Jamaica's Most Wanted

Part 34

Serena

Mi really doe like Kareem. Why him woulda agree fi set mi up like that. As soon as mi sure seh Isiah gone mi cut.
And mi nuh guh ova Amelia yaad fi like one week.

Levy ask mi fi follow him guh buy some stuff fi him mada and quite frankly mi did bored and bitter suh mi seh yes.

Mi guh wid him to pricemart then we guh a bascho. It was a friendly vibe and den him drop mi home and mi step pass mi fada and guh straight inna mi room.

What a waste of space, him wouldn't even seh him come comfort mi or anything, him hide mi out until him know seh mi snap outta mi depressive episode.

Mi sidung and a play up pon mi phone and mi start feel dizzy. Mi gag and fling mi hand a mi mouth, mi run guh to the bathroom and vomit up everything wah mi eat todeh.
Mi programmed fi think the worst suh mi google it.
'Random puking' and google tell mi all sort a fuckry.

"Brain tumor, gallbladder disease, heart attack, pregnant and ulcer." Mi read out loud

Wait pregnant? Dat cyah possible. Mi tek d pill any time Isiah get carried away so that is a no no.

Mi laugh to mi self and flop back and mi mind start run.

Then mi realize sumn.

Mi period nuh come yet.
Mi did too caught up wid things mi deven realize.

Now hold on, mi guh check mi Flow app and see seh mi eleven days late.

Fada God.

Mi ignore it and start prepare mi stuff fi school tomorrow.

Mi couldn't shake the feeling seh sumn did wrong.

Mi guh laydung, twist and turn till mi finally drop asleep.

Mi jump up outta mi sleep and run gah d bathroom, puking again.

No no no no no.

Dis naah guh work. No.

A wah mi do God suh? Seriously.

Mi notice seh outside was getting lighter, suh mi know a bout afta 5 or early afta six.

Mi clean up inna mi room and tek out d empty wata bottle dem and ting.

Meeda try busy up mi self suh mi neva did affi think bout the elephant inna d room, or inna mi belly. Hopefully not.

Mi start pace round the house until mi finally sidung, outta breath.

Instead a panicking, mi fi jus guh buy a test right? And stop gwaan like bafoon.

Mi draw on one pair a sweatpants and one hoodie and mek my way to the pharmacy.

Mi buy the test and mi nuh itch fi go home back. Hungry did a kill mi but mi jus did waah get this outta the way.

"Fada God, doe mek dis be wah mi think it is." Mi seh and piss pon d stick den put it pon d counter and wait likkle.

"God mi know yuh naah fail mi enuh." Mi whisper.
Mi tek up d stick and see two lines, one brighter than the other.

"A joke dis enuh." Mi seh.

Mi tek out the next one and repeat the same steps and it was the same results except the second line was just as bright as the first one.
Look like God fail mi.

Mi sidung and wull mi head and before mi know it mi start bawl.

Babies are a blessing doe get mi wrong, but mi jus feel like mi nuh ready.

"A wah mi do yuh fada God?" Mi ask, expecting a ansa.

Mi kiss mi teeth and get up offa d toilet and shove the stick dem inna mi pocket.