#الجميلة_والوحش
الحلقة 6وصل يوم العرس
ليلى دايريلها أهلها عزومة بسيطة ولبست فيلو ومشت للمزين بأوامر من نضال لأنه نعيمة مش ناوية تصرف قرش أحمر عالعرس وصارت عركة كبيرة
مشت سيارتين وحدة فيها فاطمة وجلال وحدة فيها قيس بيروحوا بالعروس
خشت فاطمة تزغرط وطلعت بالعروس ونزل قيس ساعدهم يركبوها في السيارة
بعد ماركبت
قيس ألف مبروك
ليلى الله يبارك فيك
ومن هالكلمتين ماعاد زادوا شي لعند وصلوا للحوش
لف عليها وفتح الباب وهي مدت يدها وهو مسكها وكانت متحشمة منها ماعمرها تعاملت مع راجل غير نضال خوها حتى من عمها ماكانش يجيهم على خاطر متعارك هو ونعيمة
نزلها قيس جت فاطمة شن نساعدكم
قيس أنتي تعبتي خالتي فاطمة امشي ارتاحي
فاطمة باهي ألف مبروك عليكم
ليلى ابتسمت الله يبارك فيك
قيس الله يبارك فيك
مشاها قيس توا قدامك تلات درجات
ليلى حاضر
وصلوا للباب فتح قيس الباب تفضلي لحوشك وخشي برجلك ليمينوصلوا للدروج
قيس دارنا فوق في الدور الفوقي توا اركبي عالدروج قعد ماشي وشاد معاها الفيلو مش كان جيتي في قفطان وريحتينا من التكركير
ليلى كيف مش دروحني عروسة
كملوا تكركير هو وياها في الدروج وكانت تعد مع كل خطوة وصلوا لدارها
قيس قدامك السرير وعلى يمينك الدولاب ولا يسار الحمام
ليلى ان شاء الله قدمت واحد اثنين .... وصلت للسرير وبعدها اتجهت يمين وعدت القت الدولاب مساته وصلت السرير ومن السرير لجهة ليسار مشت للحمام فتحت الباب تأكدت أنه هو الحمام
قيس واقف يتفرج عليها ... أنت شن ديري من بكري تحركي في فمك والتمتمي
ليلى ههههههه ماتخافش نحفظ في المكان
قيس اها معناها هكي تحفظي في الحوش
ليلى رجعت للسرير ايه زمان علمتهلي أمي كنت مانتحركش من مكاني بس لما كبرت تبي من يساعدها وبالأخص آخر فترة مرضت هلبا وبعدها ماتت وبوي تزوج مرأة تانية ورتني الويل زدت تعلمت غصب عني حتى من الفطور والغداء والعشاء كنت نجيبلها فيه واتي
قيس ان شاء الله مع ربي خير ... بس بنسالك مرت بوك قالتلك أنه عندي علة
ليلى ابتسمت ايه
(طبعا نعيمة قلتلها علل بسيطة قلتلها واعر ومنكدي ومايحبش الناس ومايطلعش برا من الحوش وماجابتلها قصة تشوه وجهه ولو حكتلها خايفة ترفض وتلقص فيها وماعاد بتفتك منها)
قيس باهي تمامفي صباح اليوم التالي ناضت ليلى ومشت للحمام وبعدها للدولاب وتستكشف في الدار شن مازال فيها كان بين الدولاب والزيانة كرسي كبير وبعدها زيانة قعمزت عليها تمشط في شعرها
قيس يشبح فيها ومركز فيها وعجباته من أول ماشافها وتوا من غير مكياج تمحمح صباح الخير ليلى
ليلى ابتسمت صباح النور قيس كنت نستنى فيك نبيك توريلي المطبخ
قيس تمام
نزلت ليلى من الدروج بسهولة وقفت في نهايتها توا وين بنمشي
قيس يسارك مطبخ ويمينك صالة ولو خاشة من الحوش تلقيهم العكس يمينك مطبخ ويسارك صالة
ليلى حاضر فهمت
قيس خداها من يدها ومشي بيها للمطبخ
وراها الغاز والدولاب شن فيه والثلاجة وقعمز عالطاولة ويشوف فيها كيف الطيبليلى تلفتت قيس أنت مازال هنا
قيس ناض ايه مازال هنا تبي حاجة
ليلى ابتسمت ههههه ساعدني شوي ماتقعدش مقعمز أول مرة نخش للمطبخ هذا
قيس تني كمامة ايه في شن نساعدك
ليلى تحط في الحاجات ... هدوما حطهم عالطاولة
قيس هذا بس
ليلى ايه
قيس تمام
قعمزوا يهدرزوا
