💍❤️هروب ليلة الزفاف❤️💍
بقلم✍️ أسماء الزروالي⭐🌙
فقرة 58 🌹
وقفات هبة ووقفات معاها ملاك. اما ليلى حسات بأن هبة ماشي هي هديك البنت الساهلة اللي تلاقات معاها في الشقة ديال بلال واللي كانت ناوية تجيبها ديرها خاتم بين صباعها تلعب بيها كيف بغات . والا بقا الحال على هاذ الشكل تقدر هبة تضيع ليها كاع الخطط اللي كانت تتخطط ليهم هي سنين.
شافت ليلى في هبة وكلماتها بحزم : شوفي حنا جبناك باش تعلميها وتقريها وتقابليها ماشي جبناك باش تبقاي مجمعة معاها وعطيينها غير لعب.
هبة جاوباتها حتى هي بكل ثقة وتحدي : عارفة شنو المطلوب مني غادي نفدو لكن بطريقتي اللي تنشوفها مناسبة واللي اكيد هي مختالفة مع الطرق الفاشلة ديال المربيات اللي قبل مني .
ليلى تعصبات : شتك زعمتي من نهار الاول . شوفي الا بغيتي طولي هنا خاصك تسمعي لهضرتنا. حنا اللي عارفين ملاك شكون هي وشنو محتاجة ماشي انتي اللي في ظرف نص ساعة بغيتي تبيني لينا انك عرفتي ملاك احسن منا..
هبة : احيانا الإنسان ممكن اضيع من عمرو سنين وهو تيحاول افهم الانسان اللي قدامو وتيقول باللي هذاك الانسان راه صعيب الواحد افهمو . لكن في الاخير تيبان ان تفكير واسلوب الاول هو اللي غلط من الاول وهو اللي ماقدرش افهم او اتواصل مع الإنسان الاخر .
ليلى : هههههه وياني ابنت لعروبية طلعتي حتى انتي تتعرفي تعبري. ولكن كلامي معاك من بعد ماشي قدام البنت .
هبة : سمحي لية انا تنقول غير اللي تنشوفو صح .
دارت شافت في بلال اللي كان تيتبع الحوار بهدوء وتيحلل في الشخصيتين اللي بزوج قدامو
هبة : اسي بلال الا كان ممكن تعتطيني الثقة ولو غير لأيام قليلة تخليني نتصرف فيها مع ملاك بحريتي وبقرارتي انا . ونواعدك غادي تشوف اختلاف.
وقف وقال وهو تيستعد ابعد على سوق النسا اللي فرعو ليه راسو وقال : ليلى انتي تبعيني للمكتب.
ورجع شاف في هبة وقال: وانتي منين نصيفط عليك نزلي عندي المكتب حتى انتي عندي معاك شي كلام.
سمح فيهم بزوج ومشا دخل للفيلا.
وقفات ليلى باش تبع بلال ولكن قبل ماتحرك خنزرات في هبة ورفعات صبعها تتحلف عليها
ليلى : عرفتي شنو غير بلاما تخوي بليزتك من حوايجك لانك مغاديش طولي هنا واليوم قبل غذا غادي ترجعي منين جيتي . وانا نأكد ليك ونبصم ليك عليه حيث اجتماعي مع بلال غادي اكون غير باش اجري عليك من هنا.
دخلات ملاك : ماغاديش نخلي بابا اخليها تمشي . هبة صحبتي وغادي تبقا معانا في الدار . انتي اللي سيري بحالك من دارنا.
شافت فيها ليلى بعصبية وقالت: شفتي باباك وفرعنتي هاهو غادي امشي ونتفاهم معاك تيصحبك غادي ابقا ديما هنا. غير بلاتي.
رجعات خنزرات في هبة : تمسكنتي حتى تمكنتي وقنعتيني انك داخلة سوق راسك حتى الساعة طلعتي بخبيزتك .. لكن ماتفرحيش بزاف راه في هاذ الدار الكلمة هي كلمتي..
ودارت ومشات تبعات بلال وهي تتعوج في مشيتها.
هبة من لداخل ماسخاتش طير عليها وتنتفها لكن خافت لا بلال اتقلق منها واجري عليها من الدار. وهنا تفكرات كلام ليلى وتسألات مع راسها واش بصح ممكن اجري عليها وتقدر زعما ليلى تقنعو ... لهاذ الدراجة تيتيق فيها وتيصدق كلامها.
سمعات تنخسيس ملاك اللي بداو دموعها تينزلو واول ماشافتها هبة نزلات عندها وبصوت حنين وابتسامة خفيفة سولاتها: شت حبيبتي علاش تتبكي? ماتخافيش انا معاك ومستحيل نخلي مزال شي حد يأديك.
ملاك بصوت حزين وطفولي : ماشي مشكل تضربني او تعاقبني. ولكن غير ماتجريش عليك. انا بغيتك تبقاي معايا انتي ظريفة وماتتغوتيش علية وتضحكي معايا مابغيتكش تمشي ونبقا بوحدي
هبة حسات بقلبها تيتقطع ومن خلال هضرة ملاك عرفاتها تتعاني من الوحدة والقمع وناقصها الحب والحنان. وفكراتها في واحد المرحلة من طفولتها ... هبة شافت راسها في ملاك وهي صغيرة. حتى هي واحد الوقت كانت في نفس موقف ملاك وكانت تتعاني من الوحدة وقلة الاهتمام. وبلاما تشعر جرات ملاك في حضنها وحضناتها وقالت: كوني هانية مستحيل نتخلى عليك وغادي نعمل المستحيل باش نقنع باباك اخليني معاك. غير ارتاحي وماتبكيش .
أنت تقرأ
هروب ليلة الزفاف💍مكتملة💍
Romance💎مكتملة💎 ❌حصرية على الواتباد❌ 💥💥🌙🌙⭐⭐ قصة رمضانية ⭐⭐🌙🌙💥💥 🌹📕هروب ليلة الزفاف📕🌹 💞ما أجمل القدر حين يهديك شخصا يغنيك عن الاخرين💞 ⏳⏳لهروب نحو المجهول دائما جميل لأننا ماتنعرفوش شنو جايب لينا ومنين وإمتى وشنو مخبي لين...
