လက်ထပ်စာချုပ် || ဘာသာပြန် ✅

အချပ်ပို

T/N : ယန်ကျင်းက ရွှီလောင်ကျောက်ရဲ့ချစ်သူပါ။ အရင်အခန်းမှာတုန်းက သူပြောဖူးပါတယ်။

လွန်ခဲ့သည့်ငါးနှစ်တုန်းက ဟန်းယန်ကို ဟဲ့လျန်ချင်းကို ပထမဆုံးတွေ့ဖူးခြင်းဖြစ်သည်။ အဲ့တုန်းက သူ့သူငယ်ချင်းက လူငယ်ဝက်ဘ်ဂိမ်းပြိုင်ပွဲတစ်ခုတွင် အစီစဉ်တင်ဆက်သူတစ်ယောက်အဖြစ်လုပ်တာကြောင့် ယန်ကျင်း၊ ရွှီလောင်ကျောက်နှင့် သူ့ကို ဖိတ်စာပို့လာခဲ့တာဖြစ်သည်။ သူစိတ်မဝင်စားပေမဲ့လည်း သူ့သူငယ်ချင်းက ဖိတ်စာပို့လာတာကြောင့် သွားတက်လိုက်သည်။

ပွဲကျင်းပရာနေရာ၌ ဟဲ့လျန်ချင်းသည် သူ၏အာရုံကို ရွှီလောင်ကျောက်နဲ့ စကားပြောခြင်း၊ သူ့လက်ထဲရှိစာရွက်စာတမ်းများ အပေါ်၌သာ ထားရှိလေသည်။

"ဟေး.. မင်း ဒီကို ပွဲလာကြည့်တာမဟုတ်ဘူးလား။ မင်းအလုပ်တွေကိုပဲ တစ်ချိန်လုံးအာရုံစိုက်ထားစရာမလိုပါဘူးကွာ" ရွှီလောင်ကျောက်က ဟဲ့လျန်ချင်းကို ပုတ်လိုက်ပြီး "ငါတို့နိုင်ငံကပန်းပွင့်ငယ်လေးတွေက သူတို့ကိုယ်သူတို့ ပိုကောင်းအောင်လုပ်ဖို့ ဘယ်လောက်အားစိုက်ထုတ်နေလဲဆိုတာ ကြည့်လိုက်စမ်းပါ။ မင်းလည်း စိတ်အားထက်သန်မှုနည်းနည်းပြပြီး သူတို့ကို အားပေးမှုနည်းနည်းပေးသင့်တယ်နော်"

ဟဲ့လျန်ချင်းက စာဆက်ရေးနေပြီး စာရွက်စာတမ်းပေါ်များတွင် ပြင်ရန်လိုအပ်သည့်နေရာများကို မျဉ်းတားနေကာ မော့မကြည့်လာဘဲ ပြောလိုက်တော့သည်။ "အားပေးတဲ့ကိစ္စကိုတော့ ငါမင်းကို လွှဲထားလိုက်မယ်။ ငါ့ရှယ်ယာလည်း ပါတာပေါ့"

"ကျစ်.. မင်းကလေ ပြောမကောင်းဆိုမကောင်းကောင်ပဲ" ရွှီလောင်ကျောက်က နှာမှုတ်၏။

စက္ကန့်အနည်းငယ်ကြာပြီးနောက် ရွှီလောင်ကျောက်က သူ့ကိုထပ်ပုတ်လာပြန်တော့သည်။ "ဒီအဖွဲ့ရဲ့တီထွင်နိုင်စွမ်းကလေ အတော်လေးကို စောက်ရမ်းမိုက်တာကွာ.. သူတို့ရဲ့ နည်းပညာအသိဉာဏ်ကလေ နည်းသေးတယ်ဆိုပေမဲ့လည်း တီထွင်နိုင်စွမ်းကတော့ အတော်လေး မူရင်းပုံစံဖြစ်ပြီးတော့ တော်ကြတယ်ကွ"

"အင်.. အတော်တော်ကြတာပဲ" ဟဲ့လျန်ချင်း ခပ်ပေါ့ပေါ့ ပြန်ပြောလိုက်သည်။