💎مكتملة💎
❌حصرية على الواتباد❌
هاد القصة قصيرة ذات طابع #خيالي #رومانسي دافئ ... غتهزكم لعالم آخر ... عالم الخيال و الاحلام ... تخليكم تخدمو عاطفتكم و مخيلتكم بكل تأكيد ... غنحط صور باش تقربكم من الصورة لي رسمت عبر كتابتي...
❄تحت عنوان : The Rend...
🗻The rendez-vous 🚪الموعد 🗻 🎋بقلم : غزلان ش. ✉ البارت 10: زيراف : كوني هانية ... انا و انت لي من المستحيل نتفارقو ... ماذي: كلامك غريب و لكن رتاحيت منين سمعتو ... زيراف سكت و هي على كتفو كتصنت لدقات قلبو ... طاقة غريبة كتجول فذاتها... كتحس بيه كيعرفها مزياان و هادشي مخليها تكون على راحتها و متصنعش ولا حتى تعطي مبررات و لا تاحاجة من هاد القبيل ... و هي هكاك سمعاتو كيدندن بحال المرة الاولى ... زادت زيرات عليه و داك احساس الراحة لي حسات بيه افضل من احساس فاش كتفيق بكري وسط جو بارد وكتفكر بلي هذاك يوم الاحد و كتزيد تعنق وسادتك و غطاك ... حط ايدو على ظهرها و بقا كيدوزها عليها بحنان ... بقاو هكاك ... لي شافهم من بعيد يعرف واحد فيهم لاجئ للآخر ...
زيراف: جاء الوقت ... ماذي: لاء مابغيتش ... زيراف: ولكن راه ضروري ... ماذي: صافي قلت ليك لا ... زيراف: باراكة من العناد ...
بهية: ماذب نوضي اماما راه الوقت ... ماذي مغمضة عينيها و كتهضر: لا خليني قلت لك مابغيتش بهية: كيف بقيتي؟؟ قاست حرارتها ... بهية: اوووف شوية بعدا ... ماذي شوفي فيا نهضر معاك .. حلات ماذي نصف عين و شافت فيها بغضب ... بهية: بلا ماتمشي اليوم ... رتاحي ... انا غنوجد ليك الغداء ديالم و فطورك و نخليهم فالكوزينة و منين تجوعي سخنيهم ... بغيت نبقى معاك ولكن راك عارفة .. ماذي غطات وجها بالغطا ديالها وقالت : غير سيري قادة براسي ... باست امها راسها وخرجات... رجعات مادي غمضات عينيها ... راجية ترجع عند زيراف ... و لكن ماقدرتش تنعس من جديد ... حطات راسها تحت الوسادة باش تحجب الضوء و لكن والو ... حيدات الغطا و بقات كتشوف فالسقف ... شوية بشوية ترسمات بسمة فوجها ... تذكرات الحضن و داك الكلام ... خلا قلبها يدفى و روحها ترتعش وسط جسدها ... شافت فصورتو المعلقة حدا سريرها و ناضت جلسات مربعة رجليها قدامو ... ماذي: تمنيت كون مانفيقش غاااع و نبقى غير معاك ... يا ترى شنو غتكون رحلة الليل ... *شافت فالساعة و رجعات شافت فيه* ياله 7 و نصف ...كيفاش غنصبر هاد السوايع كاملة ... خرجات تنهيدة خفيفة وسكتات ... فلحظة تحلات عينها فاش تذكرات لوحتو فجنب الوردة ... و ناضت بالخف .. علقات ورقة من حجم كبير و لاحت الاقلام و الصبايغ فالارض بعشوائية و بالزربة كأنها مدروكة بالوقت ... علقات الورقة و باشرات بالخف رسمات الكادر بالقلم و عاد بدات تبين المحتوى ... مخرجة لسانها و ايديها عامرين بالالوان و شعرها مبعتر مخبي وجها و كل شوية تبعدو شي لي كيخليها تعمرو ... كتلون هنا وهنا بحال شي جيعان تحط قدامو عشرات الاطباق و كياكل بشراهة من كل طبق .. بعد ساعتين رمات لي فايديها فراشي و لوحة كتخلط فيها الالوان فالارض ... هزات شعرها من وجها و دارت بلا متشوف فاللوحة ... شافت فالمراية انعكاس وجها ... شعر مبعتر و كلها الوان ... مشات للخزانة و جبدات حوايج نقيبن و دخلات للحمام ... عمراتو بماء دافئ رمات بحوايجها و تخشات وسطو ... غمضات عينيها و حطات ايديها الداخل فالماء ... بعد مدة حلات عينيها و خرجات ايديها وبدات تلعب بالماء .... كتهزو فايديها حتى لمستوى عينيها و تخليه يطيح قدامها نقطة ورى الاخرى ... باينة افكار غريبة كدور فبالها ... رجعات غاصت فالماء ولكن هاد المرة كلها و بعينيها مفتوحين ... شعرها كيتلوى وسط تحركات الماء الخفيفة كترمش بعينيها ببطئ ... حتى خرجات فجأة و خدات نفسها .... مسحات وجها و ناضت ...كملات حمامها و نشفات راسها و خرجات ... لبسات حوايجها وخرجات لكوزينة ... سخنات فطورها ورجعات لبيتها ... هزات عينيها فاللوحة لي رسمات ... عوجات راسها ليمين ... و بعد للشمال ... كتفرج فيها بحال اول مرة شافتها ... ماذي: كيف كتبان ياترى ... زيراف لي غيقول ليا ... شافت فالشرجم و حطات كاس الحليب لي فايديها .. و اتاجهت ليه ... شدات فالمقبط ديالو باش تحلو و لكن تراجعت منين تردد صوت زيراف قائل : ردي البال لراسك ... ماذي:شعري فازغ و غنتنكس ... حتال من بعد ... خدات الحليب ديالها ورجعات تشربو وتقابلت مع لوحاتها ... ب3 بيهم ... ماذي: عمرني رسمت بالالوان حتى تلاقيتك ازيراف ...هههه لوحة البرق تاهي تستاهل سويعات من حياتي ... حطات اكاس و سرحات ورقة اخرى كبيرة حدا الاخرى و بدات تاني ... ولكن هاد المرة طلقات الموسيقى باش تضفي لمسة اخرى.. كل نغمة من الموسيقى كتخليها تزيد تعطي و تحرك الفرشاة بسلاسة ... بحال شي راقصة البالي ... و بعد ساعتين اخرى رجعات للور كتشوف فشنو خرجات ايديها ...
🎨🎨يتبع🎨🎨
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
