اسكريبتات الحور♥👑✨

متنساش النجمه بتاعتي يسكر منك ليها ★♥

_موافق صح؟ صح، أنت وافقت أصلا.
بحزم•يمن، بطلي زن.
خبطت برجلي في الأرض_يا بابا بقا يا بابا، أنا نفسيا محتاجة أطلع الرحلة صدقني.
بصلي بتفكير•طيب سيبيني أعرف الرحلة مين مطلعها و أرد عليك.
رديت بفرحة_أنا عارفة، أقولك؟ 
بنفاذ صبر•قولي.
_مطلعاها شركة **** و المسؤول عنها شخص اسمه محمد علي نجم ابن صاحب الشركة .
بنظرة متحفزة•علي نجم؟ ياااه.
كمل•ده صاحب عمري و حبيبي .
_أحلف؟يعني موافق!
•طبعا، ده أنا هبقي ضامن إنك في إيد أمينة.
قومت حضنته_بحبك يا بابيتو بحبك جموده.
زقني من حضنه و هو بيضحك•أوعي بقا ده أنت زنانة أوي.

دخلت أوضتي و أنا بغني و بضحك حاسة بسعادة و فرحة ليها طعم تاني هيهيهي بابيتو وافق ينهار فرررحة.
دخلت أوضتي كلمت ميار و أكدت عليها إنه بابا وافق و هي كلمت محمد منظم الرحلة و قالتله إننا إحنا رايحين.
محمد يبقي صاحب أخو ميار و هي إللي أقترحت عليا الرحلة أصلا.
الرحلة كانت كمان يومين ، لـ دهب و هنفضل هناك ٤ أيام بـ لياليهم ، فضلت مش عارفة أنام من كتر تحمسي و بجهز شنطتي و لبسي و بغني و أنا بجهزهم .
جه اليوم و كلمت ميار و نزلنا أنا و هي نروح للمكان إللي مفروض نركب منه للرحلة و هيهيهي وصلنا و ركبنا.
و بعد ٤ أيام قضيتهم  ، أحلي ٤ أيام فـ حياتي كنت بجهز شنطي أنا و ميورة عشان للأسف مروحين .
نزلنا تحت و توجهنا لمكان الباصات عشان نركب و مفترض إنهم أخدوا أرقام كل اللي طالعين رحلة عشان يطمنوا إن كله ركب.
ميار كانت بتحكي مع صحبتها ، ميار إجتماعية عني كتير أنا بقف زي عمود الإنارة ، منسجمتش مع الأجواء و روحت أتمشي مش بعيد عنهم يعني كنت نفس نطاق المكان إللي هنركب منه و فوني كان سايلنت.
كنا متقسمين جروبات معينة ، يعني كل باص له ناس معينة و أنا كنت فـ باص رقم ٣ و وقفت في مكان أهدي مفهوش ناس كتيرة لحد ما دورنا يجي بقا.
و طول ما أنا واقفة في شخص رايح جاي بيتصل علي حد و بيلعن التأخير و الاستهتار .
=يا زفته أنت ما تردي يخرب بيت القرف و الاستهتار ياربي.
فصل بقلة حيلة و هو مش عارف يوصل للشخص اللي متأخر و وقف و باين علي وشه العصبية.
_أحم، لو سمحت شكلك معانا فـ الرحلة ، هو باص ٣ وصل ؟
بصلي بإستغراب=سوري بس أنت معانا في الرحلة!
_آه.
=طب أنت مين اسمك أية ؟
_يمن ، أنا يـ
إتعصب=يا نهارك أسود يا نهارك ..افتحي فونك كدة يا يمن.
ارتبكت جدآ و بصيت لـ فوني إللي علطول معمول سايلنت لقيت ١٧ ميسد كول من رقم غريب.
بصتله بتعجب_ماله فوني!
قرب مني سحبه من إيدي=ماله فونك؟يا هانم أنا بتصل من بدري باص ٣ كله مشي لما معرفوش يوصلولك صاحبتك ميار فضلت تتصل بيك كتير و أنا و كان ممكن أروح في داهية بسببك.
إتوترت و دمعت _أنا ..أنا آسفة والله مكنتش أعرف .
بصلي بقلة حيلة و زفر=ماشي يا يمن ، عامة حصل خير ، مش فاضل غير باص واحد بس ، كله إتملي مش ناقصه غيري ، إركبي أنت و أنا هتصرف .
مسحت دموعي_لا لا ميصحش أبدا ، أمشي و أنا هتصرف.
=يا يمن ، هتتصرفي أزاي هتسافري لوحدك يعني؟أركبي الله يهديك.
