اسكريبتات الحور♥👑✨

متنساش النجمه بتاعتي يسكر منك ليها ★♥

"هتحبني ولا مش هتحبني في نهارك اللي مش باينله شمس ده!"

- اللهم بارك يا زين ما ربيت والله، آنسة حنان قدوة يُقتدى بها.
- ربنا يباركلك يا أحمد والله.

"إنت لسه هتقولي يُقتدى وميُقتداش، هتتقدملي امتى ونتجوز وأبقى عروسة قد الدنيا يعني؟"

قعد في الكرسي اللي قصادي - آخر مرة شوفتك كنتِ صغيرة أوي، اللهم بارك دلوقت، عارفة يا آنسة حنان بره بتلاقي البنات شكل تاني خالص، البنت من دول بترفع عينها في الشاب ويكأنها واحد صاحبه.
- استغفر الله العظيم.

"يا بني أنا بحبك، أنا بحبك، فاهم ولا أقولها بصوت عالي بدل ما أنا بكلم نفسي زي الهبلة دلوقت؟ ما تحبني بقى يا أحمد".

- وتلاقي الصوت العالي والضحكة العالية، وحاجات لا يقبلها دين، فرحت إني لاقيت بنات لسه زيك كده، اللهم بارك بتبصي في الأرض وصوتك مش طالع.
- ربنا يعزك.

"أنا باصة في الأرض علشان مكسوفة بس والله مش علشان حاجة، لكن أنا؟ هموت وأرفع راسي وأشوفك يعني، يا بني ما تقول لأبويا عاوز اتجوزها وخلصنا".

- فاكرة زمان كنتِ بتقوليلي يا عمو، فاكرة ولا نستيني؟
- عمو!
- يبقى ناسية، طب فاكرة الشيكولاتة اللي كنت بجبهالك؟
- أنا..
- فرق السن بينا مش كبير، لكن إنتِ كنتِ محترمة من زمان.

" ماله ده؟ كنت بقولك يا عمو علشان تجبلي شيكولاتة، يعني كنت بضحك عليك يعني، فاهم ولا نو استيعاب؟"

- أنا هقوم أمشى بقى يا عمي، لسه هسلم على كتير واليوم قرب يخلص.
- إنت لحقت قعدت يا أحمد؟
- هجيلكم كمان يومين بإذن الله، بما إن آنسة حنان بتدرس نفس التخصص، فلازم آجي أقعد معاها كتير.

هو أنا مالي حبيت الدراسة كده ليه؟ هتقعد معايا كتير يا واد يا قمر إنت؟ قال آنسة حنان قال، في إيه يا أخ أحمد وسعها شوية مش كده.

- الواد قمر يا ماما، سافر شوية رجع بحلاوتهم كلهم.
- إنتِ يا بت مش هتقصري لسانك شوية؟
- أكتر من كده مقدرش، دا بيقولي يا آنسة حنان يا ماما، بيقول عليا محترمة، كنت عاوزة أضحكله ضحكة خليعة.
ضحكت - مفيش فيكِ إلا لسان، ولما بتقعدي مع حد مبتعرفيش تنطقي، طول لسانك مشغلاه معانا وخلاص.
- بس بقى علشان أنا فضلت سرحانة امبارح فينا واحنا بنتجوز، ماما تفتكري فستان الفرح هيبقى حلو عليا؟
شدتني من ايدي - اقعدي احشي البتنجان دلوقت وبكرة هنشوف الفستان حاضر.

يعني أنا فعلًا كنت شيفاه كبير عليا، بس دلوقت عقلت وبقيت كبيرة وشيفاه قمر عليا، الواد سافر شوية رجع زي القمر، في ايه! ما براحة على قلوبنا الله يحرقكم.

- أحمد بره، يلا تعالي.

يلا آجي، مجيش ليه؟ دا أنا مستنياه من وقت ما مشي.
خرجت لاقيته قاعد مع بابا، ابتسملي وفضل ساعة يمدح في أدبي، صعبان عليا أوي، ميعرفنيش، ما هو لو يعرف بقول ايه في عقلي مش هيقول كده.