مر ثلاث ايام ووقتها كلهم منشغلين بأشياء كثير
عبدالرحمن يروح لدوامه وسلطان ونايف يعاونون اهل الديره عشان وقتها ملكه للرجال
وقتها كان التواصل بينهم نادر جدا بس ام عبدالرحمن تتصل عليه وتطمن عليهم كلهم وتوصل اخبارهم للبنات
نايف معد هو فاضي يمسك جواله حتى لهم يومين يزينون المخيم ويرتبونه
اما بالنسبة لسلطان كان يتصل بأمه كل ثلاث او اربع ساعات يتطمن عليها ويطمنها عليه بنفس الوقت
وسلمان كل ما لقى له وقت فاضي فيه عاونهم بأي شيء وخصوص تعليق العقود كونه خفيف وسهل شيله فا كان سلطان يشيله على كتفه ويعلق العقود
سلمان : سلطاان لاتتحرك تكفى
سلطان بضحك : انت انتبه طيب ولاتمسك الأسلاك
نايف : كيف الامور عندك فوق يابطل؟
سلمان : وين عبدالرحمن بس هذا ماعليه أمان ابد
نايف : وعبدالرحمن مايعرف يمسك زين خلك على سلطان ان كانك تبي ضلوعك
سلطان : ترى عبدالرحمن كسر نايف تكسر انتبه يعني
صفق سلمان راس سلطان ونطق : قلت لك لاتتحرك بغت تنكسر اللمبة بسببك
سلطان بضحك : تسلم يالغالي يجي منك أكثر
مرت دقايق بسيطه وخلص الجهه الي عنده ونزله
سلمان : اعتذر ان كاني عورتك بس قهرتني
سلطان : وش دعوه سلمان عادي مابينا
نايف : اي سلمان يسلم ونايف يتكسر عادي حسبي الله ونعم الوكيل بس
نطق فهد بضحك وهو يطبطب على كتفه : معوض يا نايف تردها لهم بزواجهم ان شاء الله
نايف : الله يسمع منك يا فهود
سلطان : اقول فهد شخبار الجامعه الحين؟
فهد : والله الحمدلله تمشي الأمور
سلطان : الله يبلغ اهلك فيك يارب
فهد : اللهم آمين وياك وكل مسلم
سلمان كان بيمشي ووقتها بالغلط تكرفس بحبل وحده من الخيام وانفك وطاحت الخيمه على الي يعدلون داخل
عبدالرحمن وقتها كان رايح يمّهم ويوم شاف طيحه سلمان راح له ركض وكلهم ركضو له
عبدالرحمن : سلمان جاك شيء يابوك؟
سلمان : سليم سليم
فهد : انت سليم ماعليك بس الي داخل الخيمه ماهقوتي انهم سليمين
سلمان : يويلي الحين الشياب بينقدون علي
رفعه عبدالرحمن بسرعه من الارض وقت شاف عمه سعد وابوه جايين عندهم
ابو فهد بعصبيه : من الي فك الحبل ها؟
عبدالرحمن : العذر والسموحه منك عمّي بس وانا جاي للشباب ماشفتها وانفكت بالغلط
ابو عبدالرحمن : حصل خير ياسعد أهدأ
فهد : يبه عادي ما شافها مو مركز معنا اصلا عقله بالدوام مابعد طلع
ابو فهد : وش بلاك سلمان؟ ثيابك كلها تراب ليه؟
سلطان : وانا انزله رميته بالتراب بس سليم ما جاه شيء
ابو فهد بضحك : ماخلصنا من نايف جانا سلمان
كل اللي صار كان تحت عيون الجد محمد والجد إبراهيم
الجد محمد بأبتسامه : والله ماهقيت يسترون على ولدك
الجد إبراهيم : طيبه من طيبك يابو عبدالعزيز
الجد محمد : جعلك تسلم
الجد إبراهيم : كل ما اشوفهم مجتمعين كذا ويضحكون اذكر أيام قبل لما كنا نجمعهم بالعيد ويتسترون على تركي ان خرب شيء ولا شيء
الجد محمد بضحك : وعقبها بكم ساعه يجي بنفسه ويعترف
