذت

فستان مني ولبسته ، جان قصير و ومابي ردن ، اجت سحبتني تريد تحطلي مكياج بس رفضت وهيه اصرت ، حطيت مكياج خفيف لكن هيه تكثر بالمكياج

ريماس : نوررر ماحلوو هيج كثري
نور : ماحلووو

اجت حطت حمره طوخ ، وكحل و الاينر ، باوعت لنفسي بالمرايه كلشش تغيرت ، اول مره احط هيج مكياج ، بدت تدور فستان البسه ، وطلعت فستان يصير لرگبه وضيگ والردن يصير منفوش و وبي فتحه من الظهر و فتحه من الصدر ،

نور : تره كلش تغيرت
ريماس ؛ تخبلين ، يلا نصور

طلعت تلفونها ودخلت ع لسناب ، وبدينا نصور بس واهس ماعندي ، وهيه تطلع اغاني وتصور وانا كاعده ع الكوشه انتظر رساله منه اجت رسالة فتحته شفته من صديقتي طفيت التلفون وكمت اصور ويه ريماس احاول انساه ،

نور : دزيلي الصور
ريماس : اوكي ، تعاي اصورج وحدج

صورتني ع المرايه و بدت تصورني ، كعدت ع الكوشه وشفت رساله منه كاتب

"" الو

كلبي يركص من الفرح ، دخلت ع المراسلة كتبت
"" وينك
"" جنت جاي اشتغل كولي شبيج
"" وين انتَ
"" ب الموصل

( الكلام كله ب 2015 )

"" وليد انا كلبي رح ينتهي من القلق وانتَ تحجي ببرود الله ينطيني البرود اللي عندك

"" فضيها اريد اروح
"" تمام صارت هيج بايي

سديت التلفون وانا دموعي ع خدي شفت كاتب رساله
"" بسيطه

كمت مسحت المكياج وانا ابجي لبست تراك عادي ورحت تغطيت ونمت ...

صار شهرين ع غياب وليد وانا بدت نفسيتي تتعب ، بديت اتقيى وأتعب ، كلش تعبانهه رحت للدكتور انا وزوجة عمه

الدكتور : حبيبتي مو حامل لكن هاي بسبب التعب والنفسية اذا تعبتي هذا الشي كله رح يحصل وقلة الاكل