هروب ليلة الزفاف💍مكتملة💍

💍الجزء 25💍

💍❤️هروب ليلة الزفاف❤️💍

بقلم✍️ أسماء الزروالي⭐🌙

الفقرة 25🌹

زاد الشيخ  وخلا امي رحمة  تتحرق من الداخل فعلا هي ضعيفة وماتقدرش تعمل حتى حاجة باش تعتق هبة . دموعها نزلو بحال شلال منين شافت السيارة تتبتعد وسط الشجر عرفات ان هبة غاديين بها الجلاد والسجان غاديين بها لسجن أبدي.  تحصرات على بلال الرجل الشهم اللي خسر حياتو بسباب هاد عادمي الضمير والشهامة.  اه لو كان بلال حي كان وقف حتى الشيخ البشير عند حدو.

تحل باب الفيرما لكبير هبة جالسة اللور في السيارة غارقة في احزانها وهمومها مازال مااستوعبات شنو واقع معاها في يومين تزوجات ومات بلال ولقاها اباها ومن بعد يومين غادي تزوج مرة ثانية بأمقت إنسان شافتو في حياتها.  مانتبهاتش لطريق حتى وقفات السيارة قدام باب الدار . على شكل فيلا كبيرة من زوج طبقات . هاذ الدار اللي عاشت فيها اسعد واسوء ايام حياتها. ذكريات مرة أكثر  من الذكريات حلوة.  بانت ليها رابحة وفتيحة قدام الباب تيبتسمو بانتصار. الا كان الشيخ والعربي الجلاد والسجان . هذو هما خديم جهنم  تيعرفو غير اشعلو العافية. كلامهم بحال السم وعقليتهم الشيطان اتعلم منها . منين تيكونو تيخططو الشيطان وجماعتو تيجلسو اتفرجو واستافدو.

فيقها صوت الشيخ من تفكيرها.

الشيخ : ياله نزلي اوجه الويل

حلات مسكينة الباب وهي محطمة .
خرجات من السيارة وراسها لتحت ماحملا تشوف حتى واحد .

وصلات حدا الباب ياله بغات تدخل وهي تشدها رابحة من دراعها : فين غادا ولا ماعلموكش في الغابة الصواب . سلمي بعدا عاد دخلي .

شافت فيها هبة وقالت : السلام الرابحة .

رابحة : وعليكم السلام . على سلامتك شتي تهربي تتعياه وجيبوك اجيبوك.  وها انتي رجعتي مدلولة . واللي بغا خويا هو اللي غادي اكون.

هبة : الله ياودي رابحة تخطط وماتنجحش الخطة.  ديما اللي تتبغيه تتوصلي ليه. ولكن ماشي ديما حيث كل حاجة عندها نهاية والدوام غير لله . واكيد غادي اجي يوم غادي اتحدو ليك فيهم.

رابحة : والله ابنت خالتي حتى  طوال ليك لسان ووليتي تتهضري وتعبري. والله ماجمعتي هذاك اللسان حتى نقطعو ليك ونوريك  تقللي ادب على مرت اباك . مرت الشيخ.

تتقولها وتميق.

هبة : مرت الشيخ فرحانة بيها دابا تقدا ليكم كاملين. لا انتي لا شيخ لا خوك اللي مفرعنا بيه.

كان العربي قريب منها منين سمع هاد الهضرة .

العربي: غير بلاتي هاد الهضرة كلها غادي نربيك عليها ما بقا للخميس والو .

شاف في ختو قال وهو مبتسم : اه ختي جمعي عيالات القبيلة وجدو لعرسي نهار لخميس . الشيخ اللي قرر وماعلينا حنا غير التنفيذ.

فتيحة غير سمعات الخبر وهي طلقها بتزغريدة  وهي تقول ليه : والله حتى فرحت ليك اخالي اخيرا غادي تزوج وبمن ببنت الشيخ.

دارت شافت في هبة تتستهزأ بيها : اه سمحي لية ماكانش خاصني نزغرت . وانتي ياله مات ليك الراجل . الباركة في راسك. ولكن المثل تيقول الحي قبل من الميت

هنا وصل الشيخ اللي كان تيهضر مع ابا موحى اللي غير شاف هبة جابوها تفزع وجا تيجري . لكن الشيخ شدو بالهضرة حيث امرو اوجدو للعرس.

الشيخ منين وصل حدا الباب قال : دخلو شنو باغيين الخذامة اتفرجو فيكم.

دخلوا وهبة وقفات قدام الدروج اللي طاحت منهم امها وماتت . هي تترجع الذاكرة وتذكر اليدين اللي دفعوها . وعاد ماتتزيد تأكد أن العربي هو اللي دفعها ولكن شكون اللي أكد ليها كلامها والشيخ ماكانش هداك النهار  ومن نهار وقع اللي وقع وهو مابغيش اشوفها  وحتى منين رجعات صوتها رافض اسمع ليها.

نزلو دموعها ومسحاتهم قبل ماتدور عند اباها اللي وقفها  صوتو وهي ماشيا جيهت الدروج.

الشيخ : وقفي انتي فين غاذا.

هبة دارت عندو : غادا لبيتي.
 
الشيخ : ماتمشي لبيتك تتسمعي كلامي مزيان . اولا هذاك البيت ماغاديش تخرجي منو حتى تخرجي نيشان عروسة نهار الخميس. يعني لبيت راجلك العربي. ثانيا رابحةهي الوحيدة اللي تدخل ليك الماكلة وتخرج .

شاف في رابحة وقال : رابحة ساروت بيتها نعرفو عندك الا هربات انتي اللي غادي تتحملي المسؤولية.

رابحة : كون هاني راه حتى شرجم بيتها درت ليه لحديد ماعندها في تهرب وفتيحة بنتي غادي دير كرسي وتجلس حدا الباب . حتى اوصل الخميس راه مابقينا قادين على شوهة ثانية وسط لقبيلة.

هبة : ابا سجني العمر كلو والله مانهرب غير زواج من العربي لا عفاك الله ارحم ليك الوالدين.

بداو دموعها تينزلو لكن هو احساس واحد ما تهزش داخلو .

الشيخ وهو معصب : ماتخلينيش نمد يدي عليك هضرة وحدة قلتها وماغاديش نعاودها.

هبة : ولكن هاد الشي راه حرام .اولا غادي نتزوج غصبا علية وثانية راجلي عاد مات يعني خاص على الاقل دوز العدة

هنا الشيخ فقد صبرو مشا جيهتها وجمع معاها بتصرفيقة وعاودها الثانية حتى مالت هزها من خويجها : عاودي شنو حرام واللي درتي انتي ماشي حرام تهربي وتخباي في دار راجل ماتيعرفك ماتتعرفيه اه . وزايداها بالعدة . والله كما قلت ليك وطلعي ماشي بنت حتى يكون هذاك هو اخر نهار في حياتك .