اسكريبتات الحور♥👑✨

متنساش النجمه يقمري ★♥

"كل ضحكة بتضحكيها، قلبي بيضحك وياها.♥️"
_" كنت في البلكونة بتاعت شقتي وشايفة قدامي راجل وزوجته بس عواجيز بس روح الشباب لسه فيهم بيعلقوا فانوس رمضان وصوت النقشبندي شغال عندهم في البيت وضحكتهم لبعض خاطفة قلبي قبل نظري"
_ لا علقه الناحية دي عشان يكون باين وينور الشارع..
رد وهو بيغازلها_ كفاية انك ساكنة في الشارع دا منوره اصلا ..♡
" دا كان رد الراجل اللي خلي زوجته وشها احمر وكأنهم شباب صغيرين ولسه بيغازلها لأول مرة .. ابتسمت تلقائي وحسيت اني عايزه اروح اقعد معاهم بأي طريقة ..دخلت من بلكونتي واخدت الكنافة بالقشطة اللي لسه عملاها عشان بكره رمضان ونزلت وقفت قدام بيتهم وخبطت الباب بدون اي تردد مش عارفه انا ازاي رجلي طاوعتني وجيت حقيقي انا هبلة.."
عمو باستغراب وابتسامه اول ما فتحلي _ اهلا وسهلا يابنتي اتفضلي...
رديت عليه وأنا متوترة _ انا عملت كنافة وكنت عايزه حد يقولي رأيه فيها ممكن تقولولي رأيكم...
" اول ما فتح الباب حسيت بالدفا والأمان مالي المكان وصوت النقشبندي لسه شغال والبيت كان علي الطراز القديم اللي بيخطف قلبي المقوله دي صح جدآ '‏أرواحنا تنتمي للبساطة ولكل التفاصيل الصغيرة'♡"
_ مين يا عبد الرحمن.؟!
_دي الشابة جارتنا يا حياة..
رديت بسرعه_ ريم اسمي ريم..
" كانت طنط حياة طلعت من المطبخ لابسه مريلة المطبخ وشعرها باين فيه بعض الخصل البيضة بس كان ناعم وكانت عملاه ضفاير كانت جميلة ووشها مريح للقلب"
ردت عليا بابتسامه_ اهلا يريم اهلا ياحببتي واقفة عندك ليه تعالي ...
رديت وانا لسه متوتره_ انا اسفه اني جيت فجاه ..
عمو قاطعني_ متقوليش كدا يابنتي انتي تنوري في أي وقت وريني بس الكنافة دي بتقول اي..
طنط بعتاب_بس يا عبد الرحمن عيب كدا...
رديت عليها بأبتسامه_لا ياطنط انا جايه اصلا عشان تقولولي رأيكم فيها لاني قاعدة لوحدي ...
_ اه إذا كان كدا وريني الكنافة انا كمان بتقول اي؟!
_ بس يا حياة عيب كدا..
" ضحكنا احنا التلاته كانوا لطاف اوي في كلامهم وابتسامتهم اللي مش مفارقة وشهم ؛ مديت ايدي بالكنافة لطنط حياة وقعدت ودخلت هي المطبخ عشان تجيب اطباق تحط الكنافة فيها .."
عمو سألني_ انتي قاعده لوحدك في البيت ؟!
_ اه والدي ووالدتي في عمرة وانا قاعده لوحدي دلوقتي...
رد عليا بأبتسامة _ ربنا يتقبل منهم ويردهم بالسلامه يآرب..
بادلته الابتسامه_ يآرب انا شوفت حضرتك انت وطنط بتعلقوا الفانوس وكان أول مرة اشوفكم فيها ...
رد عليا وهو بياخد الاطباق من طنط حياة_ احنا فعلا لسه جايين من عند ابني كونا قاعدين عنده فتره كدا ورجعنا تاني..
_اصل هو في اسكندريه روحنا نغير جو كدا انتي فاهمه بقا وكمان كانت حفلة تخرج ابنه...
" دي كانت طنط حياة وهي بتديني طبق الكنافة وبتقعد جنبي .."
عمو عبد الرحمن وهو مغمض عينه بأستمتاع_ الله حلوة اوي الكنافة دي تسلم ايدك يريم...
رديت وانا فرحانه أنها عجبته_ بجد انا فرحانه اوي انها عجبت حضرتك...
_ فعلا جميلة اوي وخفيفه تسلم ايدك ياحببتي..
