بين العشق والقدر

الفلاحة / الفصل الثاني

شعرت محاسن بجابر وهو عمال يتقلب في السرير يمين وشمال ومش عارف ينام، قامت قعدت على السرير:

محاسن: مالك يا راجل، مش عارف تنعس ليه.

جابر: قلقان يا ولية، شكل اللى اسمه متولي ده مش هيجيبها لبر معايا هو والواد البغل اللى مخلفه ده.

محاسن: بقولك إيه ابعد عن الشر وغنيله، طول ما انت بتتقي ربنا في شغلك يبقى مالوش صالح بيك.

جابر: وهو عاتق ولا سايب حد في حاله، النهادرة اتعارك مع عبد الرحيم وحلف ان من بكرة مش هيخليه ينزل الأرض تاني.

محاسن: يالهوي، ده حتى عبد الرحيم غلبان ووراه كون لحم، ومبيفتحش بقه مع حد خالص.

جابر: أهو شوفي انتى، كل ده عشان ابنه رد على الواد محروس لما قل ادبه على أبوه.

محاسن: أهو الواد محروس ده هو السبب في كل المصايب، لا وراه شغلة ولا مشغلة غير المرازية في الفلاحين.

جابر: انا مش خايف غير على البت اللي حيلتنا، الواد ده شكله عينه منها.

محاسن: جاته مسمار في عينيه، مش ناقص غير جوز الاتنين ده اللى اجوزه لغالية.

جابر: وهو انا مش نبهت عليكي متخليهاش تيجي الغيط، أنتي مبتسمعيش الكلام ليه.

محاسن: هي اللي صممت يا اخويا، ما انت عارف دماغ بنتك، مهنش عليها تسيبك طول النهار من غير أكل.

جابر: هي دماغها زي الحجر الصوان لكن قلبها أبيض زي اللبن الحليب، يا ما نفسي تاخد حد إبن حلال يصونها ويعرف قيمتها.

محاسن: ان شاء الله يا خويا، وبعدين متقلقش على بنتك دي ما شاء الله دماغها توزن البلد دي كلها.

جابر: ربنا يحميها ويبعد الشر عنها.

محاسن: سبها على الله يا خويا هو قادر يعدلها من عنده.

جابر: لو كنت أعرف عنوان البيه بتاع مصر، كنت روحت قابلت الهانم الكبيرة، دي ست قلبها أبيض وعرفاني.

محاسن: انت على طول بتتكلم عن الست دي بس انا عمري ما شوفتها.

جابر: ازاي بس يا أم غالية، ده أنتي شوفتيها اكتر من مرة بس أنتي اللى مخك ده مش بيفتكر حاجة.

محاسن: والنبي يا خويا ما انا فاكرة، يلا نام بقى ومتشغلش دماغك، تصبح على خير.

جابر: وأنتي من أهله.

في المستشفى كان مراد واقف قدام باب أوضة العمليات، ولف لم سمع صوت خطوات جاية عليه وبتنده بإسمه، كان معتز ووراه رقية اللى ساندة على لارا:

رقية (بدموع): طمنى يا مراد، معتصم حصله إيه وهو فين.

مراد: أهدي بس يا طنط عشان صحتك، هو ان شاء الله هيكون بخير، إيه اللي خلاك تتعب طنط وتجيبها يا معتز، هو ده اللى قولتلك عليه.