تُمطر حُباً

22

#تُمطر_حُباً22
بقلم سمر مختار

السودان..

بلسان خلود..

صحيت من النوم لقيت الساعة 12 نمت كيف للزمن دا، لقيت ورقة في طرف الدرج:

" انا طلعتا بدري وما حبيت اصحيك، المطبخ فيهو اي شي بتحتاجي ولو عايزة حاجة اتصلي علي أنا برجع قريب المغرب ولو الشغل كتير بصلي العشاء وبجي "

نزلت من السرير بتكاسل وفتور شديد طلعت الصالة ويداب ركزت في البيت، كان ابسط من بسيط لكن مفروش بحب كبير وواضح صراحة اي فعلا أنا متعودة على الترف والرفاهية بس ما عارفة هنا ارتحت أكتر والدفء والامان الحسيت بيهو هنا كان كبير شديد..

طلعتا الحوش كان الحمام عادي أو ممكن نقول حمام تقليدي لا بانيوم ولا دُش ولا رفاهية الحمام الكان ف غرفتي بس كان جميل شديد شديد، فيهو جردل بوماستك عادي مسرمك وديكورو بالبني والبيج...

فتحت الماسورة عشان الجردل يتملي بعدها رجعت شلت لي غيار مُريح واستحميت اتوضيت صليت الصبح والظهر واستغفرت كنت حاسة بتأنيب إنو الفجر فاتني ربنا يغفر لي..

رطبت جسمي ومشيت المطبخ الكان قدامو شجرة نخيل وليمون كبيرة....

" ح أوصف ليكم البيت..

غرفتين قطر فاتحين في صالة صغيرة ومطبخ قدامو شجر وحمام البيت بسيط بس مريح شديد والله 🖤 "

المطبخ كان نظيف ومرتب ترتيب رهيب والعجب التلاجة أنا شكيت عديل إنو دا ترتيب مرة لأنو مستحيل أنس يرتب البيت دا كدا..

المطبخ عبارة عن بوتجاز أبو فرن غاز
فيهو مسطبة صغيرة فيها علب بهارات وضِلف مرتبين فيها العدة
تلاجة ما شاء الله مليانة بي اي حاجة بحبها لا مبالغة وفوقها كان في جردلين شفافين واحد فيه كعك والتاني بيتفوور وعلبتين حلاوة فخمات كدا..

مغسلة عادية بتاعة حديد واكسبندا مجاورة التلاجة
فوق ليها طشت جواهو جردل بوماستك وفي تلاتة بنابر تحتها 🖤

" أنا بحب تفاصيل البيوت الزي دي والله🖤"

عملت لي كيسين اندومي بعد لقيت كرتونة في واحدة من الضِلف، لقيت موزاريلا زبطت الاندومي لقيت عصير منقة جاهز شكلو خلطو هو الصباح شلت صينيتي ومشيت شغلت الشاشة واكلت...

كنت قاطعة موضوع لقيت فيلم شغال قلت اتابعو، سمعت صوت تلفوني كانت ماما...

"خلود حبيبي كييفك"

_ واااي يا ماما اتصلتي في وقتك زهجانة وقاطعة موضوع ورحمة ما فاضية..

" قاطعة موضوع كيف يعني خلصتي شغل بيتك؟ "

_ هو البيت م محتاج حاجة لقيتو نضيف ومرتب ترتيب رهيب يا ماما والعجب المطبخ..

" يعني عجبك؟ "