Serena's POV
Two weeks past since the party and me and Isiah nuh really spend much time together.
Whenever we do see each other a nuh fi long cause him affi guh deal wid him business and sometimes me ave classes.
Mi try mi best fi avoid daddy and so far it's been working cause him a avoid mi too.
Mi sidung a work pon my essay when mi phone start ping off the hook, non stop.
Mi check and a one a d group dem wah mi inna fi mi lectures.
The lecturer waah bring him top ten students out for dinner seeing that the semester soon done, we inna November.
Mr. Bronny: Dajae, Tara, Serena, Anthony, Marcus, Yanique, Paula and Winston, you are all invited to have dinner with me. We meet on campus tomorrow at 5, there will be a charted car for us, compliments of the psychology department.
I'm not surprised cause him did a plan this from September and it's most definitely not free, him a guh pay half the bill and the ten of us a guh pay half, me still a guh cause mi waah huh out and all now mi nuh touch the money wah daddy send inna mi account and him sen more last week.
Mi agree and guh back to wah meeda do.
"Serena!" Mi hear daddy shout.
"Yes." Mi seh and walk towards mi door, same time him come inna mi room.
"Yave any plans this week?" Him ask.
"I have a dinner tomorrow wid some classmates and mi lecturer." Mi seh and sidung pon mi bed.
"Oh, yave money?" Him ask.
"Yeah." Mi seh and start fiddle wid mi finga dem.
"Look, I'm really sorry about the other night. Yuh know how I get when I drink and I'm just a bit stressed." Him seh and look pon mi.
"Yuh seh some hurtful stuff man daddy, every time."
"Mi nuh mean dem, a jus....mi deven know yah." Him seh and shake him head.
"Well as long as yuh stop drink we naah guh have a problem." Mi seh and stand up.
"Alright mi a guh try." Him seh and hug mi.
"Mi affi guh pon d road now so stay safe and alert." Him seh and walk out.
Mi smile to mi self and sidung but mi know it wouldn't last fi long. This was a never ending cycle wid daddy but dat nuh seh mi cyah enjoy the peace wah we ave fi now.
Anyway, fast forward to the next day, mi sidung inna mi house a wait pon d taxi fi come drop mi up a school.
Mi did mek plans wid Amelia earlier fi sleep ova har house afta the dinner so she and Kareem a guh pick mi up.
Mi did inna one light blue mom jeans, white buttoned down shirt and a pair a clear heels and a yellow bag.
So like 5:30 mi lock up d house and go outside guh meet the taxi and mi reach up a school in no time.
While we did a wait pon Mr. Bronny mi phone ring and mi instantly feel nervous when mi see seh a Isiah.
"Hello." Mi ansa d phone.
"Mi nuh hear from yuh since yesterday, yuh good?" Him ask.
"Yeah mi alright, you?" Mi reply.
"Yeah man, mi can come pick yuh up?" Him ask sweetly.
"Well mi kinda occupied right now." Mi seh.
"A do wah?"
"I'm going to dinner with some classmates and mi lecturer."
"Mek sure enuh, mi woulda hate fi pop up pon yuh, as a matter of fact yuh goodly call mi fi mi come pick yuh up."
"Haha yuh funny, anyway when mi reach home mi call yuh."
Mi hang up and we greet Mr. Bronny then head out pon we way.
Isiah's POV
"Wahmu to yuh face?" Mi ask Timo.
Him buss through the front door and him ave one cut ova him eyebrow and him lip buss.
"Nuh dah pussy deh man, waste man Bennet." Him shout and fling dung him bag.
Mi sit up when mi hear Bennet name and look ova pon Yap.
"D bombohole see mi a drive, him and two rookie pull mi ova and true mi did a tek a while fi come outta d car d man dem drag mi out. Bennet start question mi bout yuh and mi nae did a ansa and d fucking coward dem jump mi." Timo seh.
Bennet a mad out, mi know him neva ave it inna him fi get ntn pon mi.
"Hear wah, we a guh pay Bennet a visit tonight." Mi seh and d man dem start shout.
Outta everybody, a Timo d man choose fi attack cause him know Timo weak, but watch me and d fucka.
Adrenaline high and d man dem ready fi run in but dem did affi understand we cyah guh now.
"Yap, call we mole and get Bennet address, a dead bwoy dat tonight." Yap tek out him phone and mek d call.
What if a Bennet and him rookie dem try offa Jungle?
12:00 roll round and me and d man dem jump inna d car, Yap did a drive d car wah me inna, a jus me and him one did inna d car, three more car did deh behind we and we did a head to Bennet address.
Yap know weh him a guh so mi neva affi worry.
Mi sidung a stare through the window and Yap clear him throat.
"A wah yah think bout Uzi?" Him ask.
"Not a thing."
Mi a think bout how dis a guh haunt me.
"Yuh look stressed man."
"Mi good."
We drive in silence and den mi realize seh dah route ere look familiar. But then again mi go all over inna Jamaica so of course it would. Then Yap drive pass one sign, that look too familiar.
Then him turn down inna one scheme.....bloodclaat.
Then him stop infront one house.
"The man seh d one pon d left suh seet deh." Him point to the house.
The same house wah mi watch Serena come outta at least 50 time.
"No man, check again, dat cyah right." Mi seh and scratch mi head.
While him deh pon d call mi look pon d house, wah dis pon mi doe God?
Then the three other car dem pull up behind we.
Wah mi a guh do?
"Him seh a d right house dawg." Yap seh and look pon mi.
What if she inside?
What if a stray bullet lick har?
What if we tek har life?
Mi cyah ave dat rest pon mi conscience......
Then mi notice one light flick on.
The front door open and bout six man come out including big belly Bennet.
Oh..... We rat end up rat we out.
Mi phone ring and mi see seh a one d man dem a call mi.
"Wah we fi do Uzi?" Him ask.
"Lef dis fi a next day, we lose the fight but we nuh lose d war." Mi seh and hang up.
Yap start the car and we drive off.
"Pussyole." Mi seh
Then it sink in, me and Bennet daughter deh, this naah guh end good enuh.
YOU ARE READING
Jamaica's Most Wanted
General Fiction*Written in Jamaican Dialect, also known as Patois* 'She love bad man' is a known saying in Jamaica but sometimes people hide who they really are to protect people they care about. Isiah, one of Jamaica's biggest criminals, allegedly, has been belie...
