Serena's POV
Mi clean up d place and sidung pon mi phone a watch tik tok.
All of a sudden the front door fly open, Isiah walk in soak inna rain wata.
"Lawd yuh couldn't tek time open the door!" Mi seh and roll mi eye.
Him nuh seh nutn him jus walk pass mi.
"Good afternoon to you too." Mi seh and kiss mi teeth. D man deven lock back d door.
"Serena come ere." Him shout from inna d bathroom. Him renk doe, deven seh evening and a call mi.
"Serena come ere nuh please." Him seh again.
Mi get up n guh lock d door den tek mi own sweet time and guh to him.
"Mave bad news." Him seh and wrap one towel round him waist.
"Which is?" Mi ask.
"Mi affi guh pon a business trip fi like two weeks." Him seh and a stare mi dung.
"All of a sudden yaffi guh pon business trip?" Mi ask. That's weird.
"Mi been a push it back cause yuh deh ere. But mi affi guh now, it important." Him seh and rub mi shoulder.
Mi a stare inna him face jus fi see even a glimpse seh a lie him a tell but mi jus give in.
"How long yuh seh yah guh weh fah?" Mi ask and sigh.
"Mi know mi seh two weeks but mi nuh sure. Probably a month." Him seh.
Him hug mi up and kiss mi pon mi farrid.
"Mi waah bring yuh enuh but it too risky, mi a cut tonight, yuh can stay ere by yuh self fi suh long?" Him ask.
"Wah yuh mean by it risky?" Mi ask and lean up.
"Traveling pon d road 24/7 and some shady people deh deh too." Him seh.
"But mi nuh really waah yuh stay ere alone Serena." Him seh.
"If anything mi guh ova Amelia." Mi hate Kareem but mi cyah badda wid how lonely the house feel when a me one deh ere.
Afta dat mi stand up and watch him pack him bag dem, the way him a pack doe look like 'weeks' stay but mi nuh seh nutn.
Him pack the essentials like clothes and dem ting deh, den mi see him put one hand gun inna d bag.
"Um, since when yave that?" Mi ask.
"This? This a d least baby girl. Mi affi protect mi self doe?" Mi stand up and a watch him move round d room and a tek up things wah him need.
"Mi waah fold yuh up and put yuh inna mi back pocket suh mi can carry yuh wid mi." Him seh and put dung d bag. Him sidung pon d bed and pull mi dung inna him lap.
"Weh yah guh by the way?" Mi ask and rest mi head pon him shoulder. Him nuh ansa.
"Weh yah guh Isiah?" Mi ask again, but louder.
"Um...all bout, mi a guh live pon d road basically. Mi affi visit all a mi establishment dem and dem ting deh." Him seh and hug up mi waist.
"Suh mi a guh hear from yuh everyday?"
"That is a muss." Him seh and laydown wid me pon top a him.
Isiah's POV
Mi kiss har one last time before mi drive out. Mi watch har through the rear view mirror a watch d car. She stand up a d doorway a hug up harself like she inna music video.
We agree fi she stay ova Amelia till mi come back, mi neva like the idea of her staying there by har self, especially wid wah happen today.
Mi neva waah put har inna harms way, yk the saying goes; if yuh cyah ketch johnny murda him shirt.
Mi mek sure mi tell mi mada bout the situation suh she can stay pon har toes. She assure mi seh she good and nobody couldn't catch har off guard.
Afta the shooting mi did draw Timo to the side and ask him who else did know seh mi a come a d hospital n him seh the other two ute dem weh team up wid him.
Mathew and PJ.
Before mi guh hideout, mi did affi deal wid it.
There was always the possibility seh a follow smaddy follow mi but mi couldn't rule out the fact seh smaddy set mi up.
Me and Yap did a talk pon d phone.
"Me and d man dem good ova yasso, the place well guard up suh yuh naffi worry bout we, mi sure the ute dem can mange fi tek care a jungle." Him seh, mi glad fi see him a step up.
"Dat good but mi need fi find out who dem two ute deh talk to." Mi seh.
"Uzi, yuh eva think seh smaddy follow yuh? Memba yah guh between the hospital and wherever yuh did deh often enuh." Him seh.
"Suh it nuh hard fi dem follow yuh, stop feel like everybody a betray yuh." Him seh.
Him did right I guess. Mi ddi ave ample amount a time fi figure dis out, right now mi jus need fi cool and disappear for a while.
Mi hang up d phone n put in the location to mi portland house inna d gps and drive guh deh.
Mi jus hope everything go smoothly.
Mi lock off mi phone and drive wid some music a play and a jus one thing mi a pree.
Wah Bennett up to?
YOU ARE READING
Jamaica's Most Wanted
General Fiction*Written in Jamaican Dialect, also known as Patois* 'She love bad man' is a known saying in Jamaica but sometimes people hide who they really are to protect people they care about. Isiah, one of Jamaica's biggest criminals, allegedly, has been belie...
