اسكريبتات الحور♥👑✨

النجمة بتاعتي يصاحبي مش كل شوية هنشحت منكلم النجوم اومال لو مكنتوش القمر بذات نفسه هتعملو فيا اية....؟ 😂😂♥✨

اسكريبتات الحور

- في واحد جديد جاي يدرب معاكي
بصيت باستغراب - واحد جديد ازاي يعني!
- مش عارف اطلعي شوفي
خرجت و لقيت شاب طول بعرض واقف علي الحلبه.
-انت مين
لف وابتسم - يوسف المدرب الجديد
بصتله من فوق لتحت - مين اللي قالك تيجي تدرب هنا؟
- هو انا محتاج اخد اذن من حد عشان اجي ادرب!
جزيت علي سناني بعصبيه - طب بص يا استاذ انا المدربه هنا ومش عايزاك تبقي مدرب معايا ممكن ؟
- مش عايزه يكون ليكي منافس!؟
ابتسمت- ‏ملقتش حد احسن مني عشان ينافسني..
ضحك - طب ده انا ربنا بعتني ليكي من السما ،واهو بالمره تشوفي قدراتي . نهي جملته بغمزه!
- يعني مش هتمشي؟
-كان ممكن امشي عادي لكن هفضل عشانك انتي .
بصتله بغضب ومشيت
سمعت صوته وهو بيضحك - هستناكي ف اقرب ماتش لينا
مشيت اسرع ، خرجت من النادي وقعدت في مطعم قريب منه ،وباكل بعصبيه
- وهو مين ده اصلا عشان يكون منافس ليا!!!
- ‏اهدي يا رنا وبعدين وريه مهاراتك خليه يمشي في اقرب وقت
- ‏لا لا ده شكله متبت في المكان ، يعني اتعب السنين دي كلها وهو يجي يبقي مدرب من اول مره كده
- ‏حلو؟
بصتلها وبصيت الناحيه التانيه - والله كنت متعصبه لدرجه اني مخدتش بالي من شكله اذا كان حلو ولا لا
- ‏خلاص يلا بينا نروح نشوفه
- ‏سلمي اقعدي عشان مطلعش غلبي كله فيكي
- ‏قومي انتي هتسبيله الساحه لوحده من الاول كده ولا اي ،عرفيه انك صاحبه مكان.
قومت وقفت- ‏ايوه انتي صح انا ماشيه
خدت شنطتي واسترجعت طاقتي ودخلت النادي
ماشيه بدور عليه ، لقيته بيلعب من بعيد ومندمج اوي
قولت بصوت واطي - ماله جاي سريع كده ليه
قربت منه شويه ورميت الشنطه ، بص وضحكلي
قال بضحك- رجعتي بسرعه
- ‏افندم!
- ‏يعني قصدي تقبلتي وجودي بسرعه ، كنت فاكرك هتاخدي وقت اكتر من كده
- ‏ليه وانت شايف نفسك حاجه مهمه عشان اقعد افكر فيك!
بصلي شويه وراح رمالي ال Gloves - ماتش؟
ضحكت ولبستهم
ابتدينا وكنت بضرب بغل فيه ، ولكن استغربت انو كان بيدافع بس!!
وقفت ورجعت لورا - بتلعب مع بنت اختك انت؟
ضحك- نعم!
- مبتضربش ليه
- ايدك تقيله اوي علفكره
- ‏سألتك سؤال ، ولا خايف توريني قدراتك العظيمه
بصلي وبصتله بتحدي
- متأكده؟
رفعت ايدي واخدت وضع الاستعداد ، كانوا دقايق ولكن استمتعت! بدافع وبضرب ، كان ماتش عنيف.
قلعت ال Gloves وقعدت اخد نفسي
- لعيب مش كده
بصتله وسكت
قعد جمبي - رنا ولا تحبي اقولك يا كوتش؟
قومت وقفت - اسأل عني وانت هتعرف الاجابه لوحدك.
سبته ومشيت ، كان بالنسبالي كفايه لحد كده ،اليوم كان ممل بما فيه الكفايه.
عدي اليوم ولبست وروحت تاني يوم لقيته موجود
- جاي بدري يعني
- ‏الشغل شغل برضو ، فطرتي؟
تنحت من السؤال
لقيته في وشي وبيبتسم - فطرت يا كوتش؟
فوقت - مبفطرش دلوقتي
جيت امشي مسك ايدي ، لفيت وعملتله حركه ف ايده
ضحك وقال بوجع - قلبك ابيض يا كوتش ، سيبي ايدي
سبتها وقولت بغضب- متحاولش تعمل كده تاني ، اديني قولتلك.
- ‏طب تعالي افطري معايا
- ‏شكرا ، عن اذنك عشان عندي تمرين
قال بسرعه- ‏اتأجل
- اتأجل ازاي؟
- ‏هما قالولي اقولك كده
- ‏اممم طيب شكرا
سبته وروحت اتدرب شويه ، في دماغي افكار كتير ، ملهاش نهايه ، حاسه اني في دوامه مش عارفه اخرج منها
محستش بنفسي الا وانا واقعه علي الارض وهو جاي يجري عليا
مسكت دماغي وقولت بوجع - ا انا انا كويسه
- دماغك وجعاني؟
- ‏شويه
مسك دماغي وقعد يعمل حركات ويشوف عيني !!!
قولت ف نفسي باستغراب - دكتور ده ولا اي!
