بين العشق والقدر

إدعت الجنون/ الفصل الأخير

مشي جاسر وطلع على النيابة عشان التحقيقات، وبعد مرور بعض الوقت مشيت كمان حلا بعد ما صورت كل اللى حصل، وصورت كمان سمر.

راحت فوقية لشريف المكتب الى كان فرحان بكل اللى. حصل:

شريف: ايه رأيك بقى، ملعوبة صح.

فوقية: بس أنا خايفة يا دكتور، البت شكلها كان تعبان اوي واللى اسمه جاسر ده شكله مش سهل خالص وواصل، ده حتى بيقولوا أن المذيعة اللى كانت بتصور دي من قرايبه.

شريف: متخافيش، ولو حتى طلع من الحوار ده، هعمله غيره، أنا هفضل وراه لحد ما يطفش من هنا ومش بعيد اخليه يسيب المهنة كلها.

فوقية: ربنا يستر.

شريف: روحي بقى شوفي شغلك، والنهاردة الدور على البنت الجديدة، وأبقى حطيها في الجدول.

فوقية: ما بلاش النهاردة، احسن العين علينا اوي.

شريف: اللى اقوله يتنفذ ولا انتي ناسية الفلوس اللى بتلهفيها مني كل اول شهر ده غير أن أقدر اقطع عيشك من هنا خالص.

فوقية: لا وعلى أيه أوامر حضرتك هتتنفذ.

مرت ساعات طويلة وجاسر كان بيحاول يثبت فيها أنه مكنش موجود في المستشفى إمبارح، وبالفعل قدر يثبت ده، قررت النيابة أنها تفرج عنه والاستمرار في التحقيق في الموضوع.

كانت حلا نشرت مقاطع من الفيديوهات اللى صورتها عشان تعمل دعايا للبرنامج بتاعها، ومن ضمنها اللى اتصور واتهام شريف لجاسر، انتشرت الفيديوهات على السوشيال ميديا بسرعة.

كان عامر بيتفرج على الفيديوهات، واللى منها كتير اخد اسم جاسر وبقى يشهر بيه، رمى التليفون بغضب على الكنبة تزامنا مع وصول جاسر ودخوله من باب الفيلا:

عامر(بحدة): عجبك الفضيحة اللى إحنا فيها، ياريت تكون مبسوط يا دكتور

جاسر: يا بابا أنا معملتش حاجة، وثبت ده في أوراق النيابة، انا مكنتش موجود أصلا.

عامر: والناس بقى هتصدق، انت الدكتور الجديد في القسم يبقى مفيش غيرك، بعد يومين من وصولك حصل الموضوع ده.

جاسر: انا متأكد ان كل ده مكيدة معمولة لية، وهعرف اثبت ده.

عامر: انت اصلا من النهاردة مش هتروح المستشفى دي تاني خلاص بعد كدة.

جاسر: يعني إيه عايزني اهرب، انا كدة بثبت التهمة علية، مستحيل اوافق.

عامر: متهيألي انا طول عمري سايبك تعمل اللى انت عايزه، لكن لما الاقي انك بتفقد السيطرة وهتسئ لسمعتي، يبقى لا يا جاسر اللى أقوله هيتنفذ.

جاسر: أرجوك يا بابا، اديني فرصة وانا أوعدك اني هثبت لحضرتك اني على حق زي ما بكون دائما، ولو ده محصلش انا بنفسي هاجي وانفذ كل أوامرك