محل صغير للملابس في إحدى الأحياء المتوسطة، وقفت رودينا على كرسي عشان تجيب قطعة ملابس لحد من الزبائن وكانت بتبص عليها صاحبة المحل زينات وبتابع كل حركاتها، نزلت من على الكرسي وناولت قطعة الملابس للزبونة، قربت منها صاحبتها إيناس اللى بتشتغل معاها في المحل:
إيناس(بصوت منخفض): هو إيه الحكاية يا رودي إنتي عملتي حاجة ولا إيه.
رودينا: عملت إيه في إيه، مش فاهمة.
إيناس: كل ما أبص للمدام ألاقيها مركزة معاكي زيادة عن اللزوم.
رودينا(وهي بتبص على زينات نظرة سريعة): هكون عملت إيه يعني، ما انا من صباحية ربنا واقفة على رجلي زي ما انتي شايفة، تلاقيها بس مركزة عشان تشوف الزباين بيدونا بقشيش ولا لأ.
إيناس: طب يا ختي ربنا يستر، روحي شوفي الزبونة أهي خرجت من أوضة القياس.
اتجهت رودينا إلى الزبونة اللى قالتلها إنها هتاخد الملابس، حملتها عنها واتجهت معاها للكاشير:
رودينا: الأستاذة هتاخد دول يا مدام.
ابتسمت زينات وأخدت الفلوس وطبعت الفاتورة للزبونة اللى أخدت الفاتورة والباقي ومشيت، راحت رودينا تكمل شغلها لكن وقفتها زينات:
زينات: قوليلي يا رودينا إنتي مفكرتيش في الجواز قبل كدة.
رودينا (بضحك): هو حضرتك عندي عريس لية ولا إيه.
زينات: لا أنا بتكلم بجد، أنتي ما شاء الله حلوة وأي حد يتمناكي.
رودينا: طب واللى عايز يتجوز ده مش عايز جهاز وفلوس وحضرتك يعني عارفة إننا على قد حالنا واللى جي على قد اللى رايح.
زينات: طب ولو العريس جاهز ومش محتاج منك حاجة.
رودينا: واللي جاهز ده هياخدني يعني بشنطة هدومه، هو حضرتك بتكلمي عن حد معين.
زينات: بصراحة كدة أنا شايفاكي حلوة وكنت عايزة أخدك لابني.
رودينا(بصدمة): ابن حضرتك.
زينات: اه.
رودينا(بتوتر): بس اللى أعرفه انه متجوز اتنين.
زينات: طب وإيه يعني، الشرع محلله أربعة وهو راجل مقتدر وابني الوحيد وكل العز ده بتاعه وحده.
رودينا(بإحراج): طبعاً ده شرف لية حضرتك، بس معتقدش أن بابا يوافق، وكل شيء قسمة ونصيب وربنا يرزقه باللى أحسن مني.
زينات(بسخرية): بابا، ماشي، روحي شوفي شغلك.
انصرفت رودينا من أمامها، وكانت بتشوف شغلها، وكل ما تبص لزينات تلاقيها بتبصلها بغيظ، بعد مرور بعض الوقت وصل سليمان جوز زينات:
أنت تقرأ
بين العشق والقدر
Romansaمجموعة قصص قصيرة عن خفايا العلاقات الحب ليس دائماً اختيار، بعض الظروف تجمع بعض الأشخاص وتجعل مشاعرهم مضطربة، هل تكفي هذه الظروف لتجمع بين القلوب أم إنها عاطفة تنتهي مع انتهاء الوضع الذي يجمعهم. بين العشق والقدر، رومانسي اجتماعي
