#تُمطر_حُباً12
بقلم سمر مختار
☆ الدوحة
- نفسي افهم بس لي رفضتي الزواج مني؟
* باسم انت عرضت علي الزواج بدافع الشفقة م اكتر وكل واحدة ف مكاني كانت ح ترفض..
- بدافع الشفقة؟
انتي شايفة كل حبي ليك شفقة؟
* حب!!!
- ايوااا انا بحبك يا أستاذة، بحبك لدرجة م بتتخيليها، حبيتك من يوم كنتي طفلة وكل لحظة بتقولي فيها انا صديقك المقرب مشاعري تجاهك بتكبر، حبيتك من زمان وانتي ف الأخير شايفة حبي ليك مجرد شفقة!!!
* بس يا باسم م ينفع نكون لي بعض
- تمام يا زولة..
"بلسان سمر"
كنت واقفة وسمعت كل الحوار من الأول، أنا عارفة انو باسم بحب لينا بس لي هي رافضة؟؟
بعد طلع مشيت ليها لقيتها بتبكي ضميتها شدييد بعد هدت قلت ليها لي عملتي كدا؟
- م بستاهلني يا سمر أنا عارفة انو بحبني بس م بستاهل واحدة زيي..
* كدا بتظلميهو وبتظلمي نفسك يا لينا..
- الله كريم يا سمر ولو فيهو خير ربنا يكتبو🖤
_
☆ السودان
"بلسان هبة"
كنت في الكراسي منتظرة مؤيد يطلع من غرفة محمد، م قدرت أدخل وانتظرت مؤيد عشان يوريني حالتو كيف..
مؤيد طلع وقال لي خليني اوديك البيت عشان ح يفقدوك بعدا
- محمد كيف؟
* صاحي بس قال م عايز يشوفك
- كيف يعني م عايز يشوفني؟
* كدا عديل والله قال م عايز يشوفك
- زعلان مني يعني ولا كيف؟
* شكلو بس م عايزك تشوفيهو بالحالة دي احترمي رغبتو وخليني اوديك واجيهو راجع...
رجعت البيت وبالي م معاي خالص، العزومة خلصت وكلهم رجعو الا عمتو منى قعدت معاها لانو محمد اتصل عليها وقال ليها مشى الخرطوم لي شغل ضرب ح يقعد يومين ويرجع..
عدو يومين وما قدرت استحمل، بعد طلعت من الامتحان قلت لي مؤيد وديني المستشفى قال لي هبة بسس...
قلت ليهو م بس ولا بطيخ ارح وديني وما عليك، عاين لي مسافة وقال لي ارح..
وصلنا المستشفى نزلت بسرعة وطوالي غرفة محمد ضربتها ودخلت على طول، عاين لي وقال الجابك هنا شنو؟
- ح تهرب مني لمتين يعني؟
* م عايز اشوفك دي م واضحة؟
عاينت لي ملامحو الباهتة والمرهقة م كان قادر يقوم زي الناس، قلت ليهو عاجبك الانت فيهو دا؟
* وصلت الأنا فيهو د بسببك يا هبة، لو اديتيني ليهو اليوم داك مش كان احسن من كدا؟
- كيف أديك الموت ب يدي يا محمد، خليك عارف السم البتعمل فيهو د ح تبطلو وتمشي إعادة تأهيل انا م عايزة اشوفك كدا
* م شغلتك بي خليني اموت..
- ح تعمل القلتو ليك وإلا والله يا محمد انا م مسؤولة من الحيحصل
* تهديد يعني؟؟؟
- افهم زي م عايز تفهم، فكر في امك دي م عندها غيرك واختك؟؟؟
* م انتي الح توريني اهتم بيهم كيف
- ح اوريك يا محمد وبالغصب كمان وح تسمع كلامي ولا على كيفك
* اعملي الفي بالك ولو سمحتي م عايز اشوفك هنا تاني يا ريت تحترمي رغبتي
عاينت ليهو ولساني م قادر ينطق ولا حرف💔
شلت خطواتي وطلعت بسرعة حتى م انتظرت مؤيد وركبت اقرب عربية وصلتني البيت..
"محمد"
كيف قدرت اقسى عليها بالطريقة دي؟
رغم القلتو ليها بس قلبي م عايزها تفارقو ولا لحظة، بس كيف؟
فعلا هبة تستاهل عشان كدا ح أتعافى وأعافر عشان لمن اجي اقيف قدامها بكل ثقة ومن اللحظة دي ح اعمل القالتو لي..
_____
تسارع أحداث..
"خلود"
عدت فترة طويلة شديد اتغيرت فيها حجات كتيرة، حجات ماف زول متوقعها تتغير زي مصطفى مثلاً..
