أنهى سلطان كلامه مع فرسه، هالفرس بالنسبه لسلطان كان الشيء الكبير كل ما حس بضيق مايلقى نفسه الا وهو قدام هالفرس ويتكلم معه
على الساعه 12:38 باليل...
ببيت الجد إبراهيم، محد كان صاحي هالوقت الا رهف وهي بغرفتها، سكرت جوالها من ودعت جود عشان تنام
انسدحت على سريرها وأطلق جوالها صوت رساله
كانت تحسبها من جود واخذتها وشافت الرساله من برا
رهف : رهف؟ وش ذا الرقم الغريب الي يسأل عني بذا الوقت؟
فتحت جوالها على الرساله وشافت الرقم المجهول وتحاول تتذكره
ارسل لها رساله ثانيه بعد ما شاف إنها فتحت الرساله
( هالمره مافي احد بيحاول يسوي لك شيء، وحتى البطل عبدالرحمن مارح يقدر )
جمدت ملامحها عرفته من كلمه البطل عبدالرحمن، قالها زياد له وقت تحرش فيها بالسوق
ردت عليه وقالت له : وش بغيت؟
رد عليها بتهديد : بعطيك مهله 3 شهور تفكرين فيها زين، بتقدم لك بعدها وبتوافقين، بعطيك هالفتره تفكرين فيها بحياتك المستقبليه معي انا، وبحاله وصلني رفضك، ودعي جميع إخوانك والي تحبينهم، وفي حال انك علمتي احد عن شيء تحملي نتيجه اغلاطك
ماقدرت ترد عليه، حست بسكاكين تدخل قلبها
ماتدري وش ممكن تسوي..
جاي اخر الليل يهددها بأخوانها وأهلها، وش ممكن تسوي بذي اللحظة؟
سكرت جوالها بعد ما بلكت رقمه وحاولت تنام إلين غلبها النوم
إنتهى هاليوم الي كان طويل عند الجميع، كانت بدايته طيحه جود بالمستشفى ونهايته تهديد زياد لرهف..
الصباح على الساعه 7 تقريباً
قام سلطان على صوت جواله اخذه وشاف الاسم ورد
سلطان بأبتسامه : هلا بالي لها الخاطر يهلي
ام سلطان : ويينك يا امك؟ دورتك مالقيتك بالبيت وينك فيه؟
سلطان : لاتشيلين هم انا بالاسطبل جيت امس باليل اشوف وضع الفرس
ام سلطان : كان قلت لي طيب عشان ما اقعد ادورك زي المجنونه
سلطان : العذر والسموحه منك يالغاليه اخر مره معليك
ام سلطان : متى بترجع؟
سلطان : شويات، بحط اكل للفرس وبجي
ام سلطان بأبتسامه : والسلطان يبي فطور؟
سلطان : اذا كان من يدينك والله ما اقول لا
ام سلطان : يله اجل انتظرك لاتتأخر
سلطان : ابشري على خشمي ربع ساعه ولاني عندك
ام سلطان : الله يحفظك
سكرت امه وهو قام وحط الاكل للفرس واخذ اغراضه ومشى للبيت
بجهة ثانيه ببيت ابو عبدالرحمن :
قام عبدالرحمن وهو مفجوع من الألم الي استحل صدره بشكل كبير
حط يده على مكان الألم وهو شاد عليه ويسمي ويتعوذ من الشيطان، مرت دقايق بسيطه ثم وقف الألم، قام ودخل الحمام
"الله يكرمكم" واخذ له شاور بارد ثم طلع ولبس وبعدها نزل للأهل
الجده حصه : اوه دحوم قام
قرب منها وحب راسها وراس جده الي كانو قايمين بالبيت
الجد محمد : وش مقومك هالوقت يابوك؟
عبدالرحمن : ابد والله قمت فجأه ولا قدرت انام مره ثانيه قلت اقوم اشوف وش تسوون
الجده حصه : يوجعك شيء؟
عبدالرحمن : لا مافيني الا العافيه
الجده حصه : اجلس وانا امك اجلس
جلس عبدالرحمن وهو يشوف نظرات جده الي مستغربها ونطق : والله يا جدتي ضااييق مرره
الجده حصه : وراه؟ بسم الله عليك من الضيق
عبدالرحمن : والله ياجده مضيقني هالجد
الجده حصه : وش مسوي لك هالجد؟
عبدالرحمن : مزعل زوجتي امس ومهاوشها
نطقت الجده حصه بعدم فهم : بسم الله عليك عبدالرحمن متى تزوجت انت؟
عبدالرحمن : جدتي امس منافخ جدي على وتين، بالمستشفى تطقطق هي وجود وكذا وهو ضاق عليها وجايتني تشكي منه
الجده حصه : افاا كذا يا محمد؟ تهوش بنتي؟
الجد محمد : هشتها عشان تتأدب ولا تسوي هالحركات
عبدالرحمن : والله العذر والسموحه منك ياجدي انا حركاتها ذي احبها وابيها تسويها دايم مافيها شيء، ولا يحق لك تهوشها وانا راضي
الجده حصه : قم قم بس خل جدك يلقى له من يجلس معه، انا الي يزعل بنتي كأنه مزعلني، قم وانا امك قم
نطق عبدالرحمن وهو يقوم : افطرتي يمه؟
الجده حصه : تعال اسوي لك اكل وتسولف لي يله
راحو هم الإثنين للمطبخ وهم تاركين جدهم وراهم
مر الوقت بدون مايحس احد الكل لاهي بأموره، الجده حصه من الصبح وهي تشتت نفسها عن الجد محمد لين يعتذر من وتين او انه يرضى عليها وهذي اصعب، عبدالرحمن وسلطان كانو يخططون لطلعه ثانيه يبون يعوضهم عن الي صار بالمزرعه من الحادث والروعه، غير العشاء الي بدون ماينتبوهن زادوه ملح
غير كذا بيكون نايف والجوهره موجودين معهم مو مثل ذيك المره، نايف شارد من جاء ولا استقبله الا ابواب المستشفى
بعد المغرب طلع عبدالرحمن مع سلطان وسلمان يتمشون شوي كون ان الجد إبراهيم والجد محمد ببيت واحد
ببيت ابو عبدالرحمن :
البنات كانو مجتمعين سوا كون ان اجدادهم مع بعض، وقتها كانت الجده حصه مع ام وليد وام عبدالرحمن بالصاله ووتين بغرفتها تذاكر وكانت رهف مع جود بالجلسة الخارجيه كونهم يعرفون ان البيت فاضي ولا فيه احد
جود : احسك مو على بعضك ابد وش الي صار؟
ضحكت رهف بتوتر : مافي شيء ابد
جود : قولي هالكلام لوتين مو لي انا، بسرعه رهف تكلمي
نطقت رهف وهي تحاول تغير الموضوع : يابنت الحلال مافيني شيء، شرايك بكره نروح السوق؟
جود : اصلا لازم نروح في اشياء للجامعه ناقصتني مره
رهف : حتى انا لازم اشتري لي ملابس جديدة
جود : اجل خلاص خل نكلمهم اننا بنروح بكره
رهف : تمام
حست جود وقتها انها ماتبي تتكلم عن الموضوع وتركتها براحتها ولا ودها تضغط عليها أكثر
يتبع...