" كانت طنط حياة وهي بتطبطب علي رجلي بحنية "
_بس معلش يريم مش احسن من بتاعة حياة ...
" ضحكت علي كلامه وطنط ضحكت كمان بس بخجل حقيقي علاقتهم قمر هفضل ادعي ربنا يرزقني بواحد زي عمو عبد الرحمن لطيف وكلامه لطيف زيه بالظبط انا وقعت في حبهم يا جماعه والله قضيت وقت لطيف معاهم وبعدها روحت علي شقتي وانا قلبي حساه هيخرج من مكانه"
اول ما دخلت شقتي _ انا عايزه اعيش معاهم بس خلاص أنا هلم هدومي واروح اعيش معاهم...
" بعد يومين كنت قاعده في البلكونه بتاعتي بقرأ قرآن لحد ما اذان المغرب يأذن لقيت حد بينادي عليا"
_ريييم
" ببص في المكان اللي بينادي لقيت عمو عبد الرحمن وطنط حياة واقفين بيضحكولي "
_ ما تيجي تفطري معانا انهارده حياة عامله شويه محشي يستاهلوا بوقك..
_ شكرا يا عمو عبد الرحمن مش عايزه اتعبكم...
" كنت بقول كدا وانا بقول لو قالي تعالي تاني مش هناقشه هيلاقيني في قلب بيته انا مش بعرف اعيش لوحدي ولا بعرف أكل لوحدي انا بحب الناس حواليا دا بجد .."
طنط حياة قالتي _ تعالي بس وكمان عامله كنافة عايزه اخد رأيك فيها يلا بقا عشان مزعلش منك..
رديت بأبتسامة_ حاضر افتحولي الباب بقا ميهونش عليا زعلك...
" انا ما صدقت اصلا والله وانا كمان ميهونش عليا زعل طنط حياة ابدا دي حببتي دي هما مش عارفين انهم نور عنينا ولا اي"
"خبطت علي الباب والمغرب كان بيأذن عمو عبد الرحمن فتحلي دخلت وحولت السفرة مع طنط حياة وعمو عبد الرحمن كان بيصب العصير لينا.. "
_ كل سنه وانتي طيبه يريم..
_ وحضرتك بخير ياعمو ...
" قعدنا وأكلنا بين هدوء ومناقشات بيني وبين عمو عبد الرحمن..  بعد كدا قعدنا خلصنا أكل وقعدنا في الصالون"
سألني بهدوء وابتسامه_ تعرفي معني اسم ريم يريم؟!
رديت وانا ببتسم_ احب اسمع معناه من حضرتك يعمو...
_ معناه الغزال الصغير الأبيض، الظبي جميل العيون الذي يعيش بداخل الصحراء...
رديت وانا بضحك_ دا حقيقي يعمو بس للاسف انا مش بحب اسمي..
_ لي دا اسمك من الاسامي القديمه بس لحد دلوقتي ناس كتير بتسميه وبتحبه لأن اسمك تغني بيه الشعراء ..منهم احمد شوقي لما قال _"ريمٌ عَلى القاعِ بَينَ البانِ وَالعَلَمِ_أَحَلَّ سَفكَ دَمي في الأَشهُرِ الحُرُمِ"
" كنت بستمع ليه وانا فرحانه وحبيت اسمي فجاه."
طنط حياة وهي داخله علينا_الله الله بتغازل البنت عيني عينك كدا بتخوني يعني..
_هو أنا أقدر برضه مخنتكيش واحنا صغيرين هخونك دلوقتي طب والله عيب..
" ضحكنا وفضلنا نهزر شويه علاقتهم لطيفة انا دائما مؤمنة أن الحب من كفايه في علاقة الزواج لازم يبقي فيه موده بينهم ورحمه واحترام الحب مش كل حاجه هو جزء بس مش الكل.."
********
"وجودك مش يدوب فرصه عشان ألقي لمشاعري مكان وجودك راحه ومحبه وفرحه لكل شئ زعلان! 🤍
"تاني يوم روحت الشركه اللي بشتغل فيها سمعت عن شاب جديد اخد الشركه ومستر هشام سابها خلاص كانت الشركه كلها متوتره من وجود المدير الجديد وانا برده لحد ما طلب كل العمال في الشركه أنهم يتجمعوا "
_ ريم تفتكري عايزنا لي؟!
_ اي السؤال دا اكيد عايز يتعرف علينا يعني ...
