دموع الفرحه بقلم / لولو محمد ( كامله )

الحلقه ١٨

#lolo #لولو_محمد
((((((((((((دموع الفرحه )))))))))))))
الحلقه الثامنه عشر
بلال / يعنى نزلتى من عربيه راكب فيها اتنين شباب قدام البيت عادى و الناس فى الشارع شافوكى
فرح / مش شايفه فيها مشكله مانت ياما وصلت جيهان و الناس شافوها
بلال/ الوضع مختلف انتى متجوزه
فرح / انت شايف كدا
بلال/ انا خايف عليكى مش اكتر
..................
فرح / انا جعانه نتكلم و احنا بناكل
فرح تلف و تمشى ناحيه المطبخ
بلال/ فرح هو ولاد عم فريده اسمهم ايه تانى كدا
فرح / حسام و حازم
بلال/ ماشى
فرح تمشى و بلال يدخل الاوضه
...........
فرح بتتفرج على فيلم و بلال بيشتغل على اللاب توب
بلال بيرفع عينه يبص على فرح بتلعب فى الدبله و تلفها و تطلعها و تدخلها
بلال/ هى واسعه عليكى
فرح / ايه .... هى ايه
بلال/ الدبله
فرح / هههههههه انا كنت مندمجه فى الفيلم
رساله عالواتس على موبايل فرح
فرح تمسك الموبايل و ترد عالرساله و يوصلها رد و تدحك
بلال/ مين
فرح / فريده ..... انا هدخل جوه
بلال/ خدى راحتك
فرح تدخل اوضتها و تقفل الباب
بلال يحاول يشتغل ثوانى و يقفل اللاب و يدخل لفرح
فرح /ههههههههه دا كان يوم جامد
بلال يفتح الباب
فرح فى التليفون / ثوانى ...... عاوز حاجه يابلال
بلال/ ايه .... اه ... كنت هعمل نسكافيه تحبى اعملك معايا
فرح / لا شكرا
بلال لسه واقف يبص عالموبايل
فرح / فى حاجه تانيه يا بلال
بلال / لا ابدا انا كنت ماشى
بلال يقفل الباب
فرح فى التليفون / ايوه يا بنتى ... بلال كان هيعمل نسكافيه و بيسالنى اشرب معاه ..... تفتكرى ..... لا مفتكرش هيزعل ...... لو كان عاوزنى انا اعملهوله كان قالى اعمليلى نسكافيه ......هههههههه اه فعلا انا المفروض ادلعه و اقوله كدا ..... طب خلاص خلاص هقوم اعمله متنسيش بكره بقى ترنى عليا لما تلبسى عشان منتاخرش ..... سلام
فرح تقفل التليفون و تقوم تدخل لبلال المطبخ
فرح / محتاج مساعده
بلال / خلصتى مكالمه
فرح / دى كانت فريده على فكره
بلال/ مسالتش على فكره
فرح / انا بقولك يعنى
بلال/ ماشى
فرح / فريده بتقول كان المفروض انا اقولك عنك يا حبيبى انا اعملك النسكافيه
بلال/ لا ملوش لزوم
فرح / عندك شغل الساعه كام بكره
بلال/ بكره مكتب هخلص المشروع النهرده و بكره هروح على ١٢ كدا اسلمه
فرح / اصل انا عندى كليه الصبح بدرى
بلال/ شغال اظبطى المنبه و اوصلك
فرح / انا كنت بقول يعنى انت مفيش داعى تصحى بدرى مدام هتسهر يعنى
بلال/ بجد والله
فرح / انا كان قصدى يعنى انا روحت النهرده معاك و فى الاخر على باب الكليه دخلت معاهم و فضلت معاهم طول اليوم مفيهاش حاجه لو روحت معاهم
بلال / اعملى اللى انتى عوزاه
فرح / مش عوزاك تكون زعلان
بلال/ و انا ايه اللى يزعلنى يعنى
فرح / اصلك لما رجعت و عرفت انى روحت معاهم زعلت
بلال/ بصى يا فرح انتى عارفه انتى بالنسبالى ايه و عارفه انا بخاف عليكى اد ايه
فرح / و انت كمان واثق فيا صح
بلال/ يا فرح انا مربيكى و عارف انى لو حطيتك فوسط مليون راجل مفيش مخلوق فيهم هيقدر يعدى حدوده معاكى
فرح / طيب ايه المشكله
بلال/ الناس مش هتسكت
فرح / و من امتى الناس بتبطل كلام
بلال/ انا لما كنت بوصل جيهان كنت عارف انها مراتى و كل الناس اللى حوالينا عارفين انى هتجوزها
فرح / بس انا متجوزه فمينفعش انى اركب مع صحبتى و زمايلى فى الكليه
بلال/ زمايلك جوه اسوار الجامعه براها محدش يعرف
فرح / انت بتحرم عليا اللى حللته لنفسك من سنين
بلال/ عارف نظرتى للموضوع اختلفت
فرح / ليه بقى
بلال/ عشان بخاف عليكى
فرح / و مكنتش بتخاف على جيهان
بلال/ وقتها كنت صغير و نظرتى للامور كانت مختلفه و هى مكنش عندها مشكله مجتمعها و الناس اللى بوصلها وسطيهم كانوا فاهمين ده
فرح / خلاص حاضر
بلال/ هنا اول مهتنزلى مالعربيه اللى رايح و اللى جاى هيتكلم شوفتوا مرات الباشمهندس بلال رايحه جايه مع الشباب فى العربيه
فرح / اسمى فرح مش مرات الباشمهندس بلال
بلال/ حاضر هبقى اقول للناس اسمك عشان لما يجيبوا فى سيرتك
فرح / انا هسمع الكلام مش عشان انا مقتنعه عشان انا عارفه انك اكيد مش هتقولى غير الصح
بلال/ لو مش مقتنعه بكلامى متعمليهوش عندك مخ و شخصيه فكرى و اعملى اللى انتى شيفاه صح
فرح / انا داخله انام عشان هصحى بدرى
بلال/ تصبحى على خير
.......
