Isiah's POV
Weh she deh? Mi drop Serena a d police station almost five hours ago and mi a call har phone and she naah ansa. Why she always do dis? She love mad mi?
Mi couldn't help but think the worst.
Mi call Amelia and she mek mi know seh Serena safe and alright. She was sleeping with the baby.
That made me realize seh mi neva really sidung and pree the fact seh we naah guh eva get fi do dat wid ours. Mi did too busy a be top don and strong man mi deven tek the time fi feel ntn.
Life fuck up enuh. In under one year mi meet one person and all a d fuckry come tumbling down. Everything bad wah coulda happen, happened.
Mi sidung inna d car and wull dung mi head pon d steering wheel and start bawl. The first time in a long while mi sidung and bawl suh.
My first ute? Seriously? Tiny neva dead good. Mi shoulda really fuck har up first, but mi neva ave d time.
I missed talking to my baby, mi miss rubbing Serena belly and singing to my kid. Every time mi think bout it mi get mad. Nutn nuh hurt mi suh, when Serena wake up and dem did affi sedate har because she realize seh she lose the baby.
Mi couldn't lose har.
She knew what I was, what I do and what I've done. Not half of everything though. But she still deh ere. She nuh turn pon mi. Despite me playing a part in her father's death. She still stick around.
But what if she change har mind? What if she switch up like Yap? What if she betray mi and turn mi in? Mi woulda ave it inna mi fi kill har? God no.
She was my everything. My whole world revolved around Serena. Mi nuh mek a decision and she nuh pop up inna mi mind.
Mi wipe mi face and start d car and head over to Amelia's.
On the drive there, mi get food and snacks.
Mi call Amelia and tell har fi come meet mi outside fi help mi carry d sumn dem inside and ting.
I called Amelia, suh why when mi pull up, mi see Serena outside a chat to man? And a laugh. Wah coulda so funny?
When mi park d car she deven realize, she jus a chat. Why she love chat suh?
"Yo! Fawud nuh." Mi shout and skin up mi face.
She walk towards mi and kiss mi jaw and help mi bring in d sumn dem and by the time she put dem dung she gaan back outta door.
A wah d rawse a gwaan?
Mi guh a d window and look outside and she gaan back a d fence gaan chat to the ute weh did a smile and a listen to har.
"Oye peeping tom!" Amelia shout and fling one cushion pon mi.
"Who dah ute deh?" Mi ask Amelia.
"We new neighbor ." She seh and mi gi har food.
"Suh why him a talk to Serena? Nuh your neighbor?" Mi ask.
"A some school sumn dem a talk bout."
A coulda God dem a talk bout, mi nuh care, mi still waah guh kick him dung.
Mi kiss mi teeth and sidung a d window a watch dem. Then mi see she show him har hand and him wull it a look pon sumn.
Mi did a try be patient and understanding but why she have him a touch har.
Mi pull d door and guh out pon d porch.
"SERENA! Yuh naah come eat? The food a get cold enuh." Mi seh and skin up mi face. She roll har eye and tell him bye and mi walk guh in lef har.
Mi guh sidung round d table weh d food deh and she come back in.
"Which one a mine?" She ask. Mi point pon one bag and watch how har face light up.
"Yuh find man?" Mi ask.
"Man find me." She seh and a walk back towards the door.
"Weh yah guh miss?" Mi ask.
"Mi a guh talk. A jus fi few minutes then mi come back." She seh.
"Do yuh ting."
She cyah serious a bloodclaat. It look like Serena waah mi clap a shot inna dah ute deh head. Obviously.
It look like she nuh waah deal wid mi right now and one ting mi have, is shame. Suh my yaad a d move.
"Yow Amelia, mah cut."
"Isiah yuh serious?" She ask.
"Wah?"
"A cyah jealous yuh jealous." She laugh and fling the baby dribbler pon mi.
"Hear wah, mah come go home Amelia. A fool Serena tek mi fah dawg. Mi come all d way dung yah and she outta door a chat to man. How dat look?" Amelia sigh and get a walk towards mi. She a breast feed the baby suh mi skin up mi face.
"My girl put up yuh titi." Mi seh and she laugh.
"Isiah mi fi mek mi pickney dead fi hungry? Anyway, memba wah she a guh through right now. She obviously wants some form of escape and dem talking bout molecules or people brain a gi har dat, den mek she stay." She seh.
"She can talk to me bout it."
Mi look pon d two a dem outta door and mi hate fi admit it but him look like the type a man weh she deserve, not a fucked up murderer like me weh can barely sleep a night.
"She can but she doesn't want to, is there something wrong with that?" Amelia ask.
"Stop try get inna mi mind, mi a guh home." Mi open d door, wave bye to har and den walk guh to mi car.
"Isiah." Serena seh.
"Isiah yuh naah hear mi?" She seh again.
"Lata Andrew." Mi hear har seh.
Mi unlock d car and guh round d driver's side.
"Isiah." She wull mi hand and mi stop.
"Yes Serena?" Mi turn round.
"Yuh neva hear mi a call yuh?" She ask.
"Yeah but mi neva did a medz yuh. Head deh some weh else."
"Suh why yah guh weh? Mi jus did a guh come back in." She seh and tek sumn outta mi hair.
"Mi come link yuh and yuh deh outside and talk, mi feel like meeda intrude suh mi a cut."
"Yuh cyah serious."
"Like a judge."
"Alright Later, gah yuh yaad." She seh and walk off.
Mi jump inna mi car and cut. Mi nave the energy fi argue.
YOU ARE READING
Jamaica's Most Wanted
General Fiction*Written in Jamaican Dialect, also known as Patois* 'She love bad man' is a known saying in Jamaica but sometimes people hide who they really are to protect people they care about. Isiah, one of Jamaica's biggest criminals, allegedly, has been belie...
