اليوم الثاني الساعه 6:41 المغرب، ببيت ابو عبدالرحمن :
كانو كلهم جالسين بالصالة على طلب الجد محمد
ابو عبدالرحمن : امر يبه؟
الجد محمد : بكره ان شاء الله رايحين نخطب البنت لـ عبدالرحمن
ابتسمت وتين بأتساع ونطقت : صدق جدي؟
الجد محمد : كلمت إبراهيم اننا بنجي بكره نخطب رسمي والله يكتب الي فيه الخير
قامت جود وحبت راس جدها ولفت لعبدالرحمن الي جالس جنب جده وهو شارد، حضنته وهي تبارك له وهمست بأذنه : بتاخذها غصب عنهم كلهم..الله يوفقكم يارب
بادلها عبدالرحمن بأبتسامه : الله يبارك فيك عقبال ما افرح فيك
بعدت عنه جود وانهالت عليه وتين والدموع بعينها : خلاص بتتزوج معد بتعايرني اني زوجتك
ضحك عبدالرحمن بصخب وهو يطبطب على ظهرها : شدعوه وتينوه حتى هنا بتغارين، حشى ماصرتي زوجه
قام عبدالرحمن بعدها وحب راس جده ونطق : كثر الله خيرك يابو عبدالعزيز، سهلت علي مشوار طوييل
نطق الجد محمد بأبتسامه : واجب وانا ابوك واجب
نطقت وتين بصوت عالي خلا الكل يلتفت عليها : ماعندي فستان لبكره!
ضحكت ام عبدالرحمن وقالت : ابد ابشري نروح انا وانتي السوق
جود : وانا بروح ادور بدولابي اشوف في شيء ولا دورو لي عشان بطلع مع جوجو ورهف
الجده حصه : يله بسرعه بسرعه عشان يوديكم ابوكم، اخوكم اليوم عريس
راحت جود ركض لغرفتها وتبي تعرف وش بتكون رده فعل رهف على الموضوع، جود اكثر شخص فرحان بالموضوع..الي امس عرفت تماماً ان عبدالرحمن يحبها ويبيها
بالأمس بغرفه عبدالرحمن :
تكتفت جود وهي تقول : بسرعه تكلم
عبدالرحمن : وش اقول؟
تكلمت جود بعدم صبر وغضب : قّل انك تحبها! قّل انها ببالك من زمان! قّل ان هالخطبه ماهي للحمايه! قّل انك تحترق لما يطري ببالك ان زياد بيتقدم لها قبلك!
ابتسم بخفه ونطق : لهدرجه تدورين وراي؟ طيب، احبها وابيها وباخذها طرقٍ عن خشم الي يرضى والي ما يرضى
شد على اسنانه وكمل بقهر : واموت وقت يطري اسمه على اسمها، ووقت ينجاب سيره خطبته لها، واموت اكثرر انه غاصبها عليه..
ابتسمت جود بحب وهي تحضنه وتكافح دموعها ماتنزل : والله يااحظك فييهاا، اخذتت بنت فيها كل خيير، الله يتمم عليكم بالخيير، والله مرره فرحانه انك كلمت امي وما خبيت، ياااربب مايردها شيء على موافقتها علييك ياارببب
بعدت عنه وكلمت : لازم تجيب لها شيء ولازم نتأكد منك اول، يبيلك غتره جديده، وخاتمك هذا لازم نغيره
بردت ملامح عبدالرحمن ونطق : الخاتم لايمكن يتغير فاهمه؟
بردت اطرافها من نبرته الغير معتاده، ماتزال جاهله الخاتم الي بيد اخوها ومن مين اصلا..ليش لسه مصّر مايغيره، سلطان عنده نفس الخاتم بعد، بس ماتقدر تسأل من مين هالخاتم؟
حاط براسه انه لايمكن ينزع هالخاتم ويغيره، اربعتهم عندهم نفس الخاتم، هو وسلطان ونايف وفارس الله يرحمه، كان هديه منه لهم الثلاثه، ولا واحد فيهم فكر انه يغيره، حتى نايف بعد زواجه ما غيره، دبله الجوهره كانت ملائمه للخاتم، وان كتبه الله دبله رهف بتكون نفس الشيء...
جود : طيب طيب خلاص لاتغيره بس ضروري تجيب شيء يعني، وضروري اعطيها خبر عشان ماتنفجع