فى الاوضه فرح تتقلب فى السرير رايح جاى و تقوم تروح اوضه بلال تلاقيه بيشتغل عاللاب
بلال/ فى حاجه يا فرح انتى لسه منمتيش
فرح / مش عارفة انام ممكن اخلينى هنا لحد مروح فى النوم
بلال/ طبعا تعالى
فرح تنام فى السرير و تتغطى و تفضل تتقلب فى السرير
بلال يقفل اللاب و يقوم ينام جنبها و يحضنها
بلال/ مالك يا فرحتى
فرح / مش عارفه انام
بلال/ تحبى احكيلك حدوته ههههههه
فرح / بطل هزار
بلال/ خلاص براحتك هقوم اكمل شغل
فرح / لا خليك جنبى لحد مروح فى النوم
بلال / ماشى يا فرحتى
يفضل جنبها لحد متنام
...........
بلال يصحى مالنوم يلاقى ورقه عالكومدينو
بلال يقرا / الفطار عالسفره و الغيار فى الحمام و كويتلك طقم عالشماعه خد بالك من نفسك انا روحت الكلية بتاكس كلمنى لما تصحى ..... ماشى يا ست فرح
يمسك التليفون و يتصل محدش يرد شويه و توصله رساله
بلال/ انا فى محاضره لما اخلص هكلمك ...... ماشى يادوب اقوم اللحق
........
فى الكليه
فريده / هتروحى معانا و لا زى الصبح
فرح / بصى مش عوزاكى تزعلى
فريده / هو بلال زعقلك امبارح انك روحتى معانا
فرح / لا بس هو اتكلم معايا
حسام يدخل فى الحوار
حسام / فعلا المواصلات و التاكسيات امان عن انك تيجى معانا
فرح / بغض النظر انك ادخلت فى الكلام بلال كان هيوصلنى
حسام / و بعدين ملقاش بنزين فى العربيه
فرح / لا هو كان سهران بالليل بيشتغل فصعب عليا اصحيه طفيت المنبه و سبته نايم و لعلمك انا برد عليك بس عشان فريده
حسام / لا ملكيش دعوه بفريده
فرح / انت ايه مشكلتك معايا
فريده / اهدى يا فرح مفيش مشاكل
حسام / لا هو انتى اللى عندك مشكله معايا من امبارح و انا مش نازل مالزور كلامهم بيتبلع و كلامى تقيل
فرح / ليه يعنى بينى و بينك ايه يعنى
فريده / خلاص يا جماعه مش مستاهله
فرح / عن اذنكوا انا مروحه
فريده / انا هاجى معاكى يا فرح
فرح / مفيش داعى خليكى معاهم
فريده / لا انا رجلى على رجلك تعالى
فرح تمشى مع فريده و حازم يدخل
حازم / هما راحوا فين
حسام / روحوا
حازم / ايه الهبل ده و انت ازاى تسيبهم يروحوا بقى انا اتكلم مع واحد صاحبى ارجع اللاقيهم روحوا
حسام /فرح مش عاوزه تركب معانا ففريده روحت معاها
حازم / و انت ايه اللى مدايقك
حسام / انا مش مدايق
حازم / عليا انا دانت من امبارح و انت مش طايق نفسك
حسام / يا سلام ليه يعنى
حازم / عليا برده مش هى دى نفس البنت اللى كنت بتقف فى البلكونه بالساعات تتفرج عليها
حسام بارتباك/ ايه.... مين دى..... ايه اللى انت بتقوله ده
حازم / ياد دانا و انت وشين لبريزه واحده و لو انت فاكر ان محدش كان واخد باله تبقى غلطان
حسام / انا مروح
حازم / استنى بس اتكلم معايا
حسام / نتكلم فى ايه يا عم
حازم / طب عينى فعينك كدا دانت مطلعتش البلكونه غير من يوم مسكنت
حسام / خلاص خلصنا فتره و انتهت
حازم / كويس طمنتنى
حسام / و لعلمك انا كنت بتفرج عليها لسبب
حازم / يسرنى انك تشاركنى بهاذا السبب العظيم
حسام / اول مره شوفتها و هى واقفه فى البلكونه كان ف كوبايه شاى حطاها عالسور و سرحانه و عماله تعيط
