كانت العيون كلها موجهة لأدم وهنا مستتنيين ردهم، حتى أدم نفسه بص لهنا شوية وبعدين بدأ يتكلم:
أدم: انا طبعاً مقدر كلام حضرتك يا عمي، بس فعلاً الشقة بتاعتي كويسة أوي، وممكن حضرتك وطنط تيجوا تشوفوها بنفسكم وبعدين نبقى نتفق.
عصام: وانتي يا هنا ايه رأيك.
هنا (بأدب): بعد إذن حضرتك يا بابا، انا برده من رأي ادم واحنا كل واحد فينا معاه عربيته، مش هيكون في تعب أن شاء الله، وعشان خاطر طنط برده متبقاش لوحدها.
سعاد(بفرحة): ربنا يحميكي يا مرات إبني.
سهام(بهمس لبنتها): شوفتي البت عرفت تضحك عليها، قال مرات أبنها قال.
عصام: خلاص يا ست الكل، العرسان موافقين على رأيك، وان شاء الله ربنا يتمم بخير.
يسرا: انا بنتى هتبقى أمانة عندك يا ست سعاد، انتي برده في مقام أمها.
سعاد: متقلقيش يا حبيبتي، دي هتكون في عينية.
عصام: طب نقرأ الفاتحه بقى، وبعد كدة نحدد ميعاد الخطوبة.
سعاد: احنا أن شاءالله نعمل فرح وكتب كتاب على طول، الشقة جاهزة، عروستنا ووالدتها ينزلوا معانا نختار العفش والشبكة، وفي خلال شهر نحدد ميعاد الفرح.
يسرا(بصدمة): بس مش شهر ده قليل أوي، خليها على الأقل شهرين تلاتة.
سعاد: وليه التأخير، لو العروسة ناقصها حاجة تنزل تجبها، وخلوا الخفيفة عليكوا والتقيلة علينا.
عصام: لا متقلقيش من الناحية دي يا ام أدم، احنا عارفين الأصول كويس وبنتنا حاجتها كلها جاهزة هي بس تشاور وتختار
سعاد: طب خلاص يبقى مفيش مشكلة.
عصام: نقرأ الفاتحه بس الأول ونتفق على ميعاد نشوف الشقة، ولا انتي مش عايزة تضيفينا عندك.
سعاد: تنورنا والله في أي وقت، ده احنا بيت كرم وخلاص بقينا أهل.
ابتسم الجميع وقروا الفاتحة، وقربت سعاد من هنا باستها وباركتلها وادتها هدية كانت مشترياها ليها، وبعد كدة سارة كمان سلمت على هنا:
سارة(ببسمة): انا بقى سارة، اخت أدم واكبر منه بسنتين، وانا اللى هقولك على كل أسراره وان شاءالله هنبقى صحاب.
هنا(ببسمة): أن شاء الله اخوات، انا طول عمري نفسي يبقى لية اخوات والحمد لله ربنا رزقني بيكي.
ابتسمت سارة بحب لهنا، حست انها فعلا طيبة وتستحق أدم أخوها، سلمت رحيل على هنا بتعالي وسهام كمان باركتلها من غير نفس، لكن هنا سلمت عليهم بأدب وتجاهلت اسلوبهم اللى يضايق.
بعد مرور بعض الوقت، نزلوا عيلة أدم بعد ما حددوا ميعاد عشان يروحوا يشوفوا الشقة، قعدت هنا مع مامتها وأبوها يتكلموا عن اللى حصل:
أنت تقرأ
بين العشق والقدر
Roman d'amourمجموعة قصص قصيرة عن خفايا العلاقات الحب ليس دائماً اختيار، بعض الظروف تجمع بعض الأشخاص وتجعل مشاعرهم مضطربة، هل تكفي هذه الظروف لتجمع بين القلوب أم إنها عاطفة تنتهي مع انتهاء الوضع الذي يجمعهم. بين العشق والقدر، رومانسي اجتماعي
