Isiah's POV
Mi almost figet bout d one Bennet aswear. But life still a keep. Like mi did seh, Mi woulda wait likkle afta Serena birthday before mi actually do sumn bout Bennet.
"Alright hear wah, mi a gi every man and oman two days fi lay low, find some weh safe fi stay and get dem shit sort out." Mi seh.
"Wah yuh mean? A wah a guh dung?" One ute ask.
"Unuh naffi know, jus find some weh and laylow fi couple months," Mi tell dem. Dem nod dem head and start chat amongst dem self.
Two days enough fi dem do dem ting and two days enough fi me do mine.
Afta mi sort out things up desso, mi guh back ova my house, weh Serena did a wait pon mi.
When mi reach up back she did a run up and dung a look clothes.
"Wah yah do?" Mi ask and flop dung pon d bed.
"Amelia a ave d baby, mi need fi gah d hospital." She seh and put on one dress.
"Alright mah guh bring yuh." Mi seh, like a nuh me always drive har up and dung. She a wull hard end pon mi still, cause mi buy har d car she determined fi drive it, like mi a nuh har personal chauffer.
"No, Kareem did a ask if yuh can guh pick up him mada and sumn cause Amelia parents already deh deh, him nuh waah come outta d hospital and miss the birth." She seh.
"Suh how yah guh reach?" Mi ask and wull har hand.
"Isiah, yuh buy mi d car fi drive." She seh and hug mi up.
"Mi all figet bout dat, hurry up and gwaan." Mi kiss har belly den kiss har lips den let har guh.
"Love you."
"Love you too."
She cut and mi decide fi laydown likkle.
Kareem mumma can wait likkle.
Afta mi please mi self, mi get up and decide fi guh fi d lady.
Mi drive go to the address and blow the horn three time and she come out.
"Hello, thanks for coming to get me." The old lady seh and come inna d car.
"Yeah man, anytime, mek we hurry up and drive go to the hospital suh yuh doe miss the birth a yuh grandchild." Mi drive off.
Mi did know a likkle shortcut suh mi reach the hospital in like fifteen minutes.
"Those are Amelia's parents" Kareem mada seh. We walk towards them and as soon as we reach dem Kareem buss outta one room.
"It's a girl." Him shout. The old people dem start kick up and a gwaan and him guh hug him mada.
"Yow weh Serena deh? Amelia a ask fi har." Him tell mi.
"Weh yuh mean by weh she deh? She nuh reach yet?" Mi ask and raise mi eyebrow.
"No, she nuh reach."
"But she lef out before mi, good while too." Mi scratch mi head.
Mi walk weh from him and pull out mi phone and call har.
"This number is unavailable...." What the fuck?
Mi hang up and call it like three more times and jus decide fi think seh she stuck inna traffic.
Mi sidung inna d waiting room fi bout half an hour a wait and still, no Serena. Mi start cause this isn't like her. If a one thing mi know, she naah guh Miss this and she been a brag bout being a rich aunty n dem fuckry deh.
All of a sudden mi body start scratch mi, cold sweat a wash ova mi, mi a shake mi foot, proper anxiety mah feel.
Suh when mi phone flash on and an unknown number pop up almost an hour later mi ansa it yuh fuck.
"Hello?"
"Is this Isiah Walker?" The lady on the other end of the line ask.
Mi get up and walk guh somewhere quieter.
"Okay, you were listed as the emergency contact for a Serena Bennet." She said in a question like tone.
"Yeah and?" Why she nuh hurry up and talk?
"Well she's at UWI right now, in critical condition."
Critical Condition?
<<<<<<<<<<
Serena's POV
Mi cyah believe Amelia a ave d baby right now. Mi cyah wait fi trouble har bout it.
Mi did inna rush suh when Isiah come, mi tell him wah Kareem seh and lef out. Mi a weave through d likkle traffic weh deh pon d road and ting like some big driver then mi reach a stop light.
It was an intersection suh mi wait likkle, when the light guh pon green mi drive off again.
"God, I hope mi nuh miss it." Mi whisper and change gear.
Mi stop a one intersection again, this time a me one, no other car neva did a drive in the direction that I was. Suh mi start tap the steering wheel and a hum.
Mi notice one black jeep a drive pass, nice.
Then the jeep buss a U-turn just as the light guh pon green. Mi ignore it and as mi start drive off mi notice it a drive come back towards mi. Impatient much? Them couldn't wait pon d light fi change.
Mi jam mi brakes suh dem coulda drive pass but mi notice dem a get closer to mi.
"Wait! No-" before mi coulda even finish talk the jeep ram inna d side a mi car, the window bruck and the door bend.
Dem reverse again and then speed towards mi as if crashing inna mi car a first time wasn't enough. Mi head lick up inna d dash board and glass fly all bout and cut mi up.
Mi start feel light headed and the last thing mi memba was trying to open car door.
YOU ARE READING
Jamaica's Most Wanted
General Fiction*Written in Jamaican Dialect, also known as Patois* 'She love bad man' is a known saying in Jamaica but sometimes people hide who they really are to protect people they care about. Isiah, one of Jamaica's biggest criminals, allegedly, has been belie...
