Isiah's POV
Mi nuh hear a ting bout or from Bennet since we did guh a him house. Mi nuh hear Serena talk bout him, mi barely hear him call har.
"Wah yah think bout?" Serena ask and rub mi back.
Mi a think bout how yuh fada disappear, mi a worry.
"You." Basically.
"Wah bout mi?" She ask? She did jus wake up, har eyes and har lip dem did kinda swell, har face did kinda oily. She pull out har braid dem last night suh har hair did inna it natural state and she did jus look pretty.
Mi did get up and sidung a d edge a d bed and she did come behind mi and hug mi up, wrap up inna d sheet weh we did tear offa d bed last night.
Mi cyah believe mi affi guh miss out pon dis. Either mi affi guh ghost or mah guh dead at the end of this war wid har fada and either way, mi cyah guh have har. If mi guh ghost before she find out, she a guh find out over the news or sumn and if mi dead, she a guh find out who mi really is whether it be over the news or from har wasteman fada.
Mi nuh happy wid either option.
"Tell har." D likkle voice inna mi head seh. But she probably nuh like it or maybe she a guh hate me. Serena too innocent fi mix and mingle wid d people like mi.
Mi feel selfish fi even a deal wid har and naah be truthful but mi nave nuh choice.
She deserve better but mi cyah guh sleep good a night knowing seh Serena a guh love a next man just like she love mi, if not more.
"Yuh feel like yuh can see yuh self wid nobody other than me?" Mi ask har.
"No, why yuh ask dat?" She ask and laugh.
"Alright, say sumn fi happen to mi todeh, you woulda move on, or try wid nobody else?" Mi ask.
"Mi know a nuh years we a talk fah or nutn but still."
"Stop think like dat." She seh and rub mi neck back.
"Mi cyah help it." Mi seh and laydown back.
She sidung a stare pon mi wid one likkle smile pon har face.
"Wah?" Mi ask.
"Mi think a me alone think like dat." She seh and start play wid mi ears.
"But to answer yuh question honestly, it woulda tek some time but of course mi woulda try again wid somebody. Mi cyah see mi self wid nobody else right now but if sumn fi happen to yuh, yuh wouldn't want mi fi move on and be happy?" She ask.
"No not really. Be happy yes, move on no. Mi nuh waah yuh happy wid nobody if a nuh me." Mi seh and she start laugh.
She laydown pon mi chest and mi know mi a gun man or whatever and mi fi be tough and ting but jah, Serena mek mi feel like porridge.
Dis girl can mek mi do anything if she ask mi or jus hint at it.
Mi love dah girl ere like crazy.
Mi phone start ring and mi laydown deh deh a ignore it and Serena liff up har head.
"Yuh naah guh ansa it?" She ask.
"Yuh cyah ask mi fi stay inna d bed wid yuh? Jesus. Yuh cyah be one a dem girl deh weh jealous a dem man work." Mi ask and she start laugh.
Mi get up outta d bed and draw one one shorts.
"Isiah yuh batty fat enuh."
Mi ignore har and start dig up mi fi mi phone and when mi find it a Timo did a call mi.
YOU ARE READING
Jamaica's Most Wanted
General Fiction*Written in Jamaican Dialect, also known as Patois* 'She love bad man' is a known saying in Jamaica but sometimes people hide who they really are to protect people they care about. Isiah, one of Jamaica's biggest criminals, allegedly, has been belie...
