بين العشق والقدر

إدعت الجنون/ الفصل الرابع

جت عربية المستشفى، وطلع المسعفين واخدوا رودينا لتحت وكانت يسرية قاعدة على كرسي بتعيط وواقفة جمبها رضوى تطبطب عليها عشان تهدى، زينات اللى كانت بتهز جسمها بغضب وبتبصلها بإنتصار وجمبها ياسر ابنها اللى ماسك تلج وبيحطه على الضرب اللى في وشه.

شدوها عشان ينزلوا لتحت وهي بتبتسم، بص أبوها ليها بحزن:

ربيع: لا حول ولا قوة إلا بالله ، سامحيني يا بنتي انا السبب في اللى حصل.

بصت رودينا لابوها بحزن، وبعدين بصت لصاحبتها اللى كانت واقفة على الباب وهي بتبكي ومش مصدقة اللى حصل لصاحبتها، غمزت رودينا لإيناس اللى اتصدمت من ده وجريت على المسعف:

المسعف: أمشي قدامي بقى، بطلى معافرة يا بنتي.

رودينا كانت بتضحك وهي عمالة تغني وتهز في دماغها بجنون:

إيناس: براحة شوية عليه من فضلك، ممكن انا أنزلها معاك ومستعدة أركب معاكوا لحد المستشفى كمان.

المسعف: لا يا أستاذة، دى مسئولية وبعدين مش شايفة حالتها عاملة ازاي ممكن تأذيكي.

إيناس: متخفش دي طيبة خالص، وبعدين هي متكتفة، لكن أنا هنزل معاكم عشان متبقاش لوحدها، وافق ربنا يخليك.

وافق المسعف، ونزلت إيناس معاها لتحت، ركبت العربية ورودينا زي ما هي لحد ما قفلوا عليهم العربية، وركب المسعف قدام بجوار زميله، قربت إيناس من رودينا تتكلم معاها بصوت واطي:

إيناس: رودي اتكلمي معايا وقوليلي أن اللى فهمته صح، كل اللى حصل فوق ده مجرد تمثيلية مش كدة.

بصت رودينا لإيناس وهي بتبتسم ونفخت في وشها جامد، بدأت إيناس تخاف وتبعد عنها شوية بقلق، التانية ضحكت بصوت عالي وفجأة:

رودينا: مجنون مجنون مجنون.

اتخضت إيناس جامد ورودينا بتضحك على صاحبتها:

رودينا: متخافيش يا أنوس، انا كويسة ولسة بعقلي محصلش أي حاجة خالص.

إيناس (وهي بتحط ايديها على قلبها): حرام عليكي يا شيخة، خضتيني.

رودينا: ايه رأيك بقى في دماغ صاحبتك، فكرة عمرها ما تخطر على بال حد أبدا.

إيناس: دي فكرة منيلة ومهببة، تقدري تقوليلي هتعملي ايه دلوقتي.

رودينا (بثقة): ولا حاجة، همثل اني مجنونة يومين كدة، لحد ما الزفتة وابنها يغوروا ويبعدوا عننا، وارجع اعقل وأخف وأخرج بألف سلامة.

إيناس: وأنتي فاكرة أن الدكاترة اللى هناك هبل، وهيدخل عليهم العبط اللى إنتي عاملاه ده، اكيد هيعرفوا انك كويسة وهترجعي لزينات تطلع على عينيكي اللى عملتيه فيهم.