قلبي لكِ

الحلقة الـ21

ورجوتُ عيني أن تكُفَّ دموعها
يومَ الوداعِ نشدتُها لا تدمعي
أغمضتُها كي لا تفيضَ فأمطرت
أيقنتُ أني لستُ أملكُ مدمَعي

- زاي الربيعي

—-

انكسرت هوايي حب طفولتي اللي جنت اتمناه بكل ليله وابجي علموده ، مايثق بيه واعتبرني خاينه ، خلاني افقد الثقه حتى بنفسي واكره نفسي
كرهت محمد و لو شفته رح اقتله خلاص ،

... طلع وخلاني حايره بنفسي ، دموعي مستمره تنزل على وجهي دخلت خديجة واجت تحجي وتغلط دخلت جده رحت حضنتها وطلع الكل بقت بس هيه

نور : جده والله ماخنته
جده : خليه هسه يرجع
نور : مستحيل ابقى هنا

رحت طلعت الجنطه وبديت احط ملابسي
جده : لا تسوين هيج تحملي
نور : جده شنو اتحمل هو بنفسه كال ولي لاهلج بس شسوي
جده : ضلي ولا ترحين
نور : جده افتهميني مااكدر أضل

حطيت ملابسي وطلعت صايه لبستها وحجابي نزلت جده وياي لان ماتكدر تنزل ، خابرت صمد اجاني رحت وياه وانا الدموع بخدي

اعتبرني خاينه وماصدكني ، والثقة اذا ماكانت بين الزوجين ينتهي الزواج ، حضنت امي وانا ابجي وهيه خطيه لازمه وجهي وتباوعلي
سرى : وليد ضربج

رجعت حضنتها وانا ابجي دخلتني بالصاله نزعت الصايه والحجاب وكعدت بحضنها دخل ابوي ويباوعلي مصدوم رحت حضنته

وانا ابجي كتله : بابااا
.. شبيج شصاير

رغم كلشي يبقى ابوي يبقى هو اللي يوكف بظهري ، حضنتها وانا اشهك وابجي

نور : بابا رح يطلكني
.. شصاير ليش يطلكج
نور : عباله انا خاينه
،، خيولييي انا من البدايه ما ردت انطيج اله بس هو واحد جذاب

ابتعدت عنه وكتله
.، انته هم بعتني انته وياه ماكو فرق بينكم

صعدت للغرفه وسديت الباب وانا ابجي ، حطيت راسي ع المخده ...

مر اسبوع وانا بيت اهلي كله بغرفتي واكلي صاير قليل رحت للدكتوره علمود اعرف جنس الطفل ، وطلع بيه ولد

فرحت هواييي الحمدالله ع كل حال ، رجعت للبيت حاولت اكل هواي حتى ابني يصير بخير لان الدكتورة كالت الطفل محتاج عنايه وغذاء ، باوعت لنفسي بالمرايه

وجهي تعبان وضعفان وبطني كبرانه لكن جسمي ضعيف ومابي قوه ، هالات جوه عيوني وشعري رافعته ليفوك لان مالي خلكه ،

شفت اتصال من جده رديت عليه

جده : هلااا بنورتنا
نور : هلا بيج جده
جده : شلونج
نور : الحمدالله اليوم رحت لدكتوره علمود جنس الطفل
جده : شنو طلع
نور : ولد

سمعتها تهلهل وكال
،، هلااا برضاوي يلاا بسرعه خلي يجي
،، ان شالله

سولفنه شوي وسديت الاتصال ، وليد من قبل يصيحوله ابو رضا ، كمت اكلت ورجعت نمت

"" مرور شهرين

دخلت بشهر السادس ، وبطني كبرانه وليد يسمع اخباري من جده وعرف بيه ولد وتكول فرحان بي ،

باوعت بالمرايه ولزمت بطني
نور : يلاا تعال حبيبي اريد اشوفك

اشتاقيتله هواييي ، بس مستحيل انزل كرامتي و اروح اله هو طردني ، وحسيت نفسي رخيصه بعينه ، هو الخسران ،

شفت رسالة منه ، كلبي حسيته رح يطلع من مكانه ، ردت ادخل لرساله بس مادخلت ، هسه يكول منتظره رسالة منه ،

شفته 3 إشعارات منه ، غلبني الشوق ودخلت ع المحادثه كاتب

"" السلام عليكم
"" شلون الطفل وحالته شلونها
"" اذا محتاجة شي او محتاجة طبيب انا موجود

صاير يحجي برسميات انا اعلمك وليد هيج صارت ، دزيت

"" وعليكم السلام
"" اشكرك مامحتاجة شي واذا احتاج شي اخوي موجود

دزيت الرساله وبسرعه دز صوتي
وليد : وشنو قابل انا هنا طرطور تخابريني وكت تحتاجين شي فهمتي

مارديت وسديت التلفون ، يوم ثاني اجت جده رحت فتحت الباب الها وشفت سيارته وصرت وره الباب حتى مايشوفني وسلمت ع جده

نور : دخلي

فجاة صار كبالي ، باوعتله وانا عيوني بعيونه اختفت الابتسامه مني ...

نور : ابو رضا تفضل

باوعلي وكال
وليد : اشكرج أم رضا بس عندي شغل

طلع منه فلوس وانطاني كال
.. هاي فلوس
.. مااريد مامحتاجة

خزرني وكال
.. هذول لابني

حط الفلوس بيدي وراح ،، اييي هسه صارن لابنك فضلت ابنك عليه ،،

جده : يابنتي رجعي لبيتج
نور : جده مااريد انا مرتاحه هنا شنو وليد دزج عليه
جده : ليش اجذب عليج لا ماكال بس انا اجيت ارجعج
نور : اذا يريدني هو يرجعني انا كرامتي فوك كلشي

جده : انتو تحبون بعض لا تسون هيج ورح يصير عدكم طفل

سرى : حجيه عذريني بس بنيتي ماترجع هو شلون يضربها حتى شايله بكلبي عليه
جده : ساعة عصبيه
سرى : مو من حقه يضربها
جده : ان شالله تنحل الأمور

سكتت ورحت جبت عصير وحبشكلات ، حطت ايدها ع بطني

جده : شكد صارلج
نور : رح ادخل سابع بعد يومين

يتبع ...