تُمطر حُباً

20

#تُمطر_حُباً20
بقلم: سمر مختار

بلسان فارس...

سديم أكتر انسان في حياتي عرفتو عانى، قدر ما يظهر للناس إنو كويس وبارد بس معاي أنا غير، عارف إنو ما عندو غيري عشان كدا بحاول م احسسو بالوحدة، حتى لو مشغول بفضى ليهو ما عشان هو ما عندو غيري بالعكس عشان أنا بكون مبسوط إنو معتبرني أكتر من صاحب، هو شايفني ملجأ أو أمان..

إتصالات سديم النص الليل دي متعود عليها بس اتصالوا دا كان غير، حتى صوتو ما ياهو الصوت البعرفو والحقيقة الكان بفتش وراها كل السنوات دي أتمنيتو يكتشفها وأنا معاهو عشان يلقى البسندو، ما قدرت أقعد بعد اتصالوا دا وحتى عدم ردو ما طمني لأنو لو كويس ح يرسل لي برجع ليك...

فتحت دولابي بعد نزلت شنطة السفر الصغيرة نزلت ملابس بطريقة عشوائية وف نفس الوقت اتصلت على سيادة العميد عبدالله..

* يا سعادتك آسف على ازعاجك بالليل دا بس محتاج لي هيلكوبتر حالاً توديني مطار الخرطوم جاتني سفرية طارئة لي الدوحة...

- خير يا إبني أنا زاتي الليلة شغال مساء كدي تعال الهليكوبتر أصلاً ف مهبط السطوح بتاع القسم...

* طيب لو ما فيها ازعاج برضو ح ارسل ليك رقم خلي زملائنا الفي الدوحة يحددوا موقعوا ويشوفو  الزول حاصل عليهو شنو مسافة أوصل..

قفلت منو طوالي حجزت تذكرة الكترونية، صحيت منال...

* حبييبي مالك الليلة صاحي للوقت دا..
عاينت الشنطة وشافتني لابس قالت لي طالع وين يا فارس الساعة ماشة لي واحدة صباحاً..

- يا منّو انا مسافر الدوحة جاني شغل طارئ اسي صحاني من النوم..
* كيف يعني مسافر الدوحة؟
- طبيعة شغلي يا حبيبي بس بوعدك م بتأخر طيب؟
* مسافر كيف بالليل دا؟
- الهليكوبتر منتظراني ح نمشي بيها خلي بالك من نفسك وارح عشان تنومي مع فجر ما تنومي براك طيب؟

* ضروري تسافر؟
- والله مسألة حياة وموت يا منال لازم أسافر...

حاولت أراضيها لحد ما سقتها غرفة فجر ووصيتهم الاتنين يكلمو أمي الصباح على كدا اتوكلت على الله ومشيت المركز، بركنت العربية وطلعت بعد شرحت الموضوع للمدير قال لي زولك دا كسروا بابو لقوهو مغمى عليه ودوهو المستشفى...

- هتلاقي زول منتظرك ف المطار ح يوديك ليهو..
* طيب يا سعادتك ربنا يجزيك كل خير
- الواجب يا ابني..

نص ساعة وكنت ف مطار الخرطوم ف طيران بدر، ما عارف الزمن جرا كيف لقيت نفسي ف مطار الدوحة، فعلا لقيت زول واقف مما وصلت استقبلني ساعتها كان أذان الفجر وصلنا المستشفى على طول مشيت محل سديم راقد...

- حالتو شنو؟
* عندو قولون عصبي، حالياً ماخد مسكن آلام وشوية أدوية نام من فعل الدواء ح يصحى بعد المفعول ينتهي، وكمان عندو نقص حاد في الدم لو ما اتلحق كان ممكن تبقى انيميا بس لازم يتغذى كويس..