" بس يا أدهم المستر شكله بيحبك اوي " تحدثت هنا والدته
" اه بيحبني اوي "
" طب وانت بتحبه؟ "
" اه بحبه اوي بيفكرني ببابا "
حمحمت " هو متجوز؟ "
" لا " ثم نظر اليها وتحدث بطفولية " اتجوزيه يا ماما عامل زي بابا وبيحبني "
" ايه!..اتجوزه " تحدثت بخجل ثم اردفت " هو انت مش هتزعل اني اتجوز؟..بس انت قبل كدة زعلت "
" اه كنت زعلان عشان هم ناس وحشة ومش بيحبوني ومش حنينين لكن سالم عامل زي بابا "
ابتسمت وحدثت نفسها " بصراحة هو هيبقى اب مثالي "
اما ادهم فوضع يده على فمه " انا نسيت!..ده خالو عايز يتجوز ميس ضحى ومتفق معايا! "
" طب ايه رأيك اجي اخدك كل يوم؟ " تحدثت بخبث
حدث نفسه " ماك!..لا لا! "
" لا يا مامي الشغل وبعدين انا بروح لوحدي "
" لا هاجي اخدك "
" يووه! " حدث نفسه
اما ضحى فعادت للمنزل وهى تضحك وتعض شفتاها وقلبها لا يتوقف عن الخفقان بسرعة
" ايوا يا نادية..محتاجة اقابلك "
وبالفعل ذهبت اليها نادية وجلست بجانبها وابتسمت
" شكلك مبسوطة..ايه فيه عريس؟ "
حمحمت ضحى " يعني حاجة زي كدة بس انا خايفة "
" من ايه؟ "
" انا مريت بتجارب وحشة اوي يا نادية ده غير سمعتي في الحارة منيلة واي راجل لما يعرف هيبعد عني..خايفة اتحرج واتكسر خايفة كرامتي تتهان..خايفة افرح انه عايز يتجوزني وانسى الماضي بتاعي الي مفيش راجل هيقبل بيه "
" فيه ايه يا ضحى ماضي ايه..مش هو ابو أمير الله يرحمه وبسام؟ "
" لا " نظرت اليها وتنهدت " فيه حاجات كتير محدش يعرفها "
" حاجات ايه!؟ "
" أمير ابن غير شرعي "
شهقت نادية ونظرت اليها بصدمة فبدأت ضحى بالحديث وقص ما حدث من البداية عليها حتى الآن
كانت تستمع نادية بصدمة وهى تضع يدها على فمها وعانقت ضحى بقوة وهى تربت عليها
" يا حبيبتي يا ضحى يا حبيبتي!..ازاي تمري بكل ده لوحدك!..ازاي استحملتي كل ده!.. ازاي استحملتي فكرة انك تربي ابنه! "
" ابني ملهوش ذنب يا نادية ده حتة مني بردو..في الاول مكنتش طايقاه بس دلوقتي البصة في عينيه بالنسبالي بالدنيا كلها بصته ليا وهو حاسس بالأمان عشان انا جمبه بالدنيا وما فيها كفاية صوت ضحكته لما يشوفني بتنسيني كل حاجة وحشة ده اغلى من روحي "
" ربنا يحفظهولك يا حبيبتي..طب انتِ عاملة ايه طمنيني عليكي قدرتي تتجاوزي الموضوع؟ "
ابتسمت صحى ابتسامة ساخرة " اتجاوز؟..انا بموت كل يوم بس بحاول اعيش واستحمل عشان أمير انا محتاجة عوض كبير من ربنا..انا خايفة العريس الي بقولك عليه ده بعد ما يعرف يسيبني مش قادرة اقوله مش هقدر فا هرفضه "