قيس أنتي مكملة قرايتك
ليلى كنت نقرا في معهد خاص دوي الاحتياجات الخاصة يعني زيي
قيس وليش ماكملتيش
ليلى ابتسمت بألم بعد ماتوفى بوي بطلتني مرت بوي من القراية
قيس وخاطرك ترجعي تقري
ليلى بصراحة ماعاد فكرت فيها لأنه فقدت الأمل مرضت وياما صار فيا بس اهو عايشة
قيس وجعاته هلبا ماسدش لصار معاها ليلى أنتي بصيرة من الولادة أو بعد
ليلى من الولادة للأسف
قيس اها بس شايفك متأقلمة عادي
ليلى شي طبيعي بتتأقلم ماعاد عايش بوضعي وبتعيش طول عمرك والحمدلله على كل حال ناضت قعدت الضم في الطاولةقيس قعد يفكر لازم ندير حل إلا مافيه
ليلى قيس
قيس نعم
ليلى سكتت في شن تفكر
قيس شي الأسبوع الجاي لازم نبدأ خدمة وهكي قبل كنت مانفكر في شي وتوا خشيتي لحياتي لازم النظم روحي
ليلى قعمزت أنت شن تخدم
قيس بروفيسور لغة عربية في الكلية
ليلى ماشاء الله ربي يزيدك علم على علمك
قيس ان شاء الله
ليلى شن كان هدفك لما كملت قراية حتى بعد ماكملت كلية
قيس طموح بس وكنت فاضي ماعندي ماندير
ليلى وين أهلك بما أنه خالتي فاطمة نحسابه أمك بس أمس قلتلها خالتي حتى أنت معناها مش أمك
قيس هذي أم صاحبي تعامل فيا زي ولدها وحتى أنا نحس فيها أمي وأهلي متوفيين ليهم سنين للآسف
ليلى اها أنا أسفة
قيس ليش تتأسفي عادي تعودت وخديت على عدم وجودهم وأنا وحيد
ليلى بس أنا توا موجودة
قيس خايف في يوم تسيبيني وتمشي زي ماصار للناس كلهم نفروا مني
ليلى لأنهم مايربطكش بيهم شي مقدس زي الأم الأب الزوجة الابن هذا أقرب شي ليك صح
قيس تنهد ايه صح وان شاء الله ربي مايفرقنا على بعض
ليلى شن بنديروا اليوم
قيس وين تبي تمشي أنتي
ليلى كان نقولك ماتصدقش
قيس هههههههه قولي وين ماتبي مستعد نرفعك
ليلى خاطري نرقد وماحد ينوضني
قيس هذا بس
ليلى ماهو الفترة لفاتت ماقدرتش نرقد طول الوقت نفكر كيف بتكون حياتي مع شخص مانعرفاش وزيدها بزايد أنا ماشفتك ولا حنشوفك أكيد
قيس وكيف طلعت النتيجة
ليلى حاليا ممتاز تعامل فيا كويس أحسن من معاملة مرت بوي
قيس وان شاء الله حنرتقي للامتياز مش غير ممتاز توا شن بجد بترقدي
ليلى ايه
قيس شن نوصلك للدار
ليلى هههههههه لا نبي نمشي بروحي ولو رحت نقولك توصلني
قيس باهي تمام تو نراقبكمشت ليلى للدروج بحدر وتعد قديش قدامها وركبت للدروج وكملت للدار وتأكد قيس أنها وصلت للسرير بسلام
قيس تعرفي مع أنه أول يوم نشوفك فيه بس أكثر حاجة عجبتني فيك مشيتك
ليلى ههههههههه مشيتي لكأنه واحد كيف يتعلم الطريق ووقف على رجليه
قيس ماتقوليش هكي بس والله معجب بيك وبالفعل وتتعلمي بسرعة هلبا لدرجة حفظتي الحوش من أول مرة
ليلى شن بترقد حتى أنت
قيس ماعندي ماندير في هالصقع خش حتى هو ورقد
ناضت ليلى العشية مست بجنبها لقت قيس راقد ... قيس قيس نوض
قيس ناض قديش الساعة توا
ليلى مانعرفش شوف الساعة بروحك
قيس شافها قريب المغرب رقدنا طول هالوقت
ليلى ايه ماحسيتش عالوقتنزلوا تحت
ليلى شن تبي نديرلك توا
قيس ديريلي قهوة
ليلى مشت الطيبله فيها ومدتله الفنجان شن تبي ندير عشاء
قيس لا كلمني جلال قال بنجيبلك عشاء خالتي فاطمة بتبعته معاه
ليلى ليش التعب في روحها
.
.
.
يتبع المزيد
أنت تقرأ
الجميلة والوحش
Bí ẩn / Giật gânرواية ليبية تحكي عن راجل ملقب بالوحش وفتاة حسناء الوجه عمياء