- انا كويسه والله سبني بقي
- ‏كل ده عشان مكلتيش ،اتفضلي قومي
- ‏مش ع....
قال بصوت قوي- ‏قولت قومي
قومت بسرعه وبصتله ، للحظه حسيت اني خوفت منه!
قعدنا وكلت - مينفعش متفطريش ، انتي مدربه عارفه يعني اي
- عارفه
- ‏ووراكي ماتش مهم جدا قريب علي حسب ما سمعت.
سرحت لثواني في اللي قاله وهزيت راسي
- خايفه تلعبيه؟
قولت بسرعه - لا طبعا
- اومال مال وشك عمل كده ليه
- ‏ع عمل ازاي يعني
بصيت علي الارض وحاسه ان عينه عليا
- قومي نتدرب شويه
- ‏يلا
مكنتش في وعيي بنسبه ميه في الميه ،الماتش واخد كل تفكيري ، يا تري قدري هيبقي زي قدر بابا !
سؤال مراودني دايما من ساعه ما خدت بطوله ورا بطوله و الماتش ده اكتر ماتش انا مستنياه بشغف بس في نفس الوقت جوايا احساس غريب..
فوقت علي لكمه قويه جدا وقعتني
بصتله بعصبيه - في حد يضرب حد كده
- عشان انتي مش معايا خالص قولت افوقك
- ‏والله !
ضحك باستفزاز وهز راسه
قومت وابتديت اضرب وادافع ، ضربته كانت قويه لكن فوقتني...
عدي ايام ، اتعودت اروح الاقيه موجود ،بس في نفس الوقت المنافسه كل مادا بتزيد ما بنا ، بيحب ينكشني اوي ،بشوفه في قمه سعادته اما بيعصبني ، اوقات كتير بيتأخر ، بس الغريبه اني ببقي اعده مستنياه!
روحت في يوم ملقتهوش ، يوم ورا يوم مش موجود ، بسأل عليه بيجي ساعه او ساعتين وبيمشي وانا مش موجوده ، الماتش معاده بيقرب وهو مش موجود.
- هو كوتش يوسف مشي من هنا؟
- ‏لا كوتش يوسف قدامك اهو
لفيت بسرعه وبصتله بلهفه
قولت بسرعه- انت كنت فين
- وحشتك مش كده
- وحشتني ! اي الثقه دي
ضحك ومشي
ابتسمت من جوايا حسيت اني اتطمنت ومرتاحه
خلصت التدريبات اللي ورايا
- الماتش بكره
ابتسمت بتوتر - ا اه اه بكره
- جاهزه؟
- ‏ج جاهزه
- ‏انتي في حاجه مضيقاكي؟
ضحكت وقولت بهزار- ‏لو حصلي حاجه متنسنيش بقي يا كوتش
- بعد الشر ، هتكسبي بأذن الله انا واثق فيكي
- ‏يلا هقوم اتدرب شويه قبل ما اروح
- ‏ممكن نتغدي مع بعض انهارده؟
بصتله شويه وابتسمت - ممكن.
خلصنا وروحنا المطعم
- انتي خايفه يحصلك زي باباكي؟
بصتله بصدمه - انت عرفت منين
- عرفت وخلاص ، الله يرحمه
حسيت بدموعي علي خدي من غير قصد
- دخلت الطريق ده عشان بابا ، كان امل ليا طول المشوار
- ‏اولا ده قضاء وقدر ، مش عشان باباكي الله يرحمه مات وهو بيلعب ماتش يبقي انتي كمان يحصل معاكي كده
- ‏انا مش خايفه يا يوسف بس جوايا احساس غريب
قرب ايده مني ورجعها تاني بسرعه
ضحكت
قال بضحك- مش مستعد اخسر ايدي تاني ، بس حابب اقولك انا معاكي دايما ، وبكره هبقي معاكي في الماتش
- شكرا ربنا يخليك
- ‏ربنا يخليك! اممم تشربي اي يا رنا
- ‏اكل اطلب اكل، شرب اي بس انا ورايا بطوله بكره
ضحك - حاضر
اليوم عدي وصحيت تاني يوم ، جهزت نفسي نفسيا وافتكرت كلامه ، ابتسمت وحطيت ايدي علي قلبي
نزلت وروحت كان في ناس كتير جدا ، مش اول مره العب ماتش ولكن اول مره احس الاحساس ده .
فضلت مستنياه كتير وبدور عليه في كل مكان ولكن مش لقياه
جهزت نفسي وكان فاضل عشر دقايق واخش ، فقدت الامل انو يجي ، كان نفسي اشوفه قبل ما العب
خدت نفسي وسمعت صوت
- رنا
لقيته بينهج وجاي بيجري - انا اسف ، اسف اني اتأخرت
- انت كويس مالك في اي
- ‏لا لا مفيش حاجه ، جاهزه؟
بصيت في عينيه وهزيت راسي
دخلت وابتدي الماتش ، كنت سرحانه ، صوره بابا متشالتش من قدام عيني ، عماله اخد ضرب ومبدافعش عن نفسي ، كنت موجوده جسمانيا لكن روحي في مكان تاني ..
حسيت بضربه قويه جدا وقعتني علي الارض ، الدنيا اسودت لثواني ، بعدين بقت سوده خالص ! ...

