CLOVER

Part-16

      Unicode version

အချိန်အားဖြင့် မနက်ဆယ့်တစ်နာရီ...

အေးစိမ့်နေတဲ့ အခန်းလေးဟာ ခေါင်မိုးနဲ့ နီးကပ်နေတဲ့ ဒုတိယထပ်မှာတည်ရှိတာကြောင့် အမိုးပေါ်ကို သည်းထန်စွာရွာသွန်းနေတဲ့ မိုးရေကျသံ တဗြောင်းဗြောင်းကို အသံလုံအခန်းဆိုသော်လည်း အနည်းငယ်ဆိုရုံမျှတော့ ကြားနေရ၏။

ကျောင်းဖွင့်တဲ့နေ့တစ်နေ့ဖြစ်ပေမယ့် မြူရှင်းဟာ အိပ်ယာပေါ်က စောင်ပုံထဲမှာပဲ ပုဇွန်ထုပ်ကလေးလို ကွေးလို့နေလေရဲ့။မနေ့ညက KIRAကြောင့် မိုးရေစိုရုံလေးစိုခဲ့ပေမယ့် နဂိုက ကိုယ်ခံအားနည်းတဲ့ မြူရှင်းကိုကိုအား ကိုယ်ပူရုံဖျားဖို့ရာအတွက် လုံလောက်စေခဲ့သည်။

ပြင်းထန်စွာနေမကောင်းတာမျိုးမဟုတ်ပေမယ့်လည်း မိုးရွာနေတာ​ရောကြောင့်ပါ မြူရှင်းရဲ့ ဖေဖေဟာ သားဖြစ်သူက ဖျားနာနေခြင်းကို အကြောင်းပြုလျှက် ကျောင်းကိုခွင့်တစ်ရက်တောင်းခံပြီးဖြစ်လေသည်။

ကျောင်းမသွားရတာကြောင့် မိုးအေးအေးလေးနဲ့ စောင်ပုံထဲမှာကွေးနေရတဲ့ feelingကို မြူရှင်းအတော်သဘောခွေ့နေ၏။

*နေ့တိုင်းသာ ဒီလိုလေးဆိုရင် ဘယ်လောက်ကောင်းမလဲ။

ဒီလိုမျိုးလေးတွေးမိပေမယ့်လည်း မြူရှင်းတို့ရဲ့မြို့အနီးက မြစ်တစ်စင်းကြောင့် ယခုကဲ့သို့ မိုးသည်းသည်းထန်ထန်ရွာလေတိုင်း မြစ်ရေလျှံခြင်းဒဏ်ကို အနိမ့်ပိုင်းရပ်ကွက်တွေက အလူးအလဲခံစားတတ်ရ၏။ကိုယ်ချင်းစာကြည့်မိရုံနဲ့တင် သူတို့အစားစိတ်မကောင်းဖြစ်ရတာမို့ မိမိစိတ်ချမ်းသာချင်ရုံ ဆန္ဒတစ်ခုတည်းကြောင့် သူတစ်ပါးမိသားစုတွေ ဒုက္ခများရမှာက မဖြစ်သင့်ဘူးမဟုတ်ပါလား....ဆုတောင်းတိုင်းက မပြည့်ဘူးဆိုပေမယ့်ပေါ့။

ထားပါလေ...

လောလောဆယ်တော့ ear budsလေးကို နားထဲထည့်ပြီး bluetooth နဲ့ချိတ်ကာ မိုးရွာနေတိုင်း နားထောင်နေကျ playlistကို ဖွင့်ထားလိုက်သည်။ပထမဆုံးပေါ်လာတဲ့ သီချင်းက

Still with you..

Lyricsတွေရဲ့တစ်နေရာကိုရောက်တော့ တိုးညင်းတဲ့အသံလေးနဲ့ လိုက်ဆိုမိသည်။