قلبي لكِ

الحلقة الـ30

زاي الربيعي

"" تسريع الأحداث ""

،،دخلت بشهر الرابع ، جاي تمر الايام بدون مانحس ، يعني تخيلو ذاك اليوم انا حامل واليوم شهر الرابع ،

جنت كاعده انا وريماس نسولف فجاة اندك الباب بقوه ، وجان وليد ما موجود لذالك خفت افتح الباب وجان يجي صوت خديجة و زهراء يصيحن

رحت فتحت الباب وهجمن عليه ويضربن بيه ، حيل اتاذيت وانا مااكدر أتحرك وريماس توخرهن ، وبعد ماحسيت بشي

فتحت عيوني انا بالمستشفى و وليد لازم ايدي ومحد بالغرفه ، باوعتله وجان عيونه كلها قلق وحزن

نور ؛ طفلي شلونه
وليد : الله يعوضنه

من گال هيج حسّيت كأنو صخر و طاح عليه كمت صرخت وضليت ابجي وهو حاضني ،،

مر يومين وطلعت من المستشفى وانا مالي خلك احد ،، طفلي راح وجنت فرحانه بي ،، حسبي ونعم الوكيل ع اللي جان السبب جنت جاي ابجي بالغرفه ودخل وليد

اجه حطني ع صدره ويمسح ع شعري
وليد : كافي وداعتج خليتهم يتمنن الموت و هذا الكل. محمد بالسجن لأن طلع يشتغل ويه واحد بالمخدرات

نور : وليد ابني راح ليش سون هيج وياي
وليد : عبالهن انا ذبيت محمد بالسجن
نور : وانا شعليه
وليد / الغيره وماتفعل

ضليت ابجي بصوت مسموع كتله
،، طفلييي راححح

هو ساكت ، جنت يوم كامل ما نايمه بس ابجي ،، فجأة نمت ع صدره ، كعدت ع صوت الأذان كمت توضيت وبديت اصلي وادعي ربي ياخذ حقي

بديت ابجي ع السجادة ، وره دقايق دخلت ريماس وبيدها رضاوي شلته وبديت ابوس بي

نور : يا بعد روحي
ريماس : نوره خلي اسويلج اكل صارلج يوم ماماكله موزين عليج
نور : مااشتهي

دخل وليد : روحي جيبي اكل رح تاكل غصبًا عنها

شلت السجادة وغسلت لرضاوي وشفت فاتح ايديه رحت حضنته ونمت ع صدره ، اندك الباب وراح اخذ الاكل من ريماس بده يوكلني ورضاوي يباوع كارتون بالايباد

خلصت الأكل وهو راح اخذ الصينيه ، مر اسبوع تحسنت حالتي ، وصرت تمام بديت التهي بالشغل ، واراسل صديقات ممرضات وياي ،

محمد بالسجن و زهراء و خديجة اختفن من ذاك اليوم ، اجت ريماس تبجي كمت الها

نور : شبيج شصاير
ريماس : امييي
نور : شبيها
ريماس / ماتت
نور : شنووو شلون احجي
ريماس : لمن طالعه اجت سياره و دعمتها مامااا راحتتت

... حضنتها ، صح امها عذبتها لكن تبقى الام ماكو مثلها وماتتعوض ، وبدت الفاتحه و زهراء تخبلت وحالتها حاله ، الصراحه حالتها مزريه ،

انا كاعده ع صفحه و محد كُلش قليل جايين ، حتى العالم ما تحبها ، ومحد يبجي بس ريماس نزلت دموعي وأتذكر اللي سوت وياها

"" الله يسامحها ويغفر ذنوبها والله يرحمها

مر3 ع الفاتحه وانتهت وبعد ما شفنا احد ، وجده خطيه كله ساكته وماتحجي ، زهراء ضلت عدنا و ريماس خطيه تعتني بيها ، لأن صارت كلش مخبله وتصرفاتها تصرفات جهال وتلعب ويه رضاوي

بس اخاف منها ، احيانًا اكول اخاف جذب مابيها شي ، جنت كاعده بالغرفه واندك الباب دخلت زهراء وهيه تباوعلي وتضحك اجت حضنتني حيل

حسّيت أعضامي تكسرت ، وضلت تبوس بيه وراح تبوس رضاوي ، سكتت عنها و شوي و ريماس اخذتها

مر شهرين و زهراء عدنا وحالتها نفسها ، جان ماكو احد بالبيت بس انا و زهراء ، الحجيه و ريماس راحن للسوك اخذهن وليد ، جنت اغسل ملابس فجاة دخلت زهراء

وعيونها يخوفن ومنزله رأسها ورافعه عيونها ولازمه سچينه بيدها جانت مسويه كصايب و ايدها كلها دم تذكرت رضاوي وينههه

ضليت اصرخ وهيه اجت حطت السجينه ع ركبتي وجانت لابسه دشداشه سوده و بيها خرز بيض

زهراء : هههههههههههههههههههه يروحييييي صدكتي انا مريضه

نور : زهراء وين رضا
زهراء : راحح
نور : وخري زهراء الله ينطيج وخري
زهراء : خربتي عائلتنا امي ماتت ابوي بالسجن واخذتي اختي بصفج بعد شتردين هااااا

فجاة حسّيت السجينه داخل بطني وبده الدم ينزل ، وعيونها يخوفن طحت بالارض وانا لازم السجينه واباوعلها راحت جابت رضاوي وذبته يمي

جانت حالته ابدًا ما حلوه ، وكله دم انا بعد ماشفت شي غير الضلام ...

———
يتبع ...