خلود..
مر يومين مؤيد أتعافى ورجع الجامعة وانا نزلت الشغل وكان ضاغط شديد، كنت ماسكة الادراة العامة لأنو محمد جاهو ظرف طارئ اضطر يسافر، المفروض عندنا اجتماع في الإمارات بس أسافر كيف مع الشغل الظاغط دا وبدون رحمة م بقدر أسافر، محمد م قادرة اوصل ليهو رقمو مغلق ليهو كم يوم..
جاتني السكرتارية قالت لي في ضيف عايز يقابلك، بعد دخل اتضايقت منو بس مضطرة اتحملو لأنو مدير الشركة الاتعاقدنا معاها قريب..
* اتفضل تشرب شنو؟
- شكراً يجميلة بس جيت اتكلم معاك كلمتين
* الشغل فيهو مشكلة؟
- مالك رسمية كدا انتي
* دا مكان شغل يا استاذ ولا شايف شنو؟
- عايني مستحيل تكون فاتت عليك نظراتي ف آخر اجتماع عشاء، انا معجب بيك واعجابي واضح المهم جيت اكلمك إني مسافر فتحنا فرع جديد في الإمارات وح امسك القسم الإداري، العقد مدتو سنة ح اكملها وارجع زول عرس طيب؟
* خلصت خلاص؟
ح اعتبر نفسي م سمعت ولا حرف، اقفل الباب وراك ..
واصلت شغلي خليتو واقف بعاين لي، بعد مسافة طلع ختيت القلم واتنفست بزهج وقلت شنو الود الغبي دا من أنس للعبيط دا..
فجأة!!
اتذكرت أنس!!
أنس المفروض إني اعتذر منو بس م عبرتو ولا ب حرف..
شلت تلفوني وجبت رقمو كتبت "آسفة"
خاتة إصبعي ف زر الارسال وبقيت بفكر ارسل أو لا!!!
جات داخلة رحمة بطريقة عشوائية خلعتني وبدون احس ضغطت على الرسالة مشت!!!!!
* واااي يا خلود م وريتك خالد رسل لي شنو اتخيلي قال لي عايز عقد وسد مال ح يتكلم مع أبوي الليلة وبعد اسبوع ح يحصل الموضوع!!
بعد م كنت مع الرسالة بالي جا معاها وفرحت شديد قمت حضنتها وبقينا ننط ف المكتب قلت ليها المعفن عايز يفاجئنا بس م لحق قالت لي هيييي د راجلي لو سمحتي قلت ليها شوووف البايرة الما صدقت..
زحيت منها بعد الباب ضرب والسكرتيرة جات داخلة ادتني ظرف..
* د شنو ؟
- الظرف دا خلاهو ليك المستر القبل شوية
عقدت حواجبي ك علامة ضيق شلتو منها وختيتو ف المكتب لقيت رحمة بتعاين لي كأنها منتظرة تفسير..
* م تعايني لي كدا..
- اكيد م منتظراني أسألك حتى تجاوبي صاح؟
* تتذكري يوم عشا العمل الكان قبل عرس منال ومصطفى؟
- وقت الراجل داك كان بعاين ليك بنظرات حب من النظرة الأولى 🤭
* م وقت سخافتك يا زفتة..
- اها خلاص فهمنا واصلي..
* حكيت ليها الحصل كلو قالت لي واااااي الزول طلع جادي!!
- هو انس ود اهلي رفضتو تفتكري ح اوافق ب دا؟
* بمناسبة أنس م ناوية تعتذري يا خلود؟
سكت مسافة واتذكرت رسالتي ليهو طقطقت لي أصابعها قالت لي هييي هييي م قلنا ليك عرسيهو قلت ليك اعتذري..
باندفاع قلت ليها لو بقى آخر راجل م بعرسو قالت لي م تنفعلي حبيبة طيب خلينا نشوف مستر غرام مرسل ليك شنو، شالت الظرف فتحتو وكانت ورقة فاضية استغربنا!!