" قطع كلامنا انا وجني دخول شاب أقل ما يقال عنه أنه قمر والله طول بعرض بغمازات حاجه كدا كريمه بالقشطه "
قالنا وهو بيبتسم بطريقة لطيفه_ انا عمر المدير الجديد باذن الله واتمني اكون عند حسن ظنكم ولازم تعرفوا انتوا مش بتشتغلوا عندي احنا بنشتغل مع بعض واي مشكله هتقابلكوا انا موجود ولو في أيدي حاجه اساعد بيها عمري ما هتأخر وكمان عايز نبقي صحاب ..حد عنده اي سؤال؟!
_ حضرتك مرتبط؟؟
" كان سؤال مفاجئ لينا كلنا مش ليه لوحده بس نقول اي بنات اخر زمن "
رد هو بأبتسامه وببرود_ لا. اي سؤال تاني برا حياتي الشخصيه؟!!
" سكتنا كلنا ونهينا الإجتماع دا وكل واحد راح يشوف شغله لحد ما خلصنا وكل واحد روح بيته قابلني في الطريق ناس بتبيع حاجات عمايل بيتي وانا مش طباخة ماهره يعني فاخدت منهم وروحت البيت اول ما وصلت كان المغرب بيأذن فتحت الباب وبأكل وللاسف الاكل كان وحش جدا وباين عليه بايت ..."
_ يادي الحظ الفقر اي دا ..هما اتنين بس اللي بلجأ ليهم في المواقف اللي زي دي ....
" اكيد عرفتوهم يعني عمو عبد الرحمن وطنط حياة جريت علي شقتهم قبل ما يبدأو أكل.. خبطت والمفجأه إن كان عندهم ضيوف هو بشمهندس عمر مديري الجديد في الشغل طب احيه..."
سألني بأستغراب اول ما فتح الباب_ ايوه عايزه حاجه؟!
رديت وانا وشي في الأرض من الاحراج _ عمو عبد الرحمن موجود؟!
_ ايوه ثانيه واحده ...جدووو.
" جده يلاهوي يعني عمو عبد الرحمن جد القمر دا هو فعلا هجيب الحلاوة دي منين .."
_ ايوه يعمر... ريم مالك يحببتي انتي كويسه؟!
رديت بسرعه بعد ما سمعت نبرة قلقه_ ايوه الحمد لله كويسه بس كنت جايه افطر معاكوا ممكن؟!
رد وهو بيضحك _ ياشيخه وقعتي قلبي تعالي تعالي ادخلي..
", دخلت وكل دا وعمر بيبصلي بأستغراب ومن قلق جده عليا وكلامه معايا"
طنط حياة _ اي دا ريم تعالي يحببتي مالك؟!
_ مفيش يا طنط بس جبت أكل من برا وكانوا وحش جدا ومطبختش فجيت معلش بقا انا رخمه عارفه ..
" كنت بقول اخر كلمه بضحك.."
عمو عبد الرحمن رد عليا وهو عامل نفسه متعصب _ بصراحه بقا رخمه اوي حد يجي لحد في معاد فطار؟!
" ضربني ضربة خفيفه علي دماغي وكمل_ انتي هبلة انتي تيجي في أي وقت انتي زيك زي عمر بالظبط وبقولك اي بلاش عمو وطنط دي قولي تيته وجدو عشان تأكلي غير كدا مفيش أكل...
ضحكت وانا بقول_ حاضر ياجدو حلو كدا...
رد وهو بيضحك_ ايوه يلا الاكل زمانه برد..
", قعدنا وانا متوتره من نظرات عمر اللي مركزه عليا مش بعرف أكل وحد مركز معايا بالذات لو حلو انا جعانه عايزه أكل.."
عمر _ مش هتعرفني ياجدو؟!
جدو وهو بيضحك_ دي ريم يعمر بنت غلبانه كدا بنعطف عليها كل شويه تيجي تأكل عندنا..
" ضحكنا كلنا عمو عبد الرحمن دمه خفيف وبيحب الضحك "
طنط حياة ردت علي عمر_ دي ريم يعمر جارتنا هنا واتعرفنا عليها وبقت زيك بالظبط بنعتبرها حفيدتنا وعليها كنافة بالقشطه إنما اي تأكل صوابعك وراها ...انا اصلا كنت هنديلك انهارده تيجي تعملي واحده الكنافة موجوده والقشطه موجوده اعمليلنا واحده بقا....