كنت بدأت أعيط_بس..بس أنا مش هعرف أروح في باص معرفش فيه حد صدقني روح أنت و أنا هكلم بابا.
ملامحه لانت=يعني متروحيش في باص متعرفيش حد فيه و تستني فمكان متعرفيش فيه حد؟
كمل=و بعدين بتعيطي لية ها!
_مبعرفش أفضل في مكان لوحدي مبعرفش أنا ...
قاطعني=و مين قالك أنك متعرفيش حد ؟ أنا يا ستي محمد منظم الرحلة ، أديك بقيتي تعرفي حد متتوتريش بقا.
بصيتله بإستغراب_أنت محمد!
ضحك=أنا محمد.
بص في فونه فجأة و رجع قال=يا نهار أسود يا نهار أسود و منيل .
أتوترت_في إية!
=الباص إللي فاضل مشي..شوفتي يا أختي! فضلنا نتعازم مين يروح و مين يتسوح أدينا أتسوحنا سوا.
عيطت تاني _يعني ٱخنا توهنا! و إزاي يمشوا بدونك؟
ضحك أوي =توهنا؟و بدونك؟
يا يمن الباص له مواعيد و لا عزاء للمستهترين المتأخرين ، يمشي و هم يتسوحوا.
_أنا كدة سوحتك معايا.
=ما آه منك لله بقا.
أتعصبت_بقولك آسفه تقولي منك لله!
أنت قليل ذوق ٩ مرات والله ٩.
ضحك كتير و قال=٩ مرات؟ ده أنت لُقطة والله.
المهم ، هنتحرك دلوقتي بس مواصلات بقا و أمرنا لله ، و هاخدك معايا عشان صعبتي عليا إكمنك متعرفيش تتعاملي في مكان متعرفيهوش.
بصيتله و كان باين علي وجهي إن طريقته مضايقاني فـ قال:
=أو مش عشان صعبتي عليا أوي يعني..
_أومال عشان إية؟
=مش عارف بس حاسسني مسؤول عنك دلوقتي.
إتحرجت_بتقول إية!
=بقول آاااه يا يمن آه كحة صعبة أوي معكيش مياة!
إتوترت و إتحرجت ...و إبتسمت.
=يلا؟
_يلا.
كل جروب بيسيب شنطة في الباص إللي مفروض يركب فيه و بالتالي كنا ماشيين خفاف ، أنا كلمت ميار طمنتها و وصيتها تاخد شنطي عندها و كلمت بابا طمنته و قولتله إللي حصل .
مشينا حاجة بسيطة و هناك ركبنا أول مواصلة تخرجنا من دهب نفسها و كانت حوالي نص ساعة.
كنت ملتزمة الصمت و متوترة من الموقف إللي حطيت نفسي فيه و متعصبة منه و كمان محرجة.
نزلنا و فضلنا نتمشي شوية عشان نركب تاني مواصلة تنقلنا لمحافظتنا نفسها و ساعتها وقفني لما قال:
=أستني، هجيبلك عصير من هنا، بتحبي إية!
_شكرا بس مش عايزة.
=اممم حاسك بتقولي رأيك؟عامة أنا مباخدوش ، هجيبلك إللي بحبه أكيد هتحبيه.
اتجهنا ناحية الماركيت و أنا ماشية جنبه قولت_لية أكيد هحبه؟
=عشان أنا ذوقي حلو ههه
تمتمت_سخيفففف.
فتح التلاجة و جاب منها عصير و هو بيقول=سامعك ياللي جنبي سامعك.
اتحرجت و سكتت لحد ما هو يحاسب و يجي و بعدها كملنا لحد ما وصلنا و ركبنا تاني مواصلة.
أول ما ركبنا طلعلي عصير ...عصير برتقال..إيه!!
مسكتها بفرحة و قولت بعفوية_بحبه أوي ده عصيري المفضل و حتي لما ماما بتعملهولي بفرح أوي و بحب أشربه مع الجزر و ء..
سكتت و إتوترت لما لقيته باصصلي و مبتسم و كل شوية إبتسامته توسع ... أنا لية بقول كل دة هو إبن خالتي يعني؟يا غبيهه.
=كملي.
كان باين علي خدودي الكسوف ، و التوتر الشديد علي إيديا إللي بضغطهم فـ بعض.
مسك أيدي و حط العصير فيها و قال= إتحرجتي ليه؟أنت عفوية و طفلة ..
وطي صوته=و جميلة.
عارفين؟دلوقتي ممكن تشربوا أحلي قهوة علي بوتاجاز تسخين مخصص ليها يطلعهالكم زي التحف كدة.
