☆ السودان_البيت الكبير
شاي وقهوة، ونسة وضحك هنا مشاغلة وهنا تصوير، الشباب بلعبوا بلايستيشن والبنات كل واحدة بتتونس مع التانية ف حاجة، الأمهات بسترجعوا الذكريات مع رجالهم..
وقف مؤيد قال ليهم اتنشن اتنشن شباب استوووب عايز اتكلم الكل انتبه لي كلامو..
- شباب بكرة سنوية عمو مجاهد كنت ح افاتحكم ف الموضوع بكرة بس طالما اتلمينا خلاص، يلا الأسبوع الجاي ح يكون اجازة الأضحى رايكم شنو نطلع رحلة مشاوي ونكسر روتين كل مرة فالبيت؟
أيمن قال ليهو طالع بتاع فارغة زي عمك بالنسخ واللصق ضحك وقال ليهو والله ايودي دا بحبو زي عيوني كيف م اطلع زيو وانا السموني عليهو؟
ضحكنا على كلامو واتفقنا على انو نمشي المزرعة واصلنا السهرة وكل حد مشى غرفتو يلا ح ارتب ليكم الجوطة الحاصلة دي..
مرت فترة طويلة شديد ما عارفة زاتها كيف وفجأة لقينا نفسنا كبرنا واولادنا عايشين قصتنا الزمان..
مجاهد استشهد في شمال السودان قبل سنة، وفاتو صدمة علينا كلنا ومن بعدو مصطفى بقى ف رتبتو وعايش مع جدو عز الدين وحبوبتو منال..
متذكرين خالتو مها أم منى وميعاد وأيهم؟
اتوفت قبل خمسة سنوات أثر صدمة راجلها سراج الكان عندو قلب مات فالمستشفى..
ميعاد أخبارها انقطعت منهم وماف زول كان عارفها سافرت وين، بعد تحري وتحقيق اتضح انها مغيرة اسمها..
خالتو مروة فضلت مستقرة ف السعودية مع زلفة العرست هناك برضو..
نجي لي جوطة أولاد عز الدين الرفاعي أو اقول ليكم ح تتعرفوا عليهم براكم ما الكلام عند سيدو احلى..
_____
غرفة البنات..
" على لسان خلود "
كنت مع رحمة ف سرير واحد بتحكي لي تفاصيل الشغل الليلة ومرة تنبرش ف خالد ومرة نتشاكل وهكذا😹
رحمة دي صحبتي الوحيدة البحس معاها اني حقيقية بعيدا عن انها بت عمي بس بحبها شدييييد يخوانا ومرحة اكتر من اختها الكبيرة منن..
منن ورحمة بنات عمو أيهم وزرابي صح اخوات بس اختلاف توتل ماف مقارنة بين الشرق والغرب، منن عندها حركات كدا بتعرفها براها مرات بحس انها بتغير من اختها بس بقول يمكن انا احساسي غلط مع انها شغالة برضو احسن شغل وماف فرق بينهم، يا رب يطلع احساسي غلط..
بالرغم من حركاتها الا انها مصاحبة منال بت عمو مجاهد يمكن لانهم ف نفس الشغل بقيلو ف المستشفى ومدروشين ف الشغل بس الحمد لله م لقيت نفسي ف قراية المستشفيات دي وحبيت مجالي الأدبي كتييير ولقيت نفسي فيهو🖤
" على لسان منال "
كنت بعاين ل تلفوني والرسائل البتجي فيهو وما سامعة ونسة البنات من شدة سرحانة لحدي م قاطعني صوت منن بتقول لي خلينا نمشي ننوم بعدا ف غرفتنا ودعناهم ومشينا..