رديت وانا ببتسم _ بس كدا من عنيا الاتنين احلي كنافة لاحلي تيته حياة في الدنيا..
" سكتنا شويه وقعدنا نأكل لحد ما عمر قطع الصمت دا بسؤاله"
_ انا شوفتك قبل كدا يريم؟!
رديت وانا برفع وشي ليه_ ايوه حضرتك مديري في الشغل اجتمعنا كلنا انهارده..
" ايوه اصل انا هكدب ليه طبيعي ان اققوله ايوه ولا انتوا ليكوا رأي تاني"
_ ايوه يبقي هو كدا فعلا ..
_ اي دا معقول مع بعض في شركه واحده ومقولتوش؟!.
رد علي جدته وهو بيبتسم_ انهارده كان أول يوم ليا يا حببتي لسه متعرفتش علي حد ...
" أول ما خلصنا أكل قومت مع تيته عملت الكنافة وطلعتها"
_ اه جميله جدا تسلم ايدك...
" دا كان رأي عمر حسيت بوشي سخن وقلبي دقاته بقت عالية لدرجه اني خوفت أنهم يسمعوها والله"
رديت بكسوف _ الحمد لله انها عجبتك ...
" قعدنا مع بعض مدة طويلة واتعرفنا علي بعض عرفت أنه خريج هندسه كان شخص لطيف زي ما توقعت وبيهزر وبيضحك اللي هو ابغي اتزوجه هالحين. عدي شهر اهلي رجعوا واتقربنا انا وعمر من بعض اوي بقينا بنسهر مع بعض في البلكونه بنتكلم في الشغل نروح ونيجي مع بعض وغصب عني قلبي وقع في حب عمر والله ووقعت فعلا ياويجز ياخويا انت مش بتكدب"
_ انسه ريم ممكن اتكلم معاكي في حاجه.؟!
" دا كان صوت احمد زميلي في الشغل لما دخل عليا المكتب بس كان بيتكلم بتوتر وتقريبا كدا انا فهمت هو عايز اي لانه باين عليه بقاله فتره كبيره أنه معجب بجني وهي كمان بس هما عاملين نفسهم مش واخدين بالهم واكيد هيطلب مساعدتي عشان أنا عندي قدرة علي الإقناع رهيبه ."
_ اكيد يا أحمد اتفضل..
كمل كلامه وهو بيقعد قدامي_انتي عارفه انا عايز اي لانه باين من نظرتك انا بحب جني وعايز اكمل نص ديني ...
" قاطع كلامنا دخول عمر علي اخر كلمه وكان وشه احمر من الغضب وعنيه كان فيها غضب الدنيا خوفت اوي لاني اول مره اشوفه بالحالة دي"
_ اي اللي بيحصل هنا دا احنا في شغل ولا جروب تعارف؟!!
رديت عليه بسرعه_ عمر في اي..
‏قاطعني وعنيه بتطلع شرار_ اسمي بشمهندس عمر ...كل واحد فيكم علي شغله يلا اتفضلوا..
‏", اتفجأت من كلمته هو عمره ما حط القاب بينا لقيت احمد طلع بأحراج من جنبه وهو بيستأذنه والتاني نظرته ثابتة عليا وانا بدأت اتوتر ومش عارفه اقف مظبوط لحد ما مشي ورجع مكتبه"
_هو ماله دا كل دا عشان سيبنا الشغل دقيقه دا مكملتش دقيقه والله اي الظلم دا ...
‏" خلصنا شغلنا كنت متوقعه هلاقيه برا بس اللي حصل عكس كدا لا هو ولا عربيته كانوا موجودين اه دا الباشا مقموص بقا يولع ولا يهمني مش هصالحه انا معملتش حاجه"
‏_ الاستاذ اللي مشي وسابني اتبهدل في المواصلات..
‏" ايوه انا ياجماعه روحتله البيت عند تيته وجده عشان اصالحه اي دا هو أنا كنت بقول مش هصالحه يقطعني .. اول ما شافني ساب الباب ومشي من غير ما يرد عليا اللي مش محترم دا "
سألته وانا بقعد  ‏_ دا انت مقموص بجد بقا ممكن اعرف مالك؟!
_ مزعلاه في اي يا غزال الريم انتي؟!
