ခင်ခင်ပျိုရေ မမုန်းလိုက်နဲ့

အပိုင်း - ၃၉

ဒီရက်ပိုင်းအချိုးတွေပြောင်းနေတဲ့ခင်ခင်ပျိုလေးကြောင့်
စိတ်မချဖြစ်နေတဲ့မိဘနှစ်ပါးသည် ခင်ခင်ပျိုလေးရှိရာ
အိမ်ကလေးသို့ တိတ်တဆိတ်ရောက်လာကာ
အပြောင်းအလဲများကိုလိုက်ရှာလေသော် တကယ့်ကိုအပြောင်းအလဲကြီးတစ်ခုနှင့်ကြုံကြိုက်လေသည်။

"ကြည့်စမ်း ! မမဝေ အဲ့တာ မောင့်သမီးမွေးထားတဲ့
ကြောင်ပေါက်လေးလား"

အံကိုကြိတ်လို့ဒေါသတကြီးနဲ့ဆိုလိုက်တဲ့မောင်ခင်ကြောင့် အနားက မမဝေမှာလန့်လေသည်။ မောင်ခင်သည် သူသိပ်ချစ်ရသည့်သမီးဖြစ်သူအားဒဏ်ရာတွေပေးခဲ့သည့်သူများဖြစ်သည့် နွယ်တို့အသိုင်းအဝိုင်းကို သေခန်းဖြတ်ထားသည့်အနေအထားတွင်ရှိသည်။

"နွယ်"

ခင်ခင်ပျိုလေးအိမ်၌မရှိတုန်းအဝတ်အစားများကို
လျှော်ဖွတ်ပေးပြီး အချက်အပြုတ်၊အိမ်သန့်ရှင်းရေးများကိုလည်း‌ မောသည်မရှိ ပန်းသည်မရှိ အပြုံးမပျက်လုပ်ဆောင်နေသည့်အိမ်ရှင်မလောင်းလျာလေး မမနွယ်သည် နောက်ကျောမှခေါ်သံကြောင့် လက်ထဲမှလှန်းမည့်အဝတ်သည်မြေပြင်ပေါ်သို့ပြုတ်ကျသည်။

"ဒေါ်လေး"

နွယ်သည်ဒီကိုရောက်လာတာတစ်ပတ်ပြည့်တော့မည်ဖြစ်သော်လည်း အခုထိ ဒေါ်လေးဝေနှင့်ကိုကိုမောင်ခင်တို့ကိုအသိမပေးရသေးသလို တွေ့လည်းမတွေ့ရသေးချေ။

ဤသည်မှာ နွယ်ရဲ့သတ္တိနည်းမှုတွေကြောင့်လည်းဖြစ်မည်။
မေမေ့လုပ်ရပ်တွေကြောင့် သာယာအေးချမ်းတဲ့မိသားစုလေးက ပူပင်သောကရောက်ခဲ့တာမို့ နွယ် မျက်နှာချင်းမဆိုင်ဝံ့ခဲ့ပဲရှိနေခဲ့သည်။
ခင်ခင်ပျိုလေးကိုအဆုံးရှုံးမခံနိုင်လွန်းလို့သာ ဒီကိုရောက်လာခဲ့ပေမယ့် နွယ်သည်တစ်ယောက်တည်းမို့ ဤဒေသတွင်တစ်ခုခုဆို အတော့်ကိုကူကယ်ရာမဲ့ပါသည်။

"ဘာလာလုပ်သလဲ ငါ့သမီးကိုမသေသေးလို့
ပြန်လာသတ်‌လေသလား နွယ်"

"မောင် စိတ်ကိုလျှော့ပါ"

မောင်ခင်၏ဒေါသသည်ထိန်းမရနိုင်သည့်အခါ
တောက်တစ်ချက်ကိုခေါက်ပြီး နွယ့်ကိုအကြည့်လွဲသည်။