☆ السودان_صباح الجمعة
"على لسان خلود"
قعدنا مع منال انا ورحمة تلاتة أيام والليلة من الصباح شغالين تجهيزات الخطوبة، داخلين وطالعين لحدي الظهر كدا باقي الأسرة الكريمة شرّفت وتقريباً نحن وقتها خلصنا اي شي حتى العصير عملناه ف التلاجة وجهزنا الغدا..
منن جاتني ف المطبخ قالت لي في قهوة جاهزة محمد قال عايز؟
- ماف قهوة جاهزة عليك الله يا منن لو م فيها تعب تعالي اعمليها عايزة بس أزين الكيكة دي وارتاح شوية بقيت م قادرة اقيف عديل..
* مششششم😒
عارفنك شغالة من الصباح ماف داعي تكلمي الخلق كلو..
- م قاصدة كدا وانتي عارفة براك لو م عايزة تعمليها احسن تكلميني اشوف غيرك ماف داعي للمطاعنة والكلام الما حلو..
* قولي اصلا كايسة مشاكل لانو الكلام القلتو م جاب كدا..
- خلاص عليك الله يا منن الجبنة ح تعملها هبة وافنان امشي مشيك..
طلعت من المطبخ زهجانة من كلامها وتصرفاتها البتضايقني طوالي لقيت هبة نازلة من غرفة منال قلت ليها هبووش عليك الله اعملي القهوة وودي لي محمد سيرمس شكلو معاهو اصحابو..
ابتسمت وقالت لي عيووني ليك اسي كنت جاية المطبخ اشوفك محتاجة شنو
ابتسمت ليها وقلت م بتقصري يا قلبي، طلعت فوق من شدة تعبي نومت طوالي، صحيت ب مخدة ف وشي لقيتها رحمة قلت ليها يا حيوانة دي طريقة تصحي بيها انسان؟
- يسد نفسك يا بت قوومي عشان تعملي لي منّو الميك اب الزمن قرب شوية ويوصلو..
قمت بخطوات متثاقلة اخدت دش وما كان علي صلاة غيرت ملابسي وبديت لي منّو طوالي..
"على لسان هبة"
بعد عملت القهوة ووزعت لي ناس الهول شلت سيرمس وكبابي مشيت على ديوان محمد ونسيت اني لابسة بيجامة وبدون طرحة🤦♀️
ناديت ليهو بس م سمعني ضربت الباب ب رجلي، اتسمكرت ف مكاني لمن فتح لي واحد حتى انتبهت ل نفسي قاطعني صوت محمد وهو جاي من مدخل الشارع بقول خليها يا مان بجيبهم انا ارجع كمل شغلك..
الولد اتحرج ودخل جوا قفل الباب، محمد اتلفت علي وقال لي بعصبية طالعة كدا لي؟؟
وانتي اصلا طالعة لشنو كان ممكن تتصلي لي أو لمؤيد نجي نشيلهم؟؟
قلت ليهو محمد م تتزهج م انتبهت ل نفسي واصلا م كنت قايلة معاكم غريبين..
قاطعني بنزفرة م تقولي لي زفت ياخ، نحن زاتنا غريبين وم مفروض تطلعي قدامنا بالشكل دا، جيبي زفت الحجات دي وتاني لحدي م ترجعي بيتكم م تجي بالشارع دا..
شالهم مني بزهج ودخل، مشيت وانا زعلانة ومليانة منو شديد أول مرة يتكلم معاي بالطريقة دي دموعي اتجمعت بس م قادرة انزلها اسي اي زول ح يسألني دخلت الحمام بكيت وغسلت وشي بعدها طلعت غرفة منو لقيت خلود بتلبس فيها بس مزاجي من ساعتها زي الزفت...
