عند البنات :
دخلت عليهم الجوهره وسلمت عليهم وجلست جنب جود
ام عبدالرحمن : الحمدلله على السلامه جوجو
الجوهره : الله يسلمك
ام عبدالرحمن : عسى الطريق سهل عليك؟
الجوهره : هان هالمره بس مدري كيف طريق الرجعة خصوص اننا نمشي الفجر
ام عبدالرحمن : بتهون كلها هالاسبوع بس
"للمعلومية الجوهره من حست بالاعراض هذي سألت ام عبدالرحمن عنها كونها تفهم بالأمور هذي ولا تقدر تسأل امها لأنها لو قالت لها من البدايه بتطلب منها انها ترجع لبيت ابوها وتترك بيتها عشان ترتاح عندهم وهي ماودها تترك نايف بالوقت ذا"
الجده حصه : الا ماقلتي لي يا الجوهره تزوجت اختك؟
الجوهره : لا مابعد تزوجت ليه؟
الجده حصه : ناويتها لواحد ومنها نلم شمل الخوات
الجوهره بأبتسامه : وعلى من ناويتها؟
جود : عبدالرحمن بزوجه وحده على ذوقي حلوه وكشخه وتليق له
الجده حصه : والله لو اني ابيها لعبدالرحمن ماخذيت شورك
ام عبدالرحمن : والله الله يصلحه مابعد فكر بالزواج
وتين : والصراحه يمه عبدالرحمن حالف ماياخذ الا من ذوق جود
الجده حصه : إيه بلاه داري ان هالخبله بتقوله كل شيء بالبنت من زين وشين
جود : والله يمه منب غاشه اخوي بوحده ماتستاهله
وتين : يع ما اتخيل نزوجه وحده نعرف شينها قبل زينها
ام فهد : لذي الدرجه تقديسكم واصل لعبدالرحمن؟
جود : اخوي الوحيد من حقنا نقدسه وندلعه دامه نعم السند لنا بعد ربي
ام فهد : والنعم فيه ماقلنا شيء بس مو لذي الدرجه تتكلمون عنه كذا
إيمان : يعني خليكم طبيعيين ولا تجيبون سيرته دامني ما اجيب سيره فهد قدامكم وهو اخوي الوحيد
وتين وهي تهمس لجود : ويا عزتي ل فهود
الجده حصه : والله يا إيمان محد منعك ماتتكلمين عنه مثلهم هذاه فهد ان بغيتي عيونه عطاك بس ماش ماتقدرين هالشيء فيه مسيكين
إيمان : واضحه الغلاه عندك لمين يجده
الجده حصه : والله ثنينهم غالين علي بس كلٍ ونيته
نطقت الجوهره على اساس تغير النقاش الي بيصير لشيء عفوي : افاا ونايف ماله غلاه مثلهم؟
الجده حصه : شدعوه هذا وعبدالرحمن عندي واحد
وتين : لاتنسون سلطان مانحب نفرق بينهم ترى
الجده حصه : عاد سلطان بسم الله على قلبه غير عن هالاثنين كلهم ادب واخلاق ما شاء الله
الجوهره : مب قصور بالاثنين طبعا بس اتفق معك نايف شوي عليه حركات
ام عبدالرحمن بضحك : وسلطان احسن من عبدالرحمن ما اختلفنا
عند الرجال :
نايف : عن إذنكم بروح اشوف عبدالرحمن
ابو عبدالرحمن : اعذره ان كانك كلمته وقال لك شيء مب زين تراه معصب ولا يعرف وش يقول
ابتسم نايف ونطق : شدعوه يا عمّ لو يقول الي يقوله عاذره كم عبدالرحمن عندنا حنا ولا يا سلطان؟
سلطان بضحك : صدقت معليه ياما غيرنا جوهه عقب مايتنكد
الجد محمد وهو يطالعهم بأبتسامه : الله يديمكم لبعض يارب ولا يحرمكم من بعض
سلطان : آميييين ويخلييك لنا يارب
طلع نايف من المجلس وطلع برا للشارع وشاف عبدالرحمن جالس بالسياره وركب معه
نايف : رجعنا يا عبدالرحمن؟
عبدالرحمن بهدوء : وش اسوي مافي شيء بيخليني أهدأ إلا هي
نايف : بس بيضرك هالدخان وبتستصعب توقيفه
عبدالرحمن بهدوء : معليك سهالات جربت وتركته مره ومرتين وثلاث
نايف : مشكلتك تبيها بين فتره وفتره
عبدالرحمن بهدوء : هالكلب ذا مدري وش صله قرابته بوليد ولا بأهلهم وعشانه يعرفهم ومعهم مقدر اسوي له شيء
نايف : ماعليك منه انت اذا سوا شيء مره ثانيه اسحب البنات بهدوء وامش وطنشه طنشه يا عبدالرحمن
عبدالرحمن بأنفعال : مع وين تبيني اسحب البنات كذا بهدوء! انت تعرفني زين مستحيل أمشي الموضوع كذا وبس! صعبب صعب اتركه يمر مرور الكرام وياخذ الموضوع لعبه ويسويها متى مابغى!
ناظره نايف بحده : هالمره بسكت على اسلوبك ذا لأنك منفعل المره الجايه بسحبك عنه ولا لك كلمه عليه يقطع ابليسك مرتيين يا عبدالرحمن مرتيين! متضارب معه عبدالرحمن ركز معي انت تهاوشت معه هالمره قدام البنات! وانت معروف مارح يفكك احد منه وهم يكفيهم الي صار لهم
لف عبدالرحمن وناظر نايف : بتكون هادي اذا صار نفس الشيء للجوهره؟
يتبع...
