هروب ليلة الزفاف💍مكتملة💍

💍الجزء 85💍

💍❤️هروب ليلة الزفاف❤️💍

بقلم✍️ أسماء الزروالي⭐🌙
فقرة 85🌹

هنا كان بلال وصل للباب وسمع كلامها  .دار راسو كاع ما سمعها لكن فهم سبب تصرفاتها.
بلال : احم ... هبة هاهو المضاد الحيوي... راه خلطتو ليها بالماء دابا عطيها معلقة راه غادي تلقايها معاه وحدة ذابا ورا الماكلة ووحدا في الليل .
هبة خدات من عندو دوا وهي مزال حشمانة .

زهرة جاببت ليها الضحك اما بلال كتم ابتسامتو وخرج.

زهرة: اويلي وليتي حمرة ... راه عادي اشوفك بلا حجاب ماتنسايش راه طبيب مولف اشوف الناس عريانين.

هبة : هو مولف انا مامولفاش.. اشوفني هكذا.
زهرة ابتسمت وتمات خارجة: هبيلة وصافي.

دوزات هبة النهار كامل مقابلة ملاك ومرة ومرة تتمشي طل عل الحاجة وتطمنها على حفيدتها.. اما بلال منين خرج صباح ماعاود رجع ... 

حتى وصل ليل كانت هبة عطات الدوا لملاك ونعساتها و هي متكية حداها بحجابها اللي ولات ماتتيقش تحيدو لا امشي بلال ادخل عليها على غفلة... خصوصا بيت بنتو اللي كاع ماتيدق على بابو غير تيدرم وادخل...

وفعلا تفكيرها كان في محلو ... وهي مزال متكية حدا هبة تفاجأت ببلال داخل عليهم ...
غير شافتو جات واقفو بحال شي عسكري.
وبدات تتقاد في حوايجها. وبات التوثر على حركاتها.
بلال: السلام عليكم كيف بقات ملاك.

قرب من السرير وهو تيسولها.

هبة منزلة وجها للأرض: الحمد لله شوية .. وخا كلات غير شوية ماتتقدرتش تسرط.

بلال تيقيس ليها راسها: مزيان ... غذا صباح اتفشو ليها شوية ... المهم عطيوها غير السوائل راه زهرة عارفة كلشي.

هبة : اه مسكينة راه عملات ليها الصوبا... ومرة مرة تتجيب ليها العصير .

بلال : مزيان.

خلا بنتو ورجع تيشوف في هبة اللي مزال تتحاول تجنب الشوفة في وجهو.
مشا جيهتها ووقف مباشرة قدامها.. تيتسناها تشوف فيه.... هي عاد مازادت توثرت.

بلال : هزي وجهك مالك نهار كامل تتجنبي تشوفي فية... ياكما دايرة شي زبلة.
هبة حشمانة : لالا مادرت والو والله.

بلال: اوا مالك

هبة : ماملي والو اسي بلال

مسك دقنها بيدو ورفع ليها وجها تشوف فيه.

قال ليها بصوت هاذي خلاها مشللة بلاصتها بدون حركة :  صباح عن غير قصد سمعت هضرتك مع زهرة ....هبة ماتحشميش مني ... الا كنت البارح شفتك بلا حجاب فالامر عادي ..  ومادرتيش شي حاجة عيب او حرام .... حيث اصلا حنا قدام الله وفي الشرع زوج وزوجة .... يعني وخا نشوفك بأي لباس سواء محتشم او غير محتشم او بلا حجاب  راه حلال ومافيه حتى عيب.... مفهوم.

طلق ليها وجها وخرج ... وخلاها تدور كلامو في راسها.... فعلا هي نسات بأنه قدام الله راجلها.... لكن هذا ما تيعنيش أنه عادي تكون قدامو بلا حجاب او لابسة حوايج النعاس. راه تيبقا غريب بالنسبة ليها ...

هبة : اوف على موقف .... واوف عليه حتى هو اللي تيعجبو احرجني.

مشات لبيتها وهي تتنكر على الموقف كامل.