Isiah's POV
Mi guh in behind har and close the door.
She did gone back pon har laptop a type a guh weh.
"Yuh hungry?" Mi ask and put har phone infront har.
No ansa.
"Mi a guh order some food, yuh want anything?"
No ansa.
"Yah come bade wid mi?" Mi ask.
Still, no ansa.
Suh mi roll up a spliff and light it up because she miss seh sumn bout dis but she neva seh ntn she jus guh some weh else and meeda falla backa har till she lock har self inna d bathroom.
Mi deven get fi enjoy mi spliff.
"Serena mi waah ask yuh sumn, come here." Mi seh.
All now she nuh fart pon mi. And a suh she malice mi fi bout two day.
Everyday mi talk to har she nuh ansa and she deven look pon mi.
She deven sleep wid mi.
She wake up early and bade suh mi doe bade wid har and if mi do wake up early and seh mi a guh bade wid har, she lock the bathroom door.
Mi did feel bad, trust mi, mi naah guh eva do dat again.
Mi doubt mi get even 6hrs worth a sleep d two day dem.
Suh when mi wake up the third day she neva deh inna d bed and mi neva hear har inna d house. The time was bout afta 10 inna d day.
When mi come outta d room mi guh bade and brush mi teeth and ting den mi guh inna d living room and see har a dash weh burger king bag.
"Bloodclaat now, yah eat and nuh gimme none." Mi seh and watch har.
She go ova to d sink and a wash out the sumn dem wah she use suh mi guh corna har.
Mi stand up behind har and put mi hand dem pon d counter suh she couldn't move.
"Good morning." Mi seh and kiss har neck and she ease mi off.
"Mi cyah touch yuh again." And she nuh ansa.
"Yuh nuh hear mi a talk to yuh?" Mi seh and knee har pon har batty.
She still neva did a pay mi nuh mind suh mi liff har up and put har pon d kitchen counter.
"Isiah move nuh and mek mi do wah mi a do." She and push mi.
"Yaffi talk to mi." Mi seh and hug har up.
She kiss har teeth.
"No, now leave me alone." She seh.
"No." Mi seh and bite har pon har shoulder.
"Stop." She seh and laugh.
"Yuh know how long mi nuh hear yuh laugh." Mi seh and kiss har and she kiss mi back.
"Move now." She seh.
"Serena I'm sorry." Mi seh and she shake har head.
"We good now?" Mi ask and she nod har head.
"Serena we good?" Mi ask and hug har up.
"Yes Isiah." She seh and wrap har hand dem round mi neck.
"But look how yuh stink too, bout yah sleep inna settee." Mi seh and she laugh.
"Move mek mi wash up d sumn dem." She seh.
"Dem naah guh nuh weh. Mi did miss yuh." Mi seh and rub har back.
YOU ARE READING
Jamaica's Most Wanted
General Fiction*Written in Jamaican Dialect, also known as Patois* 'She love bad man' is a known saying in Jamaica but sometimes people hide who they really are to protect people they care about. Isiah, one of Jamaica's biggest criminals, allegedly, has been belie...