الجد إبراهيم : اذكرهم يسترون عليه عشان مانكب العصبيه فيه ولا هدينا اعترف
الجد محمد : الله يديم المحبه بينهم ويألف قلوبهم على بعض
سكت الجد محمد من شاف سلمان جايهم يركض
نطق سلمان بعد ما حب روسهم : يبه بروح مع فهد نجيب باقي الاغراض من عند الحريم
الجد إبراهيم : بحفظ الرحمن
راح سلمان مع فهد عشان يجيبون الباقي وباقي العيال يرتبون المخيم ويكنسون الفرشات عقب التراب الي جاه
الحريم طبعا مب اقل منهم كلهم محتاسين كثير من تزيين حلا وعشاء وكذا ويتعاونون عشان ينجزون
الجده حصه : وتين يمه روحي افتحي الباب لعمتك هيفاء وصلت
وتين بحماس : جت عمتي؟
الجده حصه : اي بسرعه روحي افتحي لها
راحت وتين ركض للحوش وفتحت الباب لعمتها
سلمت عليها وهي ميته شوق : الحمدلله على السلامه عمتي
هيفاء : الله يسلمك وتين اخباركم طيبين؟
وتين : الحمدلله بخير ادخلي عمتي حياك
خذت وتين شنطتها ودخلو
سلمت هيفاء على الكل وهي مشتاقه لهم مره
ام عبدالرحمن : ابطيتي علينا هالمره كثير
هيفاء : وش اسوي ام سامي تعبت وقعدنا عندها
جود : والله يا عمه مشتاقيين لك واجد
هيفاء : وتين قالت لي عن جيرانكم الجدد شخبارهم طيبين؟
جود : الحمدلله طيبين وبيجون قريب عشان التجهيزات
إيمان : يمه حصه امي ما قالت لك متى بتجي؟
الجده حصه : ما قالت لي شيء بس فهد بيجي بعد شوي ياخذ أغراضهم
راحت جود للحوش عشان تفتح الباب لرهف لانها ارسلت لها انهم عند الباب
جود : ياهلا بالغالين حياكم
ام وليد : الله يحيك يامّي
جود : عمتي هيفاء موجوده داخل تفضلوا
دخلت ام وليد ورهف وسلمو على الكل
هيفاء : والله وكبرنا يا ام وليد وكبرت بنتك وصارت عروس
ام وليد : تعرفين الوقت سريع ومر بسرعه بدون ما نحس فيه
قاطعهم صوت الجرس
هيفاء : وهذا فهود وجاء ابطلع انا يمه وبعطيهم الاغراض وبسلم عليه
الجده حصه : بحفظ الرحمن
طلعت هيفاء للحوش وحطت الأغراض عند الباب
فهد : ياولد
هيفاء : ادخل ادخل مايمك احد
دخل فهد وهو منصدم من سمع صوت عمته
نطق وهو يسلم عليها : الحمدلله على السلامه عمتي
هيفاء : الله يسلمك شخبارك فهيدان؟
فهد بضحك : والله الحمدلله
هيفاء : معك احد؟
فهد : معي واحد من الشباب
هيفاء : اجل لاتطول عليه خذ الأغراض والله يحفظكم
حب راسها واخذ الأغراض وطلع
رجعت هيفاء داخل وقعدت مع الحريم يضبطون الأكل ويخلونه بالثلاجة عشان يحطونه بكره العصر
عقب ما خلصوا كل شيء وتعب وإرهاق جلسو وتقههو ثم كل وحده راحت لبيتهم
وهيفاء راحت لشقتهم كون عندهم شقه بالديره
يوم الملكة...
عند البنات ببيت ابو عبدالرحمن :
الجوهره : خالتي كلمتي العيال اليوم؟ نايف مايرد على جواله
ام عبدالرحمن وهي تشوف الساعه : توه عبدالرحمن ماطلع من دوامه اذا طلع بدق عليه وبشوف لك نايف
الجوهره : تمام يعطيك العافيه
جود بضحك : ماهقيت نايف يسحب عليك هالسحبه
يتبع..
