على الساعه 5:45 نزل نايف مع الجوهره لبيت ابو عبدالرحمن ودخلت الجوهره وقت شافت سلطان جاي ووقف نايف
دخل نايف وسلطان سوا وكان عبدالرحمن بالملحق
نايف : سلام عليكم
عبدالرحمن بأبتسامه : هلا وعليكم السلام والرحمه
نايف : ايوه؟ وش السالفه الي صارت؟
عبدالرحمن : طويله وانا اخوك ماتنقال هنا، اهم شيء قبل نطلع نتأكد من البنات
نايف : ليه؟ في شيء خايفين منه انتم
سلطان : مع الاسف مو واثقين
نايف : خلاص زين هم بيطلعون بعد المغرب نصلي ويروحون
عبدالرحمن : الوضع كذا من قبل تجي بس حلو انك فهمت من نفسك
بالطرف الثاني داخل البيت بالمطبخ :
جود : والله السالفه قويه عليها، بنشرحها لك زين بالتفصيل هناك
الجوهره : الله يهونها عليها
جود : وش صار عليك انتي ونايف، من عقب الحادث راح ولعد له حس ولا طاري، وانتي ماكنتي معه، يعني ماتوقعت ماتجين
الجوهره : المفروض اني اجي معه، عارفته يحتاج احد يسانده، اخوانه طاحو ومروعينه بالخبر، بس ماكان بيدي كنت عند اهلي وامي كانت مصره اقعد عندها، وماكان في احد يرجعني
جود : حصل خير، اهم شيء كلهم بخير وعافيه
الجوهره : الي يسمعك يقول انهم بخير صدق، يد سلطان للحين مافكوها
جود بأبتسامه : اي خلاص بيفكها هاليومين
الجوهره : وش دراك؟
وعت جود على نفسها ونطقت : عبدالرحمن يقوله شلون بدري انا يعني؟
مر الوقت وهم السواليف تأخذهم ولا وقفو الا لما سمعو صوت الأذان، قامو وتوضو وراحو يصلون، والعيال طلعو للمسجد مع الجد محمد وبطريقهم طلعو معهم الجد إبراهيم وسلمان
صلو المغرب كلهم ويوم طلعو من المسجد ارسل سلمان لـ رهف وقال لها يجهزون عشان يمشون بسرعه
بلغت رهف البنات انهم خلصوا صلاة وبيمشون، وقتها ثنتينهم كانو لابسين عبايتهم يدرون ان المسجد مب بعيد وبدقايق يوصلون
كلها دقايق بسيطه وطلعو البنات وركبو السياره مع رهف وسلمان، والعيال يراقبونهم بالسياره
عبدالرحمن : مارح نمشي وراهم، الكوفي ادله وأرسلت لي جود موقعه
سلطان : سلمان يعرف سيارتك عشان كذا نبعد الشبهات
نايف : في طريق ثاني اكيد
عبدالرحمن : فيه طريق ثاني بس اصبر خل يبعدون ونمشي حنا
سلطان : وكيف بنعرف اذا وصلو ولا لا؟
عبدالرحمن : جود بترسل لي لا تخاف
نايف : وجود مخابرات عندكم؟
عبدالرحمن : إيه، مهمتها توصيل المعلومات المطلوبه
نايف : يعزتي لها طاحت ببير ماله نهاية
عبدالرحمن : هي طاحت فيه من زمان مب من يومين ولا ثلاث
سلطان : الله يستر عليهم بس، حرك خلاص ابعدوا عننا
حرك عبدالرحمن السياره ويمشي على موقع الكوفي، ثلاثتهم مايدرون وش بيقابلهم هناك
نايف مايدري اصلا وش الموضوع الي صار بفتره غيابه، ولا هو عارف اذا هذا الموضوع بيشكل ضرر على الجوهره وهي معهم؟ مايقدر يراهن على قوتها لو حصل لهم شيء لكنها حامل وهذا الي مخوفه
