تُمطر حُباً

21

#تُمطر_حُباً21
بقلم: سمر مختار

السودان
على لسان خلود ...

وقفت عربية خالد قدام بيتنا كنت معاهو أنا، أنس، خالتو شهد وبسام، أما عربية مؤيد كان سايقها آسر فيها سمر، لينا، باسم وخالو رئبال ..

استقبلونا ماما وبابا، خالو اياد، خالو رئال، خالتو سلوان وخالتو طل...

البيت كان منظم وواضح إنهم عاملين كرامة، انا عن نفسي كنت مرهقة شديد بعد شربت موية قعدت شوية وطوالي مشيت غرفتي البعدت منها شهر ونص، كنت مشتاقة لي كل ركن فيها...

أخدت حمام ولبست ملابس مريحة ونمت ما كنت عارفة الساعة كم بس صحيت بي خبيط على الباب، انتبهت لي أنس الكان راقد في الجلسة بنفس ملابسو استغربت هو جا متين بس قطع أفكاري ضرب الباب..

نزلت من السرير فتحت لقيتها أفنان بعد سلمت عليها قالت لي بعدا ننزل للغداء، بعد فاتت لقيت أنس صاحي وبضغط على راسو ب أطراف اصابعو..

* لي نمت في الكنبة؟
_ كدا احسن لينا الاتنين، داخل الحمام لو سمحتي..

كان بتكلم بدون يعاين لي وحتى ردو مختصر، شال بشكير من شنطتو اتجاوزني ودخل الحمام..

من اليوم داك وأنس تعاملوا معاي بقى كدا، أنا عارفة نفسي غلطانة بس تعاملوا د بغيظني شديد..

فتحت شنطتي طلعت فستان رمادي أكمام نص، بين ستريت وعادي واصل لحد نص الساق وفيهو تثليثة بسيطة في الصدر، ومعاهو اكسسرز وملحقاتو كلها من بعدها جا طالع كان لافي وسطو بس اتوترت شديد أول مرة اشوفو بالمنظر دا طوالي زحيت بصري منو وشلت فستاني دخلت الحمام...

جهزت نفسي، شقيت شعري من قدام ومسكت نصو بي مشبك والباقي خليتو مفرود، طلعت من الحمام لقيتو بتعطر وبتكلم بالتلفون أنا زاتي شلت صندلية اتعطرت بيها ومخمرية عملت قلوس كحلت عيوني ولبست شبشبي متوسط الكعب وهو خلص تلفونو..

* نازل ولا عليك شوية؟
عاين لي مسافة قبل ما يقول لي: نازل بس انتي ما ح تنزلي كدا..
قلت ليهو باستغراب: كيف يعني؟

_ كدا عديل غيري الفستان دا وشوفي ليك طرحة..
* لا انت جنيت عديل دا الناقص والله عايز تتحكم في لبسي؟

اتقدم علي وقال: على ما اعتقد أنا راجلك وتحت في رجال قاعدين يعني أولاد اعمامك التحت ديل ما شايفاهم؟

* شوف أنا ما بسمح ليك تتدخل في لبسي، أنا بلبس البريحني وأصلا من زمان بلبس البريحني الجديد شنو بالنسبة ليك؟

_ الجديد إنك حالياً وللأسف على ذمة راجل شرقي غيور ما بسمح لي مرتو تكون متاحة..

نفسي زاد من الزعل قلت ليهو ب انفعال كيف يعني تقول لي متاحة انت متخلف؟

غمض عيونو وعمل نفس حركة قبيل خت أصابع يدو ف راسو دلالة على الصداع وقال: شوفي يا خلود أنا براي مصدع كلامي ما أعيدو ليك تاني يا تغيري فستانك دا وتشوفي ليك طرحة يا أما ارقدي نومي أصلا ح تكوني تعبانة من السفر الطويل..