شـــەوانـی بـێ ئەســتـێـرە 🔚

بــەشــی یـەکــەمــ 🤍

ئەو ڕۆژە هەوا تەم و مژبوو، هەورەکان
هێدی هێدی فرمێسکیان دەباراند ، زەوی دڵۆپی بارانەکانی هەڵدەمژی کزەبایەکی دەهات و سەمای بەدرەختەکان دەکرد.
کاتێ بلیتی یەکەم نەخۆشی نوسی، پیاڵەیەک چای خواردەوە ، پەنجەرەکەی کردەوە کەمێک لەو هەوا خۆشەی بەهاری هەڵمژی ، کەمێک پشوویدا بۆ چاوپێکەوتنی نەخۆشێکی تر ، لە بەرامبەر کلینەکەیدا دوو درەختی بڵندی سێو ڕوا بوو. گوڵێکی زۆر جوان و سەرنج ڕاکێشیان گرتبوو ، ماوەیەک سەیری گوڵی دارسێوەکانی کرد و لەسەر جێگەکەی دانیشتەوە.

وتی: تکایە نەخۆشێکی تر!

پاش ماوەیەکی کەم، ژن و مێردێکی گەنج چوونە ژوورەوە ، ژوورەکەی لە بەهەشتێکی خنجیلانە دەچوو، بە گوڵ و گەڵای جۆراوجۆر ڕازاندبویەوە، هەر پەشێو حاڵێک ڕووی بکردایەتە ژوورەکەی ئارام دەبوەوە. کاتێ سەیری چاوەکانیت بکردایە هێور و ئاسوودە دەبوی. ئەو کاتەی قسەی بکردایە ،قسەکانی ئاوازی ژیانیان لێدەباری. بەڕاستی کارەکەی شیاویەتی.

-سڵاو دکتۆر گیان!

زەردەخەنەیەکی کرد و لەبەریان هەستا.

-سڵاو لەوباوەڕەدا نەبووم جارێکی تر یەک ببینینەوە، گرفتێکتان هاتۆتە پێش ؟گومانم نەدەکرد کە.....

ژنەکە زەردەخەنەیەکی کرد و وتی:
-بەڵێ، گرفتەکەمان چارەسەربوو ، ئەمڕۆ بۆ سپاس کردن هاتووینەتە خزمەتت..... بەڕاستی چاک بومەتەوە زۆریش سەرحاڵم (باشم).

پیاوەکەش سوپاسیکرد :

-بەڕاستی جەنابی سەبوری تۆ کەسێکی سەرکەوتوو و بێ وێنەی.

پاشان چەپکە گوڵەکەی دەستی خستە سەرمێزەکەی ، بە زەردەخەنەیەکەوە بەردەوام بوو لە قسەکانی:

-بەڕاستی ئێمە قەرزاری تۆین.

-ئۆھ....تکات لێدەکەم قسەی وامەکە، من ئەرکی سەرشانی خۆمم بەجێهێناوە.

ئەو زۆر دڵخۆش بوو کە توانیویەتی خێزانێکی لە دەردیسەری و گرفتاری ڕزگار کردوە، پاش ئەوان نۆرەی خانمی -بەیات- بوو، ئەو ژنەی کە ساڵێک لەمەوبەر کوڕە جوانەکەی لەدەست دابوو، لەپاش مردنی کوڕەکەی دووچاری نەخۆشی بوبو.

بەدرێژایی ئەوساڵە ئەو خانمە هەفتەی جارێک سەردانی دکتۆر -سلێمان سەبوری - دەکرد، کاتێ گوێی لە قسەکانی سەبوری دەبوو کەمێک دەهاتەوە سەرخۆی ،کاتێ چووە ژوورەوە وەک پیشەی هەمیشەیی خۆی ڕەنگی ژاکاو و شپرزە دەکەوتە پێش چاو ،بە بینینی دکتۆر فرمێسک بەچاوانیدا هاتە خوارەوە.