حازم / و ايه المشكله مكل البنات بتعيط دول بيعيطوا اكتر مبيسرحوا شعرهم
حسام / معرفش من يومها و كل متطلع البلكونه لاى سبب تنشر او تقف شويه او حتى بتنضف بفضل واقف
حازم / كلام مقنع
حسام / معنديش كلام تانى اقوله و ياريت الموضوع ده ميتفتحش تانى و لا حتى مع نفسك
حازم/ طب على العموم الحمد لله اطمنا انها متجوزه و هو بقى يشيل هم دموعها دى مش مشكلتنا صح
حسام / مش هنخلص بقى و لا ايه
حازم / لا ازاى يلا بينا
..........
فى البيت
فرح تدخل و تغير هدومها و تدخل المطبخ و تعمل الغدى تليفونها يرن مسج تقراها و تطلع البلكونه و تكتب رساله تانيه و تدحك و تشات
فى الناحيه التانيه حسام بيطلع البلكونه يبص يلاقى فرح بتدحك فى البلكونه و تشاور يبص على يمينه يلاقى فريده واقفه بتدحك و تشات عالموبايل يبتسم و يلف عشان يدخل يلاقى حازم واقف على باب البلكونه بابتسامه عريضه يعدى من جنبه و يخبط فكتفه
حازم / هههههههه ماشى ياعم حقك
بلال يدخل البلكونه
بلال / ايه يا فرح اللى واخد عقلك
فرح / محستش بيك و انت داخل
بلال/ دانا حتى شاورتلك وانا فالشارع مشوفتنيش
فرح / كنت بكلم شات عالواتس مع فريده
بلال/ اه و الواتس مكنش ينفع و انتوا جوه ولا الشبكه كانت وحشه
فرح / مانا كنت لابسه الطرحة
بلال/ عادى مش قصدى بس اصل....
فرح / اصل ايه
بلال/ هو ولاد عم فريده ساكنين فى الشقه اللى جنبها
فرح / اه
بلال/ اصل كان فى واحد كدا واقف فى البلكونه اللى جنبها و كان تقريبا يعنى بيبص عليكى
فرح / مختش بالى والله
بلال/ اه مانا عارف اذا كنتى مختيش بالك منى انا هتاخدى بالك منه ليه يعنى
فرح / قصدك ايه
بلال/ انا جعان و شامم ريحه بطاطس تطير العقل
فرح / بجد حالا هغرفلك
.......
عالاكل
فرح / بس يا سيدى دا كل اللى حصل معايا النهرده
بلال/ هو حسام ده شكله ايه
فرح / عادى يعنى
بلال/ ههههههههههه ماشى
فرح / انا اصلا طلبت من فريده انى متكلمش معاه تانى هى صاحبتى و بلاش اكتر من كدا عشان منخسرش بعض
بلال/ كويس والله
فرح / هى كمان قالتلى انها هتروح الكليه و ترجع معايا و رجلها على رجلى
بلال / كتر خيرها
فرح / انت بقى عملت ايه فشغلك
بلال/ والله كويس مش بطال
فرح / امال مبتاكلش كويس ليه
بلال/ مفيش باكل اهو
فرح / عليا برده
بلال/ يا بنتى والله مفيش حاجه
فرح بزهق / ماشى
بلال/ ماما اتصلت بيا
فرح / خير
بلال/ يوم الجمعه عزمانا انا و انتى و جلال و عيله خطيبته عالغدى
فرح / كويس انا اصلا عندى السبت اجازه
بلال/ ممتاز
فرح / بالمناسبه بقى
بلال / خير
فرح / انت عندك شغل بكره من كام لكام
بلال/ ليه
فرح / اصل بكره اجازه و فريده يعنى كانت بتقول يعنى اروحلها لما تنزل الشغل نرقص كدا و هتلم صحباتها فى الشارع و نهيص يعنى
بلال/ مينفعش اللمه دى تبقى هنا
فرح / معرفش بس ليه
بلال/ هنا هبقى مرتاح اكتر
فرح / ماشى هقولها بس انت كدا هتغرم جامد مهو الناس دول لازم هيضايفو
بلال يفتح المحفظه و يطلع فلوس و يحطها قدام فرح
بلال/ لو مكفوش انا بحط فلوس للطوارئ فى الدرج بيتهيالى انتى عارفه مكانها
فرح / ليه ياعم ميكفوش ليه هو انا هعزم قبيله قريش
بلال/ هههههههههه