عارفين عدد شعلات البوتاجاز كام؟ إتنين
عارفين نوعه طيب؟
أعرفكم عادي إحنا أهل ، نوع البوتاجاز ببساطة هو خدود يمن.
والله وجهي صار يخرج منه صهد بسبب هذا الكائن اللعين..اللطيف.
فتحت علبة العصير اللعينة سبب إحراجي و بدأت أشرب .
=أنت تمام؟
_أيوة.
=طب لو محتاجة تنامي و الشمس مضايقاكي معايا منامة"eye cover" .
هو أزاييي لطيف كدههه! أكنعني إزاي.
_لا ، بعرف أنام بدونها و بحب أنام في الشمس عادي.
الكذاب بيروح النار ، و يمن بتكذب ليل و نهار.
حاولت أنام و لقيته مش هينام فقولت بصوت خافت_مش هتنام؟
بصلي بـ شك و قال= لأ.
غمضت عيني و حاولت والله حاولت بس الشمس عملت من وجهي كله بوتاجاز سبعة شعلة والله هذا الحكي عيب يا شمس هتحرج بسببك دلوقتي.
صوت خافت جنب أذني سمعته بيقول:
=يا كذابة ياللي مبتعرفيش تكذبي ، خدي المنامة و متعانديش.
فتحت عيوني و برقت قصادي فـ كمل:
=متتحرجيش إحنا بقينا صحاب سفر و مرمطة ، إمسكي المنامة أهي و نامي الله يهديك.
بصتله بإمتنان خدتها غطيت عيوني و نمت.
*
كانت زي الأطفال بالتمام ، عفوية زيهم ، خدودها بتحمر لما حد يحرجها زيهم ، بتتوتر و تعيط بسرعة زيهم ... و لما بتنام رأسها بترتخي زيهم.
كانت بتميل برأسها علي كتفي كل شوية و كنت حاسس إنها في حالة إغماء مش نوم ، دي مكانتش حاسة خالص.
مالت برأسها علي كتفي و إستقرت في النوم ، كان نفسي أوي أشوف ملامحها و هي نايمة عشان أتاكد إنه طفلة بس مش عشان حابب أشوفه مثلا لا خالص.
فتحت الكاميرا و نزلت الفون لتحت عشان أشوف ملامحها و هي نايمة ، صحيح عيونها مش باينة لكن أتأكدت أنها طفلة خلاص.
و بيني و بينكم ، راضيت الصوت إللي جوايا و بيتحايل عليها أشوفها .
و عشان أراضيه أكتر ، صورتنا صورة و دخلت أعملها إيديت أتسلي بقا لحد ما نوصل.
و عـ صورتنا كتبت كابشن"كتفي هنا لأجلك .. و قلبي أيضا".
كنا وصلنا فـ حاولت أنقل رأسها أخليها تسند عالشباك مش عليا ، عشان لما تصحي متتكسفش.
صحيت مدروخة زي الأطفال بردو و مش عارفة تسند طولها فـ كان لازم أول ما ننزل أجيبلها قهوة علطول.
*
أخدت منه القهوة و قولت_شكرا .. بجد شكرا علي ذوقك و آسفه جدا إني تعبتك كدة.
=أنا اللي بشكرك إنك سوحتينا لأنك أدتيني فرصة أعرفك.
أبتسمت و قولت_ ساكن فين!
=في ***** شارع ****
_حلو أوي أنا كمان نفس المنطقة بس مش نفس الشارع ، يلا!.
=يلا يا جارتي.
وصلت و أنا كان شارعي قبله فدخلت الشارع و هو كمل عشان يروح بيته .
وصلت بيتنا و حضنت بابا أوي_وحشتني أوي يا حجوج.
ضربني في كتفي بـخفة•بتثبتيني عشان منتخانقش !
_الاه و إية يجيب خناق يا بابيتو بس .
•المرمطة يا أستاذة ، عامة كويس بردو لتاني مرة كنت مع شخص يؤتمن و ربنا ستر.
_هو ميعرفش إنك صاحب والده و أنا بنته صح!
•صح ، بس هيعرف لازم نشكره و نعرفه.
ابتسمت _ طيب يا حبيبي ، و عامة أنا بعد بكرة الجاي عندي تدريب فالمستشفي ، هخلص و أكلمك ساعتها و ممكن نروح لعمو صاحبك و نشكره موافق!
•موافق.
قومت روحت ناحية أوضتي_تصبح علي خير يا حبيبي .
أنا دكتورة تحاليل و في سنة الإمتياز و خلاص هانت ، كل يوم عندي تدريب و لكن عطفوا علينا بأسبوع إجازة عشان كدة طلعت الرحلة.