Jamaica's Most Wanted

Part 37

Isiah's POV
The look wah did deh pon mi mada face was priceless. Mi finally decide fi tell har seh Serena pregnant and mi honestly couldn't tell if she did vex, happy or nervous.

"Pregnant?" She seh, like she nuh hear wah mi jus seh.

"Yes mommy." Mi ansa and smile.

"Lawd God, mi finally a guh get mi grandbaby." The lady wull on pon har heart like she a get heart attack.

Mi stand up a smile and sumn, feel proud yuh fuck den all of a sudden she stop create excitement.

"Wah a guh happen wid Bennet?" She ask.

"Well mommy, mi affi guh deal wid him quicker dan mi think and mi affi guh dweet by mi self. Cyah mek nobody know wah mi a guh do." Mi sidung pon one stool.

"Alright, as yuh seh, doe mek nobody know when yah guh do yuh ting. Deal wid it quick and fast." She touch mi shoulder and seh.

Mi leave out and decide fi guh up to the mansion fi guh check pon mi people dem.

Mi a guh deal wid Bennet later, first mi a guh check up pon mi empire then mi a guh finish plan fi Serena birthday which is next week Friday.

As much as mi woulda waah kill d pussy right now, mi couldn't tek weh har fada right before har birthday.

"Alright wah we ave?" Mi ask Timo.

"Everything a run smoothly. Yuh can check wid Tiny dem, mi only know bout d man dem, yuh cut last week and since then everybody a move good. No side eyes, no bad comment. Everybody jus a wait pon yuh fi gi we d order." Him seh.

"Order? Fi wah?" Mi ask.

"Yuh know." Him tilt him head likkle.

"Oh, mi soon mek unuh know."

Bennet and d wull a him police bwoy dem a terrorize we fi way too long, almost two years we a fight it out and honest to God mi know d man dem tyad just as much as me.

"Ah unuh jus continue do wah unuh a do, maffi guh pon d road guh check on sumn."

"Ah stay safe."

Mi jump inna mi car and drive guh to the place. Mi secure the deal and smile to mi self.

"She a guh love dis." Mi think to mi self.

"Okay so when do you want this delivered?" The salesman ask.

"Friday morning, as early as unuh can deliver it zeen?" Mi shake him hand and cut.

Mi smile to mi self while mi a drive guh home, things a guh really smooth from weh day dawg. Mi get back mi oman, she and we baby healthy, business a run smooth like butter, literally everything a run great as fuck but yet still mi cyah help but shake the feeling seh sumn big a come.

Bennet resurface like ntn nuh happen. Him stop fan mi dung pon d road side, him jus watch mi drive pass and that mean seh him ave something planned. But fi d sake a Serena, mi jus a guh easy back until two weeks or so after her birthday and den a desso it done.

Desso mi a guh murda him.

<<<<<<<<<<<<<<<<<<<
"HAPPY BIRTHDAY TO YOU! HAPPY BIRTHDAY TO YOU! HAPPY BIRTHDAY DEAR SER SER. HAPPY BIRTHDAY TO YOU." It's a ritual fi watch ova back the video dem wid mi mada pon mi birthday. Not fi sad out mi self of nutn but jus fi feel like she actually deh ere a wish me happy birthday. Snapchat nuh mek it easier anyway, cause every year pon mi birthday dah video ere come up inna d memories.

Mi did jus turn fifteen and mi mada wake up early and set up the house wid balloons and stuff and one big cake.

Before mi come outta d room she borrow mi phone and she video everything and dah video ere a one a d few weh mi can watch and still feel har presence.