فرح / احكى بقى مالك و بلاش تقولى مفيش عشان انا عارفه كويس ان فى
بلال/ يا ستى كان حوار كدا و فكس
فرح / طب احكيهولى
بلال/ كان فى ارض فى موقع ممتاز بيت قديم يعنى لو وقع هيطلع موقع ممتاز على شارع رئيسى فى منطقه حيويه
فرح بصياعه / وماله نوقعه
بلال / هههههههههه عنك الطلعه دى يابو دومه
فرح/ ههههههههه
بلال/ المهم انا كان عينى عليه من زمان و بحلم اشتريه و احوشله بس حظى النحس يقرروا ملاك الارض يعرضوه للبيع الشهر الجاى و انا لسه مجهزتش
فرح / يعنى مشكله فلوس يعنى
بلال/ انا لو كنا فظروف تانيه كنت كلمت بابا بس هو لسه شارى شقه بلال و مديله يشطبها و كمان معظم اللى كنت محوشه دفعته فى شبكه جيهان
فرح / ثوانى
فرح تقوم من عالسفره تدخل اوضتها و ترجع بشكمجيه كبيره و تحطها قدام بلال
بلال / ايه ده
فرح / من يوم متولدت و انا كل مصروفى و عدياتى بحوشها و اشترى بيها دهب و كل مكونت بجيب حاجه دهب ماما كانت بتجيبلى هديه حاجه كمان تشجيع يعنى انى بحوش دا غير بقى شبكتى دا غير يعنى الدهب اللى كان عندى من وانا صغيره او هدايا معرفش يعملوا كام بس شوف كدا يمكن تكون نوايه تسند الزير
بلال/ انتى بتستهبلى صح
فرح/ ليه بس انا لو كان عندى حاجه تانيه كنت اديتهالك
بلال/ يا فرح انا مش ممكن اخد دهبك
فرح / انت مش هتاخد انا اللى بديهالك و بقولك بيعهم و اشترى الارض و لو مكفوش هكلملك ماما و بابا يمكن يتصرفوا
بلال / السبب ان عندك الدهب ده هو انه يسندك فى المستقبل و يامنهولك
فرح / مش الدهب اللى هيامن مستقبلى انت اللى هتامنه و بعدين يا سيدى لما ربنا يفتحها عليك و تخلص المشروع ابقى هاتلى دهب بداله
بلال/ سيبيها بس لله ربنا يعمل اللى فيه الخير
فرح / انا خلاص اديتهولك و خلعت بقى يلا عشان يادوب اقوم اغسل المواعين و اكلم البت فريده و اروق الشقه و ابيض المحاضره و انت روح شوف وراك ايه بقى
فرح تشيل الاكل من عالسفره و تمشى عالمطبخ
.............
تانى يوم فى الشغل
جيهان / صباح الخير يا بلال
بلال / صباح النور
جيهان / ها قررت تعمل ايه فارض عماره الملوك
بلال/ والله انا كنت فكرت انى اصرف نظر
جيهان / والله خساره كانت بجد هتبقى نقله كبيره فحياتك
بلال/ ايوه بس الفلوس هجيبها منين مانتى شايفه المصاريف و ظروفى
جيهان / يا سلام مش باباك جاب لاخوك شقه المفروض يجيبلك زيها
بلال/ ابويا مبيستخسرش فيا حاجه وبعدين تمن الشقه ميشتريش ارض
جيهان / طب و الفلوس اللى كنت محوشها دانت بقالك سنين بتحوش لليوم ده
بلال/ نسيتى الخاتم اللى فايدك
جيهان / يا سلام و هو الخاتم اللى فايدى هو اللى ضيع حلمك و تحويشه عمرك طب مانت جبت كوليه لفرح
بلال/ يا ستى فرح عرضت عليا اخد دهبها كلو و احطه فى الارض
جيهان / اه قول بقى كدا على كل يا سيدى انا لو عاوز الخاتم انا معنديش مانع
بلال/ انا مش عاوز حاجه و مقولتش بيعى حاجه انا مش عاوز حاجه من حد انا قولت انى مش هقدر اشترى الارض لانى معيش فلوس مش اكتر فبلاش تعملى مشكله
جيهان / و كمان بقيت انا اللى بعمل المشاكل
بلال/ ياربى بقى خلاص قفلى عالسيره
جيهان / و على ايه سيباهالك خالص