دخلو جود ووتين للمقلط وسكرو الباب لين يدخل سلمان ويرقى للغرفه ورهف كانت بالمطبخ تسوي قهوه للبنات وحطها بالصالة
دخل سلمان ورقى لغرفته على طول عشان مايقطع على البنات شيء وبعد ما رقى وسمعت رهف انه سكر الباب راحت لهم وطلعو يجلسون بالصالة
رهف : والله الصراحه اليوم كان مره حلو
وتين : ما انكر انه حلو، بس بالنهايه خربته عليكم
جود : معليه ما صار الا كل خير، تصير احيانا عادي
رهف : على هالقعده المفروض تجلسون عندي دايم بالبيت
جود : لا عيب امك فيه وجدك يعني ولا ودنا نطرد اخوانك من بيتهم
رهف : والله الي يشوفك يقول انهم يقعدون، امي طاحت بعزايم الجارات وتروح مع امكم وعاجبها الوضع، وجدي ان جيتو راح لجدكم ولا احلى منهم مع بعض، وسلمان يطلع يذاكر ويرجع المغرب ويقعد بغرفته ووليد خير شر ما نشوفه الا اذا جاء صديقه عندنا وعقبها بالدوام
وتين : اشوى اجل عندنا وعندكم خير، بس حتى ولو انتي اخف
جود : صح انتي وحده وحنا ثنتين
رهف : عادي نغير الأماكن مافيها شيء
وتين : هي صح مافيها شيء بس مو دايم بنجي هنا
رهف : اي اي يصير خير ان شاء الله
كملو سواليفهم وحبه حبه بدت كل وحده تسج لحالها، لكن ما بينو لبعض هالشيء وكل وحده تفكر بشيء مختلف
على الساعه 11 تقريبا بالليل
وقف عبدالرحمن سيارته عند بيتهم ونزل راح يوقف يم باب بيت الجد إبراهيم
فتح جواله وأرسل لجود انه برا يستناهم
وعلى ما ارسلها طلع وليد وزياد من البيت
وليد : هلا عبدالرحمن
نطق عبدالرحمن وهو يصافحه : ياهلا والله
وليد : اخبارك عساك بخير؟
عبدالرحمن : والله الحمدلله
زياد : ماعرفتنا يا وليد؟
وليد : معليش نسيتك، هذا عبدالرحمن ولد جيرانا، عبدالرحمن هذا زياد خويّي
مد عبدالرحمن يده لزياد وزياد مدها له وسلمو على بعض، كونهم يدرون ان وليد مايدري عن الي بينهم من هواش
وليد : تحتري احد؟
عبدالرحمن : اهلي عندكم بيطلعون الحين
وليد : يله اجل ما نأخرك فمان الله
عبدالرحمن : فمان الله
مشو وليد وزياد ناوين يروحون يتعشون ولما مشو طلعو البنات لعبدالرحمن وراحو للبيت
دخلت رهف بعد ما سكرت الباب وراهم ورقت لغرفتها وقعدت فيها، ووقت جلست على سريرها جتها رساله من رقم غريب وقرتها من فوق وكان محتوى الرساله، ( قريب امي بتكلم امك على الخطبه خليك جاهزه)
بردت عظامها من كلامه وهي عارفه اشد المعرفه ومتأكدة انه زياد
قعدت تدعي وتتحسب عليه لانه ضاغطها بكل الجهات، تهديد وهددها بأقرب ناسها، والحين؟ بيسوي الي برأسه
مر اليوم هذا بخيره وشره على الجميع..
باليوم الثاني عند نايف والجوهره :
الجوهره : نيّوف، نايف قوم بتتأخر
فتح نايف عينه شوي ورجع يغمضها ونطق : سكري اللمبات، نورها قوي
الجوهره : قوم تكفى والله تتأخر على دوامك
نايف : والي يرحم والديك ماعندي دوام اليوم
الجوهره : ليه ما قلت لي انه ما عندك دوام؟
نايف : امس وانتي نايمه قالو لي لاتجي ماعندك شيء
الجوهره بزعل : والله حرام عليك كويت ثوبك والشماغ بدري اليوم وزينت الفطور عشانك وانت هنا تقول لي ماعندي دوام
وقتها هو سحبها لجنبه وحط رأسه برقبتها
الجوهره : ناييف هذي الحركات لاتسويهاا تروعني ترى ومو زين للي ببطني
نايف : بتتركيني انام الحين مع زوجتي ولا لا؟
سكتت الجوهره وقت حست انه صدق تعبان ويحتاج ينام، اكتفت بس انها تلعب بشعره
مر الوقت بدون ما تحس وإلا هو نام وبعده دقايق هي ما حست بنفسها ونامت معه
بالديره تحديداً بالمزرعه :
سلطان : ياخي دحوم انسى الي صار وتراها عزيمه زيها زي غيرها عادي مافيها شيء
عبدالرحمن بقهر : انا بننجن كيف كذا كييف انت علمني كيف ادخله المجلس واقهويه ولا كأنه مسوي شيء، سلطان مقدر والله مقدر
سلطان : ليه ماتقدر؟ سهالات بعدين انت مو قلت انك امس سلمت عليه قدام وليد ولا صار شيء؟ خلاص كمل على اساس انك اول مره تشوفه امس وصلى الله وبارك
عبدالرحمن بعصبيه : سلطان تكفى افهمني مقدر اضيفه زي اي ضيف انا لو ابسط حركه منه ودي اذبحه فيها! ما اتحمل اكون معه بمكان واحد مستحييل، ما اتخيل حتى اني اكون موجود معه بنفس المكان وببيتنا بعد، متحرش بالبنات مرتين ولا حس بدمه ابد والمشكله متعدي على رهف وقدامي سلطان علمني بس كيف تبيني اصير معه بنفس المكان ونفس البيت ولا بعد انا الي بضيفه
سلطان بهدوء : عبدالرحمن، تحبها؟
لف عبدالرحمن نظره لسلطان : احب مين؟
سلطان بهدوء : لاتسوي نفسك غبي عندي، أدري انك تحبها وتبيها، ولا مستحيل تعصب كل هالعصبيه وهي ماتعني لك شيء
سكت عبدالرحمن لفتره بسيطه ثم ابتسم بخفه ونطق : بكذب عليك لو بقول لك لا، احبها، حتى مدري كيف ومتى وليه؟
سلطان بأبتسامه خفيفه : الحب ماله وقت، يجيك فجأه ويداهمك بالأفكار، هواجيسك واجده هالفتره وانا اخوك
عبدالرحمن : مدري وش بسوي ان كانك بتقدر تمنعني عنه بيكون احسن بكثير، مقدر اكسر كلمه جدي وهو حالف عليه بالعزيمه، سلطان انا قلبي معد يقوى
يتبع...
