TARAXACUM

Final Extra

Unicode

Recommended Song - My Heart will go on (Flute version)

တစ်ရက်... နှစ်ရက်... သုံးရက်...

ရက်တွေကုန်ဆုံးလာလေလေ၊ အဂ္ဂါ၏ရင်ခုန်သံကမြန်လာလေလေ။ သိပ်မကြာခင်အတောအတွင်းမှာပဲ Venice သို့ မင်္ဂလာပွဲအတွက် အဂ္ဂါ၏မိသားစုရောက်လာခဲ့သည်။ အဂ္ဂါ၏မိဘနှစ်ပါး၊ အဂ္ဂါ၏အစ်မဖြစ်သူနှင့် ဒေါ်တင်မိုးဆွေပါ ပါလာခဲ့သည်။ လဝန်းမေကတော့ ရောက်ကတည်းက လည်ပတ်ရင်း မင်္ဂလာဆောင်တွင် ဝတ်ဖို့ရန်အဝတ်အား အဂ္ဂါလက်ကိုဆွဲ၍ တစ်မြို့လုံးပတ်ဝယ်သည်။ သတို့သားလေးခမျာ အစ်မဖြစ်သူ၏လက်ချက်နှင့် Venice မြို့ကို အတော်လေး နှံ့နေကာ၊ ဘယ်နေရာဘာရှိသလဲ ဆိုတာကိုပင်သိနေပြီ။ တစ်နေကုန်ဖင်ပူအောင် မထိုင်ရဘဲ လဝန်းမေ၏ ဂျစ်တိုက်မှုအောက်တွင် အနားမရရှာ။

Taraxacum သည်လည်း မအားချေ။ ပွဲလုပ်ဖို့ရန်နေရာကိုလည်း သူကိုယ်တိုင်စီမံက ကိစ္စအဝဝ များလှသည်ဖြစ်၍ အဂ္ဂါနားပင် မကပ်နိုင်။ မိုးလင်းသည်နှင့် အိမ်မှထွက်သွားရရှာပြီ။ ညဘက်ပြန်လာချိန်တွင်တော့ အဂ္ဂါကလည်း ပင်ပန်းလို့အိပ်နေရှာလေပြီ။ ထိုအခါတွင်တော့ Taraxacum သည် အခန်းအတွင်းသို့ သူခိုးထက်လုံသော ခြေသံဖြင့် ဝင်ကာ အင်္ကျီထူကိုအသာအယာချိတ်၍ အဂ္ဂါဆီသို့ချဉ်းကပ်သည်။ မှောက်ရက်ကလေးအိပ်နေတာကိုတွေ့လျှင် ခပ်ဖြေးဖြေးမ၍ နေရာတကျပြန်လုပ်ပေးမြဲ။ အဂ္ဂါကတော့ သူရွေ့လျှင်ရွေ့သလို ရွေ့သွားကာ မနိုးပါဘဲ နှုတ်ခမ်းလှုပ်စစဖြင့် အင်းအဲလုပ်ကာ အိပ်ဆဲပင်။ Taraxacumသည် အဂ္ဂါကို စကားလုံးလေးတချို့ပြောပြီး၊ မအိပ်ခင်အနမ်းလေးပေးပြီးမှအိပ်သည်။ သည်ရက်တွေမှာ သူ့ကောင်လေးတော့ ပင်ပန်းနေရော့မည်။

တစ်မနက်ခင်းတွင် အဂ္ဂါသည် နေရှိန်မြင့်မှနိုးလာသည်။ နိုးသည်ဆိုသည့်အတိုင်း နိုးရုံလေးပင်။ မျက်လုံးအား ခပ်မှေးမှေးဖွင့်လျက်၊ လွတ်နေသည့်တစ်ဖက်ခြမ်းသို့ ခြေထောက်တစ်ဖက်ကရောက်သွားသည်။ ထုံးစံအတိုင်း မူမပျက် သူ့စိတ်ထဲတွင်ထိုနေရာ၌ လူမရှိဟု မှတ်ယူထားသောကြောင့်ပင်။ သို့သော် ဘေးတွင်ရှိနေသော Taraxacum ကြောင့် အဂ္ဂါ လှုပ်လှုပ်ရှားရှားဖြစ်သွားလေသည်။ သူ့ထက်အမြဲ ဦးဆုံးနိုးကာ အပြင်ထွက်သွားတတ်သည့် Tarax က ယခုမူ သူ့ဘေးတွင် နှစ်ခြိုက်စွာ အိပ်ပျော်နေလေသည်။ ဘယ်လောက်ပင်ပန်းထားသည်လဲမသိ၊ မျက်ကွင်းတွေတောင်ညိုချင်နေသလိုလို၊ သို့ထိတိုင် အိပ်နေသည့်ပုံရိပ်က လိုင်းပေါ်တွင် ခေတ်စားနေသည့် Future Business hubby ပါပဲ။ လက်ထပ်မည့်ကိစ္စက သတင်းပေါက်ကြားသွားပေမဲ့ ကာယကံရှင်တွေက တစ်ဦးတစ်ယောက်မျှ Confirm မလုပ်သောကြောင့် သတင်းအမှားယောင်ယောင် ဖြစ်နေဆဲပင်။