" كان جدو عبد الرحمن وهو بيقعد جنبه اول ما سمع صوتي طلع من الاوضة وبقا متعود خلاص يقولي يا غزال الريم علي اساس بيدعلني يعني انا بحبه اوي جده دا اكتر واحد بيعرف يدلعني "
رديت وانا بضحك_ علمي علمك يا جدو والله طلعت لقيته مشي وسابني اتبهدل في المواصلات يرضيك؟!..
رد عليا عمر_ علي أساس انك مش عارفه عملتي اي؟!
‏رديت وانا بمثل الصدمه _ انا يابني والله ما حصل..
سألني بهدوء ‏_ كنتي قاعده مع احمد لي يريم؟!
‏_ وانت مالك؟!
‏", ايوه يا جماعه اشتموني كمان خلوني اتوب لساني دا لو دخل جوا هيرحم البشرية."
‏" شدني من ايدي ودخلني البلكونه بعيد عن جده وكمان جده متحركش من مكانه اي دا في اي؟!"
اتكلم بزعيق ‏_ اتكلمي كويس كنتي قاعده مع الزفت ليييه؟!
‏رديت بهدوء بحاول اهدي من غضبه_ مفيش يعمر كان جاي عشان يتقدم لجني وعايزني اققولها ومكسوف منها وبس  ..
‏" بصلي بهدوء وبدأت عروق رقبته تختفي تاني بعد ما كان بارزة من الغضب بس انا مش هسكت والله ما هسكت ازاي يسبني اتبهدل في المواصلات كدا اصلا .."
سألني بترقب ‏_ بجد يعني مكنش عايز يتقدملك انتي ؟!
بصيتله وانا مغمضه عيني نص تغميضه كدا_ ودا يزعلك في اي؟!
بصلي بتوتر _ عادي يعني بسأل ..
" وبعدين بقا في الواد دا مش هيصرخ في وشي كدا ويقولي عشان بحبك وانتي بتاعتي انا وكدا والشغل بتاع الروايات دا "
سألته _ عمر هو انت مش عايز تقول حاجه؟!
_اققول اي ؟!
_ اه اصل كنت عايزه اققولك اني جايلي عريس وعايزه اخد رأيك فيه هو شغال معانا في الشركه..
" انا كدابه يجماعه والله مفيش عريس ولا حاجه بس احنا لازم نجس نبضه ونعصبه كدا عشان نشوف اخرتها مع كبرياء العاشق دا "
صرخ في وشي بصوت عالي وعروق رقبته برزت تاني _ نعمممممممم سمعيني كدا بتقولي اي ؟!
رديت ببراءة_ اي بقولك عريس  متقدم..
" مكملتش جملتي لما لقيته بيلف حوالين نفسه عايز حاجه يتضربني بيها اي دا هيضرب ولا اي لا كله الا الضرب.."
اتكلم بعصبيه_ بتعيدها تاني ريم بتعيدها تاني ....
بصيتله برعب_ في أي يعمر طب قولي اي اللي ضايع منك واحنا ندور عليه ؟!
‏" سكت لثواني وبقا هادي وانا ببصله وعيني مبرقة برعب وفجأة لقيته بيقرب عليا وبقينا قريبين من بعض جدا كنت ههرب من قدامه مسكني بسرعه ولفني ليه وعنيه في عيني وماسك ايدي اتوترت اوي من نظرته اول مره احس بالإحساس دا في حياتي وان قلبي يدق كدا مش خوف لا شعور تاني بس شعور لذيذ ولطيف علي القلب "
‏_ اي هتضرب ولا اي علفكرا انا معايا الحزام الاسود ها..
‏_ أنا مش لاقي قلبه..
‏_ طب دور كويس يمكن ضاع هنا ولا هنا..
‏"بصلي بعصبيه وبدأ يجز علي أسنانه انا عايزه أروح "
‏بصلي بغضب وحب_ انا لازم اخد معاد مع الحاج الوالد..
رديت باستعباط ‏وعيني مبرقة_ لي هتشتكيله مني ؟!
رد عليا بحب_ لا هتجوزك منه .♡
ضحكت بحب وقولت_ أخيراً لقد هرمنا..♡
"قدامهم واقف عبد الرحمن وهو محاوط كتف حياة "
_ قصة حب جديده تشبه قصتنا يحياة ..
"  تبادل نظرات حب وفي الخلفية أم كلثوم بتغني"وقابلتك انت لقيتك بتغير كل حياتى معرفش ازاي حبيتك معرفش ازاي يحياتي.♡
.