فتحت عيني ، كانت اوضه وانا نايمه علي سرير وفي اجهزه جمبي .. انا فين !!!
شوفت خيال يوسف
قولت بوجع - يوسف ا انت هنا
فتحت عيني وشوفت بوضوح اكتر ، ده يوسف بس اي اللي ملبسه البالطو الابيض ده!
وقف قدامي- انتي كويسه
- ا اي اللي حصل ، واي اللي انت لابسه ده
عمل ايده علي رقم اربعه - دول كام ؟
بصيت بعصبيه - والله
ضحك وحد خبط علي الباب ودخل ، كان راجل كبير وشكله دكتور
- اي الاخبار يا دكتور
دماغي وقفت - ‏دكتور مين!!!
- دكتور يوسف
بصتله - دكتور ازاي ، يعني اي
ابتسم للدكتور وخرجوا هما الاتنين ، وسابوني مع صدمتي
دخل بعد شويه وكان بيضحك
قولت بسرعه - انت دكتور؟
هز راسه ب اه
- والملاكمه !
ضحك - اي يعني مقدرش ابقي في الاتنين !
- ل لا لا اكيد في حاجه غلط ، انا حصلي اي
- ‏للاسف البنت ضربتك ضرب خارج قوانين اللعبه واغمي عليكي ، انتوا كان في بينكوا طار؟
ابتسمت ومسكت دماغي - اه كنت باكل اكلها
- احنا هنهزر ولا اي
- ‏وانت دكتور بحق وحقيقي بقي بجد؟
- ‏اجبلك بطاقتي؟
- ‏مقولتليش ليه
- ‏مجتش مناسبه اقول
بصيت بحزن - يعني انا كده خسرت البطوله
- مع الاسف خسرتيها بس كسبتي حاجه مهمه جدا
قولت باستغراب - اي؟
شاور علي قلبه
تنحت
مسك ايدي وضحك- كسبتي قلب الدكتور الغلبان ده والله
- غلبان !
- ‏اه والله
ضحكت جامد
- تتجوزيني؟
- اعرضه بطريقه ارقي من كده
ضحك- امممم ارقي
مد ايده- موافقه نكمل ضرب في بعض للابد؟
ضحكت ومسكت ايده - موافقه جدا .

' فِ وسط عَالم مَليء بِالكوارِث كُنت انتَ انتصَاري الوحِيد ❤' ›